MUTWE WAKULILONGESA 4
Mumu Liaka Twakuya ha Chiwanyino cha Kwiwuluka Kufwa cha Yesu
“Chino lingenu nukangwiwuluke.”—LUKA 22:19.
MWASO 20 Watuhele Mwane Yoze Wazanga Chinji
CHIKUMA CHILEMU *
1-2. (a) Ha mashimbu aka kanji-kanji twakwiwuluka chinji atu waze twafwishile? (b) Yika Yesu alingile ha ufuku muze te hikwasala hakehe hanga afwe?
NYI hitunafwisa atu waze twazanga, chipwe ngwe mukupalika miaka yinji nihindu twakununga ni kwaewuluka. Alioze kanji-kanji, twakwanyonga chinji muze twakuheta ha tangwa lize afwile.
2 Ha hita mwaka, muze twakuheta ha tangwa lize Yesu afwile, tununu a tununu twa atu kakukunguluka hanga ewuluke kufwa chenyi. (1 Petu. 1:8) Tulieswe twakwiwuluka kutalatala chize tukwete mumu lia yize Yesu alingile hali yetu. Iye kahanyine mwono wenyi ngwe ukuule hanga atutusule ku shili ni kufwa. (Mateu 20:28) Nawa Yesu kazangile hanga tumbaji twenyi ewuluke kufwa chenyi. Kashika, ha ufuku muze te kanda achifwa, Yesu yalinga chiwanyino chilemu ni kuhana shimbi ngwenyi: “Chino lingenu nukangwiwuluke.” *—Luka 22:19.
3. Yika mutumona ha mutwe uno?
3 Ha unji wa atu eswe waze akuya ha Chiwanyino cha Kwiwuluka Kufwa cha Yesu, akehe wika e akwete kutalatala cha kuya mu malilu. Alioze anji a kuli ayo kali ni kutalatala cha kutwama hano hashi. Ha mutwe uno, mutumonaho yize yakutulingisa mba tuye ha Chiwanyino cha Kwiwuluka Kufwa cha Yesu hita mwaka, chipwe ngwe tuli ni kutalatala cheswacho. Mutumonaho
nawa yize mutuyuka ha kuya ha chiwanyino chacho. Chitangu, tutalenu mumu liaka akwa-Kristu akuwayisa atamba kuya ha chiwanyino cha kufwa cha Yesu.MUMU LIAKA AKWA-KRISTU AKUWAYISA AKUYA HA CHIWANYINO CHA MWENE?
4. Mumu liaka akwa-Kristu akuwayisa akulia mbolo ni kunwa vinyu ha Chiwanyino cha Mwene?
4 Akwa-Kristu akuwayisa kakuya ha Chiwanyino cha Mwene hita mwaka nawa kakulia mbolo ni kunwa vinyu. Mumu liaka ayo akulia mbolo ni kunwa vinyu? Mba tunyingike kanawa chikuma chino, chitangu tutalenu yize Yesu alingile ha ufuku wenyi wa kasula hano hashi. Hanyima lia kulinga Chizomboka, Yesu yaputuka chiwanyino chize twakuvuluka ngwo, Chiwanyino cha Mwene cha Ufuku. Ha chiwanyino chacho, Yesu yapalikisa mbolo ni vinyu kuli apostolo jenyi ashishika 11 ni kwalweza hanga alie mbolo ni kunwa vinyu. Chikwo nawa, Yesu yaalweza hakutwala ku usendo waali—usendo waha ni usendo wa Wanangana. * (Luka 22:19, 20, 28-30) Usendo uno wazulwile jila hanga apostolo jacho ni akwa-Kristu akwo akuwayisa apwe mianangana ni asasendote mu malilu. (Uso. 5:10; 14:1) Masalila ja akwa-Kristu akuwayisa, * e wika akulia mbolo ni kunwa vinyu ha Chiwanyino cha Mwene, mumu kanalingi chihanda cha usendo weswe waali.
