MUTWE WAKULILONGESA 1
“Waze Akufupa Yehova Kechi Kuhona Nichimwe Chuma Chipema”
CHISONEKO CHETU CHA MWAKA 2022: “Waze akufupa Yehova kechi kuhona nichimwe chuma chipema.”—SAMU 34:10.
MWASO 4 “Yehova Iye Kafunga Kami”
CHIKUMA CHILEMU *
Ndawichi kanyingikine ngwenyi kakahonene “nichimwe chuma chipema” chipwe muze te akupwa ha mashimbu akalu (Tala maparagrafu 1-3) *
1. Mu kapinda muka Ndawichi apalikile?
NDAWICHI te kanachina hanga alamwine mwono wenyi. Mumu Saulu, mwanangana wa ndundo mu Izalele, te kanafupu kumushiha. Muze Ndawichi afupile yuma ya kulia yatula mu mbonge ya Nobe, koko yeta mbolo jitano. (1 Samue. 21:1, 3) Hanyima, iye ni atu jenyi yaya ni kuswama ku chivwenge. (1 Samue. 22:1) Kuchi chapwile mba Ndawichi apalike mu yuma yacho?
2. Kuchi Saulu alisele mu ponde? (1 Samuele 23:16, 17)
2 Saulu te kakwivwila Ndawichi ukwa mumu atu anji kapwile ni kumuzanga ni kumulemesa hamukunda wa kukumba jita jinji. Saulu kanyingikine nawa ngwenyi, Yehova kalitunyineyo ngwe mwanangana mu Izalele mumu lia kuhona kumwononokena nawa ngwenyi hanasakula Ndawichi hanga amusalakane. (Tanga 1 Samuele 23:16, 17.) Chipwe chocho, amu te uchili mwanangana mu Izalele, Saulu kapwile ni tujita ni atu anji waze te akumukwasa, kashika Ndawichi achinyine hanga alamwine mwono wenyi. Shina Saulu te mahasa kukwika Zambi kupwisa Ndawichi mwanangana? (Iza. 55:11) Mbimbiliya kuyambile niyimwe ha chikuma chacho. Alioze mutuhasa kupwa ni shindakenyo ngwetu, Saulu te kanalise mu ponde. Mumu waze akwasa jita ni Zambi nihindu keshi kukumba!
3. Kuchi Ndawichi alivwile chipwe muze apwile mu ponde?
3 Ndawichi kapwile mukwa-kulikehesa. Hi iye ko wasakwile kupwa mwanangana mu Izalele. Yehova mwe wamusakwile. (1 Samue. 16:1, 12, 13) Saulu kamwene Ndawichi ngwe mukwa-kole yoze watela kufwa. Alioze, Ndawichi kakasumine Yehova mulonga mumu lia kupwa mu ponde yacho; nawa kakalinyenyetele ha kupwa ni kulia chikehe ni ha kuswama ku chivwenge. Shimbu achilinge, muze te anaswame mu chivwenge, iye yemba mwaso wa uhaliso uze uli ni maliji a chisoneko chinakwate mutwe uno, anambe ngwo: “Waze akufupa Yehova kechi kuhona nichimwe chuma chipema.”—Samu 34:10.
4. Yihula yika mutukumbulula ha mutwe uno, nawa mumu liaka yili yilemu?
4 Musono, tuvumbi twa Yehova anji kanahono kulia ni yuma yikwo yize akufupiwa ku mwono. * Yino yakulingiwa kuli Yela ja Yehova anji, chipi-chipi ha mashimbu wano a musongo wa Covid-19. Nawa amu “luyinda munene” anakundama, mutupalika mu yuma yikalu chinji. (Mateu 24:21) Mumu lia yikuma yino, mutukumbulula yihula yiwana: Mu mulali uka Ndawichi “kakahonene nichimwe chuma chipema”? Mumu liaka twatamba kuwahilila ni yuma yize tuli nayo? Mumu liaka mutuhasa kufuliela ngwetu, Yehova matufunga ni kutwaha yize mutufupiwa? Nawa kuchi mutuhasa kulilulieka haliapwila ha yuma yize muyiza kulutwe?
