1-2. Yika umwe mungelo alwezele mapwo ku fuka lia Yesu, nawa yika Yesu aalwezele?

LILI tangwa 16, lia Nisane ha mwaka 33 M.J. ha chimene-mene. Amwe tuvumbi a mapwo akuwayila Yehova kanayi ni chinyengo cheswe ku fuka lia Yesu Kristu. Ayo te kanazange kukwita maji a lupembo mupema ha mujimba wa Yesu, alioze, muze hakundama ku fuka, yaliwana liawashi! Umwe mungelo yaalweza ngwenyi, Yesu hamuhindwisa mu ufwe: “Mba munutetekela ku Ngalileya; kwenako munukamumona.”—Mateu 28:1-7; Luka 23:56; 24:10.

² Muze te mapwo hakatuka ku fuka, Yesu mwene yakundama kuli ayo ni kwalweza ngwenyi: “Yeenu, nukambulwile mandumbu jami aye ku Ngalileya, kwenako makangumwena.” (Mateu 28:10) Yesu kota te kali ni sango jilemu chinji ja kulweza tumbaji twenyi, kashika aashikile hanga aliwane no!

3-4. Mumu liaka mutuhasa kwamba ngwetu, shimbi ya kutayisa tumbaji yili ha Mateu 28:19, 20, kakayihanyine wika kuli apostolo? (Tala chizulie ha chifukilo.)

³ Tanga Mateu 28:16-20. Ha kukunguluka chize Yesu aluliekele, yahanjika hakutwala ha mulimo ulemu chinji, uze te tumbaji twenyi malinga ku sekulu yitangu, wenawo ni yetu tunalingi musono. Yesu yamba ngwenyi: “Kashika yeenu nukatayise tumbaji a ku mavungu eswe, . . . nikualongesa kufunga yuma yize yeswe nanuhele shimbi.”

⁴ Yesu kanazange hanga tumbaji twenyi eswe ambujole. Shimbi yino kakayihanyine wika kuli apostolo jenyi 11.  Kuchi tunachinyingika? Muze Yesu ahanyine shimbi yino ku mulundu wa Ngalileya, shina kwapwile wika apostolo jenyi? Iwuluka ngwe, mapwo waze anakaya ku fuka lia Yesu kaalwezele kuli mungelo ngwo: “Mba munutetekela ku Ngalileya; kwenako munukamumona.” Kota mapwo wano afuliela kanakapwaho muze Yesu ahanyine shimbi ya kwambujola. Chikwo nawa, Postolo Paulu yamba ngwenyi, Yesu “wamonekene kuli mandumbu kuhiana kulakaji atano ha chisuho chimuwika.” (1 Kori. 15:6) Kulihi kwenako?

5. Mumu liaka mutuhasa kwamba ngwo, kukunguluka anavuluka ha 1 A-Korindu 15:6 che chili nawa ha Mateu 28?

⁵ Mutuhasa kwamba ngwetu, Paulu te kanahanjika ha kukunguluka chizechene chalingiwile ku Ngalileya, chize anatongola mu Mateu 28. Mumu liaka mutuhasa kwamba chocho? Chitangu, Tumbaji a Yesu anji kapwile a ku Ngalileya. Kashika chapwile chashi kuli Yesu kulikungulula ni tumbaji twenyi anji ku mulundu wa Ngalileya, kuhiana ku Yerusaleme. Chamuchiali, Yesu te hasoloka kuli apostolo 11 ku Yerusaleme. Nyi iye te kanazange kuhana shimbi ja kutayisa tumbaji kuli apostolo wika, te mahasa kuchilinga ku Yerusaleme. Kachi kakasanyikine apostolo, mapwo ni tumbaji akwo hanga aliwane nenyi ku Ngalileya.—Luka 24:33, 36.

6. Kuchi Mateu 28:20 unasolola ngwo, shimbi ya kutayisa tumbaji yinatale ha matangwa jetu? Kuchi tunanyingika ngwetu, tumbaji twa Yesu kanakaula shimbi yino?

⁶ Tala chikuma chamuchitatu. Shimbi ya kutayisa tumbaji kakayihanyine wika kuli akwa-Kristu a ku sekulu yitangu. Kuchi tunachinyingika? Yesu yamanununa ni maliji akasula a usongwelo wacho kuli tumbaji twenyi ngwenyi: “Yami hamuwika ni yenu nguli matangwa eswe ndo kumanunuka cha miaka.” (Mateu 28:20) Maliji wano a Yesu kanamanunuka musono, mulimo wa kutayisa tumbaji unayi kulutwe. Nyonga hachino! Ha miaka yeswe kakupapachisa atu 300,000 waze akulihana hanga apwe Yela ja Yehova ni kupwa tumbaji twa Yesu Kristu!

