MUTWE WAKULILONGESA 5
Tutayize Kuya ni Yena
“Tutayize kuya ni yena mumu hitwevwa lufuma ngwo, Zambi hwali hamwe ni yenu.”—ZEKA. 8:23.
MWASO 26 Yami Nwakwashile
CHIKUMA CHILEMU *
Mapanga akwo (“kumi lia malunga”) kakulemesa chinji kulingila Yehova hamuwika ni akwa-Kristu akuwayisa (“Ka-Yunda”) (Tala maparagrafu 1-2)
1. Yika Yehova ambile ngwo te muyilingiwa ha matangwa jetu?
YEHOVA kahanjikile uprofeto uno unatale ha matangwa jetu, ngwenyi: “Kumi lia malunga a ku mavungu a malimi eswe makakwata ku hina lia mutu umuwika Ka-Yunda nikwamba ngwo, Tutayize kuya ni yena mumu hitwevwa lufuma ngwo, Zambi hwali hamwe ni yenu.” (Zeka. 8:23) “Ka-Yunda” yoze anavuluka hano, kali akwa-Kristu akuwayisa ni spiritu yisandu, waze anavuluka nawa ngwo, “A-Izalele a Zambi.” (Ngala. 6:16) “Kumi lia malunga,” kali atu eswe waze ali ni kutalatala cha mwono wa mutolo hano hashi. Ayo kananyingika ngwo, Yehova kanawahisa chizavu cha mandumbu akuwayisa ni spiritu yisandu, nawa kakuwahilila chinji kuwayila Zambi hamwe no.
2. Mu mulali uka “kumi lia malunga” akuya hamuwika ni akwa-Kristu akuwayisa?
2 Mbimbiliya yinambe ngwo: “Kumi lia malunga . . . makakwata ku hina lia mutu umuwika Ka-Yunda nikwamba ngwo, Tutayize kuya ni yena mumu hitwevwa lufuma ngwo, Zambi hwali hamwe ni yenu.” Chipwe ngwe, versu yino yinahanjika hali Ka-Yunda umuwika, alioze liji lize linambe ngwo, “yenu,” linalumbunuka atu anji. Chino chinalumbunuka ngwo, Ka-Yunda hi mutu umuwika ko, kali chizavu cha akwa-Kritu akuwayisa. Musono, hi chashi ko kunyingika majina ja akwa-Kristu eswe akuwayisa waze ali hano hashi. * Chipwe chocho, waze ali ni kutalatala cha mwono wa mutolo hano hashi, mahasa “kuya” hamwe ni akwa-Kristu akuwayisa. Mu mulali uka? Ha kulingila Yehova hamwe no. Alioze, waze ali ni kutalatala cha mwono wa mutolo hano hashi, keshi kumona akwa-Kristu akuwayisa ngwe miata jo, mumu kananyingika ngwo, mwata wo kali umuwika, Yesu.—Mateu 23:10.
3. Yihula yika mutukumbulula ha mutwe uno?
3 Akwa-Kristu akuwayisa anji, achili hano hashi hamuwika ni tuvumbi akwo a Zambi, kashika amwe mahasa kulihula ngwe: (1) Kuchi mandumbu akuwayisa atamba kulimona ene? (2) Kuchi twatamba kumona ndumbu yoze wa kulia mbolo ni kunwa vinyu ha Chiwanyino cha Yesu? (3) Shina twatamba kulihulumba ha kwoka cha atu waze akulia mbolo ni kunwa vinyu ha Chiwanyino cha Yesu? Mutwe uno muukumbulula yihula yino.
KUCHI AKWA-KRISTU AKUWAYISA ATAMBA KULIMONA ENE?
4. Utowezo uka uli ha 1 A-Korindu 11:27-29 uze akwa-Kristu akuwayisa atamba kwononokena, nawa mumu liaka?
4 Akwa-Kristu akuwayisa ni spiritu, katamba kwononokena utowezo uze uli ha 1 A-Korindu 11:27-29. (Tanga.) Kuchi mukwa-Kristu mahasa kulia mbolo ni kunwa vinyu mu mulali uze ‘kuwalitele’? Iye mahasa kuchilinga, nyi kakwehuka shimbi ja Yehova, alioze manunga ni kulia mbolo ni kunwa vinyu ha Chiwanyino cha Yesu. (Hepre. 6:4-6; 10:26-29) Akwa-Kristu akuwayisa ni spiritu kananyingika ngwo, nyi kanazange kutambula “kwononona cha kutambika cha kwilu cha Zambi muli Kristu Yesu,” katamba kununga ni kushishika.—Fwili. 3:13-16.
