1-2. Kuchi maliji a Yehova ali ha Izaia 65:16, 17, anatukolweza tunyongonone?

KUKUNGULUKA cha mambonge cha 2017, chapwile ni mutwe unambe ngwo: “Kanda Uhonga!” Ha kukunguluka chacho, twalilongesele chize mutuhasa kunyongonona chipwe ngwe tunapalika mu yipikalo. Chize haze ndo musono, hikwapalika miaka yiwana, nihindu tunanungu ni kunyongonona mu yuma ya mwakono.

² Yipikalo yika wapalika ha mashimbu wano? Shina wafwisa umwe usoko hanji sepa yoze te wazanga chinji? Nyi hanji unapinji ni umwe musongo? Kutala unapinji ni ushinakaji? Shina wapalika mu yuma yipi, yihungumiona hanji mu luyinda wa chisemewa? Kutala unapinji ni umwe musongo ngwe wa COVID-19? Tunashimbwila tangwa lize yuma yino muyikahwa, chekwamba tangwa lize mutukayivulama!—Tanga Izaia 65:16, 17.

3. Yika twatamba kulinga haliapwila, nawa mumu liaka?

³ Mwono mu chifuchi chino unakale chinji, alioze kulutwe yuma muyikapihia chinji kuhiana. (Mateu 24:21) Chino chinasolola ngwo, tunafupiwa kununga ni kukolesa kunyongonona chetu. Mumu liaka? Mumu Yesu kambile ngwenyi: “Mweswe manyongonona ndo ku songo, kumakamulamwina.” (Mateu 24:13) Kunyonga ha chize akwetu anakumbu yipikalo ngwe yize tunapalika, muchihasa kutukwasa kunyongonona.

4. Mumu liaka mutuhasa kwamba ngwetu, Yehova kali chilweza chipema cha kunyongonona?

⁴ Iya yoze uli chilweza chipema cha kunyongonona? Yehova Zambi. Shina chino chakukomwesa? Achinyonga hachino: Hashi hano kanayuluho kuli Ndiapu nawa hanazale too ni yipikalo. Yehova kali ni ndundo ja kuhwisa yipikalo yino  yeswe haliapwila, alioze kanashimbwila tangwa lialita hanga achilinge. (Roma 9:22) Amu tangwa liacho kanda liheta, Zambi kananungu ni kunyongonona ndo ha shimbu lize hanatese. Tushimutwinenu yuma livwa yize yinasolola ngwo, Yehova kananungu ni kunyongonona.

5. Kuchi lufuma wa jina lia Yehova amupihishile chize mu Munda wa Endene, nawa kuchi wakwivwa ha chikuma chacho?

⁵ Kupihisa lufuma wa jina lienyi. Yehova kakuzanga jina lienyi nawa kanazange hanga atu eswe alivumbike. (Iza. 42:8) Alioze chize haze apihishile lufuma wa jina lienyi, hikwapalika miaka tununu 6. (Samu 74:10, 18, 23) Yuma yeswe yaputukile mu Munda wa Endene, muze Ndiapu (linalumbunuka “Chilamikiji”) alamikijile Zambi ngwo, kazangile kuhana kuli Alama ni Eva yuma yize te anafupiwa hanga awahilile. (Uputu. 3:1-5) Chize haze, Yehova kakumulamikiza ngwo, keshi kuzanga kuhana kuli atu yuma yize anafupiwa ku mwono. Yesu kalipikalile chinji hakumona chize apihishile lufuma wa jina lia Tato. Kashika alongesele tumbaji twenyi kulemba ngwo: “Tata nuli mu malilu, jina lienu lipwe lisandu.”—Mateu 6:9.

6. Mumu liaka Yehova aneche hanga kupalike mashimbu anji mba asolole ngwo kali ni ulite wa kuyula?

⁶ Kulimika ni Wanangana wenyi. Yehova wika mwe uli ni ulite wa kuyula malilu ni hashi, nawa kuyula chenyi chapwa chipema. (Uso. 4:11) Alioze Ndiapu yonga angelo ni atu hanga anyonge ngwo, Zambi keshi ni ulite wacho. Kashika te mukupalika mashimbu anji mba Yehova asolole ngwenyi kali ni ulite wa kuyula, nawa ngwo kakuyula kanawa. Zambi kasolwele mana ha kwecha atu aliyule ene hanga ayo amone ngwo, kechi kuhasa kufumbuka chakuhona ukwaso wenyi. (Jere. 10:23) Mumu lia uhumikizo wenyi, chikuma chino makachihwisa liakulu. Nawa niumwe keshi kayambashana ngwo, Zambi kali ni ulite wa kuyula malilu ni hashi. Eswe makanyingika ngwo, Yehova mwe wa kuyula kanawa, nawa Wanangana wenyi we muukaneha sambukila yamwenemwene.

