1-2. Kapinda muka tuvumbi anji a Yehova anapalika, nawa kuchi ayo akwivwa?

NYONGA ha yikuma yino yitatu: umwe ndumbu mukweze mamulweza kuli ndotolo ngwo, kali ni umwe musongo upi. Umwe ndumbu chikilikita mupema, mamuchiza ku mulimo, masa tachi hanga awane mulimo weka, alioze kechi kuuwana. Umwe ndumbu wa pwo kashinakaji hahonga chinji, keshi kuhasa kulingila Yehova ngwe chize apwile ni kulinga muze te uchili mukweze.

² Nyi unapalika mu kapinda ngwe wa mandumbu wano, muhasa kulivwa ngwe kuushi ulemu. Kapinda yono mahasa kukuchiza chiseke, kupinjisa mwono we ni usepa we ni akwenu.

3. Kuchi Satana ni atu waze anasongwela akusolola ngwo, keshi kulemesa mwono wa atu?

³ Hashi heswe hanasolola chize Satana akulelesa mwono wa atu. Chize ku mashimbu akunyima, Satana nihindu kakulelesa mwono wa atu ngwe kuushi ulemu. Kashika alwezele Eva ngwo, te mapwa ni utuswilo nyi mehuka Zambi. Alioze iye te kananyingika pundu ngwo, chino muchinehena Eva kufwa. Satana mwe wakusongwela mingoso, yuma ya mafwefwe ni uwayilo wa mahuza. Kashika, twatambile kukomoka muze twakumona akwa-mingoso, akwa-mafwefwe ni mangana a mayingeleja, masolola yitanga ngwe ya Satana, ha kulelesa mwono wa atu.

4. Yika mutulilongesa ha mutwe uno?

 ⁴ Yehova kakulemesa mwono. Iye kanazange hanga tunyingike ngwo tuli alemu, nawa kakutukwasa muze mutulivwa ngwe kutushi ni ulemu. (Samu 136:23; Roma 12:3) Mutwe wa longeso lino muusolola chize Yehova akutukwasa ha yikuma yino yitatu: (1) Muze twakuyiza, (2) muze tunahono mbongo, ni (3) muze tunapinji ni ushinakaji ni kulivwa ngwe tusolo kulinga nichimwe mu mulimo wa Yehova. Alioze, chitangu tutalenu mumu liaka mutuhasa kupwa ni shindakenyo ngwetu, yetweswe tuli alemu kumeso ja Yehova.

5. Yika yinasolola ngwo atu kali alemu chinji kuli Yehova?

⁵ Chipwe ngwe katutangile ku fufuta ya mavu, nihindu tuli alemu chinji kuli Yehova kuhiana mavu. (Uputu. 2:7) Kuchi tunachinyingika? Iye katangile atu ni uhashi wa kwimbulula yitanga yenyi. (Uputu. 1:27) Ha kututanga chino, iye katusele helu lia yitangiwa yikwo ya hashi, nawa katuhele mulimo wa kufunga hashi ni tushitu.—Samu 8:4-8.

6. Kuchi tunanyingika nawa ngwetu Yehova kakulemesa atu yihenge?

⁶ Chipwe muze Alama avulumwine, nihindu Yehova yanunga ni kulemesa atu. Tuli alemu chinji kuli Yehova, kashika atumine Mwanenyi Yesu, hanga afwe ngwe ukuule hamukunda wa shili yetu. (1 Yoa. 4:9, 10) Hamukunda wa ukuule wa Yesu, Yehova makahindwisa atu waze akufwa mumu lia shili ya Alama. Atu jacho makapwa ‘akwa ululi ni yihenge.’ (Yili. 24:15) Chipwe ngwe tunayiji, tuli yiswale hanji pichi, Liji lia Zambi linasolola ngwo, tuli alemu kuli Yehova.—Yilinga 10:34, 35.