5. Kuchi akwa-Kristu akuwayisa atamba kulimona ene?
5 Spiritu yisandu ya Yehova yakukwasa atu hanga apwe akwa-kulikehesa, hi akwa-kulinangamisa ko. (Efwe. 4:1-3; Kolo. 3:10, 12) Kashika, akwa-Kristu akuwayisa ni spiritu, katambile kulimona ngwe kali alemu chinji kuhiana akwo. Ayo kananyingika ngwo, Yehova keshi kuhana spiritu yisandu yinji kuli ayo, kuhiana akwo. Keshi kulilamba ha pambo ngwo, kananyingika umwenemwene unji wa Mbimbiliya kuhiana akwo. Nawa ayo katambile kulweza umwe ndumbu mu chikungulwila ngwo, kali wakuwayisa, nawa ngwo katamba kulia mbolo ni kunwa vinyu ha Chiwanyino cha Yesu. Alioze, akwa-Kristu akuwayisa kakulikehesa, nawa kananyingika ngwo Yehova wika mwe mahasa kusanyika mutu yoze maya ni kutwama mu malilu.
6. Kulita ni 1 A-Korindu 4:7, 8, kuchi akwa-Kristu akuwayisa atamba kulimona?
6 Akwa-Kristu akuwayisa, kananyingika ngwo chili chiwape kwasanyika hanga akatwame mu malilu. Alioze, o keshi kushimbwila hanga aalemese chinji ngwe kanahiane akwo. (Fwili. 2:2, 3) Nawa kananyingika ngwo, muze awayishile Yehova kakachambulwile kuli mutu niumwe. Kashika, mukwa-Kristu wakuwayisa keshi kukomoka nyi umwe makakajana hali iye ngwo, keshi wakuwayisa. Iye kananyingika ngwenyi, Mbimbiliya yinambe ngwo, kutwatambile kutayiza chamutayijila, nyi umwe mamba ngwo katambula chawana chalipwila kuli Zambi. (Uso. 2:2) Akwa-Kristu akuwayisa ni spiritu, keshi kushimbwila hanga aalemese chinji kuli akwo. Kashika, keshi kulweza atu waze maliwana no ngwo yami kanguwayisa. Nawa keshi kulisambula ngwo, yami nguli wakuwayisa kuli Zambi.—Tanga 1 A-Korindu 4:7, 8.
7. Yika akwa-Kristu akuwayisa keshi kulinga, nawa mumu liaka?
7 Akwa-Kristu akuwayisa ni spiritu, keshi kunyonga ngwo katamba wika kulikata ene ni ene, ngwe hanalingi ka chizavu ko wika. Ayo keshi kulifupa hanga ahanjike hakutwala ku chize awayishile, hanji kulinga chizavu cha kulilongesa Mbimbiliya ukawo. (Ngala. 1:15-17) Nyi akwa-Kristu akuwayisa alinga chocho, mandumbu mu chikungulwila malihandununa. Nawa chino muchisolola ngwo kanalimika ni spiritu yisandu, yize yakukwasa atu ja Zambi hanga apwe ni sambukila ni kulinunga.—Roma 16:17, 18.
KUCHI TWATAMBA KUMONA AKWA-KRISTU AKUWAYISA?
Kutwatambile kumona akwa-Kristu akuwayisa ngwe kali alemu chinji kuhiana mandumbu akwo
(Tala paragrafu 8) *
8. Mumu liaka twatamba kukeya ha chize twakumona waze akulia mbolo ni kunwa vinyu?
8 Kuchi twatamba kumona akwa-kristu akuwayisa a malunga ni a mapwo? Hi chipema ko kukomoka chinji umwe mutu, chipwe ngwe kali mukwa-Kristu wakuwayisa. (Mateu 23:8-12) Nyonga hali makulwana a mu chikungulwila. Mbimbiliya yakutukolweza ‘kwimbulula ufulielo wo,’ alioze yakututoweza nawa ngwo, kutwatambile kupwisa niumwe mutu mwata wetu. (Hepre. 13:7) Kwamba pundu, Mbimbiliya yinambe ngwo, mandumbu amwe “katela kuawezela ulemu.” Chino chakulingiwa hamukunda wa ‘kuyula kanawa’ ni kukilikita “milimo ya kwambujola liji ni kulongesa,” hi ko ngwo mumu ayo kali akuwayisa. (1 Timo. 5:17) Nyi twakomoka chinji mukwa-Kristu wakuwayisa, iye mahasa kwivwa sonyi, hanji kulinangamisa. * (Roma 12:3) Kwamba pundu, kutwazangile kupiangula niumwe mukwa-Kristu hanga alinge shili ya mutapu au!—Luka 17:2.
