1-2. (a) Kulita ni maliji a Yesu waze ali ha Mateu 28:18-20, mulimo uka akwa-Kristu akusa mu chihela chitangu? (b) Yihula yika mutushimutwina ha mutwe uno?

APOSTOLO kota kawahililile muze ayo alikungulwile ha umwe mulundu. Muze Yesu amuhindwishile, iye yaalweza hanga o amuwane ku chihela chacho. (Mateu 28:16) Kota lino liapwile shimbu lize iye asolokele “kuli mandumbu kuhiana kulakaji atano ha chisuho chimuwika.” (1 Kori. 15:6) Mumu liaka Yesu asanyikine tumbaji twenyi hanga amuwane ku chihela chacho? Kachilingile hanga aehe umwe mulimo ulemu chinji, hakwamba ngwo: “Yeenu nukatayise tumbaji a ku mavungu eswe.”—Tanga Mateu 28:18-20.

² Tumbaji waze evwile maliji wano a Yesu e alingile chikungulwila chitangu cha akwa-Kristu. Mulimo utangu wa chikungulwila chacho wapwile kutayisa tumbaji a Kristu. * Musono, hashi heswe hali yikungulwila yinji ya akwa-Kristu amwenemwene, nawa mulimo wowene we ayo akusa mu chihela chitangu. Mu mutwe uno, mutushimutwinamo yihula yino yiwana: Mumu liaka chili chilemu kutayisa tumbaji? Yuma yika twatamba kulinga ha kutayisa tumbaji? Shina akwa-kristu eswe mahasa kukwasa kutayisa tumbaji? Nawa mumu liaka kutayisa tumbaji chakufupiwa uhumikizo?

3. Kulita ni Yoano 14:6 ni 17:3, mumu liaka chili chilemu kutayisa tumbaji?

³ Mumu liaka chili chilemu kutayisa tumbaji? Mumu tumbaji a Kristu e wika mahasa kupwa masepa ja Zambi. Chikwo nawa, waze akukaula mu ngano ja Kristu kali ni mwono upema haliapwila ni kutalatala cha mwono wa mutolo. (Tanga Yoano 14:6; 17:3.) Kwamba pundu, Yesu hanatwehe chiteli chilemu, alioze mulimo wacho kutushi kuulinga ukwawetu. Postolo Paulu yasoneka hali mwene ni hali amwe waze te akalakala no ngwo: “Tuli akwa milimo-ni-akwo a Zambi.” (1 Kori. 3:9) Chino chili chiwape chinene chize Yehova ni Yesu hanahane kuli atu yihenge!

4. Yika twalilongesa ha chilweza cha Ivan ni Matilde?

⁴ Mulimo wa kutayisa tumbaji muhasa kutunehena uwahililo unji. Tutalenu chilweza cha Ivan ni mukwo-pwo, Matilde mu Colômbia. Ayo kambulwile sango lipema kuli mukweze avuluka ngwo Davier, yoze wambile ngwenyi: “Ami ngunazange kwalumuna mwono wami, alioze chishi kuhasa.” Davier te kakulinga boxe, kunwa droga nawa te chizengi. Iye nawa te katwama hamwe ni kasendo kenyi Erika. Ivan yamba ngwenyi: “Yituputuka kulilongesa nenyi Mbimbiliya. Ku chihunda kuze te atwama kusuku chinji, mba tuyeko te twakwenda maola anji ha kinga mu matapalo a malowa. Erika, muze hamona ngwo Davier kanayi ni kwalumuna yitanga yenyi, chocho neye yaputuka kulilongesa Mbimbiliya.” Hakupalika cha mashimbu, Davier yecha droga, walwa ni boxe. Nawa yambata Erika kulita ni shimbi. Matilde yamba ngwenyi: “Muze Davier ni Erika aapapachishile ha mwaka 2016, yitwiwuluka yize Davier te akwamba ngwenyi, ‘Ami ngunazange kwalumuna mwono wami, alioze chishi kuhasa.’ Tunakawahilila chinji, chocho yituputuka kulila.” Kwamba pundu, muze twakukwasa atu hanga apwe tumbaji a Kristu, twakuwahilila chinji.