7. Yika mutulilongesa, nawa mumu liaka?

⁷ Atu anji waze akulilongesa Mbimbiliya kakulikolweza hanga aapapachise. Chipwe chocho, alongi anji a Mbimbiliya kakwivwa woma wa kupwa tumbaji. O kakuzanga kulilongesa Mbimbiliya, alioze keshi kulikolweza hanga aapapachise. Nyi uli ni longi wa Mbimbiliya, tunanyingika ngwo unazange kumukwasa akaule yize wakumulongesa hanga apwe kambaji wa Kristu. Mutwe uno muusolola chize mutuhasa kukwasa alongi jetu hanga atatuke ku ufulielo. Mumu liaka mutuhanjika ha chikuma chino? Mumu ha mashimbu amwe, mutuhasa kusakula nyi twatamba kununga ni kulilongesa ni longi wa Mbimbiliya nyi ka.

8. Mumu liaka hi chashi ko kukwasa longi hanga azange Yehova?

⁸ Yehova kanazange hanga atu amulingile mumu kakumuzanga. Kashika, twatamba kukwasa longi yetu hanga anyingike ngwo, Yehova kakulihulumba hali iye ni kumuzanga chinji. Tunazange hanga longi yetu anyingike ngwo, Yehova kali “tato ya ana-ashiwa, kanda sopi ya twamishi a mapwo.” (Samu 68:5) Nyi longi yetu wanyingika chize Yehova akumuzanga, zango lienyi hali Yehova mulikola chinji. Chakupwa chikalu kuli alongi amwe kunyonga Yehova ngwe Tato wa zango, mumu kota yisemi jo te keshi kwasolwela zango. (2 Timo. 3:1, 3) Kashika, muze  tunaalongesa, twatamba kushindakenya ha yitanga yipema ya Yehova. Kwasa longi ye anyingike ngwo, Yehova kanazange kumwaha mwono wa mutolo nawa kanazange kumukwasa hanga apwe ni mwono wacho. Yika nawa muhasa kulinga?

9-10. Mikanda yika twatamba kulongesa nayo alongi jetu, nawa mumu liaka?

⁹ Longesa ni mukanda “Yika Mbimbiliya Muyihasa Kutulongesa?” ni mukanda “Nunga mu Zango lia Zambi.” Mikanda yino, kanakayilulieka hanga tukwase alongi jetu azange Yehova. Chakutalilaho, kapitulu 1 wa mukanda, Kutulongesa unakumbulula yihula yino: Shina Zambi keshi kutufunga nawa mbunge yipi akwete?, Kuchi Zambi akwivwa muze atu akumona lamba? Shina muhasa kukundama kuli Yehova? Mba yika mutwamba ha mukanda, Nunga mu Zango lia Zambi? Mukanda uno muukwasa alongi kunyingika chize kukaula shimbi ja Mbimbiliya muchihasa kupemesa mwono wo ni kukundama kuli Yehova. Chipwe ngwe unanyingika kanawa  mukanda uno, nihindu watamba kulilulieka kanawa muze muya ni kusongwela longeso lia Mbimbiliya kuli longi ni kunyingika chize muhasa kumukwasa.

¹⁰ Haliapwila nyonga ngwe, longi ye wa Mbimbiliya kanazange kunyingika chimwe chikuma chili ha mukanda uze kuushi mu Mushete Wetu wa Yikwata ya Kulongesa Nayo. Yika muhasa kulinga? Muhasa kumukolweza hanga atange mukanda wacho ukawenyi, alioze yena nunga ni kulilongesa nenyi mukanda, Yika Mbimbiliya Muyihasa Kutulongesa?

11. Ha mashimbu aka twatamba kuputuka ni kuhwisa longeso lia Mbimbiliya ni kulemba? Kuchi mutuhasa kulumbununa kuli longi yetu ulemu wa kulemba?

¹¹ Putuka longeso lia Mbimbiliya ni kulemba. Chili chipema kuputuka ni kuhwisa longeso lia Mbimbiliya ni kulemba, mutuhasa kuchilinga ha poso jitangu, muze mutumona ngwetu longeso lia Mbimbiliya mulinunga. Twatamba kulweza longi yetu wa Mbimbiliya ngwo, spiritu ya Zambi ye yakutukwasa kunyingika Liji lienyi. Alongeshi amwe shimbu kanda achiputuka longeso lia Mbimbiliya, kakukwasa alongi jo anyingike ulemu wa kulemba ha kutanga mukanda Tiangu 1:5, unambe ngwo: “Nyi kachi umwe wa kuli yenu mahona mana, akete kuli Zambi.” Hachino, mba mahula longi ngwo: “Kuchi mutuhasa kwita mana kuli Zambi?” Longi hanji mahasa kukumbulula ngwenyi, twatamba kulemba kuli Zambi.