7. Shindakenyo yika yikwo tuli nayo yize yinasolola ngwo, tuli ni ulemu unji kumeso ja Yehova?

⁷ Tuli nawa ni shindakenyo yikwo ngwo, tuli ni ulemu kumeso ja Yehova. Iye hanatukoka ha kutukwasa hanga tunyingike sango lipema. (Yoano 6:44) Muze twakukundama kuli Yehova, ni iye kakukundama kuli yetu. (Tia. 4:8) Yehova nawa kakusa mashimbu ni tachi hanga atulongese ni kutufumba, chino chinasolola ngwo, tuli ni ulemu unji kumeso jenyi. Iye kananyingika kanawa utu wetu, ni chize mutuhasa kwalumuka. Iye kakutufumba mumu kakutuzanga. (Yishi. 3:11, 12) Kwamba pundu, tukwete ulemu unji kumeso ja Yehova!

8. Kuchi mukanda wa Samu 18:27-29 muuhasa kutukwasa muze tunapalika mu yipikalo?

⁸ Atu amwe te kakumona Mwanangana Ndawichi ngwe keshi ulemu. Alioze iye kapwile ni shindakenyo ngwenyi, Yehova te kakumuzanga ni kumukwasa. Shindakenyo yino, ye yakwashile Ndawichi kukumba yipikalo yenyi. (2 Samue. 16:5-7) Chizechene ngwe Ndawichi, muze mutunenganyana hanji mutupwa ni yipikalo, Yehova mahasa kutukwasa tupwe ni nyonga lialita hakutwala ku yipikalo yacho, ni kutukwasa hanga tuyikumbe. (Tanga Samu 18:27-29.) Nyi tuli ni ukwaso wa Yehova, nichimwe chuma muchitukwika kumulingila ni uwahililo chakuhi. (Roma 8:31) Haliapwila tutalenu yikuma yacho yitatu, yize tunafupiwa kwiwuluka ngwetu, Yehova kakutuzanga nawa kakutulemesa chinji.

9. Yika mutuhasa kwivwa hamukunda wa musongo?

⁹ Musongo muuhasa kutuhongesa chinji. Muuhasa nawa kutuvwisa ngwe kutushi ni ulemu. Twakwivwa sonyi muze akwetu matumona ngwo tunahongo nawa tunafupu ukwaso. Hanji kushi niumwe unanyingika ngwo tunayiji, chipwe chocho, mutuhasa kunyenganana mu mbunge hakunyingika ngwo jatukangana kulinga yize twapwile ni kulinga. Chipwe ngwe musongo muutupinjisa chinji, Yehova kakututakamisa. Mu mulali uka?

10. Kulita ni Yishima 12:25, yika muyihasa kutukwasa muze tunayiji?

 ¹⁰ Muze tunayiji, “liji lipema” mulihasa kutuhuzulula mu mbunge. (Tanga Yishima 12:25.) Kashika, Yehova ni zango lieswe yasa maliji apema mu Mbimbiliya waze akutwiwulula ngwo, tuli alemu kumeso jenyi chipwe ngwe tunayiji. (Samu 31:19; 41:3) Nyi twatanga chinji Mbimbiliya, Yehova matukwasa hanga tukumbe manyonga api waze twakupwa no mumu lia musongo.

11. Kuchi ndumbu Jorge anyingikine ngwo Yehova kakumukwasa?

¹¹ Tala yize yinakalingiwa kuli Jorge. Muze apwile mukweze, yapwa ni umwe musongo uze te wakumuzeyesa chinji. Hamukunda wa musongo wacho, Jorge te kakulivwa ngwe keshi ulemu. Yamba ngwenyi: “Te chanyingikine chize mungukumba kapinda wa musongo wacho, ni sonyi jize te mungwivwa muze atu mangumona. Muze musongo wami te unayi ni kwoka, te nakunyonga chize mwono wami muwalumuka. Nevwile yinyengo yinji, yingwita kuli Yehova hanga angukwase.” Kuchi Yehova akwashile Jorge? Jorge yamba ngwenyi: “Te kuchishi kuhasa kulihumikiza. Kashika, yangukolweza hanga ngutange amwe tupitulu a Samu waze akusolola chize Yehova akulihulumba hali tuvumbi twenyi. Te nakutanga matangwa eswe jimwe versu ja Samu yacho, yino yangukwashile chinji kuhuzuluka mu mbunge. Hakupalika cha matangwa, atu te kakungumona ngwo ngunawahilila chinji. Nawa te kakungulweza ngwo, kupwa chami chakwatakamisa. Hazehene yingunyingika ngwami, Yehova kakukumbulula yilemba yami! Iye kakungukwasa hanga ngupwe ni nyonga lialita hakutwala ku musongo wami. Yinguputuka kulihulikila ha yize Mbimbiliya yakwamba hakutwala ku chize Zambi  akungumona, chipwe ngwe nguli ni musongo uno.”

