MUTWE WAKULILONGESA 30
Chize Mutukwata ku Mbunge ya Atu waze Keshi mu Yingeleja Niyimwe
“Nalipwishile yuma yeswe kuli atu eswe, hanga ni yuma yeswe ngukalamwine amwe.”—1 KORI. 9:22.
MWASO 82 “Pangu Lienu Likatemuke”
CHIKUMA CHILEMU *
1. Yuma yika yinalumuka mu yifuchi yimwe ha miaka yino?
HA MIAKA yinji kunyima, atu anji hashi heswe te katwama mu yimwe yingeleja. Alioze ha miaka yino, yuma yinalumuka. Atu anji keshi kutayiza nawa ngwo, kali mu yimwe yingeleja. Mu yifuchi yimwe, atu anji kakwamba ngwo keshi mu yingeleja niyimwe. *—Mateu 24:12.
2. Yika yakutwala atu anji ahone kupwa mu yingeleja niyimwe?
2 Mumu liaka atu waze akwamba ngwo keshi mu yingeleja niyimwe * anayi ni kwoka? Amwe hanji kanalihulikila ku yuma ya ku mwono chipwe ngwetu ku yipikalo yo. (Luka 8:14) Akwo, keshi kutayiza nawa ngwo Zambi kwali (ateus). Eka, kakutayiza ngwo Zambi kwali, alioze kakunyonga ngwo kupwa mu yimwe yingeleja chili chuma cha ku shakulu, kuchishi ulemu, kuchalitele ni ciencia nawa kuchishi kusolola ushindakenyo wa yuma (lógica). Ayo hanji kakwivwa masepa, alongeshi hanji ha yisaji ya fuji ngwo, yuma yalitangile yene. Alioze kota kanda achivwa kama umwe maalweza mumu liaka o atamba kufuliela muli Zambi. Akwo, keshi kuzanga kuya mu yingeleja mumu lia kuzo ya mangana waze akufwila mbongo ni wata. Amwe katwama mu yifuchi muze manguvulu hanase shimbi jize jakukinda milimo ya uwayilo ukwo.
3. Yika mutulilongesa ha mutwe uno?
3 Yesu katutumine kutayisa “tumbaji a ku mavungu eswe.” (Mateu 28:19) Kuchi mutuhasa kukwasa atu waze keshi mu yingeleja niyimwe, anyingike Zambi ni kumuzanga ni kupwa tumbaji a Kristu? Twatamba kunyingika ngwetu, mutapu uze mutu mapanjikilamo sango lipema unatale kuze akolelele. Chakutalilaho, mutu yoze wakolela mu Europa mahasa kusolola nyonga lialisa ni lia mutu yoze wakolela mu Ásia. Mumu liaka? Mumu mu Europa, atu anji kanyingika yimwe hakutwala ku Mbimbiliya nawa hanevu ngwo Zambi mwe watangile yuma yeswe. Alioze mu Ásia, atu anji kali ni chinyingi chikehe hanji kanyingikine nichimwe hakutwala ku Mbimbiliya, nawa hanji keshi kufuliela hali Sakatanga. Kashika mutwe uno, muutukwasa hanga tukwate ku mbunge ya atu eswe waze mutuliwana no mu munda, chipwe ngwe kanakatuka kweswako hanji kakwete ufulielo weswawo.
PWAKO NI NYONGA LIALIATA
4. Mumu liaka twatamba kupwa ni nyonga lialita?
4 Pwako ni nyonga lialita. Hita mwaka, atu waze te keshi kuwayila Zambi kakupwa Yela ja Yehova. Anji a kuli ayo te kakwete yitanga yipema nawa kevwile yikola ku mbunge ha kumona ulembekese mu ma yingeleja. Akwo te kakulinga yuma chamulingila nawa kafupiwile kwecha yitanga yipi. Kashika, ni ukwaso wa Yehova mutuhasa kuwana atu eswe waze “Zambi hanafunjikila ku mwono wa mutolo.”—Yili. 13:48; 1 Timo. 2:3, 4.