7. Aya waze alimikine ni Yehova, nawa yika iye makaalinga?

⁷ Kupianguka cha ana jenyi amwe. Yehova katangile angelo ni atu angunu. Alioze umwe wa kuli angelo jacho yapianguka ni kulipwisa Satana (linalumbunuka “Chimika”). Iye yapiangula nawa atu angunu Alama ni Eva hanga alichinge ha uhulia wenyi. Angelo ni atu akwo no yalichinga ha uhulia wacho. (Yunda. 6) Kulutwe, chipwe atu a mu vungu lia Izalele, vungu lize Zambi asakwile, yalitunaye ni kuputuka kuwayila tuzambi a mahuza. (Iza. 63:8, 10) Chalitele Yehova kulivwa ngwe, kamomba nyima. Chipwe chocho, Yehova kananungu ni kunyongonona mu yuma yeswayi, ndo tangwa lize makwonwona yihulia jacho eswe. Chino, muchikahuzulula atu ashishika waze ananyongonona hamwe ni Yehova mu yuma yipi ya mwakono.

8-9. Mahuza aka Satana akuhanjika hakutwala kuli Yehova, mba yika twatamba kulinga ha mahuza jacho?

⁸ Mahuza waze Ndiapu akumwanga. Satana kalamikijine Yombi ni tuvumbi akwo a Yehova ashishika ngwo, kakumuwayila wika mumu lia yuma yipema yize akwalingila. (Yombi 1:8-11; 2:3-5) Ndo ni musono Satana machinunga ni kulamikiza atu ngwo, keshi kulingila Zambi ni mbunge yimuwika. (Uso. 12:10) Kashika mutuhasa kukwasa kusolola ngwetu, Satana kali mukwa-mahuza ha kunyongonona mu yipikalo ni kununga ni kushishika kuli Yehova mumu lia zango lietu hali iye. Nyi twembulula chilweza cha kunyongonona cha Yombi, ni yetu makatuwahisa.—Tia. 5:11.

⁹ Satana kakuzachisa mangana a uwayilo wa mahuza hanga alongese atu ngwo, Yehova  kapwa mukalu nawa iye mwe wakunehena atu lamba. Nyi kwafwa umwe kanuke, amwe kakwamba ngwo Zambi mwe wamusaka hanga akapwe mungelo mu malilu. Chino chili kushililika Zambi. Alioze yetu tunamunyingika kanawa. Nyi tuli ni umwe musongo upi hanji twafwisa mutu yoze twazanga chinji, kutushi kusuma Zambi mulonga. Shimbu tuchilinge, twakufuliela ngwetu tangwa limwe Zambi mahwisa yikola ni kufwa. Kashika, mutuhasa kulweza atu eswe waze mazanga kutupanjika ngwo, Yehova kali Zambi wa zango. Nyi twachilinga, mutukwasa Yehova hanga akumbulule yoze wakumuchoka.—Yishi. 27:11.

10. Yika Samu 22:23, 24, unatulongesa hakutwala kuli Yehova?

¹⁰ Lamba lize tuvumbi twenyi akumona. Yehova kakuvwila tuvumbi twenyi keke. Iye keshi kuzanga kumona tuvumbi twenyi mamona lamba ha kwahungumiona, misongo ni lamba lize liakwiza mumu lia uhenge wetu. (Tanga Samu 22:23, 24.) Yehova kananyingika yikola yize twakwivwa, nawa kanazange kuhwisa lamba lietu. Yino ye makalinga lume. (Tesa ni Kutuhuka 3:7, 8; Izaia 63:9.) Kwasala hakehe, “iye makakusumuna masoji eswe ku meso [jetu]. Kufwa kuchichi kapwa nawa; kukuchi kapwa nawa kunenganyana, chipwe miteto, chipwe yikola, ka.”—Uso. 21:4.