5. Chuma chika chitangu chize twatamba kulinga ha kutayisa tumbaji?

⁵ Chuma chitangu chize twatamba kulinga ha kutayisa tumbaji chili kufupa atu waze anazange kulilongesa umwenemwene. (Mateu 10:11) Twakusolola ngwetu, tuli Yela ja Yehova ha kwambujola kuli atu eswe waze twakulitakana no. Muze mutwononokena shimbi ya Kristu ya kwambujola, acho tunasolola ngwetu tuli akwa-Kristu amwenemwene.

6. Yika muyihasa kutukwasa mba tufumbuke mu mulimo wa kwambujola?

⁶ Atu amwe kakuzanga kulilongesa umwenemwene wa Mbimbiliya, alioze anji waze twakuliwana no, ha chisuho chitangu mahasa kusoloka ngwe kazangile. Mutuhasa kwakolweza hanga azange kulilongesa Mbimbiliya. Mba tufumbuke mu mulimo wa kwambujola, twatamba kulilulieka kanawa. Kashika sakula yikuma yize mazanga atu waze muliwana no mu munda. Kusulaho lulieka maliji waze mukaputuka kuhanjika no.

7. Kuchi muhasa kuputuka lusango ni umwe mutu, nawa mumu liaka chili chilemu kumupanjika ni kumuvumbika?

⁷ Chakutalilaho, muhasa kulweza mwenya zuwo ngwenyi: “Shina munguhasa kukuhula chimwe? Yipikalo yize tunamono musono, yinapinjisa atu hashi heswe. Kunyonga lie, shina manguvulu mahwisa yipikalo yacho?” Kusulaho, muhasa kushimutwina nenyi Daniele 2:44. Hanji muhasa kumuhula ngwe: “Kuchi yisemi mahasa kulongesa ana jo hanga apwe ni yitanga yipema? Kuchi wakunyonga hachino?” Kusulaho, shimutwinenu nenyi Shimbi  Yamuchiali 6:6, 7. Chikuma cheswacho musakula, nyonga hali atu waze makupanjika. Nyonga ha chize ayo mayuka nyi malilongesa umwenemwene wa Mbimbiliya. Muze unahanjika no, chili chilemu kwapanjika ni kulemesa manyonga jo. Hachino, mwanyingika kanawa ni ayo nawa mahasa kukupanjika.

8. Mumu liaka twatamba kufuna ni kumeneka mutu ha yisuho yinji?

⁸ Shimbu mutu kanda atayiza kulilongesa Mbimbiliya, hanji mufupiwa kusa mashimbu ni tachi ha kufuna ni kumumeneka. Mumu liaka? Mumu hanji ha yisuho yimwe, keshi kupwa ni mashimbu muze mufuna ni kumumeneka. Chikwo nawa, hanji mufupiwa kufunako yisuho yinji hanga mwenya zuwo akunyingike kanawa mba atayize longeso lia Mbimbiliya. Tunyingikenu ngwetu, mutondo muhasa kukola kanawa nyi mauhinjila meya ha yisuho yinji. Chizechene nawa, zango lize mutu asolola hali Yehova ni Yesu mulihasa kukola nyi mutushimutwina nenyi Liji lia Zambi ha yisuho yinji.

9-10. Mumu liaka mutuhasa kwamba ngwetu, akwa-Kristu eswe kakukwasa kuwana waze anazange kupwa tumbaji?

⁹ Hita mukwa-Kristu kakukwasa kuwana atu waze anazange kunyingika Zambi. Mutuhasa kutesa mulimo uno ni wa atu waze apwile ni kufupa mwana yoze watokele. Mu mulali uka? Tutalenu chilweza cha mwana wa miaka yitatu yoze watokele. Atu 500 ayile ni kumufupa. Hakupalika cha maola 20 chize haze mwana wacho atokele, umwe wa kuli waze te anamufupa yamuwana mu munda wa chivwale. Mutu wacho kakatayijile kutambula fweto mumu lia kuwana mwana. Yamba ngwenyi: “Hi yami wika ko namuwana, tulieswe twamuwana.”