“CHICHI KUHONA NICHIMWE”
5-6. Kuchi Samu 23:1-6 unatukwase kunyingika yize Ndawichi ambile kwamba muze ambile ngwenyi, tuvumbi twa Zambi “kechi kuhona nichimwe chuma chipema”?
5 Yika Ndawichi ambile kwamba muze ambile ngwenyi, tuvumbi twa Yehova “kechi kuhona nichimwe chuma chipema”? Muze Ndawichi asonekene Samu 23, iye kazachishile maliji alifwa ni a chisoneko chinakwate mutwe uno. Kashika Samu yino muyihasa kutukwasa tunyingike yize ambile kwamba. (Tanga Samu 23:1-6.) Ndawichi kaputukile Samu 23 ni maliji anambe ngwo: “Yehova iye kafunga kami. Chichi kuhona nichimwe.” Ha versu jikwo ja Samu yino, Ndawichi kanatongola yuma yilemu chinji. Yuma yacho, yinachingi yiwape yize Yehova amuhele mumu lia kumutayiza ngwe Kafunga kenyi. Yehova kanakasongwela Ndawichi “mu majila a ululi,” ni kumukwasa ni ushishiko weswe ha mashimbu apema ni api. Ndawichi kanyingikine ngwenyi, mahasa kupalika mu kapinda chipwe ngwe kali mu “kelo” ya Yehova. Ha mashimbu amwe, te mahasa kuhonga ni kulivwa ngwe kanende mu “chikulo cha chizulie cha kufwa [hanji mu milima yahiana, MW 1991]” ni kupwa ni akwa-kole. Alioze, amu Yehova apwile Kafunga kenyi, Ndawichi ‘kakevwile woma wa chipi nichimwe.’
6 Haliapwila tukumbululenu chihula chino: Mu mulali uka Ndawichi “kakahonene nichimwe chuma chipema”? Iye kapwile ni yeswe yize te anafupiwa hanga anunge ni kupwa hamuwika ni Yehova. Kakafupiwile kupwa ni yikumba yinji, mba awahilile. Ndawichi kapwile ni kuwahilila ni yuma yize Yehova amuhele. Chuma apwile ni kulemesa chinji chapwile chize Zambi te akumuwahisa ni kumufunga.
7. Kulita ni Luka 21:20-24, kapinda muka apalikile akwa-Kristu ku sekulu yitangu waze apwile mu Yundeya?
7 Maliji a Ndawichi mahasa kutukwasa tumone ngwetu, chili chilemu kupwa ni nyonga lialita hakutwala ku yikumba. Mutuhasa kupwa ni yikumba yeswayo, alioze kutwatambile kuyisa ha chihela chitangu ku mwono wetu. Akwa-Kristu a ku sekulu yitangu waze apwile mu Yundeya, kanyingikine kanawa umwenemwene wacho. (Tanga Luka 21:20-24.) Yesu kaatowezele ngwenyi, te mukuheta mashimbu waze Yerusaleme ‘mayijingilika kuli maswalale.’ Muze yino yalingiwile, ayo kafupiwile ‘kuchinyina ku milundu.’ Nyi matuhuka mu mbonge te manunga ni mwono, alioze te mahichika yuma yinji kunyima. Ha yimwe miaka kunyima, Kaposhi wa Kutalila yamba ngwo: “Ayo kahichikile minda ni mazuwo, nawa kakanjile niyimwe yikumba ya mu mazuwo jo. Yajikijila ha ufunge ni ukwaso wa Yehova, chocho yasa uwayilo wenyi ha chihela chitangu kuhiana yuma yeswayo yize te yakusoloka ngwe yilemu.”