11. Kuchi Yehova akwivwa ha kufwa cha tuvumbi twenyi ashishika?

¹¹ Kufwisa masepa jenyi. Kuchi Yehova akwivwa ha kufwa cha masepa jenyi ashishika? Iye kanazange chinji kwamona cheka. (Yombi 14:15) Shina muhasa kunyonga usona uze Yehova akwivwila Apalahama? (Tia. 2:23) Hanji uze akuvwila Mose yoze ahanjikile nenyi “meso ni meso”? (Kutuhu. 33:11) Iye nawa kakwivwa usona wa miaso yize Ndawichi ni akwa-kwimba masamu akwo, apwile ni kwimba hanga amuhalise. (Samu 104:33) Chipwe  ngwe tuvumbi wano ashishika hanafu, nihindu Yehova kaavulamine. (Iza. 49:15) Iye kananyingika mu yimako-yimako utu wa masepa jenyi. Mbimbiliya yinambe ngwo, kuli Zambi “eswe katwama ni mwono.” (Luka 20:38) Tangwa limwe, Yehova maahindwisa ni kupanjika nawa yilemba yo ni kutayiza uwayilo wo. Kashika, nyi hiunafwisa mutu yoze te wazanga, kwiwuluka yikuma yino muchihasa kukutakamisa.

12. Ha matangwa jetu, chuma chika Yehova akuvwila chinji yinyengo?

¹² Yingalwe waze akumwesa atu lamba. Muze uhulia waputukile mu Endene, Yehova kanyingikine ngwenyi chitangu yuma muyipihia chinji mba kulutwe muyipema. Musono, Yehova kakwivwa yinyengo ha kumona yuma yize yinalingiwa hano hashi ngwe upi, uhenge ni upupilo. Iye nihindu kakulihulumba hali atu waze keshi kuhasa kulikalila ene, ngwe ana-shiwa ni tuliwa. (Zeka. 7:9, 10) Ha matangwa jetu, chuma chize Yehova akuvwila chinji yinyengo chili kumona chize tuvumbi twenyi ashishika akwamwesa lamba ni kwasa mu mazuwo a ususu. Munuhasa kupwa ni shindakenyo ngwenu, Yehova kakuzanga yenweswe waze nunanungu ni kunyongonona ngwe iye.

13. Yuma yika yipi yize atu akulinga, nawa yika Yehova makalinga ha chikuma chacho?

¹³ Kupihia cha yitanga ya atu hano hashi. Atu kaatangile mu chano cha Zambi, alioze Satana kakuzanga hanga ayo alinge yuma yipi. Ha matangwa ja Noa, muze Yehova amwene “ungulungulu wa atu hashi, ngwenyi, wahiana,” iye “yalikonyeka chize atangile atu hano hashi. Chamunehenene chinyengo mu mbunge yenyi.” (Uputu. 6:5, 6, 11) Shina yuma hano hashi yinapeme? Ka, kuyapemene! Satana kakuwahilila chinji muze akumona atu malinga yuma yeswe ya upangala, ngwe utanji ni kulisumbakenya cha lunga ni lunga ni pwo ni pwo. (Efwe. 4:18, 19) Iye nawa kakuwahilila chinji kuhiana, muze akumona umwe kavumbi ka Yehova malinga shili yinene. Alioze uhomboloji wa Yehova uli ni haze wasulila. Kwasala hakehe, Yehova masolola ngwenyi keshi kuzanga upangala ha kwonwona yitanji eswe waze keshi kuzanga kwalumuna yitanga yo.

14. Yika atu analingi hano hashi ni kuli tushitu?

¹⁴ Kupihisa cha yitangiwa yenyi hano hashi. Yehova kahanyine kuli atu chiteli cha kufunga yuma yize atangile hano hashi. (Uputu. 1:28) Alioze umwenemwene uli ngwo, mutu nyi mapwa “ni chiyulo helu lia mukwo” kakumupinjisa, nawa chino chakupinjisa tushitu ni kupihisa hashi. (Chilu. 8:9) Amwe akwa-mana kakwamba ngwo, mumu lia yitanga ya atu kanunu umuwika wa tununu a tushitu ni mitondo mahasa kuyikuwisa ha miaka yize muyisulaho. Kashika twakumona atu malipikala hakutwala ku chize mafunga yuma hano hashi! Chokuwaha hakunyingika ngwo, Yehova kanalakenya ‘kwonwona waze akwonwona hashi’ ni kupwisaho paraisu yipema.—Uso. 11:18; Iza. 35:1.

