MUTWE WAKULILONGESA 29
Tukwasenu Kasongo Ketu Yesu
“Hanangwehe yiyulo yeswe mwilu ni hashi.”—MATEU 28:18.
MWASO 13 Kristu, Chilweza Chetu
CHIKUMA CHILEMU *
1. Upale wa Yehova uka musono?
MUSONO, upale wa Zambi uli ngwo sango lipema lia Wanangana aliambujole hashi heswe. (Marku 13:10; 1 Timo. 2:3, 4) Mulimo uno uli wa Yehova, kashika chili chilemu ha kusakula Mwanenyi hanga ausongwele. Hachino, mutuhasa kupwa ni shindakenyo ngwetu, ni usongwelo wa Yesu mulimo wa kwambujola mulingiwa kulita ni upale wa Yehova shimbu songo kanda liheta.—Mateu 24:14.
2. Yika mutushimutwina ha mutwe uno?
2 Ha mutwe uno, mutumonaho chize Yesu anazachisa “ndungo wamwenemwene” hanga ahane kulia cha ku spiritu kuli tumbaji twenyi ni kwalulieka hanga alinge mulimo wa kwambujola uze te kanda ulingiwa kama. (Mateu 24:45) Mutumona nawa yize hita umwe wa kuli yetu mahasa kulinga hanga akwase Yesu ni ndungo wamwenemwene.
YESU KANASONGWELA MULIMO WA KWAMBUJOLA
3. Chiteli chika Yesu atambwile?
3 Yesu kanasongwela mulimo wa kwambujola. Kuchi mutuhasa kupwa ni shindakenyo yacho? Ha limwe shimbu muze te kanda achiya mu malilu, iye kaliwanyine ni amwe tumbaji twenyi ku mulundu wa Ngalileya. Yaalweza ngwenyi: “Hanangwehe yiyulo yeswe mwilu ni hashi.” Haliapwila talenu maliji jenyi waze anahateho: “Yeenu nukatayise tumbaji a ku mavungu eswe.” (Mateu 28:18, 19) Hakachi ka yuma yacho, Yesu yatambula chiteli cha kusongwela mulimo wa kwambujola.
4. Mumu liaka tuli ni shindakenyo ngwetu, Yesu machinunga ni kusongwela mulimo wa kwambujola?
4 Yesu kambile ngwenyi mulimo wa kwambujola ni wa kutayisa tumbaji, te maulinga ku “mavungu eswe” nawa ngwenyi, te mapwa hapwe ni tumbaji twenyi “matangwa eswe ndo kumanunuka cha miaka.” (Mateu 28:20) Maliji wano kanasolola pundu ngwo, Yesu te manunga ni kusongwela mulimo wa kwambujola ndo ha matangwa jetu.
5. Kuchi tunakwase kumanununa uprofeto uli Samu 110:3?
5 Yesu kakapwile ni kwivwa woma ngwenyi, kusongo lia yuma ya mwakono te mukupwa akwa-kwambujola akehe. Iye kanyingikine ngwenyi, maliji a uprofeto a mukwa-kwimba masamu, anambe ngwo: “Atu je malihana mulambu ni upale woene ha tangwa lia ngolo je” te mamanunuka. (Samu 110:3) Nyi wa kwambujola sango lipema, acho unakwase Yesu ni ndungo wamwenemwene nawa unakwase kumanunuka cha uprofeto uno. Mulimo uno kuunende kanawa, alioze kwakusoloka kapinda.
6. Kapinda muka yoze akwa-kwambujola akupwa nenyi?
6 Kapinda umwe yoze akwa-kwambujola akupwa nenyi kali yihungumiona. Yitanganyanyi, mangana a mayingeleja ni manguvulu kakulweza atu anji yuma ya mahuza hakutwala ku mulimo wetu. Nyi asoko jetu, atu waze twanyingika ni waze twakalakala no mevwa sango jacho jipi, o mahasa kutushinjila hanga tweche kuwayila Yehova ni kwambujola. Mu yifuchi yimwe, akwa-kole jetu kakuvwisa mandumbu jetu woma, kwamwesa lamba hanji kwasa mu mazuwo a ususu. Kutushi kukomoka ha yuma yino atu akutulinga. Yesu kambile ngwenyi: “Ku mavungu eswe kumakanuvwila kole mumu ha jina liami.” (Mateu 24:9) Kole yize atu anji akutuvwila yakusolola pundu ngwo, tuli ni utayizo wa Yehova. (Mateu 5:11, 12) Satana mwe unanehe kole yacho. Alioze, Yesu kali ni ndundo jinji kuhiana Satana! Ni ukwaso wa Yesu, sango lipema linahete kuli atu a ku mavungu eswe. Tutalenu yuma yize yinatwehe shindakenyo yacho.