Alumuna mutapu we wa kwambujola muze unahanjika ni mutu yoze keshi kufuliela ha yize Mbimbiliya yakwamba (Tala maparagrafu 5-6) *
5. Yika kanji-kanji yakutwala atu kupanjika sango lipema?
5 Pwako chimbovu nawa Solola Vumbi. Kanji-kanji, atu kakutayiza kanawa sango lipema, hi ko mumu lia yize twakuhanjika, alioze mu mulali uze twakulihanjikila. Ayo kakuwahilila muze mutuhanjika no ni umbovu ni vumbi ni muze mutusolola ngwetu twakwazanga. Yetu kutushi kushinjila atu hanga atayize nyonga lietu. Shimbu tuchilinge, twakufupa kunyingika yize ayo akunyonga hakutwala ku yingeleja, nawa mumu liaka akunyonga chocho. Chakutalilaho, amwe keshi kuzanga kuhanjika yuma ya uwayilo ni atu waze kanyingikine. Akwo, kakunyonga ngwo chili kuhona vumbi kuhula mutu hakutwala kuli Zambi. Nawa kuli eka waze akwivwa sonyi muze maamona kanatange Mbimbiliya, chipi-chipi ni Yela ja Yehova. Ha chikuma cheswacho, twatamba kulisa mu chihela cho.—2 Timo. 2:24.
6. Kuchi postolo Paulu apwile ni kwalumuna lusango, nawa kuchi mutuhasa kumwimbulula?
6 Yika mutulinga nyi mutumona ngwetu, mutu yoze tunahanjika nenyi kawahililile ni maliji ngwe “Mbimbiliya,” “yitangiwa,” “Zambi,” hanji “yingeleja”? Mutuhasa kwimbulula chilweza cha postolo Paulu ha kwalumuna lusango kulita ni yize akuzanga. Muze te akuhanjika ni A-Yunda, Paulu te kakuzachisa Yisoneko. Alioze, muze ahanjikile ni A-Ngregu mu Areopagu waze te akukaula mana ja atu, iye kakatongwele ndusu Yisoneko. (Yili. 17:2, 3, 22-31) Kuchi mutuhasa kwimbulula chilweza cha Paulu? Nyi muliwana ni mutu yoze keshi kutayiza Mbimbiliya, hanji muchilita kuhona kutongola ndusu Yisoneko. Nyi mumona ngwo, mutu yoze unahanjika nenyi kazangile hanga atu akwo amumone unatange nenyi Mbimbiliya, eseka kumusolwela yisoneko mu mutatu uze mahona kumumona ha kuzachisa telefone.
7. Yika mutuhasa kulinga mba twimbulule chilweza cha Paulu chili ha 1 A-Korindu 9:20-23?
7 Solola malinjekela nawa panjika kanawa. Twatamba kusa tachi hanga tunyingike mumu liaka atu waze twakwambulwila sango lipema akunyonga mu mulali wacho. (Yishi. 20:5) Tutalenu nawa chilweza cha Paulu. Iye kakolelele hamwe ni A-Yunda. Ha kwambujola kuli akwa-mavungu waze te kanyingikine yuma yinji hakutwala kuli Yehova ni Yisoneko, iye te kakwalumuna mutapu wenyi wa kwambujola. Chizechene nawa, mba tunyingike kanawa yize atu a mu ngiza yetu akwivwa ni chize akunyonga, mutuhasa kuhengwola hanji kuhula akwa-kwambujola waze ajama.—Tanga 1 A-Korindu 9:20-23.
8. Kuchi mutuhasa kuputuka lusango hakutwala ku Mbimbiliya?
8 Nyonga lietu lili kuwana atu waze ‘anatela.’ (Mateu 10:11) Mba tuchilinge, twatamba kuhula atu yize ayo akunyonga ni kwapanjika kanawa muze anakumbulula. Umwe ndumbu mu Inglaterra kakuhula nyonga lia atu hakutwala ku chize mahasa kupwa ni uwahililo mu ulo, kulela ana hanji chize mehuka upi. Hanyima lia kupanjika manyonga jo, iye kakwahula ngwenyi: “Kuchi nwanyonga ha chiyulo chino asonekene hikwapalika miaka 2,000?” Kusulaho, chakuhona kuvuluka liji “Mbimbiliya,” iye maasolwela yimwe yisoneko ya Mbimbiliya ha telefone yenyi.