 ¹⁰ Atu anji kali ngwe mwana wacho. Ayo kakulivwa ngwe hanatoko. O keshi ni kutalatala, kashika twatamba kwakwasa. (Efwe. 2:12) Tulieswe tununu nake a tununu tunakalakalila hamuwika hanga tuwane atu jacho. Hanji kanda uchiwana kama mutu yoze unazange kulilongesa Mbimbiliya ni yena. Alioze, akwa-kwambujola akwo waze no akukalakala mu njiza yoyene yimuwika, mahasa kuwana mutu yoze unazange kulilongesa umwenemwene wa Liji lia Zambi. Muze umwe ndumbu mawana mutu yoze mapwa kambaji wa Kristu, eswe waze akwasa kumuwana mawahilila chinji.

11. Chipwe ngwe kuushi ni longi wa Mbimbiliya, kuchi muhasa kukwasa kutayisa tumbaji?

¹¹ Chipwe ngwe kuushi ni longi wa Mbimbiliya, alioze muhasa kukwasa kutayisa tumbaji mu majila akwo. Chakutalilaho, muhasa kutambwisa atu waze meza ha chisuho chitangu ha kukunguluka ku Zuwo lia Wanangana ni kwakwasa. Nyi waasolwela zango mu mulali wacho, muakwasa amone ngwo tuli akwa-Kristu amwenemwene. (Yoa. 13:34, 35) Chipwe ngwe, mukumbulula hakehe muze uli ha kukunguluka, nihindu muhasa kukwasa waze ezaho chisuho chitangu hanga amone chize masolola ufulielo wo mu jila yalita hamwe ni vumbi. Muhasa nawa kutuhuka mu munda ni mukwa-kwambujola mwaha ni kumukwasa azachise Yisoneko muze analongesa atu. Nyi wachilinga, yena unamulongesa hanga embulule Kristu.—Luka 10:25-28.

12. Shina tunafupiwa utotombo unji mba tutayise tumbaji? Lumbununa.

¹² Niumwe wa kuli yetu katambile kunyonga ngwo, kanafupiwa utotombo unji mba alongese akwo apwe tumbaji twa Yesu. Mumu liaka twatambile kunyonga chocho? Tutalenu chilweza cha Faustina, yoze watwama mu Bolivia. Muze aputukile kulilongesa Mbimbiliya ni Yela ja Yehova, iye te kanyingikine kutanga. Kukatuka haze, iye halilongesa ndambu kutanga. Haliapwila hamupapachisa, nawa kakuzanga chinji kulongesa akwo umwenemwene. Hita poso iye kakusongwela malongeso a Mbimbiliya atano. Chipwe ngwe, Faustina kanda achinyingika kutanga kanawa ngwe chize akutanga amwe alongi jenyi, nihindu hanakwase atu asambano kutambula upapachiso.—Luka 10:21.

13. Chipwe ngwe kutushi ni mashimbu anji, yiwape yika yize mutuhasa kupwa nayo ha kutayisa tumbaji?

¹³ Akwa-Kristu anji keshi kupwa ni mashimbu mumu lia yiteli yinji yize akwete. Chipwe chocho, o kakusa mashimbu hanga asongwele malongeso a Mbimbiliya, nawa kakuwahilila chinji ha kuchilinga. Tutalenu chilweza cha Melanie. Kapwile ni kulela ukawenyi mwanenyi wa pwo wa miaka nake mu Alaska. Mulimo wenyi wa ku musunya te wakumumbata mashimbu anji  nawa te kakukwasa tato yoze ukwete cancer. Melanie, kapwile mu chimwe chihunda muze iye wika mwe te Chela cha Yehova. Kapwile ni kulemba hita shimbu ni kulikolweza hanga atuhuke mu munda chipwe ngwe kwapwile chishika. Iye kalingile chocho, mumu kazangile chinji kuwana mutu yoze malilongesa nenyi Mbimbiliya. Hachino, yaliwana ni Sara yoze wazangile chinji kunyingika jina lia Zambi. Hanyima lia amwe mashimbu, Sara yatayiza longeso lia Mbimbiliya. Melanie yamba ngwenyi: “Liamatano ha chingoloshi te nakuhonga chinji, alioze ami ni mwanami twayukile mumu lia kuya ni kusongwela longeso liacho. Tunakawahilila chinji ha kuhengwola hanga tukumbulule yihula ya Sara. Nawa twevwile kuwaha ha kumumona mapwa sepa lia Yehova.” Ni hamu lieswe, Sara yakumba yihungumiona, yatuhuka mu yingeleja yize apwile, chocho yamupapachisa.