7. Yika yinakwehe shindakenyo ngwetu maliji a Usolwelo 14:6, 7 kanamanunuka?
7 Kapinda mukwo twakupwa nenyi kali wa kwambujola kuli atu waze akuhanjika maliji alisa. Mu usolwelo uze Yesu ahanyine kuli Yoano, kasolwele ngwenyi sango lipema te mulikumba kapinda wacho. (Tanga Usolwelo 14:6, 7.) Mu mutapu uka? Tunakwase atu anji kunyingika umwenemwene. Musono, atu hashi heswe mahasa kutanga mikanda yize yinakatuka mu Mbimbiliya ha site yetu jw.org, mumu muli sango mu malimi kuhiana 1.000! Chizavu cha Tusongo chatayiza kulumbununa mukanda, Wahilila Ku Mwono Ku Miaka Yeswe! hanga tuuzachise mu mulimo wa kutayisa tumbaji. Mukanda wacho uli mu unji wa malimi kuhiana 700! Kulia cha ku spiritu chili nawa mu yinema ni mu maliji akukopa mu malimi a tunaye ni mu sona ja tupuputa. Tunamono kumanunuka cha uprofeto wa mu Mbimbiliya. Atu “a ku mavungu a malimi eswe” kanalilongesa limi lisandu lize linakatuka ha umwenemwene wa mu Mbimbiliya. (Zeka. 8:23; Zefa. 3:9) Yino yeswe yinalingiwa mumu lia usongwelo wa Yesu Kristu.
8. Ndo hano yiwape yika twazuka mu mulimo wetu wa kwambujola?
8 Musono, atu kuhiana 8.000.000 mu yifuchi 240 kali mu ululikiso wa Yehova, nawa hita mwaka kakupapachisa tununu twa atu! Chuma chilemu hi unji wa atu ko, alioze yitanga ya ku Ukristu, chekwamba ‘utu waha’ uze akupwa nawo tumbaji wano aha. (Kolo. 3:8-10) Atu anji haneche yitanga ya luchisa, ungalwe, katonde ni kwehuka kuzanga chinji chifuchi cho. Uprofeto uze uli ha Izaia 2:4 kuunamanunuka, o ‘keshi kulilongesa nawa kwasa jita.’ Mumu muze twakusa tachi hanga tuzale utu waha, twakukwasa atu hanga eze mu ululikiso wa Yehova nawa chakusolola ngwo, tunakaula usongwelo wa kasongo ketu, Yesu Kristu. (Yoa. 13:35; 1 Petu. 2:12) Mumu liaka yino yakulingiwa? Mumu Yesu kakutwaha ukwaso uze twakufupiwa.
YESU YASAKULA NDUNGO
9. Kulita ni Mateu 24:45-47, yika Yesu ambile yize te muyilingiwa ha matangwa a kusula?
9 Tanga Mateu 24:45-47. Yesu kambile ngwenyi, ha matangwa a kusula te masakula “ndungo wamwenemwene” hanga ahane kulia cha ku spiritu kuli tumbaji twenyi. Kashika, ndungo wacho te mapwa ni milimo yinji ha matangwa jetu. Yino ye yinalingiwako lume. Kasongo ketu Yesu kanazachisa chizavu chikehe cha mandumbu akuwayisa hanga ahane kulia cha ku spiritu “ha mwaka wacho” kuli atu ja Zambi ni kuli waze akuzanga umwenemwene. Mandumbu jacho keshi kulimona ngwe miata a ufulielo wetu. (2 Kori. 1:24) Shimbu alipwise miata, ayo kananyingika ngwo Yesu Kristu mwe “kasongo ni kapitau” ka atu jenyi.—Iza. 55:4.
