1. Mumu liaka wakusakwilila hakutwala ku Mbimbiliya?

 TWAKUSAKWILILA chinji Yehova ha kutwaha Mbimbiliya! Kupalikila mu Mbimbiliya, Iye kakutukwasa tumone chize mutukumba yipikalo yetu. Kakutwaha nawa kutalatala chipema cha kulutwe lia matangwa. Chahiana ulemu, Yehova kakuzachisa Mbimbiliya hanga atusolwele yuma yinji hakutwala ku utu wenyi. Muze twakupukuna ha yitanga yenyi yipema, chino chakutukwata ku mbunge ni kukundama kuli iye hanga tupwe masepa jenyi.—Samu 25:14.

2. Yika Yehova azachishile mba akwase atu kumunyingika?

² Yehova kanazange hanga atu amunyingike. Kunyima, iye kazachishile yilota, usolwelo ni angelo hanga akwase atu kumunyingika. (Kwa. 12:6; Yili. 10:3, 4) Alioze, te muchipwa chikalu kunyingika yilota yacho, usolwelo ni yize angelo ambile nyi te kayisonekene hamwe. Kashika, Yehova atumine ‘kusoneka mu mukanda’ yuma yize azangile hanga tuyinyingike. (Jere. 30:2) Mutuhasa kupwa ni shindakenyo ngwetu, mutapu uze Zambi azachishile hanga apwe ni kuhanjika ni yetu uli upema mumu ‘majila jenyi eswe kapwa angunu.’—Samu 18:30.

3. Shindakenyo yika Yehova asele mba tupwe ni Mbimbiliya musono? (Izaia 40:8)

³ Tanga Izaia 40:8. Chize kunyima, Liji lia Zambi liakuhana usongwelo upema kuli malunga ni mapwo ashishika. Kuchi chino chakulingiwa? Tunanyingika ngwetu, Yisoneko kayisonekene ha yuma yize kuyishi kutwama shimbu linji, kashika  musono yisoneko yikulu chinji kuyishiko. Alioze, Yehova kasele shindakenyo hanga ayisononone. Chipwe ngwe, akwa-kusononona Yisoneko kapwile yihenge, nihindu kasele shindakenyo ha yize te anasoneka. Umwe mukwa-mana yasoneka hakutwala ku Yisoneko ya Hepreu ngwenyi: “Mutuhasa kupwa ni shindakenyo ngwetu, kukushi mukanda niumwe asonekene ku shakulu uze washishika kuhiana Mbimbiliya.” Chipwe ngwe Mbimbiliya kayisonekene ha yuma yize kuyishi kutwama chinji ni kuyisononona kuli atu yihenge, nihindu mutuhasa kupwa ni shindakenyo ngwetu, maliji waze twakutangamo kakusolola manyonga a Mwenyayo, Yehova.

4. Yika mutulilongesa ha mutwe uno?

⁴ Yehova kakutwaha ‘yuma yeswe yipema ni yawana yeswe yingunu.’ (Tia. 1:17) Mbimbiliya yili chawana chilemu chize Yehova atuhele. Mutuhasa kunyingika yize mutu umwe ananyingika hali yetu kupalikila ha chawana chize atwaha. Chizechene nawa hali yoze watuhele Mbimbiliya. Muze twakuhengwola chawana chino, twakulilongesa yuma yinji hali Yehova. Twakumona ngwetu, iye kanatunyingika kanawa. Chikwo nawa, kananyingika yize twakufupa. Ha mutwe uno, mutulilongesaho yikuma yitatu yize Mbimbiliya yakulongesa hakutwala ku yitanga ya Yehova: mana, ululi ni zango. Chitangu, tuputukenu kuhengwola yize Mbimbiliya yakulongesa ha mana a Zambi.

5. Yika Mbimbiliya yakutulongesa hakutwala ku mana a Zambi?

⁵ Yehova kananyingika ngwenyi, twakufupiwa yiyulo yenyi ya mana. Kashika, chawana cha Mbimbiliya chize atuhele, chinazale too ni mana jenyi. Mbimbiliya yili ni ndundo ja kwalumuna mwono wa atu. Muze asonekene mikanda yitangu ya Mbimbiliya, Mose yalweza A-Izalele ngwenyi: “Kuli yenu hi chamokomoko ko, kuchapwa mwono wenu.” (Shimbi 32:47) Waze te akwononokena Yisoneko, kapwile ni kufumbuka ni kuwahilila ku mwono. (Samu 1:2, 3) Chipwe ngwe, Liji lia Zambi kalisonekene ku shakulu, nihindu lili ni ndundo ja kwalumuna mwono wa atu. Chakutalilaho, mu site jw.org, ha chikuma “Mbimbiliya Yakwalumuna Mwono wa Atu,” hali sango ja atu kuhiana 50 waze alumwine mwono wo mumu lia kukaula yiyulo ya mu Mbimbiliya.—1 Tesa. 2:13.