5. Yika akwa-Kristu akuwayisa ananyingika hakutwala ku kutalatala cho?
5 Kuli chikuma chikwo chize chakutwala akwa-Kristu akuwayisa mba alemese chinji Chiwanyino cha Mwene. Ayo kakuchilinga mumu Chiwanyino chacho chakwaha uhashi wa kupukuna ha kutalatala cho. Yehova hanaehe kutalatala chalipwila—cha kupwa ni mwono wa mutolo mu malilu ni kukalakala hamuwika ni Yesu Kristu ni akwa-Kristu akwo akuwayisa. Ayo makapwa nawa ni uhashi wa kumona Yehova Zambi ni meso jo! (1 Kori. 15:51-53; 1 Yoa. 3:2) Akwa-Kristu akuwayisa kananyingika ngwo, makapwa ni yiwape yacho mu malilu. Alioze mba aye mu malilu, katamba kushishika kuli Yehova ndo ni kukufwa cho. (2 Timo. 4:7, 8) Akwa-Kristu akuwayisa kakuwahilila chinji muze akupukuna ha kutalatala cho. (Titu 2:13) Mba yika mutwamba hali “mapanga akwo?” (Yoa. 10:16) Mumu liaka no akuya ha Chiwanyino cha Mwene?
MUMU LIAKA MAPANGA AKWO AKUYA HA CHIWANYINO CHA MWENE?
6. Mumu liaka mapanga akwo akuya ha Chiwanyino cha Mwene hita mwaka?
6 Mapanga akwo kakuya ha Chiwanyino cha Mwene, alioze keshi kulia mbolo ni kunwa vinyu, ayo kakuwahilila wika ha kupwaho. Ha chisuho chitangu chize asanyikine waze ali ni kutalatala cha kutwama hano hashi ha Chiwanyino cha Mwene, chapwile ha mwaka 1938. Kaposhi wa Kutalila 1 wa Março 1938 kambile ngwo: “Chinalite [mapanga akwo] kupwa ha kukunguluka chino hanga amone chize akuchilinga. . . . Mumu wano kali mashimbu waze no atamba kuwahilila.” Mapanga akwo kakuwahilila chinji ha kupwa ha Chiwanyino cha Mwene, ngwe chizechene akuwahilila atu waze akusanyika ha chiwanyino cha umbachiso.
7. Mumu liaka mapanga akwo akuzanga kupanjika pande ja ha Chiwanyino cha Mwene?
7 Mapanga akwo no kakupukuna ha kutalatala cho. Ayo kakuzanga chinji kupanjika pande ja ha Chiwanyino cha Mwene. Pande jacho jakuhanjika ha yize Yesu ni akwa-Kristu akuwayisa 144,000, makalingila atu ha Kanunu ka Miaka ya Kuyula cha Yesu. Kupalikila mu usongwelo wa Yesu, akwa-Kristu akuwayisa makapwisa hashi heswe paraisu ni kukwasa atu ashishika hanga apwe angunu. Tununu twa atu waze akupwa ha Chiwanyino cha Mwene, kakuwahilila ha kunyonga chize yuma muyikapema hano hashi muze uprofeto uli ha Izaia 35:5, 6; 65:21-23; ni Usolwelo 21:3, 4 muukamanunuka. Kunyonga ha mwono uze mutukapwa nawo mu paraisu hamwe ni asoko ni masepa jetu, chakutukwasa kukolesa kutalatala chetu cha kulutwe ni chiyulo chetu cha kununga ni kuwayila Yehova.—Mateu 24:13; Ngala. 6:9.
8. Chikuma chikwo chika chize mapanga akwo akuyila ha Chiwanyino cha Mwene?
8 Tutalenu chikuma chikwo chize chakutwala mapanga akwo hanga aye ha Chiwanyino cha Mwene. Ayo kakuchilinga hanga asolole zango ni ukwaso wo kuli akwa-Kristu akuwayisa. Mbimbiliya yaprofetezele ngwo, akwa-Kristu akuwayisa ni mapanga akwo te makalakala chimuwika. Mu mulali uka? Tuhengwolenu yilweza yimwe.