KWATA KU MBUNGE YA ATU
9. Kuchi mutuhasa kukwasa mutu yoze keshi kuzanga kuhanjika hakutwala kuli Zambi?
9 Nyi mutuwana mutu yoze keshi kuzanga kuhanjika hakutwala kuli Zambi, mutuhasa kumukwata ku mbunge ha kuhanjika nenyi yuma yize akuzanga. Chakutalilaho, atu anji kakukomoka chinji yitangiwa. Hachino, muhasa kwamba ngwe: “Yena kota unanyingika ngwe yuma yinji yize atu akulinga kakwimbulula yitangiwa. Chakutalilaho, atu waze akulinga microfone kakulilongesa hakutwala ha chize twitwi liapwa, nawa waze akulinga camera kakulilongesa hakutwala ha chize liso liapwa. Muze wakumona yitangiwa, yika wakunyonga? Shina wakunyonga ngwe yalitangile-yene nyi umwe wayitangile?” Hanyima lia kumupanjika kanawa, muhasa kumuhula nawa ngwe: “Muze akwa-mana akulilongesa hakutwala ku chize twitwi ni liso yapwa, iya ayo akwimbulula? Yami nakuzanga chinji maliji wano asonekene umwe mukwa-kwimba ngwenyi: ‘Yoze wasele twitwi keshi kwivwa nyi? Yoze walulikile liso keshi kumona nyi? . . . Iye wakulongesa mana kuli atu.’ Akwa-mana amwe, kakutayiza maliji wano nawa kakwamba ngwo yuma kayitangile.” (Samu 94:9, 10) Kusulaho, musolwele chinema ha kunjila ha site jw.org® ha chikuma “Yihwojola ni Yakulitakana Nayo,” ni chikuma “Mwono Kautangile.” (Yako ha MIKANDA > YINEMA.) Hanji muhasa kumwaha mikanda yino yaali. (A Vida — Teve um Criador? hanji A Origem da Vida — Cinco Perguntas Que Merecem Resposta.)
10. Kuchi mutuhasa kuputuka lusango ni mutu yoze keshi kuzanga kuhanjika hakutwala kuli Zambi?
10 Atu anji kakushimbwila kupwa ni mwono upema kulutwe lia matangwa. Alioze, anji a kuli ayo kakwivwa woma ngwo hashi makanongesaho hanji ngwo, kuhechi katwama nawa atu. Umwe kalayi wa mbonge mu Noruega yamba ngwenyi, atu waze keshi kuzanga kuhanjika hakutwala kuli Zambi, kanji-kanji kakuzanga kuhanjika hakutwala ku yize yinalingiwa hashi. Hanyima liakumeneka mutu, iye kakumuhula ngwo: “Kunyonga lie, iya yoze mahasa kululieka mwono wetu kulutwe lia matangwa? Shina akwa-mafwefwe, akwa-mana nyi hanji mutu mweswawo?” Muze mamupanjika kanawa, iye kakutanga hanji kutongola chimwe chisoneko chize chakuhanjika ha mwono upema wa kulutwe lia matangwa. Amwe kakuwahilila hakunyingika ngwo, Mbimbiliya yakulakenya ngwo hashi kechi kanongesaho. Nawa ngwo atu ashishika makatwamaho ku miaka yeswe.—Samu 37:29; Chilu. 1:4.
11. Mumu liaka twatamba kuzachisa yikuma yalisa mu munda, nawa kuchi mutuhasa kwimbulula Paulu, ngwe chize anasolola ha A-Roma 1:14-16?
11 Twatamba kuzachisa yikuma yalisa ha kuhanjika ni atu mu munda. Mumu liaka? Mumu atu kalisa. Chikuma chize umwe mazanga hanji mukwo kechi kuchizanga. Amwe kakuzanga kuhanjika hakutwala kuli Zambi ni Mbimbiliya, alioze akwo kakuzanga kuhanjika chitangu ha yuma yikwo. Ha yino yeswe, twatamba kufupa uhashi wa kuhanjika ni atu eswe. (Tanga A-Roma 1:14-16.) Alioze twatamba kunyingika ngwetu, Yehova mwe makolesa umwenemwene mu mbunge ya waze anazange kulinga yize yalita.—1 Kori. 3:6, 7.