6. Mumu liaka mutuhasa kwamba ngwetu, kukushi mukanda niumwe uze mututesa ni Mbimbiliya?

⁶ Kukushi mukanda niumwe uze mutuhasa kutesa ni Mbimbiliya. Mumu liaka? Mumu Mwenyayo, Yehova, kali mukwa-ndundo jeswe, wa mutolo nawa kakwete mana anji kuhiana yitangiwa yeswe. Mikanda yinji kakununga ni kuyitanga chipwe ngwe enyayo waze ayisonekene hanafu, chipwe chocho yiyulo yamo, kanji-kanji yakuhwa ulemu ha kupalika cha mashimbu. Alioze yiyulo ya mana yize yili mu Mbimbiliya, kuyishi kuhwa ulemu yakukwasa atu a ha mashimbu eswe. Muze mututanga ni kupukuna ha yize tunatange, Yehova mazachisa spiritu yisandu hanga atukwase kumona chize mutukaula yiyulo yacho ku mwono wetu. (Samu 119:27; Mala. 3:16; Hepre. 4:12) Chochene, Mwenya Mbimbiliya kanazange chinji kutukwasa. Chino chakutukolweza hanga tutange Mbimbiliya matangwa eswe!

7. Kuchi Mbimbiliya yanungine tuvumbi twa Yehova kunyima?

⁷ Chuma chikwo chize chakusolola ngwo, Mbimbiliya yili ni mana a Zambi, chili uhashi uze yikwete wa kukwasa tuvumbi twa Yehova hanga alinunge. Muze A-Izalele anjilile mu Chifuchi cha Chilakenyo, kayile mu  yihunda yalisa. Amwe te akwa-kuta yishi, akwo tufunga, eka te njimi. A-Izalele waze apwile mu chihunda chimuwika te muchipwa chashi kwecha kulihulumba hali akwo waze apwile ku yihela yeka. Alioze, Yehova kaluliekele yuma hanga apwe ni kulikungulula hamuwika ha yisuho yinji hanga apanjike maliji ni ulumbunwiso wa shimbi. (Shimbi 31:10-13; Nehe. 8:2, 8, 18) Achinyonga chize te umwe Ka-Izalele mevwa muze maheta mu Yerusaleme mamona tununu twa A-Izalele-ni-akwo waze akatuka ku yihela yeka ni yeka! Mumu lia chino, Yehova yakwasa tuvumbi twenyi hanga alinunge. Kulutwe, muze chikungulwila cha Akwa-Kristu chaputukile, anji a kuli ayo kapwile ni kuhanjika malimi alisa, amwe te pichi akwo yiswale. Alioze, amu eswe apwile ni kuzanga Yisoneko yichipwa chashi kulinunga mu uwayilo wamwenemwene. Waze te akupwa Akwa-Kristu kapwile ni kunyingika ulumbunwiso wa Liji lia Zambi muze te akwakwasa kuli mandumbu jo ni muze te akukunguluka no hamuwika.—Yili. 2:42; 8:30, 31.

8. Kuchi Mbimbiliya ya kununga atu ja Yehova musono?

⁸ Yehova kakuzachisa Mbimbiliya hanga alongese atu jenyi ni kwakwasa alinunge. Mu Mbimbiliya muli umwenemwene weswe hakutwala kuli Yehova uze tunafupiwa kunyingika. Mashimbu eswe, twakukunguluka mu chikungulwila, kukunguluka cha mbonge ni cha mambonge hanga tulilongese Liji lia Zambi.  Kashika mutuhasa kwamba ngwetu, Yehova kakuzachisa Mbimbiliya hanga akwase atu jenyi amuwayile hamuwika.—Zefa. 3:9.

