Yehova kanazange hanga atu waze malimbata awahilile ni kupwa ni usepa ukolo uze muununga ku miaka yeswe. (Mateu 19:4-6) Nyi unazange kumbata, kuchi muhasa kuwana mutu yoze mulimbata nenyi? Amu ali Sakatanga yetu, Yehova kananyingika yize tunafupiwa hanga tupwe ni usendo upema uze muutukwasa kupwa ni uwahililo mu ulo. Kashika, nyi mukaula shimbi jize akutwaha, mupwa ni uwahililo wamwenemwene. Tutalenu yimwe ya ku shimbi jacho.

Yitangu, twatamba kunyingika ngwetu: “Mbunge yakwonga kuhiana yuma yeswe ni kupiha chikolo.” (Jere. 17:9) Muze atu waze anazange kulimbata malinyingika ni kupwa tusendo kakuputuka kulizanga chinji, chino nyi muchilingiwa chakupwa chikalu kuli ayo kunyonga kanawa. Nyi atu mazanga kulimbata mumu lia chize akwivwa, chino muchaanehena lamba linji. (Yishi. 28:26) Kashika, hi kusolola mana ko atu aali waze kalinyingikine kanawa umwe ni mukwo aputuke kulisolwela zango lia ulo.

Yishima 22:3 unambe ngwo: “Chikanyame malangikiza ye yipi maswama, alioze yizuzuke masenya kulutwe mba maalamba.” Ponde yika muyihasa kupwako ha kuzachisa ma site hanji ma aplicativo hanga tulinge usendo wa ulo? Chaluyinda, amwe kapalikile mu ponde yacho muze alinyingikine ni umwe ha internet. Chikwo nawa, atu waze akwete yitanga yipi kakuzachisa internet hanga onge atu ni kweeya mbongo. Akwa-mahuza jacho, mahasa kulionga ngwo kali Yela ja Yehova.

Ponde yikwo yili yino. Ma site amwe akulingila usendo kakuzachisa chimwe kwalula hanga asolole atu waze analite ni kulimbata. Alioze, kukushi yize yinasolola ngwo majila jacho kakukalakala lume kanawa. Ulo uli chuma chilemu. Kashika nyi unazange kumbata, shina mwecha computador hanga yikusakwile mutu yoze mulimbata nenyi? Kutala yuma yino atu akulinga, mutuhasa kuyitesa ni shimbi ja mu Mbimbiliya?—Yishi. 1:7; 3:5-7.

Tunawane shimbi yikwo yipema ha Yishima 14:15 yinambe ngwo: “Chizuzuke kakufuliela maliji eswe; alioze chikanyame kakutala kanawa ku kwenda chenyi.” Mba unyingike nyi umwe mutu mapwa lunga hanji pwo mupema, chitangu watamba kumunyingika kanawa. Chili chikalu kunyingika kanawa mutu ha internet. Munuhasa kulitumina yizulie ni kulisonekena mesage, alioze shina chino chinalumbunuka lume ngwo nunalinyingika  kanawa? Amwe waze anyongene ngwo, kawana mutu walita yoze malimbata nenyi kevwile yikola ku mbunge muze alimwene meso ni meso.

Umwe mukwa-kwimba masamu kambile ngwenyi: “Chatwamine hamwe ni atu amokomoko; chipwe akwa kalimbalimba chichi kulifutula no.” (Samu 26:4) Mba atu aazange, amwe kakusa foto jipema ha ma site ni ha ma aplicativo jo. Ayo kakusweka utu ni yitanga yo yipi muze anahanjika ni akwo kupalikila mu mesage. Chili chilemu kulihula ngwe: Chipwe ngwe mutu wacho mamba ngwenyi kali Chela cha Yehova, shina kali lume wakupapachisa? Kutala kali mutu yoze hanakolo ku ufulielo? Kali ni usepa upema ni Yehova? Kali mutu yoze mandumbu akulemesa chinji mu chikungulwila? Nyi hanji kali chilweza chipi? (1 Kori. 15:33; 2 Timo. 2:20, 21) Shina kali ni utuswilo wakulimbata ni mutu mukwo kulita ni shimbi ja mu Mbimbiliya? Mba uwane kumbululo lia yihula yino, yena hanji muhula Yela ja Yehova waze ananyingika kanawa mutu yoze unazange kulimbata nenyi. (Yishi. 15:22) Kwamba umwenemwene, kavumbi wa Yehova washishika kechi kulimbata ni mutu yoze hi Chela cha Yehova ko hanji ngwetu, ‘kulilema kanga’ ni mutu wacho.—2 Kori. 6:14; 1 Kori. 7:39.

Ngwe chize twamona, kuzachisa ma site ni ma aplicativo akulingila no usendo chinji ponde, alioze kuli majila apema akunyingikinamo mutu yoze muzanga kulimbata nenyi. Mba kulihi muhasa kuwana mutu mupema yoze mulimbata nenyi? Nyi kukunguluka ha mbunga kuchishi chakukanjisa, yetu twakulinyingika ni mandumbu akwo ha kukunguluka cha chikungulwila, cha mbonge ni cha mambonge.

Nyi kukushi uhashi wa kulikungulwila ha mbunga, chakutalilaho, ngwe ha mashimbu a musongo wa COVID-19, yetu twakulikungulwila kupalikila ha internet. Ha kukunguluka cha ha internet, mandumbu jetu a malunga ni a mapwo twamishi, kakuhasa kulinyingika umwe ni mukwo. Nawa kakuhasa kumona chize hita ndumbu akulinga chihanda, pande ni kwivwa chize anasolola ufulielo wo kupalikila mu makumbululo. (1 Timo. 6:11, 12) Chikwo nawa, chili chashi mandumbu kuhanjikila mu yipatulo yalisa (salas simultâneas) hanyima lia kukunguluka. Muze mukunguluka ni Yela ja Yehova akwo kupalikila ha internet, muupwa ni uhashi wakumona chize ndumbu yoze unazange kulimbata nenyi akutwama ni akwo, nawa chino muchikukwasa kumunyingika kanawa. (1 Petu. 3:4) Hakupalika cha mashimbu, muze munulinyingika kanawa, muchipwa chashi kunyingika nyi nuli ni yimwe yalifwa hakutwala ku yize nwatesele ku ufulielo, yitanga ni kumona nyi yinalite.

Nyi mandumbu waze twamishi mecha hanga shimbi ja mu Mbimbiliya jaakwase kukwata yiyulo hakutwala ku umbachiso, chino muchaakwasa hanga awahilile ku mwono wo. Ngwe chize mukanda wa Yishima 18:22 unambe: “Mweswe mawana pwo mawana chuma chipema, mazuka vumbi kuli Yehova.”