1. Kuchi twatamba kumona yilemba?

 SAKATANGA wa malilu ni hashi hanatwehe chawana chinene cha kukundama kuli iye mu yilemba. Mutuhasa kulemba kuli Yehova ha shimbu lieswe, mu limi lieswalio chakuhona kulitesa nenyi ola. Mutuhasa kupwa ni shindakenyo ngwetu, Tata yetu wa zango kumatwivwa chipwe muze tuli ha muhela mu shipitali hanji mu zuwo lia ususu. Twakusakwilila chinji ha chawana chino.

2. Kuchi Ndawichi asolwele ngwo kapwile ni kulemesa chinji uhashi wa kulemba?

² Mwanangana Ndawichi te kakulemesa chinji uhashi wa kulemba. Iye yembila Yehova ngwenyi: “Kulemba chami chikalite kumeso je ngwe insensu.” (Samu 141:1, 2) Ha matangwa ja Ndawichi, insensu yisandu yize asasendote apwile ni kuzachisa mu uwayilo wamwenemwene te kakuyilulieka kanawa. (Kutuhu. 30:34, 35) Mutapu uze apwile ni kululiekelamo insensu wakwashile Ndawichi kusakula kanawa maliji jenyi muze te akulemba kuli Yehova. Tunazange chinji kwimbulula Ndawichi. Tunazange hanga yilemba yetu yivwise Yehova kuwaha.

3. Yika twatamba kwiwuluka muze tunalembe kuli Yehova, nawa mumu liaka?

³ Muze tunalembe kuli Yehova, twatamba kuchilinga ni vumbi. Achinyonga ha usolwelo wa kukomwesa uze Izaia, Ezekiele, Daniele ni Yoano amwene. Usolwelo wacho te walisa, alioze weswe wapwile ni chimwe chalifwa. Weswe wasolwele ngwo Yehova kali Mwanangana wa uhenya. Izaia kamwene  ‘Yehova kanatwama ha ngunja mwilu.’ (Iza. 6:1-3) Ezekiele kamwene Yehova kanatwame ha temba lienyi mu malilu, liakujingilika ni ‘pangu lize liapwile ngwe kongolo.’ (Eze. 1:26-28) Daniele kamwene “Mukulu-wa-Matangwa” kali ni mazalo atoma, ngunja yenyi yapwile milengi ya kahia. (Danie. 7:9, 10) Nawa Yoano kamwene Yehova kanatwama ha ngunja yakujingilika ni kongolo yize yalifwa ni esmeralda. (Uso. 4:2-4) Usolwelo uno wakutwiwulula ngwo, Yehova kakwete ndundo jinji. Kashika twakulemesa chinji uhashi wetu wa kulemba kuli iye, nawa tunazange kuchilinga ni vumbi. Mba yuma yika mutuhasa kwita mu yilemba?

4. Yika twalilongesa ha maliji atangu a yilemba ya Yesu waze ali ha Mateu 6:9, 10?

⁴ Tanga Mateu 6:9, 10. Mu longeso lia ha Mulundu, Yesu kalongesele tumbaji twenyi chize malemba mu jila yize muyivwisa Yehova kuwaha. Yesu kaliangile kutongola yuma yilemu muze alembele. Chitangu, kupwisa jina lia Yehova lisandu, kwiza cha Wanangana uze muukanongesa akwa-kole eswe ja Zambi ni kuneha yiwape ya Zambi kuli atu hano hashi. Nyi twatongola yuma yino mu yilemba yetu, mutusolola ngwetu upale wa Zambi ukwete ulemu unji kuli yetu.

5. Shina chili chipi kwita yuma yize tunafupiwa ku mwono?

⁵ Mu yilemba yacho Yesu yasolola nawa ngwenyi, hi chipi ko kwita yuma yize tunafupiwa ku mwono. Mutuhasa kwita kuli Yehova hanga atwehe kulia chetu cha ha tangwa, atukonekene milonga yetu, atufunge ku yeseko ni kutupulula kuli chingulungulu. (Mateu 6:11-13) Nyi mutwita yuma yino kuli Yehova muze tunalembe, mutusolola kuli iye ngwetu tunafupiwa ukwaso wenyi, nawa tunazange kupwa ni utayizo wenyi.