8. Yika mutuhasa kulilongesa ha yize yalingiwile kuli akwa-Kristu ku sekulu yitangu waze apwile mu Yundeya?
8 Yika mutuhasa kulilongesa ha yize yalingiwile kuli akwa-Kristu ku sekulu yitangu waze apwile mu Yundeya? Kaposhi wa Kutalila yoze hitwatongola yamba ngwenyi: “Kulutwe mutuhasa kupalika mu yeseko yize muyisolola ulemu uze yikumba yikwete ku mwono wetu. Shina yikumba yikwete ulemu unji ku mwono wetu, nyi hanji chili chilemu kutulamwina mumu lia kushishika kuli Zambi? Muze songo muliheta, hanji mutupalika mu yipikalo ni kwecha kulinga yuma yimwe. Kashika, twatamba kulilulieka ni kulinga yeswayo mutuhasa ngwe chize alingile akwa-Kristu ku sekulu yitangu waze achinyine mu Yundeya.” *
9. Longeso lika wawana ha chiyulo chize postolo Paulu ahanyine kuli A-Hepreu?
9 Achinyonga chize chapwile chikalu kuli akwa-Kristu jacho kuhichika yuma yo yeswe ni kuputuka mwono waha! Ayo katambile kufuliela ngwo, Yehova te maakwasa kuwana yuma yeswe yize mafupiwa. Alioze, kapwile ni umwe ukwaso. Ha miaka yitano kulutwe, muze A-Roma te kanda achijingilika Yerusaleme, postolo Paulu kahanyine utowezo upema kuli A-Hepreu, unambe ngwo: “Ndako jenu jikapwe kujishi kufwila cha mbongo; pwenu akwa kuyuka ni yuma yize nuli nayo; mumu iye mwene hanambe ngwenyi, Chichi kukuhichika nichimwe, chipwe kukwehuka, ka. Chocho ni kuhamuka tunambe ngwetu, Mwene iye Chikwashi chami; chichi kevwa woma. Atu yika mangulinga?” (Hepre. 13:5, 6) Kwamba pundu, waze atayijile chiyulo chize Paulu ahanyine shimbu A-Roma te kanda achijingilika Yerusaleme, chapwile chashi kuli ayo kwijilila ni mwono washi kuze ayile. Ayo katambile kupwa ni shindakenyo ngwo, Yehova te maaha yuma yize mafupiwa ku mwono. Ni yetu, maliji wano a Paulu kanatwehe shindakenyo ngwetu, Yehova matwaha yeswayo mutufupiwa ku mwono.
‘CHATUTAMBA KUWAHILILA NAYO’
10. Yika Paulu alilongesele yize muyihasa kutukwasa?
10 Paulu kahanyine chiyulo chalifwa kuli Timoteu chize chinatale ni hali yetu. Iye yasoneka ngwenyi: ‘Nyi tuli ni ya kulia ni ya kuzala, chatutamba kuwahilila nayo.’ (1 Timo. 6:8) Shina chino chinalumbunuka ngwo, kutwatambile kulia kanawa, kupwa ni zuwo lipema hanji kulanda mazalo aha ha mashimbu amwe? Hi yino ko Paulu azangile kwamba. Iye te kanambe ngwenyi, chatutamba kuwahilila ni yuma yeswayo tuli nayo. (Fwili. 4:12) Yino ye Paulu alilongesele. Chuma chilemu ku mwono wetu, chili usepa wetu ni Yehova, hi yikumba ko.—Haba. 3:17, 18.
A-Izalele ‘kakahonene nichimwe’ ha miaka 40 muze apwile mu puya. Shina yetu mutuhasa kuwahilila ni yize tuli nayo musono? (Tala paragrafu 11) *
11. Yika twalilongesa ha yize Mose ambile kuli A-Izalele hakutwala ku kuwahilila ni yize tuli nayo?
11 Mutapu uze Yehova akumwenamo yuma yize tunafupiwa, muuhasa kulisa ni wa yetu. Tutalenu yize Mose ambile kuli A-Izalele hanyima lia miaka 40 mu puya: “Yehova Zambi yenu hananuwahisa ni milimo yeswe ya moko jenu, iye hananyingika kwendangana chenu mu puya yino yinene. Makumi aze awana a miaka Yehova wapwile hamwe ni yenu, kunwahonene nichimwe.” (Shimbi 2:7) Ha miaka yeswe 40, Yehova kapwile ni kulisa A-Izalele ni manaa. Mazalo jo waze akatukile no ku Engitu kakasuwikile. (Shimbi 8:3, 4) Chipwe ngwe amwe a kuli ayo kamwene ngwe yuma yacho te kuyishi kwakumbana, nihindu Mose yewulula A-Izalele ngwo, ayo kapwile ni yuma yeswe yize te anafupiwa. Yehova mevwa kuwaha nyi mutulilongesa kuwahilila ni yuma yize tuli nayo. Iye kanazange hanga tusakwilile ha yuma yeswe yize akutwaha, ni kunyingika ngwo, yili yawana yenyi.