9. Kuchi uprofeto wa Zekaria 8:23 unasolola yize mapanga akwo akwivwa hali akwa-Kristu akuwayisa?
9 Tanga Zekaria 8:23. Uprofeto uno unalumbununa chize mapanga akwo akwivwa hakutwala kuli mandumbu jo akuwayisa. Maliji “Ka-Yunda” ni “yenu,” kanatale hali chizavu chimuwika hanji ngwetu, masalila ja akwa-Kristu akuwayisa. (Roma 2:28, 29) “Kumi lia malunga a ku mavungu a malimi eswe,” kanalumbunuka mapanga akwo. Ayo ‘kakukwata’ hanji ngwetu, kushishika hamuwika ni akwa-Kristu akuwayisa ha kuwayila no Yehova. Kashika akusa tachi hanga aye ha Chiwanyino cha Mwene ni kukwasa ni mbunge yeswe akwa-Kristu akuwayisa.
10. Kuchi Yehova anamanununa uprofeto uli ha Ezekiele 37:15-19, 24, 25?
10 Tanga Ezekiele 37:15-19, 24, 25. Yehova kanamanununa uprofeto uno ha kukwasa akwa-Kristu akuwayisa ni mapanga akwo hanga akalakale hamuwika ni kulinunga. Uprofeto wacho unahanjika ha mitondo yaali. Waze ali ni kutalatala cha kuya mu malilu kali ngwe “mutondo wa Yunda” (munyachi uze Yehova apwile ni kusakula mianangana). Nawa waze ali ni kutalatala cha kutwama hano hashi kali ngwe “mutondo wa Eframe.” * Yehova te manunga yizavu yino yaali hanga yipwe “mutondo umuwika.” Chino chinalumbunuka ngwo, yizavu yino yiali te muyikalakala hamuwika ni kwononokena Mwanangana wo, Yesu Kristu. Chino chakusoloka muze akwa-Kristu akuwayisa ni mapanga akwo akuya ha Chiwanyino cha Mwene hita mwaka, hi ngwe yizavu yiali yalihandununa ko, alioze ngwe “chendo chimuwika” ni “kafunga umuwika.”—Yoa. 10:16.
11. Kuchi mapanga waze anatongola ha Mateu 25:31-36, 40, akukwasa mandumbu ja Kristu?
11 Tanga Mateu 25:31-36, 40. “Mapanga” waze Yesu ambile ha chisoneko chino aya? Ayo kali akwa-ululi waze ali ha matangwa wano a kusula nawa ali ni kutalatala cha kutwama hano hashi. Yesu kaavulukile nawa ngwo, mapanga akwo. Mapanga wano kali ni chiteli chinene cha kukwasa akwa-Kristu akuwayisa waze achili hano hashi. Ayo kakuchilinga ha kwambujola sango lipema hashi heswe ni kutayisa tumbaji.—Mateu 24:14; 28:19, 20.
12-13. Majila akwo aka waze mapanga akwo akukwashilamo mandumbu ja Kristu?
12 Hita mwaka, ha jimwe poso muze Chiwanyino cha Mwene kanda chiputuka, mapanga Shina Unalilulieka Hakutwala ku Chiwanyino cha Mwene?”) Mapanga akwo kakululieka nawa Chiwanyino cha Mwene mu yikungulwila yo, chipwe ngwe kumushi niumwe mukwa-Kristu wakuwayisa. Ayo kakuzanga chinji kukwasa mandumbu a Kristu mu mutapu uno. Mapanga akwo kananyingika ngwo, kuli Yesu, yeswayo malinga hanga akwase akwa-Kristu akuwayisa, iye anayilingila.—Mateu 25:37-40.
akwo kakukwasa mandumbu ja Kristu ha kulinga kwambujola chalipwila hashi heswe. Ayo kakulinga mulimo wacho hanga asanyike atu waze akuzanga umwenemwene ha Chiwanyino cha Mwene. (Tala mushete, “13 Mumu liaka tulieswe twakuya ha Chiwanyino cha Mwene, chipwe ngwe tuli ni kutalatala cha mwono wa mutolo mu malilu hanji hano hashi?
