1. Chizechene ngwe Mwanangana Ndawichi, yika amwe a kuli yetu mutuhasa kulihula?

YETWESWE twakuzanga kutwama ni sambukila. Kutushi kuzanga kulipikala. Alioze ha mashimbu amwe, mutuhasa kupinda ni yipikalo. Kashika, anji a kuli yetu mutuhasa kulihula ngwe chize Mwanangana Ndawichi ahulile Yehova ngwenyi: “Ndo mwiji muka mungupukuna mu mbunge yami ya too ni chinyengo tangwa ha tangwa?”—Samu 13:2.

2. Yika mutulilongesa ha mutwe uno?

² Chipwe ngwe ha mashimbu amwe twakulipikala, nihindu kuli yuma yize mutuhasa kulinga hanga tutepulule yipikalo yetu. Ha mutwe uno, chitangu mutulilongesaho yuma yize muyihasa kutunehena yipikalo. Kusulaho, mutushimutwina yikuma yisambano yize muyihasa kutukwasa kununga ni kulihumikiza muze tunapalika mu kapinda.

3. Yipikalo yika twakupwa nayo, nawa shina mutuhasa kuyikinda?

³ Kuli yuma yinji yize muyihasa kutunehena yipikalo, nawa kutushi ni uhashi wa kukinda yuma yacho. Chakutalilaho, kutushi ni uhashi wa kupalumwisa ndando ya kulia, mazalo hanji lukeza yoze twakufweta hita miaka; chipwe kunyingika yisuho yize matushinjila kuli akwetu ku shikola hanji ku milimo hanga tulinge utanji. Kutushi nawa ni uhashi wa kukinda ungulungulu uze wakulingiwa mu ngiza yetu. Twakupwa ni yipikalo  yinji, mumu atu anji hano hashi keshi kukaula shimbi ja mu Mbimbiliya. Satana, mwe zambi wa hano hashi, kananyingika ngwenyi atu amwe malitwamina kulingila Yehova mumu lia “yipikalo ya mwono uno.” (Mateu 13:22; 1 Yoa. 5:19) Kashika, kutushi kukomoka ha kumona yuma yinji hano hashi yize yakutupikalisa!

4. Yuma yika mutuhasa kulipikala nayo?

⁴ Mutuhasa kulipikala chinji ni yuma ya ku mwono. Chakutalilaho, mutuhasa kulipikala mumu lia kuhona mbongo hanga tulande yuma yakulikwasa nayo, hanji muze tunayiji chipwe muze matuhuma ku mulimo. Mutuhasa nawa kulipikala ha kunyonga nyi mutununga ni kushishika kuli Zambi muze matweseka. Kwasala hakehe hanga Satana atume atu jenyi alukukile tuvumbi twa Zambi. Kashika, mutuhasa kulipikala ha yize mutukalinga ha mashimbu jacho. Hanji mutuhasa kulihula ngwetu: ‘Shina chili chipi kulipikala ha yuma yacho?’

5. Yika Yesu ambile kwamba muze ambile ngwenyi: “Kanda nulipikala”?

⁵ Tunanyingika ngwetu, Yesu katowezele tumbaji twenyi ngwenyi: “Kanda nulipikala ha mwono wenu.” (Mateu 6:25) Shina chino chinalumbunuka ngwo, kutwatambile kulipikala ni chuma nichimwe? Ka, hi chocho ko! Tuvumbi amwe a Yehova ku mashimbu a kunyima no kapwile ni kulipikala, chipwe chocho kakatokesele usepa wo ni Yehova. * (1 Mia. 19:4; Samu 6:3) Yesu kasolwele ngwenyi kutwatambile kulipikala ni yuma ya ku mwono, mumu chino muchihasa kutuhongesa ha kulingila Zambi. Mba yika mutuhasa kulinga muze tunalipikala?—Tala mushete, “ Chize Muhasa Kuchilinga.”

6. Kulita ni A-Fwilipu 4:6, 7, yika muyihasa kutukwasa kulihumikiza muze tunalipikala?

⁶ (1) Kulemba mashimbu eswe. Akwa-Kristu waze anapalika mu ukalu mahasa kuwana uhwimino ha kulemba kuli Yehova. (1 Petu. 5:7) Iye mahasa kukumbulula yilemba yo ha kwaha “sambukila ya Zambi, yize yakuhiana kunyonga cheswe [cha atu].” (Tanga A-Fwilipu 4:6, 7.) Yehova kakutwaha sambukila yacho kupalikila mu tachi jenyi, spiritu yisandu.—Ngala. 5:22.