TUFULIELENU NGWETU YEHOVA MATUKWASA
12. Yika yinasolola ngwo Ndawichi te kakufuliela muli Yehova, hi muli mwene ko?
12 Ndawichi kanyingikine ngwenyi, Yehova kashishika kuli atu jenyi nawa kakufunga waze akumuzanga. Chipwe ngwe mwono wenyi wapwile mu ponde, muze asonekene Samu 34, iye kapwile ni ufulielo ukolo muli Yehova, kashika anyingikine ngwenyi, “mungelo wa Yehova” katungile chilombo “cha kujingilika” hali iye. (Samu 34:7) Ndawichi kota katesele mungelo wa Yehova ni kajita uli mu chilombo, yoze wakununga ni kutalatala nyi kuneza mukwa-kole. Chipwe ngwe Ndawichi kapwile kajita wa hamu, nawa Yehova kamulakenyene ngwenyi mapwa mwanangana, nihindu iye te keshi kujikijila ha utotombo wenyi wa kwasa mawe, hanji kuzachisa katana hanga akumbe mukwa-kole. (1 Samue. 16:13; 24:12) Iye kanakajikijila muli Yehova ni kufuliela ngwo, mungelo wa Yehova ‘kakupulula waze akumuvwila woma.’ Chipwe ngwe ha mashimbu wano kutushi kushimbwila hanga atufunge kupalikila mu chikomokeso, alioze tunanyingika ngwetu, waze eswe akufuliela muli Yehova, makazuka mwono wa mutolo chipwe ngwe mafwa musono.
Ha mashimbu a luyinda munene, chizavu cha Ngoke wa Mangoke muchihasa kutulukukila ku mazuwo. Alioze mutuhasa kupwa ni utakamiso ha kunyingika ngwetu, Yesu ni angelo kanamono yeswe yize yinalingiwa nawa meza ni kutupulula (Tala paragrafu 13)
13. Muze Ngoke wa Mangoke makatulukukila, mumu liaka muchikasoloka ngwe chili chashi kutunongesa, alioze shindakenyo yika mutukapwa nayo?
13 Kwasala hakehe, ufulielo wetu ha ufunge wa Yehova muupwa mu cheseko. Muze Ngoke wa Mangoke, chimwe chizavu cha akwa-mavungu, muchikalukukila atu ja Zambi, mwono wetu muukapwa mu ponde. Kashika, mutukafupiwa kupwa ni shindakenyo ngwetu, Yehova makahasa kutupulwila. Kuli akwa-mavungu, yetu mutukasoloka ngwe mapanga waze keshi ni yoze maafunga. (Eze. 38:10-12) Kutuchi kapwa ni mata, nawa kutuchi katambula fumbo lia kwasa jita. Akwa-mavungu makanyonga ngwe muchipwa chashi kutunongesa. Ayo kanyingikine ngwo, angelo ja Yehova kanalilulieka hanga akatufunge. Alioze yetu tunachinyingika mumu tuli ni ufulielo. Akwa-mavungu keshi kufuliela muli Zambi. Ayo makakomoka chinji ha kumona chize angelo anatwashila jita!—Uso. 19:11, 14, 15.
LILULIEKE HALIAPWILA HA YIZE MUYILINGIWA KULUTWE
14. Yika mutuhasa kulinga haliapwila mba tulilulieke ha yize muyilingiwa kulutwe?
14 Kuchi mutuhasa kulilulieka haliapwila hakutwala ku yize muyilingiwa kulutwe? Chitangu, kutwatambile kulemesa chinji yikumba, mumu tangwa limwe mutukayihichika. Tunafupiwa nawa kuwahilila ni yuma yize tuli nayo ni kuwahilila mumu lia usepa wetu ni Yehova. Chuma chilemu chili kunyingika Zambi, ni kupwa ni shindakenyo ngwo, iye kali ni ndundo ja kutupulwila muze Ngoke wa Mangoke makatulukukila.