12. Muze unapinji ni umwe musongo, yika watamba kulinga hanga upwe ni ukwaso wa Yehova?

¹² Nyi unapinji ni umwe musongo, pwako ni shindakenyo ngwenyi, Yehova kananyingika yize unapalika. Liumbe kuli Yehova hanga akukwase kupwa ni nyonga lialita hakutwala ku kapinda we. Nawa tanga maliji apema a Yehova waze ali mu Mbimbiliya. Lihulikile ha maliji waze anasolola chize Yehova akulemesa tuvumbi twenyi. Nyi walinga chino, munyingika ngwo, Yehova kali mupema kuli atu eswe waze akumulingila ni mbunge yeswe.—Samu 84:11.

13. Kuchi chisemi mahasa kwivwa nyi mamuhuma ku mulimo?

¹³ Yisemi eswe, kakuzanga kufunga kanawa asoko jo. Tunyongenu hali umwe ndumbu, yoze mahuma ku mulimo chipwe ngwe kalingile upi niumwe. Iye masa tachi hanga awane mulimo weka, alioze kechi kuhasa kuwana niumwe. Kapinda yono mahasa kuvwisa ndumbu yono ngwe keshi ni ulemu. Alioze, kulihulikila ha yilakenyo ya Yehova muchihasa kumukwasa chinji. Mu jila yika?

14. Mumu liaka Yehova akumanununa yilakenyo yenyi?

¹⁴ Yehova kakulinga yize akulakenya. (Yoshu. 21:45; 23:14) Iye kakuchilinga hamukunda wa yitela yinji. Chitangu, mumu kanazange kukalila jina lienyi. Yehova hanalakenya kufunga tuvumbi twenyi ashishika, kashika akumanununa chilakenyo chacho. (Samu 31:1-3) Chikwo nawa, Yehova kananyingika ngwenyi, nyi katufungile ngwe ana jenyi, mutunenganyana. Hanalakenya kutwaha yize tunafupiwa ku ufulielo, nawa niumwe mamukwika kumanununa yilakenyo yenyi wakuhi.—Mateu 6:30-33; 24:45.

15. (a) Kapinda muka akwa-Kristu a ku sekulu yitangu apwile nenyi? (b) Utakamiso uka tunawana ha Samu 37:18, 19?

 ¹⁵ Kwiwuluka ngwo Yehova kakumanununa yize akulakenya, muchitukwasa kujikijila muli iye, chipwe ngwe tunahono yakulikwasa nayo ku mwono. Tunyongenu ha chilweza cha akwa-Kristu ku sekulu yitangu. Muze apwile ni kwahungumiona mu Yerusaleme, “eswe amwanganyine mwamwa,” apostolo wika e asalilemo. (Yili. 8:1) Kapinda muka apwile nenyi? Kapwile ni kapinda wa kuwana yuma yakulikwasa nayo! Chinasoloka ngwe, akwa-Kristu wano katokesele mazuwo ni milimo yo. Chipwe chocho, Yehova yanunga ni kwakwasa. No kanakanunga ni kuwahilila. (Yili. 8:4; Hepre. 13:5, 6; Tia. 1:2, 3) Yehova kakwashile akwa-Kristu ashishika ku sekulu yitangu, nawa che malinga hali yetu.—Tanga Samu 37:18, 19.