12. Kuchi muhasa kukaula Samu 139:2-4 hanga ukwase longi ye anyingike kulemba kanawa?

¹² Longesa longi ye chize malemba. Mulumbunwine ngwo, Yehova kanazange chinji kwivwa yilemba yenyi. Mulweze ngwo, muze malemba ukawenyi mahasa kulweza Yehova yuma yeswe yize yili mu mbunge yenyi, ni kumulweza yuma yeswe yize te kechi kuhasa kulweza mutu niumwe. Yehova kananyingika yeswe yize yili mu mbunge yetu. (Tanga Samu 139:2-4.) Nyi longi ye kakupinda ni manyonga api hanji ndako yize kahashile kukumba, mukolweze hanga ete ukwaso wa Zambi. Chakutalilaho, hanji longi ye kakuzanga yiwanyino ya matangwa akunanga yize kuyishi kulita ni Mbimbiliya. Chipwe ngwe kananyingika ngwo yili yipi, nihindu kakuzanga yuma yize akulinga ha yiwanyino yacho. Mukolweze hanga alweze Yehova chize akwivwa ni kwita ukwaso hanga azange yize Zambi akuzanga.—Samu 97:10.

13. (a) Mumu liaka watamba kusanyika longi ye hanga aye ku kukunguluka? (b) Kuchi mutuhasa kukwasa longi hanga ahone kwivwa sonyi muze maya ku Zuwo lia Wanangana?

¹³ Sanyika longi ye hanga aye ku kukunguluka. Yuma yize longi ye mevwa ni kumona ku kukunguluka muyihasa kumukwasa hanga akole ku ufulielo. Musolwele chinema chakwamba ngwo, Yika Yakupwa mu Zuwo lia Wanangana? nawa musanyike hanga nuye nenyi chimuwika ku kukunguluka. Nyi muchilita muhasa kumumbata mu mashinyi je hanji kumufwetela taxi. Muhasa kuya ni akwa-kwambujola anji alisa muze unalilongesa nenyi. Nyi mulinga chocho, longi ye manyingika mandumbu anji a mu chikungulwila. Hachino, muze maya ku Zuwo lia Wanangana kechi kwivwa sonyi.

14. Yika yakukwasa longi hanga akole ku ufulielo?

¹⁴ Chuma tunazange chili kukwasa longi hanga akole ku ufulielo. (Efwe. 4:13) Ku uputukilo, muze mutu akulilongesa Mbimbiliya, kakunyonga chinji ha yiwape yize mapwa nayo. Alioze, muze zango lienyi hali Yehova mulinunga  ni kukola, maputuka kulikolweza hanga akwase akwo, ni mandumbu mu chikungulwila. (Mateu 22:37-39) Nyi muchilita, lweza longi ye ngwo, iye mahasa kuhana mulambu hanga akwase mulimo wa Wanangana.

15. Kuchi mutuhasa kukwasa longi wa Mbimbiliya anyingike yize atamba kulinga muze mapwa mu kapinda?

¹⁵ Longesa longi ye yize mahasa kulinga muze mapwa mu kapinda. Nyonga ngwe longi ye kali mukwa-kwambujola yoze kanda achimupapachisa, kanapihilila mumu kamwamba yuma yipi kuli umwe ndumbu mu chikungulwila, mba makulweze yuma yacho. Shimbu umukalile, mulweze yize Mbimbiliya yinambe ha chikuma chino. Iye mahasa kuvulama yuma yacho, hanji kuya ni kuhanjika ni ndumbu wacho hanga alivwashane ‘nikumuzuka.’ (Tala Mateu 18:15.) Kwasa longi ye hanga alulieke yize mamba. Mulweze chize mahasa kukalakala ni JW Library^®, ni Guia de Pesquisa para Testemunhas de Jeová ni site jw.org^® hanga anyingike yikuma yilemu ya chize atamba kukumba yipikalo. Nyi twamufumba kanawa shimbu kanda achimupapachisa, muchipwa chashi kulivwashana ni akwo mu chikungulwila muze mamupapachisa.