6. Shina muze tunalembe twatamba kutongola wika yuma yize Yesu ahanjikile mu kulemba cha mwene? Lumbununa.

⁶ Yesu kakazangile hanga tumbaji twenyi azachise maliji waze ene iye azachishile mu kulemba cha mwene. Ha yilemba yikwo, Yesu yahanjika ha yikuma yalisa yize te yili ni ulemu kuli iye ha mashimbu jacho. (Mateu 26:39, 42; Yoa. 17:1-26) Chizechene  nawa, ni yetu mutuhasa kulemba ha chuma cheswacho chize tunalipikala nacho. Muze tunazange kukwata chimwe chiyulo, mutuhasa kulemba hanga Yehova atwehe mana ni yinyingi. (Samu 119:33, 34) Nyi twatambula chiteli chaha, twatamba kulemba hanga twite ukwaso wa chize mutuhasa kuchilinga kanawa. (Yishi. 2:6) Yisemi mahasa kulembela ana jo, ni ana no mahasa kulembela yisemi jo. Nawa yetweswe mutuhasa kulembela alongi jetu ni atu eswe waze twakuwana mu munda. Chochene, muze tunalembe kutwatambile wika kwita yuma yize tunazange.

7. Mumu liaka twatamba kuhalisa Yehova mu yilemba yetu?

⁷ Chili chilemu kwiwuluka ngwo mu yilemba yetu twatamba kuhalisa Yehova. Kukushi niumwe watela uhaliso wetu kuhiana Yehova Zambi yetu. Iye kali “mupema, [nawa] mukwa kukonekena.” Iye nawa kali ‘wa too ni keke ni vumbi. Keshi kutenuka ni kawashi; utu wa zango lienyi ni umwenemwene wenyi kuyalumbama.’ (Samu 86:5, 15) Kashika twatamba kuhalisa Yehova mumu lia yitanga yenyi yipema ni yuma yize atangile.

8. Ha yuma yika mutuhasa kusakwilila Yehova? (Samu 104:12-15, 24)

⁸ Kuchizako kuhalisa Yehova mu yilemba yetu, twatamba nawa kumusakwilila ha yuma yeswe yipema yize akutwaha. Chakutalilaho, mutuhasa kumusakwilila ha ulombo upema uze twakumona ku yitemo yeka ni yeka, kulia chalisa chize twakulia, ni masepa a zango waze tukwete. Tata yetu wa zango kakutwaha yuma yino yeswe, mumu kanazange tuwahilile. (Tanga Samu 104:12-15, 24.) Chahiana ulemu, twakusakwilila Yehova ha kulia cheswe cha ku spiritu chize akutwaha ni kutalatala chipema cha kulutwe lia matangwa.

9. Yika muyihasa kutukwasa mba twiwuluke kusakwilila Yehova? (1 A-Tesalonika 5:17, 18)

⁹ Ha mashimbu amwe mutuhasa kuvulama kusakwilila Yehova ha yuma yeswe yipema yize akutulingila. Yika muhasa kulinga mba uhone kuvulama kusakwilila Yehova? Muhasa kusoneka ha mukanda yuma yize weta kuli Yehova mu yilemba, nawa ha hita shimbu muhasa kuhengwola yuma yacho  hanga utale yize Yehova akumbulula. Mba kusongo mulemba hanga umusakwilile ha yeswe yize akwaha. (Tanga 1 A-Tesalonika 5:17, 18.) Twakuwahilila chinji nyi mutu yoze twalingila chuma chipema matusakwilila. Chizechene nawa, muze twakusakwilila Yehova ha kukumbulula yilemba yetu, iye kakuwahilila chinji. (Kolo. 3:15) Alioze kuli nawa chuma chikwo chilemu chize mutuhasa kusakwilila Yehova.