9. Chitanga chika twatamba kupwa nacho, mba tunyingike sango ja mu Mbimbiliya? (Luka 10:21)

⁹ Tutalenu chikuma chikwo chize chinasolola mana a Yehova. Yihanda yinji ya Mbimbiliya kayisonekene mu mutapu uze te mayinyingika wika kuli atu waze akulikehesa. (Tanga Luka 10:21.) Atu a hashi heswe mahasa kutanga Mbimbiliya. Umwe mukwa-mana kambile ngwenyi: “Mbimbiliya kuyishi wika mukanda uze akutanga chinji hashi heswe, alioze yili nawa mukanda uze atu akulihulikila chinji.” Chipwe chocho, atu akulikehesa e wika akunyingika sango jamo ni kujikaula.—2 Kori. 3:15, 16.

10. Jila yikwo yika yize yakutukwasa kumona mana a Yehova mu Mbimbiliya?

¹⁰ Mbimbiliya yakusolola mana a Yehova mu jila yikwo. Yehova keshi kuzachisa wika Mbimbiliya hanga atulongese ngwe chizavu, alioze hanga alongese nawa hita kavumbi kenyi ni kumutakamisa. Yetu eswe muze twakutanga Mbimbiliya, twakumona chize Yehova akulihulumba hali yetu. (Iza. 30:21) Hiunapalika kama mu kapinda, mba yiutanga yimwe versu mu Mbimbiliya ni kumona ngwe versu yacho yena ayisonekenene? Ewa, Mbimbiliya kayisonekene hanga ayinyingike kuli atu anji. Mba kuchi muli sango jize yena unafupu? Muli sango jacho, mumu Mwenyayo kakwete mana anji kuhiana atu.—2 Timo. 3:16, 17.

11. Kuchi Yehova asolwele ngwenyi keshi katonde muze atumine kusoneka Mbimbiliya?

¹¹ Chitanga chikwo cha Yehova chili ululi. (Shimbi 32:4) Mutu yoze ukwete ululi keshi kusolola katonde. Chino chinasolola ngwo, Yehova keshi katonde. (Yili. 10:34, 35; Roma 2:11) Twakuhasa kumona ngwetu, Yehova keshi katonde mu mutapu uze asonekene Mbimbiliya. Chakutalilaho, Mbimbiliya kayisonekene mu malimi waze te atu anji akuhanjika ha mashimbu jacho. Mikanda yitangu 39 kayisonekene mu Hepreu, limi lize atu ja Zambi te akuhanjika ha mashimbu jacho. Alioze ku sekulu yitangu, limi lia Ngregu yaputuka kulihanjika chinji, chocho mikanda ya kasula 27 yayisoneka mu limi liacho. Yehova kakazachishile limi limuwika hanga asoneke Mbimbiliya. Musono, hano hashi hali atu tununu nake a tununu waze akuhanjika malimi eka ni eka. Mba kuchi ayo mahasa kulilongesa hakutwala kuli Yehova?

12. Kuchi uprofeto wa Daniele 12:4 unamanunuka ha matangwa wano a kusula?

¹² Ha uprofeto wa Daniele, Yehova yalakenya ngwenyi, ha matangwa a kusula “yinyingi” yize twakuwana mu Mbimbiliya “muyikaliwezela.” Atu anji te mayinyingika. (Tanga Daniele 12:4.) Chuma chimwe chize chakukwasa atu mba apwe ni yinyingi yacho chili mikanda yize akutuhwisa yinakatuka mu Mbimbiliya. Musono, Mbimbiliya yili mukanda uze analumbununa chinji ni kuuhana kuli atu hashi heswe. Mbimbiliya jize akulumbununa kuli akwa-mingoso, kanji-kanji kakujilanjisa ndando yinji. Alioze, Yela ja Yehova hanalumbununa Mbimbiliya ya muundu hanji yihanda mu malimi kuhiana 240, nawa mutu mweswawo mahasa kupwa nayo. Chino chinakwase atu a ku mavungu eswe kulilongesa “sango lipema lia Wanangana” shimbu songo kanda liheta. (Mateu 24:14) Zambi yetu ya ululi kanahane uhashi kuli atu anji hanga amunyingike ha kutanga Liji lienyi. Iye kanachilingi mumu kakutuzanga chinji.

13. Mumu liaka mutuhasa kwamba ngwetu, Mbimbiliya yinasolola ngwo Yehova kakutuzanga? (Yoano 21:25)

¹³ Mbimbiliya yakutukwasa kunyingika chitanga chinene cha Zambi—zango. (1 Yoa. 4:8) Chino chakusoloka zwalala ha sango jize Yehova asele mu Mbimbiliya ni jize kakaselemo. Mu Mbimbiliya, muli yuma yeswe yize tunafupiwa hanga tupwe masepa a Yehova, tuwahilile haliapwila ni kupwa ni mwono wa mutolo kulutwe. Alioze mumu lia kutuzanga, Yehova keshi kutulunjika sango jize kutwafupiwile shina wika jize tunafupiwa hanga tumuwayile.—Tanga Yoano 21:25.