16. Mumu liaka chili chipema kusanyika mandumbu akwo muze tunayi ni kusongwela longeso lia Mbimbiliya kuli longi yetu?

¹⁶ Muze unayi kulongesa longi ye, yako ni kalayi wa mbonge hanji mandumbu akwo. Mumu liaka? Ngwe chize twamona, akwa-kwambujola akwo mahasa kukwasa longi ye mu jila yize yena kuuchi kuhasa. Nyonga ngwe, longi ye kakufupa kukumba ndako ya kushipa makanya, alioze keshi kuhasa. Hachino, muhasa kusanyika ndumbu yoze wakumbile ndako yacho ya kushipa makanya hanga uye nenyi ni kulongesa longi ye. Iye mahasa kukwasa longi ye ha yize anafupu. Nyi wakwivwa sonyi ja kusongwela longeso lia Mbimbiliya kulutwe lia ndumbu yoze wajama, mwite hanga asongwele. Kolweza longi ye hanga alilongese yuma yipema kuli ndumbu yono wajama. Iwuluka ngwo, chuma chize tunazange chili kukwasa longi hanga akole ku ufulielo.

17-18. Yika watamba kunyingika muze kanda uchecha longi ye?

¹⁷ Nyi longi ye keshi kulikolweza hanga alumune yimwe ku mwono wenyi, muhasa kulihule ngwe: ‘Shina natamba kwecha longi yono?’ Shimbu kanda uchecha longi wacho, watamba kunyonga yize longi anyingika ni yize kanyingikine. Amwe kakushimbula chinji mba alumune yimwe ku mwono wo, akwo ka. Lihule ngwe: ‘Shina longi yami kanalikolweza kulita ni uhashi wenyi? Shina kanalikolweza “kufunga” yize analilongesa?’ (Mateu 28:20) Kutatuka cha umwe longi  muchihasa kumbata mashimbu, alioze katamba kusolola ngwo kakulikolweza.

¹⁸ Yika mutwamba, nyi wakulilongesa ni mutu ha miaka yinji, alioze kakusolola ngwo keshi kulemesa longeso? Yika watamba kulinga? Nyonga ha chino: Longi ye hahwisa mukanda Yika Mbimbiliya Muyihasa Kutulongesa?, ni kunjila mu mukanda Nunga mu Zango lia Zambi, alioze keshi kuya ku kukunguluka chipwe ha Chiwanyino cha Kwiwuluka Kufwa cha Yesu! Kali ni ndako yakuchina longeso chakuhona chitela. Hachino, muchilita kuhanjika nenyi. *

19. Yika muhasa kulweze longi yoze keshi kulemesa longeso lia Mbimbiliya nawa yika watamba kunyingika?

¹⁹ Muhasa kuhula longi ngwo: “Yuma yika yakukupinjisa hanga uhone kupwa Chela cha Yehova?” Longi mahasa kukumbulula ngwenyi: “Munguhasa kulilongesa Mbimbiliya. Alioze chichi keza kapwa Chela cha Yehova!” Nyi wakulilongesa ni longi yono ha mashimbu anji, shina muchilita kununga ni kulilongesa nenyi? Chikwo nawa, hanji longi ye makulweza yize yinamukwika kusenya kulutwe. Makulweza ngwenyi, kechi kuhasa kuya ni kwambujola ku zuwo ni zuwo. Kunyingika chino, muchipwa chashi kumukwasa.

20. Kuchi mukanda wa Yilinga 13:48 muuhasa kutukwasa kusakula nyi mutununga ni kusongwela longeso nyi ka?

²⁰ Alongi amwe kali ngwe A-Izalele a ha mashimbu ja Ezekiele. Tala yize Yehova alwezele Ezekiele hanga ambe hali ayo. Yamulweza ngwenyi: “Ni yena kuwapwa kuli ayo ngwe umwe mukwa kwimba miaso ya zango ni jili lipema, nikwimba kanawa ha chisaji, mumu kwivwa kakwivwa chize muwamba, alioze kulinga keshi kuchilinga.” (Eze. 33:32) Muchihasa kupwa chikalu kulweza longi ngwetu, kutuchi kulilongesa nenyi nawa Mbimbiliya. Alioze, twatamba kunyingika ngwo, “miaka hiyatepuluka.” (1 Kori. 7:29) Kanda tukisa mashimbu ni longi yoze keshi kusenya kulutwe, twatamba kufupa atu “waze eswe Zambi hanafunjikila ku mwono wa mutolo.”—Tanga Yilinga 13:48.

21. Chisoneko chika cha mwaka 2020, nawa mumu liaka chinalite?

²¹ Ha mwaka 2020, chisoneko chetu cha mwaka muchitukwasa kulihulikila ha mulimo wetu wa kutayisa tumbaji. Chisoneko chacho, chili ni shimbi ya Yesu yize ahanyine muze alikungulwile ni tumbaji twenyi ku mulundu wa Ngalileya ngwenyi: “Yeenu nukatayise tumbaji a ku mavungu eswe, nikuapapachisa.”—Mateu 28:19.