10. Kulita ni 1 Petulu 2:21, mumu liaka twatamba kusakwilila Yehova ha kututumina Mwanenyi?

¹⁰ Tanga 1 Petulu 2:21. Twakusakwilila chinji Yehova ha kututumina Mwanenyi hanga atulongese umwenemwene. Muze twakulilongesa hakutwala kuli Yesu, twakunyingika yuma yinji hakutwala kuli Yehova ni chize twatamba kumuvwisa kuwaha. Nyi mutufuliela mu chitapo cha Yesu, mutuhasa kupwa ni sambukila ni Yehova hamwe ni usepa upema.—Roma 5:1.

11. Mumu liaka twakulemba mu jina lia Yesu?

¹¹ Twakusakwilila chinji Yehova ha kutukwasa kukundama kuli iye kupalikila muli Mwanenyi. Yesu kali jila yize Yehova akuzachisa hanga atwehe yize twakumwita. Yehova kakwivwa ni kukumbulula yilemba yize atu akulinga mu jina lia Mwanenyi. Yino ye Yesu ambile ngwenyi: “Cheswacho munwita mu jina liami, kumunguchilinga, hanga achichimieke Tata muli mwe Mwana.”—Yoa. 14:13, 14.

12. Chuma chikwo chika chize chakutukwasa kusakwilila Yehova?

¹² Yehova kakukonekena shili yetu kupalikila mu chitapo cha ukuule wa Yesu. Yisoneko yinasolola ngwo, Yesu kali “Sasendote mukwa lutwe . . . yoze [unatwame] ku kwoko lia chindume lia ngunja ya Ulamba mu malilu.” (Hepre. 8:1) Yesu kali ‘hako yetu kumeso ja mwe Tata.’ (1 Yoa. 2:1) Twakusakwilila chinji Yehova ha kutwaha Sasendote mukwa lutwe yoze unanyingika kanawa uhenge wetu nawa yoze “wakutuhakwila”! (Roma 8:34; Hepre. 4:15) Mumu lia uhenge, nyi kukushi chitapo cha ukuule wa Yesu kachi kutuchi kuhasa kukundama kuli Yehova mu yilemba. Chochone, chitapo cha ukuule wa Yesu chili chawana chilemu chize Yehova hanatwehe. Kashika kutuchi keza kusakwilila Yehova liakulu ha chawana chino!

13. Ha ufuku muze te kanda afwa, kuchi Yesu asolwele ngwenyi kakuzanga tumbaji twenyi?

¹³ Ha ufuku muze te kanda afwa, Yesu yalembela chinji tumbaji twenyi ha kwita kuli Tato hanga ‘aafunge kuli mwe mupi.’ (Yoa. 17:15) Chino chasolwele zango lize Yesu apwile nalio hali tumbaji twenyi. Chipwe muze anyingikine ngwenyi kwasala hakehe hanga amushihe, nihindu yalihulumba hali apostolo jenyi.

14. Kuchi mutuhasa kusolola ngwetu, twakuzanga mandumbu ni mapangi jetu?

¹⁴ Chizechene ngwe Yesu, muze tunalembe kutushi kulihulikila wika hali yetwene. Shimbu tuchilinge, yetu twakulembela mandumbu ni mapangi jetu. Muze twakuchilinga, twakusolola ngwetu tunakaula shimbi ya Yesu ya kulizanga umwe ni mukwo, nawa twakusolola kuli Yehova chize twakuzanga mandumbu jetu a mu ufulielo. (Yoa. 13:34) Kulembela mandumbu ni mapangi jetu hi kukisa mashimbu ko. Mbimbiliya yinatulweze ngwo, “kuliumba cha mukwa ululi chili ni tachi jinji.”—Tia. 5:16.

15. Mumu liaka twatamba kulembela mandumbu jetu a ku ufulielo?

 ¹⁵ Twatamba kulembela mandumbu jetu a ku ufulielo mumu kakupalika mu yipikalo yinji. Mutuhasa kwita kuli Yehova hanga aakwase kunyongonona muze anayiji, anapalika mu luyinda wa chisemewa, jita, yihungumiona hanji lamba likwo nawa. Mutuhasa kulembela nawa mandumbu ni mapangi jetu waze akulihana hanga aakwase. Hanji unanyingika nawa mandumbu akwo waze anapalika mu lamba liacho. Kashika muze unalembe muhasa kutongola majina jo. Twakusolola zango lia undumbu muze twakwita kuli Yehova hanga akwase mandumbu jetu anyongonone.