CHIZE MUTWAMBUJOLA KULI AKWA-ASIA
Akwa-kwambujola anji kanasolola zango lio kuli akwo waze akukatuka ku yifuchi yize hi ya akwa-Kristu ko, nawa kanashimutwina no yikuma ya mana yize yili mu Mbimbiliya (Tala maparagrafu 12-13)
12. Yika mutulinga mba tukwase akwa Ásia waze kanda achivwa kama nichimwe hali Sakatanga?
12 Hashi heswe, akwa-kwambujola anji kanaliwane ni atu aku Ásia. Amwe kakatukile mu yifuchi yize manguvulu hanase shimbi jize jakukinda milimo ya uwayilo. Mu yifuchi yimwe ya Ásia, atu anji kanda achipwa kama ni shindakenyo nyi Sakatanga kwali nyi ka. Amwe kakuzanga kunyingika, kashika akutayiza muze twakwasolwela longeso lia Mbimbiliya. Alioze, akwo keshi kuzanga chinji kulilongesa yuma yaha. Mba kuchi mutuhasa kwakwasa? Akwa-kwambujola waze ajama hanamono ngwo, mutapu upema wa kuputuka lusango ni mutu uli kulihulumba hali iye. Nawa ni muchilita kumulweza chize kukaula shimbi ja Mbimbiliya cha kukukwasa.
13. Yika muyihasa kukwasa atu hanga azange sango jize jili mu Mbimbiliya? (Tala chizulie ha chifukilo.)
13 Yuma yize atu anji akuzanga mu Mbimbiliya yili yiyulo ya mana yize yakutukwasa tangwa ha tangwa. (Chilu. 7:12) Umwe pangi mu Nova York yoze wa kwambujola kuli atu waze akuhanjika mandarim yamba ngwenyi: “Nakulihulumba hali atu ni kwapanjika. Nyi nanyingika ngwami kali yilambala, nakwahula ngwo: ‘Hinwejilila ni yuma ya muno? Hinwawana mulimo? Shina atu amuno kananuvumbika?’” Ha mashimbu amwe, chino chakumukwasa kuhanjika chimwe chikuma cha Mbimbiliya. Nyi muchilita, pangi kakuhula ngwo: “Kuli yenu, yika muyihasa kunukwasa mba nutwame kanawa ni atu akwo? Munguhasa kunusolwela chimwe chishima chili mu Mbimbiliya? Chinambe ngwo: ‘Kuputuka cha ndombo chapwa ngwe muze majikula meya; kashika litwamine kuhamika shimbu kanda nuchiputuka kuzwela.’ Kunyonga lie, shina chiyulo chino muchihasa kutukwasa hanga tutwame kanawa ni akwetu?” (Yishi. 17:14) Kuhanjika mu mulali au, muchitukwasa kunyingika atu waze mazanga hanga tukaafunyine nawa.
14. Kuchi umwe ndumbu ku Chivumbuko akukwasa atu waze akwamba ngwo keshi kufuliela muli Zambi?
14 Mba kuchi mutwamba hali atu waze akwamba ngwo keshi kufuliela muli Zambi? Umwe ndumbu wa kwambujola ha miaka yinji kuli atu waze keshi mu yingelela niyimwe ku Chivumbuko (extremo oriente), yamba ngwenyi: “Kanji-kanji, muze umwe mutu mamba ngwo: ‘Yami chishi kufuliela muli Zambi,’ chinalumbunuka ngwo keshi kufuliela muli tuzambi waze atu akuwayila ku yihela yacho. Kanji-kanji nakutayiza nyonga lio ni kwalweza ngwo tuzambi anji hi ambwende ko, atu akwalinga. Kusulaho, nakutanga Jeremia 16:20 unambe ngwo: ‘Te mutu mahasa kulilingila tuzambi? Wano hi tuzambi ko!’ Hanyima ngwahula ngwo: ‘Kuchi mutuhasa kunyingika zambi wambwende ni yoze alinga kuli atu?’ Ngupanjika kanawa kumbululo, mba hi ngutanga Izaia 41:23 unambe ngwo: ‘Tulwezenu yize muyiza kwiza, hanga tukanyingike ngwetu, nuli tuzambi.’ Kusulaho, ngwalweza uprofeto wa Yehova uze hiunamanunuka.”