15. Yika yalingiwile kuli Ndawichi muze apwile mukweze yize yasolwele ngwo Yehova te kakumukwasa mashimbu eswe?
15 Tutalenu yize yakwashile Ndawichi, ni yize muyihasa kutukwasa hanga tulilulieke ha yeseko yize muyiza kulutwe. Ndawichi kambile ngwenyi: “Panjikenu nukambe ngwenu, Yehova iye mupema; kawaha mweswe maswama muli iye.” (Samu 34:8) Maliji wano kanasolola yize yatwalile Ndawichi anyingikine ngwenyi, katamba kujikijila ha ukwaso wa Yehova. Kanji-kanji Ndawichi te kakujikijila muli Yehova, nawa iye kakamwehukile. Muze apwile mukweze, Ndawichi kalimikine ni Ngoliate Ka-Filistea ni kulweza kajita yono wa ndundo ngwenyi: “Tangwa lino Yehova makukunjika mu moko jami.” (1 Samue. 17:46) Ha kupalika cha matangwa, Ndawichi yaputuka kukalakalila mwanangana Saulu yoze wafupile kumushiha ha yisuho yinji. Alioze, ‘Yehova kapwile hamwe’ nenyi. (1 Samue. 18:12) Amu Ndawichi amwene chize Yehova amukwashile kunyima, iye kanyingikine ngwenyi te mamukwasa nawa mu yipikalo yize anapalika.
16. Mu majila aka mutuhasa kwesekelamo Yehova hanga tumone ngwetu kali mupema?
16 Nyi twanunga ni kufupa usongwelo wa Yehova haliapwila, mutufuliela ha ndundo jenyi ja kutulamwina kulutwe lia matangwa. Tunafupiwa kupwa ni ufulielo ni mbunge ya kulihana mba twite mashimbu kuli mwata wetu ku mulimo hanga tuye ku kukunguluka cha mbonge hanji cha mambonge, ni kumwita alumune maola a milimo hanga tuhase kukunguluka ha poso jeswe ni kwambujola chinji. Achinyonga nyi mwata wa ku mulimo katayijile yize twamwita nawa mututokesa mulimo wetu. Shina mutufuliela ngwetu, Yehova kechi kutuhichika ukawetu nawa manunga ni kutwaha yeswe yize mutufupiwa? (Hepre. 13:5) Mandumbu anji waze ali mu mulimo wa shimbu lieswe, mahasa kutulweza chize Yehova aakwashile ha mashimbu waze te anafupu chinji ukwaso wenyi. Kwamba pundu, Yehova kashishika kuli atu jenyi.
17. Chisoneko chika asakula ha mwaka 2022, nawa mumu liaka chinalite?
17 Amu Yehova ali sali lietu, kutwatambile kwivwa woma wa yize muyilingiwa kulutwe. Zambi yetu matukwasa nyi twanunga ni kusa Wanangana wenyi ha chihela chitangu ku mwono wetu. Mba atukwase kulilulieka haliapwila ha yeseko yize muyiza kulutwe ni kufuliela ngwetu Yehova kechi katwehuka, Chizavu cha Tusongo kasakula Samu 34:10 yinambe ngwo: “Waze akufupa Yehova kechi kuhona nichimwe chuma chipema,” hanga yipwe chisoneko cha mwaka 2022.
MWASO 38 Zambi Makutakamisa
^ kax. 5 Chisoneko chetu cha mwaka 2022, chili Samu 34:10, chinambe ngwo: “Waze akufupa Yehova kechi kuhona nichimwe chuma chipema.” Tuvumbi twa Yehova anji ashishika keshi ni yuma yinji ya ku musunya yize malikwasa nayo. Mba mumu liaka mutuhasa kwamba ngwetu, “kechi kuhona nichimwe chuma chipema”? Nawa kuchi kunyingika kanawa ulumbunwiso wa versu yino muchitukwasa kulilulieka ha lamba lize muliza kulutwe?
^ kax. 4 Tala “Yihula ya Waze Akutanga Mikanda Yetu,” ha Kaposhi wa Kutalila wa 15 ya Setembro 2014.