14. (a) Kuchi waze akutayisa tumbaji apwa ngwe akwa-kutela yishi? (b) Kuchi maliji a Paulu waze ali ha 2 Timoteu 4:1, 2, anakwate hali yena?

¹⁴ Chipwe ngwe kanda uchiwana kama mutu yoze unazange kupwa kambaji, nihindu nunga ni kufupa. Yesu kambile ngwenyi, waze akutayisa tumbaji kali ngwe akwa-kutela yishi. Akwa-kutela yishi mba akwate yishi mahasa kupalikisa maola anji. Kanji-kanji, ayo mahasa kukalakala ufuku hanji chimene-mene, ha mashimbu amwe chakufupiwa kuya kusuku. (Luka 5:5) Chizechene nawa, akwa-kwambujola amwe ni uhumikizo weswe kakupalikisa maola anji ni “kutela yishi” ha mashimbu alisa ni ku yihela yalisa. Mumu liaka? Mumu chino chakwakwasa kuwana atu anji. Waze akulinga chocho, kanji-kanji kakwawahisa mumu  kakuwana atu waze akuzanga sango jetu. Shina muhasa kwambujola ha yimwe ola ha tangwa hanji ku chimwe chihela chize muhasa kuwana atu jacho?—Tanga 2 Timoteu 4:1, 2.

15. Mumu liaka kusongwela longeso lia Mbimbiliya chakufupiwa uhumikizo?

¹⁵ Mumu liaka waze anasongwela malongeso a Mbimbiliya kanafupiwa uhumikizo? Chikuma chimwe chili ngwo, tunafupiwa kukwasa longi hanga anyingike yize analilongesa mu Mbimbiliya ni kuyizanga. Chikwo nawa, tunafupiwa kukwasa longi hanga anyingike ni kuzanga Mwenya Mbimbilya, Yehova. Alioze, kutwatambile wika kulongesa longi yuma yize Yesu atumine tumbaji twenyi kulinga, twatamba nawa kumulongesa chize makaula shimbi jacho ku mwono wenyi. Ni uhumikizo weswe, twatamba kumukwasa muze anase tachi hanga akaule shimbi ja Mbimbiliya. Alongi amwe, mahasa kwalumuna yitanga ni mianda yo ha tukweji akehe wika, alioze akwo muchihasa kumbata mashimbu.

16. Yika walilongesa ha chilweza cha Raúl?

¹⁶ Umwe mishionaliu mu Peru kapwile ni yakulitakana nayo yipema mumu lia kulihumikiza. Yamba ngwenyi: “Nalilongesele mikanda yaali ni longi wa Mbimbiliya yoze avuluka ngwo Raúl. Alioze, iye nihindu te kakupalika mu yipikalo yinji ku mwono wenyi. Iye te kakwete yipikalo mu ulo, kuhanjika yuma yipi nawa kapwile ni ana waze te keshi kumuvumbika. Hachino, yaputuka kwiza ku kukunguluka ha mashimbu eswe, chocho yingununga ni kuya ku zuwo lienyi ni kumukwasa hamwe ni usoko wenyi. Kukatuka haze twaliwanyine, yikupalika miaka yitatu ni ndambu chocho yamupapachisa.”

17. Yika mutukashimutwina ha mutwe muusulaho?

¹⁷ Yesu katulwezele ngwenyi: “Yeenu nukatayise tumbaji a ku mavungu eswe.” Mba tulinge kanawa mulimo wacho, kanji-kanji twakuhanjika ni atu waze akwete uwayilo walisa ni wa yetu, kuchingako waze katwamine mu yingeleja niyimwe hanji waze keshi kufuliela muli Zambi. Mutwe uze musulaho, musolola chize mutuhasa kwambujola sango lipema kuli atu jacho.