MU Mbimbiliya muli mwa too ni sango ja atu ashishika waze ‘akulifwa ni yetu.’ (Tia. 5:17) Chakutalilaho, yetu mutuhasa kunyingika kanawa yize Paulu ambile kwamba, muze asonekene A-Roma 7:21-24 ngwo: “Muze nakupala kulinga kanawa, yipi yili muli yami. . . . Nguli mutu wa kulungajala!” Muze mutupinda ni manyonga jetu a uhenge, chili utakamiso kunyingika ngwo, Paulu lunga washishika neye che evwile.

Paulu nawa kahanjikile hakutwala ku chize te akwivwa ku mwono wenyi. Yamba ngwenyi: ‘Mwana Zambi . . . wanguzangile, waliechele hali yami.’ (Ngala. 2:20) Paulu kapwile ni shindakenyo ha chikuma chino. Shina ni yena che wakwivwa? Kota ha mashimbu amwe kuushi kwivwa chocho.

Nyi mutununga ni kwivwa chinyengo ha shili yize twalingile kunyima, muchihasa kutukwika kutayiza zango ni keke ya Yehova, ni kumona chitapo cha ukuule ngwe kuchishi ni ulemu ku mwono wetu. Shina Yesu kanazange hanga tumone ukuule mu mulali wacho? Nyi che twakwiwa, yika muyihasa kutukwasa mba tuchilemese? Tuhengwolenu yihula yino yaali.

Yesu kanazange hanga hita umwe wa kuli yetu amone chitapo cha ukule wenyi ngwe chawana chize amuhele. Kuchi mutuhasa kupwa ni shindakenyo yacho? Achinyonga ha yize anasoneka ha Luka 23:39-43. Umwe lunga yoze ahachile ha mutondo hamwe ni Yesu. Iye yatayiza shili yize alingile kunyima. Kota kalingile upi unene, mumu yingulungulu waze apwile ni kulinga upi wacho te kakwahata ha mutondo. Lunga wacho yalihulumba chinji ha chikuma chenyi, chocho yeta Yesu ngwenyi: “Ngwiwuluke kama muze muwiza mu Wanangana we.”

Kuchi Yesu amukumbulwile? Achinyonga ha yikola yize Yesu evwile muze azundwile mutwe hanga atale chingulungulu wacho. Chipwe ngwe te kanevu yikola, nihindu Yesu yasehesa lunga wacho hanga amuhwimise mbunge ni kumulweza ngwenyi: “Pundu, ngwami, musono uno kumukapwa hamwe ni yami mu Paraisu.” Yesu kachi kewulwile lunga wacho ngwenyi, “mwana Mutu kejileko . . . nikuhana mwono wenyi ndando ya ukuule hali anji.” (Mateu 20:28) Alioze ni zango lieswe, Yesu yakwasa lunga wacho hanga anyingike ngwo chitapo cha ukuule te kanachihane hali iye. Iye kahanjikile kanawa ni chingulungulu wacho hakwamba ngwenyi, ‘yena’ ni “yami.” Kashindakenyene ha chino muze alwezele lunga wacho ngwenyi, mukapwa mu paraisu hano hashi.

Yeswayi yinasolola pundu ngwo, Yesu te kanazange hanga lunga wacho atayize ngwo ukuule kauhanyine ni hali iye. Nyi Yesu kevwile chocho hali chingulungu yoze kakapwile ni uhashi wa kuwayila Zambi, chizechene che mevwa hali mukwa-Kristu wa kupapachisa yoze wakuwayila Zambi. Yika mba muyitukwasa hanga tupwe ni nyonga lialita hali yetwene chipwe ngwe twalingile shili kunyima?

Mulimo wa kwambujola uze Paulu alingile wasolwele ngwo, iye te kakulemesa chinji chitapo cha Yesu. Kuchi tunachinyingika? Paulu yalumbununa ngwenyi: “Nakusakwila yoze wakungukolesa, iye Kristu Yesu Mwene wetu, se wangumwene umwe mahasa kungufuliela, kashika hangusela ku uvumbiko. Chipwe napwile kunyima mukwa kushililika Zambi, mukwa kuhungumiona, mukwa kupopolola.” (1 Timo. 1:12-14) Chiteli chize Paulu atambwile chamukwashile kunyingika zango ni keke yize Yesu amusolwelele. Chizechene nawa, Yesu hanahane mulimo wa kwambujola kuli hita umwe wa kuli yetu. (Mateu 28:19, 20) Kuchi mulimo wa kwambujola muhasa kutukwasa kunyingika ngwetu, Yesu kafwile ni hali yetu?

Albert yoze asosolwele mu chikungulwila ha miaka 34 kunyima muze afunyine kuli Yehova yamba ngwenyi: “Shili yami yili kumeso jami matangwa eswe, alioze muze nakupwa mu munda nakwivwa ngwe chize postolo Paulu evwile, ni yami Yesu hanangwehe chiteli cha kwambujola. Chino chakungukwasa nguwahilile ni kupwa ni nyonga lialita hali yami mwene, ku mwono wami ni kulutwe lia matangwa.—Samu 51:3.

Allan yoze wapwile chingalwe kunyima shimbu te kanda achinyingika umwenemwene yamba ngwenyi: “Nihindu nakunyonga ha lamba linji lize namwesene atu. Ha mashimbu amwe nakuzakalakala chinji. Alioze, nakusakwilila chinji Yehova ha kwecha chivulumunyi ngwe yami hanga ngwambujole sango lipema kuli akwetu. Muze nakumona atu matayiza sango lipema, chino chakungwiwulula zango ni upeme wa Yehova. Nakwivwa ngwe kakunguzachisa hanga ngukwase atu waze no alingile yuma yipi ku mwono wo.”

Kwambujola chakutukwasa hanga tupwe ni nyonga lialita. Zango ni keke ya Yesu yakutukwasa ni kututakamisa.

Amu tuchili hano hashi ha Satana, mbunge yetu nihindu muyinunga ni kutuhisa hamukunda wa shili yize twalingile kunyima. Yika mba muyitukwasa kukumba manyonga wano?

Jean yoze wakulipikala chinji mumu lia shili yize alingile muze te uchili mukweze yamba ngwenyi: “Ngunawahilila chinji ha kunyingika ngwami ‘Zambi iye munene wahiana mbunge yami.’” (1 Yoa. 3:19, 20) Ni yetu nawa mutuhasa kuwana utakamiso ha kunyingika ngwetu, Yehova ni Yesu kali ni nyonga lialita hakutwala ku uhenge wetu. Iwuluka ngwe, ayo kahanyine ukuule hanga alamwina yivulumunyi waze akulikonyeka, hi atu angunu ko.—1 Timo. 1:15.

Twakusolola ngwetu ukuule kauhanyine hali hita umwe wa kuli yetu, ha kupukuna ha chize Yesu atwamine ni atu yihenge ni muze mutulikolweza hanga tulinge mulimo wa kwambujola uze iye atuhele. Nyi wachilinga mupwa ngwe Paulu yoze wambile ngwenyi: Yesu “wanguzangile, . . . waliechele hali yami.”