16. Mumu liaka twatamba kulembela mandumbu waze apwa tusongo mukachi ketu?

¹⁶ Mandumbu waze apwa tusongo mu chikungulwila, kakusakwilila chinji muze twakwatongola mu yilemba yetu, nawa yilemba yacho yakwakwasa. Postolo Paulu kanyingikine ngwenyi, kafupiwile ukwaso wa yilemba ya akwo. Yasoneka ngwenyi: Lembenu nawa “hali yami hanga akangwehe kuhanjika, ha kupakula kanwa liami ni hamu, mukusolola yinyingi ya chijimbikilo cha sango lipema.” (Efwe. 6:19) Ni musono nawa, tuli ni mandumbu anji yikilikita waze apwa tusongo mukachi ketu. Twakwasolwela zango ha kwita kuli Yehova hanga awahise milimo yo.

17-18. Ha shimbu lika mahasa kutwita hanga tulembe, nawa yika twatamba kwiwuluka?

¹⁷ Ha mashimbu amwe, kakutwita hanga tumanyineko akwetu mu yilemba. Chakutalilaho, pangi yoze unasongwela longeso lia Mbimbiliya mahasa kwita pangi yoze ali nenyi hanga alembe. Amu pangi wacho kanyingikine kanawa longi, kashika hanji mazanga kulemba kusongo lia longeso. Nyi machilinga, manyingika kanawa yuma yize longi anafupiwa ni kuyisa mu yilemba.

¹⁸ Muze akwita kuli umwe ndumbu hanga alembe ha kukunguluka hanji ha kukunguluka cha kuya mu munda, iye katamba kwiwuluka ulemu wa kukunguluka chacho. Muze analembe, katambile kuhana yiyulo kuli mandumbu mu chikungulwila hanji kutwa mitambi.  Ha kukunguluka chetu chinji, minutu yitangu yitano yapwa ya mwaso ni kulemba, kashika ndumbu yoze malemba katambile ‘kuhanjika chinji,’ chipi-chipi nyi chili kulemba chitangu.—Mateu 6:7.

19. Yika muyitukwasa kulilulieka muze tunashimbwila tangwa lia upatwilo wa Yehova?

¹⁹ Tunafupiwa kulemba mashimbu eswe mumu tangwa lia upatwilo wa Yehova kulinakundama. Kashika Yesu ambile ngwenyi: “Lenu ha shimbu lieswe, nikuliumba, hanga nukakumbe, nukapuluke ku yino yuma yeswe muyikapwa.” (Luka 21:36) Nyi twalemba mashimbu eswe, ufulielo wetu muukola nawa tangwa lia Yehova mulituwana akulilulieka kulu.

20. Mu mutapu uka yilemba yetu muyihasa kupwa ngwe insensu ya lupembo mupema kuli Yehova?

²⁰ Yika twalilongesa ha mutwe uno? Twalilongesa ngwetu, kulemba chili chuma chilemu. Kashika muze tunalembe, twatamba kuhanjika yuma yize yinalite ni upale wa Zambi. Twamona ulemu wa kusakwilila Zambi ha kutwaha ukuule wa Mwanenyi Yesu, yoze uli Mwanangana wetu. Twamona nawa ulemu wa kulembela mandumbu ni mapangi jetu. Nawa mutuhasa kulemba hanga twite yize tunafupiwa ku musunya ni ku spiritu. Chochene, twakulemesa chinji uhashi wa kulemba, kashika twatamba kusakula kanawa maliji waze mutuzachisa muze tunahanjika ni Yehova mu yilemba. Hachino, maliji jetu mapwa ngwe insensu ya lupembo mupema kuli Yehova, waze mamuvwisa kuwaha chinji.—Yishi. 15:8.