15-16. Yika muyitukwasa kunyongonona hamuwika ni Yehova? Hana chilweza.

¹⁵ Achinyonga ha yuma yeswe yize Tata yetu wa mu malilu ananyongonona ha tununu a tununu twa miaka. (Tala mushete, “ Yuma Yize Yehova Ananungu ni Kunyongonona.”) Yehova mahasa kwonwona yuma ya mwakono ha shimbu lieswalio mazanga. Alioze, kunyongonona chenyi chili chiwape kuli yetu! Tuchinyongenu ha chilweza chino: “Amwe yisemi kanashimbwila kusemuka cha mwano, alioze ndotolo maalweza ngwo, mwano masemuka ni misongo, kechi kupwa ni mwono upema nawa mafwa ni kawashi.” Kulela mwana wacho muchipwa chikalu chinji kuli ayo. Chipwe chocho, ni zango lieswe o mashimbwila kusemuka cha mwano. Zango liacho lie muliakwasa kunyongonona  mu yipikalo yeswayo muyisoloka hanga alele kanawa mwano.

¹⁶ Chizechene ngwe mwana yono, ana ja Alama ni Eva kasemukine yihenge. Chipwe chocho, Yehova kakwafunga ni zango lieswe. (1 Yoa. 4:19) Alioze kuli kalisa hakachi ka yisemi waze twatongola ni Yehova. Yehova mahasa kuhwisa lamba lia ana jenyi nawa mumu lia zango, iye hanase shimbu lize machilinga. (Mateu 24:36) Zango lia Yehova mulitukwasa ni yetu tunyongonone hamwe nenyi ndo haze mahwishila lamba lieswe.

17. Kuchi chilweza cha Yesu chili ha 1 Petulu 2:21-24 chinatukolweza tununge ni kunyongonona?

¹⁷ Yehova kali chilweza chingunu cha kunyongonona. Yesu kembulwile kanawa kunyongonona cha Tato. Mumu lia zango lienyi hali yetu, muze apwile hano hashi, Yesu yanyongonona mu yuma yipi ngwe matuka, luchoko ni kumushihila ha mutondo wa lamba. (Tanga 1 Petulu 2:21-24.) Chochene lume, kunyongonona cha Yehova chakwashile Yesu hanga neye anyongonone. Chino muchihasa kulingiwa ni kuli yetu.

18. Kulita ni 2 Petulu 3:9, yika atu anazuku mumu lia uhomboloji wa Yehova?

¹⁸ Tanga 2 Petulu 3:9. Yehova kananyingika shimbu yalita yize mahwisa yuma yipi hano hashi. Mumu lia uhomboloji wenyi, atu anji kahasa kusemuka, kumunyingika ni kulihana kuli iye. Atu jacho kanalingi chihanda cha mbunga yinene nawa kanasakwilila Yehova mumu lia kunyongonona chenyi. Kulutwe, muze Yehova makawahisa tununu a tununu twa atu, chino muchikasolola zwalala ngwo, kalingile kanawa ha kunyongonona!

19. Yika twatamba kununga ni kulinga, nawa yika mutuzukako?

¹⁹ Chilweza cha Yehova chakutulongesa kunyongonona ni uwahililo. Chipwe ngwe, Satana kaneha lamba linji, nihindu Yehova kananungu ni kuwahilila. (1 Timo. 1:11) Yetu tunashimbwila ni uhomboloji weswe tangwa lize Yehova machiza luchoko ha jina lienyi, makalila wata wenyi ni kuhwisa upi ni lamba lieswe lize twakumona musono. Alioze amu tangwa liacho kanda liheta, ni yetu mutuhasa kununga ni kuwahilila. Kashika, tunungenu ni kunyongonona chakuhona kuvulama ngwetu, Tata yetu wa mu malilu neye kananyongonona. Nyi twachilinga, hita umwe wa kuli yetu mamona umwenemwene wa maliji ali ha Tiangu 1:12 anambe ngwo: “Kawaha mutu yoze manyongonona mu cheseko; mumu muze hamusela shindakenyo yipema, makatambula chipangula cha mwono, chize Mwene [Yehova] hanalakenya kuli waze akumuzanga.”