MUMU LIAKA TULIESWE TWAKUYA HA CHIWANYINO CHA MWENE?
14. Mu mutapu uka Yehova ni Yesu asolwele zango lio hali yetu?
14Kuya ha Chiwanyino cha Mwene yili jila yize twakusakwililamo Yehova ni Yesu ha zango lize asolwele hali yetu. Yehova hanasolola ngwenyi kakutuzanga mu majila anji. Alioze jila yimwe yalisa chinji ni majila akwo. Mumu lia zango, Yehova yatuma Mwanenyi azanga chinji hanga amone lamba ni kutufwila. (Yoa. 3:16) Chikwo nawa, yetu twakusakwilila Yesu ha chize ahanyine mwono wenyi hali yetu chakuhona kumushinjila. (Yoa. 15:13) Yetu kutuchi kuhasa kufweta Yehova ni Yesu ha zango lieswe lize anakatusolwela. Alioze mutuhasa kusolola ngwetu, twakwasakwilila ha chize twakumbata mwono wetu wa hita tangwa. (Kolo. 3:15) Kashika twakuya ha Chiwanyino cha Mwene. Ha chiwanyino chacho, mutuhasa kupukuna ha zango lize ayo akwete hali yetu ni kusolola zango lietu hali ayo.
15. Mumu liaka ukuule ukwete ulemu kuli akwa-Kristu akuwayisa ni kuli mapanga akwo?
15Twakulemesa chinji chawana cha ukuule. (Mateu 20:28) Akwa-Kristu akuwayisa kakulemesa chinji ukuule, mumu we wakwaha kutalatala cha kuya mu malilu. Mumu lia kufuliela ha chitapo cha Kristu, ayo hanapu akwa-ululi kumeso ja Yehova ni kwapwisa ana jenyi. (Roma 5:1; 8:15-17, 23) Ukuule ukwete nawa ulemu kuli mapanga akwo. Mumu lia kufuliela ha chitapo cha Kristu, mapanga akwo kali ni mbunge yitoma kumeso ja Yehova, kakumulingila mulimo usandu nawa kali ni kutalatala cha kwalamwina ha “luyinda munene.” (Uso. 7:13-15) Kashika, chipwe ngwe uli ni kutalatala cha kuya mu malilu hanji kutwama hano hashi, nihindu muhasa kusolola ngwo wakulemesa ukuule ha kuya ha Chiwanyino cha Mwene hita mwaka.
16. Chikuma chikwo chika twakuyila ha Chiwanyino cha Mwene?
16 Chikuma chikwo chize twakuyila ha Chiwanyino cha Mwene, chili ngwo, twakuzanga kwononokena Yesu. Yetweswe twatamba kwononokena shimbi yize Yesu ahanyine, chipwe ngwe tuli ni kutalatala cheswacho. Ha ufuku muze te kanda achifwa, Yesu yalinga Chiwanyino cha Mwene ni kwamba ngwenyi: “Lingenu chino nikungwiwuluka.”—1 Kori. 11:23, 24.
YIZE TWAKUYUKA HA KUYA HA CHIWANYINO CHA MWENE
17. Mu jila yika Chiwanyino cha Mwene chakutukwasa kukundama kuli Yehova?
17Twakukundama kuli Yehova. (Tia. 4:8) Ngwe chize twamona, Chiwanyino cha Mwene chakutwaha uhashi wa kunyonga ha kutalatala chize Yehova hanatwehe ni kupukuna ha zango linene lize anakatusolwela. (Jere. 29:11; 1 Yoa. 4:8-10) Nawa muze twakuchilinga, zango lietu hali Yehova liakukola chinji ni kukundama kuli iye.—Roma 8:38, 39.