10. Mikanda yize yili ha yizulie, mukanda uka wakukwashile kunyingika umwenemwene?
10 Kukatuka ha mwaka 1919, ndungo wamwenemwene kakutuhwisa mikanda yeka ni yeka yize yakukwasa atu waze anazange kulilongesa umwenemwene. Ha mwaka 1921, ndungo yatuhwisa mukanda unambe ngwo, A Harpa de Deus hanga akwase atu kulilongesa umwenemwene wa mu Mbimbiliya. Ha kupalika cha mashimbu, yatuhwisa mikanda yikwo. Mukanda uka wakukwashile kunyingika Yehova ni kumuzanga? Shina Seja Deus Verdadeiro, A Verdade Que Conduz à Vida Eterna, Poderá Viver Para Sempre no Paraíso na Terra, Conhecimento Que Conduz à Vida Eterna, Yika Chamwenemwene Mbimbiliya Yakulongesa?, Yika Mbimbiliya Muyihasa Kutulongesa?, ni hanji mukanda wetu waha, Wahilila Ku Mwono Ku Miaka Yeswe!? Mikanda yino yeswe kayiluliekele hanga yitukwase kutayisa tumbaji. Nawa kakuyituhwisa ha shimbu lize tunayifupu.
11. Mumu liaka chili chilemu yetweswe kunyingika kanawa Yehova ni Mbimbiliya?
11 Mandumbu jetu aha mu ufulielo hi ayo wika ko anafupiwa kunyingika kanawa Yehova ni Mbimbiliya. Yetweswe tunafupiwa kuchilinga. Postolo Paulu kasonekene ngwenyi: “Kulia cha tachi kuchapwa kulia cha waze hakola.” Paulu yawezela nawa ngwenyi, nyi twakaula yize twakulilongesa mu Mbimbiliya muchitukwasa kusela “chinyingi hakachi ka chipema ni chipi.” (Hepre. 5:14) Muchihasa kupwa chikalu kwononokena shimbi ja Yehova ha matangwa wano, mumu atu anji hano hashi kanalingi yuma ya luchisa. Alioze, Yesu kanatukwase kulilongesa yuma yize tunafupiwa hanga tukolese ufulielo wetu. Malongeso jacho kakukatuka mu Mbimbiliya. Nawa ndungo wamwenemwene kakululieka kulia chacho ni kuchihana kupalikila mu usongwelo wa Yesu.
12. Ngwe Yesu, kuchi twakuhalisa jina lia Zambi?
12 Ngwe Yesu, ni yetu twakuhalisa jina lia Zambi ngwe chize liatela. (Yoa. 17:6, 26) Chakutalilaho, ha mwaka 1931 twalilukile jina Yela ja Yehova lize linakatuka mu Mbimbiliya. Chino twachilingile hanga tusolole ngwetu twakulemesa jina lia Zambi, nawa twazangile hanga atu atunyingike ni jina liacho. (Iza. 43:10-12) Nawa kukatuka ha Outubro ya mwaka wacho, jina lia Zambi yiliputuka kusoloka ha Kaposhi wa kutalila. Kusulaho, Mbimbiliya Tradução do Novo Mundo yiyifunyisa jina lia Zambi mu yihela yize liatamba kupwa. Mulimo uno walisele chinji ni wa akwa-mayingeleja waze akuchiza jina lia Zambi mu Mbimbiliya jinji jize akulumbununa!
YESU KANALULIEKA TUMBAJI TWENYI
13. Yika yakukwaha shindakenyo ngwo, Yesu kanazachisa “ndungo wamwenemwene” musono? (Yoano 6:68)
13 Kupalikila muli “ndungo wamwenemwene,” Yesu hanase umwe ululikiso hano hashi hanga ukwase atu kunyingika uwayilo walinanga. Kuchi wakwivwa akutwala ku ululikiso uno? Kota wakwivwa ngwe chize evwile postolo Petulu, yoze walwezele Yesu ngwenyi: “Mwene, kuli iya mutuya? Maliji a mwono wa mutolo yenu wika nuli no.” (Yoa. 6:68) Nyi kutwakanyingikine ululikiso wa Yehova kachi kulihi hita umwe wa kuli yetu ali? Kupalikila mu ululikiso wacho, Yesu kakutwaha yeswe yize tunafupiwa hanga tununge ni kushishika kuli Zambi. Iye nawa kakutwaha fumbo hanga tuhase kulinga mulimo wa kwambujola. Chikwo nawa, iye kakutukwasa kuzala ‘utu waha’ hanga tuhase kuvwisa Yehova kuwaha.—Efwe. 4:24.