7. Yika twatamba kunyingika muze tunalembe kuli Zambi?

⁷ Muze unalembe kuli Yehova, mulweze yize unalipikala nayo, ni chize unevu mumu lia yuma yacho. Nyi wamona ngwe kuli yize muhasa kulinga hanga uhwise kapinda wacho, mwite mana ni tachi mba uchilinge. Nyi kuwamwene yize mulinga, eta kuli Yehova hanga akukwase kulihumikiza. Nyi walweza Yehova yuma yize yinakupinjisa, hakupalika cha mashimbu mumona chize iye makumbulula yilemba ye. Nyi walemba, alioze wamwene kumbululo, kanda uhonga. Yehova kazangile wika hanga umulweze yize yinakupinjisa, alioze kanazange nawa hanga ununge ni kulemba ha chikuma chacho.—Luka 11:8-10.

8. Yuma yika nawa twatamba kutongola mu yilemba yetu?

⁸ Muze unakunjika yipikalo ye kuli Yehova mu yilemba, pwako ni shindakenyo ngwe, wamusakwilila ha yuma yipema yize akukulingila. Chili chipema kunyonga ha yuma yipema yize tuli nayo, chipwe ngwe tunapalika mu yipikalo. Nyi chakukaliwa kuwana maliji apema hanga umusakwilile, iwuluka ngwe Yehova kakukumbulula yilemba  chipwe muze mutu akwamba ngwo, ‘Lisesa ngukwase kama!’—2 Sango 18:31; Roma 8:26.

9. Kuchi mutuhasa kupwa ni sambukila yamwenemwene?

⁹ (2) Fuliela mu mana a Yehova, kanda ufuliela a yena mwene. Ha matangwa a profeta Izaia, A-Yunda kapwile ni kwivwa woma ngwo Asuria maalukukila. Kakazangile hanga aatwale mu undungo kuli Asuria, kashika etele ukwaso kuli A-Engitu. (Iza. 30:1, 2) Hachino, Yehova yaatoweza ngwenyi mamona lamba mumu lia kujikijila muli A-Engitu. (Iza. 30:7, 12, 13) Kupalikila muli Izaia, Yehova yasolola kuli atu jenyi chize mahasa kuwana sambukila yamwenemwene. Iye yamba ngwenyi: “Mu uhwimino ni ufulielo mumukapwa tachi jenu.”—Iza. 30:15b.

10. Ha mashimbu aka mutuhasa kusolola ufulielo wetu muli Yehova?

¹⁰ Kuchi mutuhasa kusolola ufulielo wetu muli Yehova? Tutalenu yilweza yimwe. Achinyonga ngwe, makwaha mulimo uze muukukwasa kuzuka mbongo jinji, alioze mufupiwa kukalakala chinji chakuhona kupwa ni mashimbu akuwayila Yehova. Hanji, umwe wa kuli yoze wakukalakala nenyi kanakusolwela zango lia ulo, alioze keshi kavumbi wa Yehova wa kupapachisa. Hanji nawa, umwe wa kuli asoko je yoze wakuzanga chinji, makulweza ngwenyi: “Watamba kusakula nyi mupwa sali liami, nyi sali lia Zambi ye.” Ha hita cheseko, mufupa kukwata chiyulo chikalu, alioze, Yehova makwaha usongwelo uze unafupiwa. (Mateu 6:33; 10:37; 1 Kori. 7:39) Chihula chili chino: Shina mufuliela muli Yehova ni kukaula usongwelo wenyi?