16. Yika muyihasa kutuvwisa ngwe uwayilo wetu kuushi nawa ni ulemu kumeso ja Yehova?

¹⁶ Nyi hitwapwa tushinakaji, mutuhasa kunyonga ngwe kutushi ni yize mutulinga mu mulimo wa Yehova. Kota Mwanangana Ndawichi, che anyongene muze apwile kashinakaji. (Samu 71:9) Kuchi Yehova mahasa kutukwasa?

17. Yika twalilongesa ha chilweza cha ndumbu Jeri?

¹⁷ Tala chilweza cha ndumbu wa pwo avuluka ngwo, Jeri. Kamusanyikine hanga aye ku kukunguluka cha mulimo wa kululieka yihela ya uwayilo ku Zuwo lia Wanangana, alioze iye kakazangile kuya. Jeri yamba ngwenyi: “Nguli kashinakaji, nguli tuliwa nawa chanyingikine kulinga nichimwe chize Yehova mevwila kuwaha. Chishi ulemu.” Ha ufuku, muze tangwa lia kukunguluka chacho kanda liheta, Jeri yalemba ni kuliumba kuli Yehova. Muze hikwacha,  yaya ku Zuwo lia Wanangana, nihindu yalihula ngwenyi, shina natamba kupwa lume ha kukunguluka chino. Muze kukunguluka chaputukile, umwe wa kuli mandumbu waze te analinga pande yamba ngwenyi, utotombo uze mutuhasa kupwa nawo uli kulihana hanga Yehova atulongese. Jeri yamba ngwenyi: “Yami nguli ni utotombo wacho!’ Hazehene yinguputuka kulila, mumu namwene ngwami Yehova kakumbulula yilemba yami. Kanangukolweza ngwo yami nguli ni yimwe yize munguhasa kumwaha, nawa kanazange kungulongesa!” Yamba nawa ngwenyi: “Muze nahetele ku kukunguluka te ngunasakalala, ni kulimona ngwe chishi ulemu. Alioze, muze kukunguluka chahwile, yingujikiza ni kutakama ni kunyingika ngwami, kumana nguli ni ulemu unji!”

18. Kuchi Mbimbiliya yinasolola ngwo yize twakulingila Yehova yili ni ulemu, chipwe ngwe hitwashinakajiwa?

¹⁸ Yehova mahasa kutukwasa tumulingile, chipwe ngwe hitwashinakajiwa. (Samu 92:12-15) Hanji wakumona ngwe mulimo uze wakulingila Yehova walumbunukine nichimwe. Alioze, Yesu katulongesele ngwenyi, kuli Yehova, yeswe mutulinga mu mulimo wenyi yili yilemu. (Luka 21:2-4) Kashika, lihulikile ha yize muhasa kulinga. Chakutalilaho, muhasa kulweza akwenu sango ja Yehova, kulembela akwenu, kukolweza mandumbu je hanga anunge ni kushishika kuli Yehova. Chuma chize Yehova akulemesa ha kumulingila hi yize ko mulinga alioze kulihana che hanga umwononokene.—1 Kori. 3:5-9.

19. Shindakenyo yika mukanda wa A-Roma 8:38, 39, yinatwehe?

¹⁹ Chili chiwape chinene kuwayila Yehova Zambi, yoze wakulemesa tuvumbi twenyi! Yehova katutangile hanga tulinge upale wenyi, kashika uwayilo wamwenemwene we wakulemesa mwono wetu. (Uso. 4:11) Chipwe ngwe akwa-hashi kakutumona ngwe kutushi ulemu, alioze Yehova keshi kutuvwila sonyi. (Hepre. 11:16, 38) Kashika, chipwe ngwe tunapinji ni misongo, kuhona yakulikwasa nayo, hanji ushinakaji, mutuhasa kupwa ni shindakenyo ngwetu, nichimwe muchihasa kutuhandununa ku zango lia Tata yetu wa mu malilu chakuhi!—Tanga A-Roma 8:38, 39.