14. Mu mutapu ukwo uka Mbimbiliya yakusolola ngwo, Yehova kakutuzanga?

¹⁴ Yehova kakutusolwela nawa zango lienyi mu mutapu uze akuhanjika ni yetu. Mu Mbimbiliya, Yehova keshi kutwaha katalilo wa shimbi ha yuma yeswe yize mutulinga ku mwono wetu. Shimbu achilinge, iye kakutukwasa tupukune ha yilweza ya mandumbu jetu, uprofeto ni ha shimbi jenyi muze tunazange kukwata yiyulo. Kulinga chino, tunatayiza Liji lia Zambi hanga litukwase kumuzanga ni kumwononokena ni mbunge yetu yeswe.

15. (a) Kuchi Mbimbiliya yakusolola ngwo, Yehova kakulihulumba hali yetu? (b) Ha chizulie, atu aka a mu Mbimbiliya waze kanuke wa pwo, ndumbu mukweze ni pangi kashinakaji anapukuna? (Uputu. 39:1, 10-12; 2 Mia. 5:1-3; Luka 2:25-38)

¹⁵ Mbimbiliya yinasolola ngwo, Yehova kakulihulumba chinji hali yetu. Mumu liaka tunambe chocho? Liji lienyi linazale too ni sango ja yuma yize yetu eswe twakupalika ku mwono. Mutuhasa kulivwa ngwe chize evwile atu waze asoneka mu Mbimbiliya, mumu no  kapwile ni manyonga ‘alifwa ni a yetu.’ (Tia. 5:17) Chahiana ulemu, muze twakumona chize Yehova afungile atu jacho, chakutukwasa kunyingika pundu ngwetu, ‘Yehova kapwa wa too ni vumbi ni keke.’—Tia. 5:11.

16. Yika twalilongesa hali Yehova muze twakutanga mu Mbimbiliya hali atu waze avulumwine ni kulikonyeka? (Izaia 55:7)

¹⁶ Mbimbiliya yinasolola jila yikwo yize Yehova akutusolwelamo zango. Yisoneko yinatwehe shindakenyo ngwo, Zambi kechi kutwehuka muze mutulinga umwe uhenge. A-Izalele kalingile shili ha yisuho yinji, alioze muze apwile ni kulikonyeka ni mbunge yeswe, Zambi te kakwakonekena. (Tanga Izaia 55:7.) Akwa-Kristu atangu no kanyingikine ngwo, Yehova kakwazanga chinji. Yehova katumine Paulu hanga akolweze mandumbu mu chikungulwila, ‘akonekene ni kutakamisa’ lunga yoze walingile shili yinene hanyima yalikonyeka. (2 Kori. 2:6, 7; 1 Kori. 5:1-5) Chili chipema kunyingika ngwo, Yehova keshi kwehuka tuvumbi twenyi chipwe ngwe mahengesa! Shimbu achilinge, ni zango lieswe iye kakwakwasa, kwafumba ni kwatayiza cheka hanga apwe masepa jenyi. Musono, yino ye Yehova analakenya kuli tuvumbi twenyi waze akulikonyeka hanyima lia kuvulumuna.—Tia. 4:8-10.

17. Mumu liaka Mbimbiliya yili chawana chipema?

¹⁷ Yehova hanatwehe chawana chipema. Mumu liaka Mbimbiliya yili yilemu? Mumu ngwe chize twamona, Mbimbiliya yakusolola, mana a Zambi, ululi ni zango lienyi. Mukanda uno wakusolola ngwo, Zambi kanazange hanga tumunyingike ni kupwa masepa jenyi.

18. Kuchi twakusolola ngwetu, twakulemesa ‘chawana chipema’ chize Yehova hanatwehe?

¹⁸ Kutwazangile kulelesa ‘chawana chino chipema’ cha Liji lia Zambi. (Tia. 1:17) Tunungenu ni kusolola usakwililo wetu ha chawana chino. Mutuhasa kuchilinga ha kutanga Mbimbiliya ni kupukuna ha yize tunatange. Nyi twachilinga, mutupwa ni shindakenyo ngwetu, Mwenya Mbimbiliya mawahisa tachi jetu ni kupwa ni “yinyingi ya Zambi.”—Yishi. 2:5.