11. Yilweza yika ya mu Mbimbiliya yize muyihasa kutukwasa tulihumikize muze anatuhungumiona?

¹¹ (3) Lilongese ha yilweza yipema ni yipi. Mu Mbimbiliya, muli yilweza yinji yize yinasolola ulemu wa kulihumikiza ni kufuliela muli Yehova. Muze mutulilongesa yilweza yacho, tutalenu yize yakwashile tuvumbi twa Zambi kulihumikiza, chipwe muze apwile mu yipikalo. Chakutalilaho, muze apostolo aakanjishile kwambujola kuli A-Yunda, ayo kakevwile woma. Ni hamu lieswe, apostolo yamba ngwo: “Chatutamba kwononoka kuli Zambi, hi kuli atu ko.” (Yili. 5:29) Chipwe muze aalambile, ayo kakevwile woma. Mumu liaka? Mumu kanyingikine ngwo, Yehova kali sali lio, nawa te kanawahilila hali ayo. Kashika, chino chaakwashile kununga ni kwambujola sango lipema. (Yili. 5:40-42) Chilweza chikwo chipema, chili cha kambaji Eshetevau. Muze te anambe kumushiha, iye yanunga ni kulihumikiza, kashika meso jenyi asolokele ngwe, “meso ja mungelo.” (Yili. 6:12-15) Mumu liaka? Mumu kanyingikine ngwenyi, kali ni utayizo wa Yehova.

12. Kulita ni 1 Petulu 3:14 ni 4:14, mumu liaka mutuhasa kuwahilila chipwe muze anatuhungumiona?

¹² Apostolo kapwile ni shindakenyo yinene ngwo, Yehova kali sali lio. Yehova kaehele ndundo ja kulinga yikomokeso. (Yili. 5:12-16; 6:8) Musono, chino kuchishi kulingiwa. Alioze kupalikila mu Liji lienyi, Yehova kakutwaha shindakenyo ngwetu, muze anatuhungumiona mumu lia ululi, iye kakutukwasa ni spiritu yenyi, nawa kakuwahilila chinji ni yetu. (Tanga 1 Petulu 3:14; 4:14.) Kashika, kanda tunyonga ha yize mutukalinga muze maputuka kutuhungumiona. Alioze, tulihulikilenu ha yize mutuhasa kulinga haliapwila, hanga tujikijile muli Yehova ngwetu mahasa kutukwasa ni kutulamwina. Ngwe chizechene alingile tumbaji atangu, ni yetu twatamba kufuliela mu chilakenyo cha Yesu chinambe ngwo: “Kumungukanwaha kanwa ni mana, aze akwa kulimika ni yenu eswe kechi kahasa kuchinda chipwe kuhamika.” Yesu  yatulakenya nawa ngwenyi: “Mu uhumikizo wenu nukazuke mwono wenu.” (Luka 21:12-19) Twiwulukenu ngwetu, Yehova kechi keza kavulama yuma yize anakamulingila kuli tuvumbi twenyi ashishika. Chino muchikamutwala hanga aahindwise.

13. Yika twalilongesa ha yilweza ya waze kakalihumikijile ni kufuliela muli Yehova?

¹³ Mutuhasa kulilongesa nawa ha yilweza ya waze kakahashile kulihumikiza ni kufuliela muli Yehova. Kulilongesa yilweza yacho yipi, muchitukwasa kwehuka kulinga yuma yize ayo alingile. Chakutalilaho, muze Mwanangana Asa aputukile kuyula mbonge ya Yunda, Yehova yamukwasa kukumba akwa-kole jenyi a ndundo. (2 Sango 14:9-12) Hakupalika cha mashimbu, Mbasha, Mwanangana wa Izalele, yalimika nenyi chipwe ngwe kapwile ni maswalale akehe. Shimbu afuliele muli Yehova ngwe chize alingile, Asa yafuta kuli maswalale a A-Seria hanga amukwase. (2 Sango 16:1-3) Nawa ku songo lia mwono wenyi, muze akwachikile umwe musongo ukalu chinji, nihindu Asa kakafupile ukwaso wa Yehova.—2 Sango 16:12.

14. Yika mutuhasa kulilongesa ha yuma yipi yize Asa alingile?

¹⁴ Ku uputukilo, Asa kafulielele muli Yehova muze te anapalika mu yipikalo. Alioze, hakupalika cha mashimbu, yafupa kuhwisa yipikalo yenyi chakuhona kufupa ukwaso wa Yehova. Ku uputukilo, kwita ukwaso kuli A-Seria, chasolokele ngwe nyonga lipema. Alioze, sambukila yo yanungine wika ha mashimbu akehe. Kupalikila muli profeta wenyi, Yehova yalweza Asa ngwenyi: “Mumu hiwajikijila hali mwanangana wa Seria, kuwajikijilile Yehova Zambi ye, kashika mbunga ya tujita twa mwanangana wa Seria hiyinomboka mu kwoko lie.” (2 Sango 16:7) Kashika, ni yetu twatamba kukeya hanga tuhone kulijikijila yetwene muze tunapalika mu yipikalo, chakuhona kufupa usongwelo wa Yehova mu Mbimbiliya. Chipwe muze tunafupiwa kukwata chimwe chiyulo kawashi-washi, nihindu twatamba kulihumikiza ni kufuliela muli Yehova, mumu iye matukwasa kukwata chiyulo chalita.