9. Kuchi mutuhasa kusolola ngwetu twakuvumbika akwa-Kristu akuwayisa?
9 Kuchi mutuhasa kusolola ngwetu, twakuvumbika akwa-Kristu akuwayisa? Mutuhasa kuchilinga ha kwehuka kwahula chize chapwile mba aawayise. Chino chinatale wika hali ayo, kutushi ni ulite wa kuchinyingika. (1 Tesa. 4:11; 2 Tesa. 3:11) Nawa kutwatambile kunyonga ngwetu malunga, mapwo, yisemi hanji asoko jo no kali akuwayisa. Kutalatala cha kuya mu malilu keshi kuchihinga mu usoko. Kakuchitambula kuli Zambi. (1 Tesa. 2:12) Nawa mutuhasa kusolola vumbi ha kwecha kuhula yuma yize muyihasa kupinjisa akwetu. Chakutalilaho, kutwatambile kuhula pwo lia ndumbu wakuwayisa ngwo: Kuchi wakwivwa muze wakunyonga ngwo, mukatwama ukawe hano hashi ku miaka yeswe chakuhona mukwenu-lunga? Kwamba umwenemwene, mutuhasa kupwa ni shindakenyo ngwetu, mu paraisu, Yehova makayukisa “usona wa waze eswe atwama ni mwono.”—Samu 145:16.
10. Kuchi mutulifunga yetwene nyi mutwehuka “kukomoka chinji yitanga ya atu”?
10 Nyi kutwalemesele chinji akwa-Kristu akuwayisa kuhiana akwa-Kristu akwo, mutulifunga yetwene. Mumu liaka? Mumu Mbimbiliya yinatulweze ngwo, akwa-Kristu amwe akuwayisa mahasa kwecha kushishika. (Mateu 25:10-12; 2 Petu. 2:20, 21) Alioze, nyi mutwehuka “kukomoka chinji yitanga ya atu,” kutuchi kukaula akwetu, chipwe akwa-Kristu akuwayisa, hanji mandumbu waze aputukile kulu kulingila Yehova. (Yunda. 16) Hachino, nyi atu wano eswe mecha kushishika hanji kuhichika chikungulwila, ufulielo wetu hali Yehova kuuchi kakokoloka hanji kwecha kumulingila.
SHINA TWATAMBA KULIHULUMBA HA KWOKA CHA ATU WAZE AKULIA MBOLO NI KUNWA VINYU?
11. Yika yinalingiwa ha unji wa waze akulia mbolo ni kunwa vinyu ha Chiwanyino cha Yesu?
11 Ha miaka yinji kunyima, kwalula cha waze akulia mbolo ni kunwa vinyu ha Chiwanyino cha Kwiwuluka Kufwa cha Yesu te kuchinatepuluka. Alioze, haliapwila kwalula chacho kuchinoko chinji ha hita mwaka. Shina twatamba kulipikala hakutwala ku unji wo? Ka. Tutalenu mumu liaka.
12. Mumu liaka kutwatambile kulipikala ha kwoka cha atu waze akulia mbolo ni kunwa vinyu ha Chiwanyino cha Yesu?
12 Yehova ‘kananyingika atu jenyi.’ (2 Timo. 2:19) Yehova kalisa chinji ni mandumbu waze akwalula atu waze akulia mbolo ni kunwa vinyu ha Chiwanyino cha Kwiwuluka Kufwa cha Yesu, mumu o keshi kunyingika pundu yoze uli wakuwayisa. Kwalula chacho chinachingi ni waze akunyonga ngwo kali akuwayisa alioze ka. Chakutalilaho, amwe atu waze apwile ni kulia mbolo ni kunwa vinyu, hakupalika cha matangwa hi yecha kuchilinga. Akwo kota ha mukunda wa mahesu-hesu, kakufuliela ngwo, makayula ni Kristu mu malilu. Kwamba pundu, kutwanyingikine kanawa unji wa akwa-Kristu akuwayisa waze achili hano hashi.
13. Shina Mbimbiliya yinatongola unji wa akwa-Kristu akuwayisa waze makapwa hano hashi muze luyinda munene makaputuka?
13 Mukukapwa akwa-Kristu akuwayisa ku yihela yinji hano hashi muze Yesu makeza ni kwasaka hanga aye no mu malilu. (Mateu 24:31) Mbimbiliya yinasolola nawa ngwo, ha matangwa akusula, hashi muhakapwa akwa-Kristu akuwayisa akehe. (Uso. 12:17) Alioze kuyishi kutongola unji wa akwa-Kristu akuwayisa waze makapwa hano hashi muze luyinda munene maputuka.