15. Yika twalilongesa ha chilweza cha umwe ndumbu ku Chivumbuko cha Ásia?
15 Umwe ndumbu ku Chivumbuko cha Ásia kanatulweze chize akufuna ni kumeneka atu. Yamba ngwenyi: “Nakwasolwela yilweza ya mana ya mu Mbimbiliya, uprofeto wa mu Mbimbiliya uze hiunamanunuka, ni shimbi ja chisemewa. Kusulaho, nakwalumbunwina ngwo yino yeswe yinasolola ngwo kwatwama Sakatanga mukwa-mana. Muze mutu matayiza ngwo Zambi kwali, nakumusolwela yize Mbimbiliya yakwamba hakutwala kuli iye.”
16. Kulita ni A-Hepreu 11:6, mumu liaka alongi anafupiwa kufuliela muli Zambi ni mu Mbimbiliya, nawa kuchi mutuhasa kwakwasa mba apwe ni ufulielo wacho?
16 Muze mutusongwela malongeso a Mbimbiliya kuli atu waze keshi mu yingeleja niyimwe, twatamba kununga ni kwakwasa hanga afuliele ngwo Zambi kwali. (Tanga A-Hepreu 11:6.) Nawa twatamba kwakwasa hanga afuliele ha yize Mbimbiliya yakwamba. Chino hanji muchifupiwa kufunyina malongeso woene ha yisuho yinji. Ha hita longeso, mutuhasa kwasolwela ngwetu Mbimbiliya yili Liji lia Zambi. Chakutalilaho, kushimutwina no yimwe yikuma ya Mbimbiliya, ngwe uprofeto uze hiunamanunuka, ciencia ni sango jamwenemwene hanji yiyulo yamo ya mana.
17. Yika muyihasa kulingiwako nyi mutusolwela atu zango?
17 Nyi mutusolwela atu eswe zango, mutuhasa kwakwasa hanga apwe tumbaji twa Kristu, chipwe ngwe keshi kuya mu yingeleja niyimwe. (1 Kori. 13:1) Muze tunaalongesa, nyonga lietu lili kwasolwela ngwo Zambi kakutuzanga nawa kanazange ni yetu tumuzange. Hita mwaka, tununu twa atu waze te keshi kuzanga yuma ya Zambi, kanalilongesa hakutwala kuli iye ni kwapapachisa. Kashika, pwako ni nyonga lialita, solola zango hali atu eswe. Panjika kanawa manyonga jo. Lise mu chihela cho. Kupalikila mu chilweza che, longesa atu chize mahasa kupwa tumbaji a Kristu.
MWASO 76 Chize Twakwivwa!
^ kax. 5 Matangwa wano twakuliwana chinji ni atu waze keshi mu yingeleja niyimwe. Ha mutwe uno, mutushimutwinaho chize mutwambujola sango lipema kuli atu jacho ni chize mutwakwasa kujikijila ha sango ja Mbimbiliya ni kufuliela muli Yehova Zambi.
^ kax. 1 Kulita ni chimwe kuhengwola, yino yili yimwe ya ku yifuchi yacho: Albânia, Alemanha, Austrália, Áustria, Azerbaijão, Canadá, China, Coreia do Sul, Dinamarca, Espanha, França, Holanda, Hong Kong, Irlanda, Israel, Japão, Noruega, Reino Unido, República Tcheca, Suécia, Suíça ni Vietnã.
^ kax. 2 ULUMBUNWISO WA AMWE MALIJI: Ha mutwe uno, liji atu waze keshi mu yingeleja niyimwe, linalumbunuka atu waze keshi kuwayila hanji waze keshi kutayiza ngwo Zambi kwali.
^ kax. 54 ULUMBUNWISO WA YIZULIE: Umwe ndumbu yoze wa kukalakala ku shipitali kanambujola kuli mukwa-mulimo-ni-mukwo. Hanyima, iye hanjila ha site hanga ete Longeso lia Mbimbiliya.