15. Yika mutuhasa kulinga muze tunatange Mbimbiliya?

¹⁵ (4) Pachika mu mbunge yisoneko ya Mbimbiliya. Muze unatange Mbimbiliya, muwana yisoneko yize yinasolola ulemu wa kulihumikiza ni kufuliela muli Yehova. Kashika, eseka kupachika versu jacho mu mbunge ye. Chuma chimwe muchikukwasa, chili kutanga yisoneko yacho ni liji mwilu, hanji kuyisoneka homa haze muchipwa chashi kuyiwana nawa. Yehova katumine Yoshua hanga atange mukanda wa Shimbi ni kuupukuna. (Yoshu. 1:8, 9) Chino te muchimukwasa kulinga yuma ni mana ni kukumba woma uze te mevwa ha kulinga mulimo wenyi. Chizechene nawa, yisoneko yinji yize yili mu Mbimbiliya, muyihasa kutukwasa kulihumikiza, chipwe muze tunapalika mu yuma yize muyihasa kutuvwisa woma unji.—Samu 27:1-3; Yishi. 3:25, 26.

16. Kuchi Yehova akuzachisa mandumbu jetu hanga atukwase kulihumikiza ni kufuliela muli iye?

¹⁶ (5) Pwako chinji hamwe ni atu ja Zambi. Kupalikila muli mandumbu jetu, Yehova kakutukwasa kulihumikiza ni kufuliela muli iye. Ha kukunguluka chetu, twakuyuka ni pande, makumbululo ni maliji a utakamiso waze twakuhanjika ni mandumbu jetu. (Hepre. 10:24, 25) Mutuhasa kuwana nawa utakamiso, ha kulweza yize tunevu kuli mandumbu waze twakujikijila mu chikungulwila. Mbimbiliya yakwamba ngwo, “liji lipema” lia umwe sepa, mulihasa kutepulula kulema cha mbunge yetu.—Yishi. 12:25.

17. Kulita ni A-Hepreu 6:19, kuchi kutalatala chetu cha Wanangana chakutukwasa kunyongonona chipwe muze tunapalika mu yipikalo?

 ¹⁷ (6) Kolesa kutalatala che. Kutalatala chetu ku Wanangana wa Zambi chili ngwe, “ankora ya mbunge” yize yakutukwasa kunyongonona chipwe muze tunalipikala. (Tanga A-Hepreu 6:19.) Kashika, pukuna ha chilakenyo chize Yehova hanalingi hakutwala ku chifuchi chaha, muze atu kechi kapwa nawa ni manyonga api. (Iza. 65:17) Nyonga ngwe uli mu chifuchi chaha, cha too ni sambukila, nawa kumushi yuma yize muyikutwala hanga ulinyenge. (Mika 4:4) Muhasa nawa kukolesa kutalatala che ha kwambulwila akwenu sango lipema. Likolweze hanga ukwase mulimo wa kutayisa tumbaji. Nyi wachilinga, muopwa ni “chinyingi liakulu cha kutalatala ndo kusongo.”—Hepre. 6:11.

18. Yika muyikalingiwa kulutwe lia matangwa, nawa yika mutuhasa kulinga?

¹⁸ Tuli ha matangwa a kusula, kashika mutupalika mu yipikalo yeka-ni-yeka. Chisoneko chetu cha mwaka 2021, muchihasa kutukwasa kukumba yipikalo ni kulihumikiza, mumu lia kufuliela muli Yehova chakuhona kufuliela muli yetwene. Kashika, ha mwaka uno, tusololenu ngwetu, twakufuliela ha chilakenyo cha Yehova chinambe ngwo: “Mu uhwimino ni ufulielo mumukapwa tachi jenu.”—Iza. 30:15.