Yika mutulinga nyi twamona umwe ndumbu kanali mbolo ni kunwa vinyu ha Chiwanyino cha Yesu? (Tala paragrafu 14)
14. Kulita ni A-Roma 9:11, 16, yika twatamba kunyingika ha chize Yehova akusakula akwa-Kristu akuwayisa?
14 Yehova mwe unanyingika shimbu lize masakula akwa-Kristu akuwayisa. (Roma 8:28-30) Yehova kaputukile kusakula akwa-Kristu akuwayisa muze Yesu te hamuhindwisa. Chinasoloka ngwe, ku sekulu yitangu, akwa-Kristu eswe amwenemwene te akuwayisa. Hakupalika cha kama ja miaka, anji a kuli waze apwile ni kwamba ngwo kali akwa-Kristu, kakakawile Kristu ni mbunge yeswe. Chipwe chocho, ha miaka yacho, Yehova yawayisa ndambu ya atu waze apwile akwa-Kristu amwenemwene. Ayo kapwile ngwe tiliku yize Yesu ambile ngwo te muyikola hamwe ni yambu. (Mateu 13:24-30) Ha matangwa wano akusula, Yehova machinunga ni kusakula atu hanga alinge chihanda cha 144,000. * Kashika, nyi Zambi manyonga kusakula amwe atu shimbu songo kanda lichiza, pundu, kutwatambile kuhangulula mana jenyi. (Tanga A-Roma 9:11, 16.) * Twatamba kukanyama hanga tuhone kupwa ngwe akwa-milimo a ha chishima cha Yesu, waze aputukile kulinyenyeta ha yize mwenya munda alingile hali waze aputukile mulimo kasula.—Mateu 20:8-15.
15. Shina akwa-Kristu akuwayisa eswe kanalingi chihanda cha “ndungo wamwenemwene, wa kukanyama,” yoze anavuluka ha Mateu 24:45-47? Lumbununa.
15 Hi eswe ko waze makaya mu malilu kanalingi chihanda cha “ndungo wamwenemwene, wa kukanyama.” (Tanga Mateu 24:45-47.) Chizechene ngwe ku sekulu yitangu, ni musono, Yehova ni Yesu hanase nawa atu akehe wika hanga alise atu anji hanji kwalongesa. Zambi katumine akwa-Kristu akehe wika ku sekulu yitangu hanga asoneke Yisoneko ya Ngregu ya akwa-Kristu. Ni musono nawa, akwa-Kristu akehe wika ali ni chiteli cha kuhana “kulia ha mwaka” walita kuli atu ja Zambi.
16. Yika twalilongesa ha mutwe uno?
16 Yika twalilongesa ha mutwe uno? Twalilongesa ngwetu, Yehova kanazange kuhana mwono wa mutolo kuli atu anji hano hashi ni mu malilu kuli waze makayula hamwe ni Yesu. Yehova kakuwahisa tuvumbi twenyi eswe, “Ka-Yunda” ni “kumi lia malunga,” nawa kakuzanga hanga eswe ononokene ku shimbi yoyene ni kushishika. Eswe katamba kulikehesa. Eswe katamba kumuwayila hamuwika ni sambukila. Nawa eswe katamba kusa tachi hanga mu chikungulwila mupwe sambukila. Hitwakundama ku songo, kashika tunungenu ni kuwayila Yehova ni kukaula Kristu ngwe mapanga a chendo chimuwika.—Yoa. 10:16.
^ kax. 5 Ha mwaka uno, Chiwanyino cha Kwiwuluka Kufwa cha Kristu muchikapwa Liamaali, 7 Abril. Nyonga lika twatamba kupwa nalio hakutwala kuli waze akulia mbolo ni kunwa vinyu ha Chiwanyino chacho? Shina twatamba kulihulumba ha kwoka cha atu waze akulia mbolo ni kunwa vinyu? Mutwe wa longeso lino unakatuka ha Kaposhi wa Kutalila wa Janeiro 2016, muukumbulula yihula yino yilemu.
^ kax. 2 Kulita ni Samu 87:5, 6, kota kulutwe lia matangwa Zambi makasolola majina ja akwa-Kristu eswe waze makayula ni Yesu mu malilu.—Roma 8:19.
^ kax. 8 Tala mushete unambe ngwo, “Zango Kulishi Kulinga Chize Kuchatele, Kulishi Kufupa Yuma Yalio-Liene” mu Kaposhi Wa Kutalila wa Janeiro 2016.
^ kax. 14 Mukanda wa Yilinga 2:33 unasolola ngwo, muze akuwayisa umwe mukwa-Kristu, Yesu he akupwa, alioze Yehova mwe wakusakula.
^ kax. 14 Nyi unazange kunyingika nawa, tala “Yihula ya Waze Akutanga Mikanda Yetu” ha Kaposhi wa Kutalila, 1 Maio 2007.
MWASO 34 Kwenda mu Ululi
^ kax. 57 ULUMBUNWISO WA YIZULIE: Achinyonga nyi ha kukunguluka cha mambonge, ndumbu yoze wa ku Mbetele ni mukwo-pwo maajingilika kuli mbunga yize yinazange kwakwata foto, chino muchisolola kuhona vumbi!