14. Kuchi wayuka ha kupwa mu ululikiso wa Yehova ha mashimbu a musongo wa COVID-19?
14 Yesu kakutwaha usongwelo wa mana ha mashimbu akalu. Twamwene ulemu wa usongwelo wacho muze COVID-19 yaputukile. Ha shimbu lize atu anji kakamwene yize malinga, Yesu yatwaha usongwelo walita hanga utufunge. Kanakatukolweza hanga tuzale kafuza muze tuli ha mbunga ni kulisela tuwa ni akwetu. Makulwana a mu chikungulwila kaakolwezele hanga apwe ni kuhanjika ni mandumbu mashimbu eswe ni kunyingika yize anafupiwa ku musunya ni ku spiritu. (Iza. 32:1, 2) Twakutambula nawa usongwelo ni utakamiso kupalikila mu sango jaha kukatuka ku Chizavu cha Tusongo.
15. Usongwelo uka twatambwile hakutwala ku kukunguluka ni kwambujola, nawa yika twazuka?
15 Muze COVID-19 yaputukile, twatambwile nawa usongwela wa chize mutukunguluka ni kwambujola. Chocho kawashi-washi, yituputuka kuzachisa internet hanga tukunguluke mu yikungulwila, kukunguluka cha mbonge ni cha mambonge. Nawa yituputuka kwambujola ha kusoneka mikanda ni kuzachisa telefone. Yehova kawahisa tachi jize twasele. Mu yifuchi yinji twatambwile sango ngwo, akwa-kwambujola koka chinji kuhiana kunyima. Kwamba pundu, mandumbu anji kapwile ni yakulitakana nayo yautakamiso.—Tala mushete, “ Yehova Kakuwahisa Mulimo Wetu wa Kwambujola.”
16. Shindakenyo yika tuli nayo?
16 Amwe kota kanyongene ngwo, usongwelo uze ululikiso wahanyine hakutwala ku musongo wa COVID-19 unakahianyisa. Alioze kulutwe, yuma yiyisolola ngwo usongwelo uze twatambwile te unalite. (Mateu 11:19) Kupukuna ha chize Yesu anasongwela atu jenyi ni zango, chinatwehe shindakenyo ngwetu, chipwe ngwe mukulingiwa yuma yeswayo, nihindu Yehova ni Mwanenyi mapwa hamwe ni yetu.—Tanga A-Hepreu 13:5, 6.
17. Kuchi wakwivwa ha kukalakala mushi lia usongwelo wa Yesu?
17 Twakuyuka chinji ha kupwa mushi lia usongwelo wa Yesu! Tuli mu ululikiso uze wakukumba katonde mukachi ka minyachi, mavungu ni malimi. Twakutambula malongeso a mu Liji lia Zambi ni fumbo lize twakufupiwa hanga tulinge mulimo wa kwambujola. Yetweswe tunalilongesa chize mutuhasa kupwa ni utu waha ni chize mutuhasa kulizanga umwe ni mukwo. Kashika, tunawahilila mumu Yesu kali Kasongo ketu!
MWASO 16 Halisenu Zambi Mumu lia Mwanenyi Yoze Awayisa
^ Tununu twa malunga, mapwo ni ana kanambujola sango lipema ni mbunge yeswe musono. Shina ni yena uli mukachiko? Nyi chenacho, ni yena unakalakala mushi lia usongwelo wa Mwene yetu, Yesu Kristu. Ha mutwe uno, mutushimutwinaho yuma yize muyisolola ngwo, Yesu kanasongwela mulimo wa kwambujola musono. Kupukuna ha sango jacho muchitukwasa kununga ni kuwayila Yehova mushi lia usongwelo wa Kristu.