18. Kupukuna ha chilweza cha Yesu chakutukwasa kulinga yika?
1 Petu. 2:21) Muze tangwa lia Chiwanyino cha Mwene kanda liheta, twakutanga lusango wa Yesu mu Mbimbiliya hakutwala ku poso yenyi ya kasula hano hashi, kufwa ni uhindukilo wenyi. Ha Chiwanyino chacho, pande jize akuhanjikaho, jakutwiwulula zango lize Yesu asolwele hali yetu. (Efwe. 5:2; 1 Yoa. 3:16) Muze twakutanga ni kupukuna ha chilweza cha Yesu, chakutukwasa ‘twende ngwe chize iye endele.’—1 Yoa. 2:6.
18Twakuzanga kwimbulula chilweza cha Yesu. (19. Yika muyihasa kutukwasa mba tununge ni kukolesa usepa wetu ni Yehova?
19Twakusa tachi hanga tununge ni kupwa masepa ja Yehova. (Yunda. 20, 21) Usepa wetu ni Yehova muununga ni kukola nyi mutumwononokena, mutusa tachi hanga tuhalise jina lienyi ni kumuvwisa kuwaha ku mbunge. (Yishi. 27:11; Mateu 6:9; 1 Yoa. 5:3) Kuya ha Chiwanyino cha Mwene, chakutukwasa hanga tununge ni kulinga yuma yize Yehova akuzanga. Chino chakupwa ngwe tunamulweze ngwetu: ‘Tunazange kukulingila ku miaka yeswe!’
20. Yika nawa muyihasa kutukwasa mba tukapwe ha Chiwanyino cha Mwene?
20 Chipwe ngwe tuli ni kutalatala cha kuya mu malilu hanji kutwama hano hashi, tulieswe tunafupiwa kupwa ha Chiwanyino cha Mwene. Wano kakupwa mashimbu waze twakwiwuluka kufwa cha mutu yoze twazanga chinji, Yesu Kristu. Chahiana yeswe, twakwiwuluka zango linene lize Yehova asolwele hali yetu ha kuhana Mwanenyi ngwe chitapo. Ha mwaka uno, Chiwanyino cha Mwene muchikapwa Liamatano 15 ya Abril 2022. Twakuzanga Yehova ni Mwanenyi. Kashika, kukushi nichimwe chuma chilemu chinji kuli yetu kuhiana kupwa ha Chiwanyino cha Kwiwuluka Kufwa cha Yesu.
MWASO 16 Halisenu Zambi Mumu lia Mwanenyi Yoze Awayisa
^ kax. 5 Chipwe ngwe tuli ni kutalatala cha kuya mu malilu hanji cha kutwama mu paraisu hano hashi, nihindu chili kuyuka chinene kuli yetu kuya ha Chiwanyino cha Kwiwuluka Kufwa cha Yesu hita mwaka. Ha mutwe uno, mutushimutwinaho chize Mbimbiliya yinatukolweza hanga tupwe ni kuya ha chiwanyino cha Mwene ni yize mutuyuka ha kuyaho.
^ kax. 2 Maliji wano kanaalumbununa nawa mu Mbimbiliya jikwo ngwo: “Nungenu ni kulinga chino nukangwiwuluke,” (NWT) nawa ngwo, “Lingenu chino ni kungwiwuluka.” (MW 1991)
^ kax. 4 Nyi unazange kunyingika nawa sango jikwo hakutwala ku usendo waha ni usendo wa Wanangana, yako ha longeso, “Vocês se Tornarão ‘um Reino de Sacerdotes’” ha Kaposhi wa Kutalila wa 15 ya Outubro, 2014, mafwo 15-17.
^ kax. 4 ULUMBUNWISO WA AMWE MALIJI: Liji masalila ja akwa-Kristu akuwayisa, linatale hali akwa-Kristu akuwayisa waze achili ni mwono hano hashi.
^ kax. 10 Mba unyingike yuma yinji hakutwala ku mitondo yiali yize yili mu Ezekiele kapitulu 37, tala mukanda, Adoração Pura de Jeová É Restaurada! mafwo 130-135, paragrafu 3-17.