1. Yika Yehova alingile muze Alama ni Eva avulumwine? (Uputukilo 3:15)

 MUZE Alama ni Eva avulumwine, Yehova yahana kutalatala kuli ana jo kupalikila mu umwe uprofeto ulemu. Yize ambile yili ha Uputukilo 3:15.—Tanga.

2. Mumu liaka uprofeto uno uli ulemu?

² Uprofeto uno wakusoloka mu mukanda utangu wa Mbimbiliya. Alioze mu mikanda yeswe ya Mbimbiliya muli yimwe yize yinalite ni uprofeto uno. Ngwe chizechene akupalalenya hamuwika mafwo a umwe mukanda, maliji waze ali ha Uputukilo 3:15 kakuchinga mikanda yeswe ya Mbimbiliya mu lusango umuwika, unambe ngwo, Zambi te matuma umwe hanga alamwine atu ni kushiha Ndiapu ni waze akumukaula. * Yino muyikaneha yiwape yinji kuli waze eswe akuzanga Yehova!

3. Yihula yika mutukumbulula ha mutwe uno?

³ Ha mutwe uno, mutukumbululaho yihula yitatu hakutwala ku uprofeto uze uli ha Uputukilo 3:15. Chitangu, aya waze anatongola ha uprofeto uno? Chamuchiali, kuchi uprofeto uno unamanunuka? Chamuchitatu, kuchi uprofeto uno unatukwase musono?

4. “Kapela” iya, nawa kuchi tunamunyingika?

⁴ Waze anatongola mu uprofeto uli ha Uputukilo 3:14, 15 kali “kapela,” “munyachi wenyi,” “pwo” ni “munyachi  wenyi.” Mbimbiliya yakutukwasa kwanyingika kanawa. * Chitangu tutalenu hali “kapela.” Kapela wa mbwende te kechi kuhasa kunyingika yize Yehova ambile mu Munda wa Endene. Kashika, upatwilo wa Yehova te unatale hali chitangiwa cha mana. Iya mwenawo? Mukanda wa Usolwelo 12:9 unatukwase kunyingika kanawa kapela wacho. Unambe ngwo “mwe kapela wa shakulu” kali Satana Ndiapu. Mba aya analingi munyachi wenyi?

5. Aya waze ali mu munyachi wa kapela?

⁵ Mashimbu amwe Mbimbiliya yakuzachisa liji munyachi hanga yihanjike hali waze akwimbulula kanawa umwe mutu ni kwamona ngwe ana jenyi. Kashika, akwa-munyachi wa kapela kali yitangiwa ya spiritu ni atu waze akwimbulula Satana ha kulimika ni Yehova ni atu Jenyi. Yitangiwa yacho yinachingi angelo waze ahichikile yiteli yo mu malilu ni kwiza hashi ha matangwa ja Noa, ni atu api waze akwimbulula tato Ndiapu.—Uputu. 6:1, 2; Yoa. 8:44; 1 Yoa. 5:19; Yunda. 6.

6. Mumu liaka “pwo” anatongola ha uprofeto uno hi Eva ko?

⁶ Haliapwila tutalenu hali “pwo.” Pwo liacho hi Eva ko. Mumu liaka tunambe chocho? Tutalenu wika chikuma chimwe. Uprofeto unatulweze ngwo munyachi wa pwo te ‘muuwonda’ mutwe wa kapela. Ngwe chize hitwamona, kapela kali Satana, chitangiwa cha spiritu. Nawa nyi pwo kapwile Eva, te muchipwa chikalu umwe mwana wakusemuka kuli iye awonde Satana. Mba, kuchi te Satana mamunongesa?

7. Kulita ni Usolwelo 12:1, 2, 5, 10, pwo anatongola ha Uputukilo 3:15 iya?

⁷ Mukanda wa kasula unasolola pwo yoze  anatongola ha Uputukilo 3:15. (Tanga Usolwelo 12:1, 2, 5, 10.) Pwo liacho hi mutu ko! Iye kali ni kakweji kushi lia yiliato yenyi, ni ha mutwe wenyi hali chipangula cha tutongonoshi 12. Iye yasema mwana walisa—Wanangana wa Zambi. Amu Wanangana wa Zambi uli mu malilu, pwo liacho neye kali mu malilu. Pwo liacho kanalumbunuka chihanda cha ululikiso wa Yehova chili mu malilu muze muli angelo ashishika.—Ngala. 4:26.

8. Chihanda chilemu cha munyachi wa pwo iya, nawa shimbu lika chino chapwile? (Uputukilo 22:15-18)

⁸ Mbimbiliya yakutukwasa kunyingika ngwo, Yesu che chihanda chilemu cha munyachi wa pwo. Yinambe nawa ngwo, iye te masemuka ku munyachi wa Apalahama. (Tanga Uputukilo 22:15-18.) Ngwe chize uprofeto wambile, Yesu mwe te mukwa-munyachi wa lunga yono washishika. (Luka 3:23, 34) Alioze mukwa-munyachi wa pwo te ndo apwe ni ndundo jinji kuhiana ja mutu, mba ahase kunongesa Satana. Kashika, muze Yesu apwile ni miaka 30 yamuwayisa ni spiritu yisandu. Ha shimbu liacho, iye yapwa chihanda chilemu cha munyachi wa pwo. (Ngala. 3:16) Muze ahindukile mu ufwe, Zambi yamusa “chipangula cha uhenya ni ulemu” ni kumwaha “yiyulo yeswe mwilu ni hashi,” kuchingako chiyulo cha ‘kwonwona yitanga ya Ndiapu.’—Hepre. 2:7; Mateu 28:18; 1 Yoa. 3:8.

9-10. (a) Aya nawa analingi chihanda cha munyachi wa pwo, ha shimbu lika o apwile chihanda cha munyachi wacho? (b) Yika mutushimutwina haliapwila?

⁹ Kuchizako Yesu, kuli nawa akwo waze analingi chihanda cha munyachi wa pwo. Postolo Paulu kasolwele chihanda cha munyachi wacho muze alwezele akwa-Kristu akuwayisa A-Yunda ni waze hi A-Yunda ko, ngwenyi: “Se nuli akwa Kristu, nuli munyachi wa Apalahama ni maswana nikulita ni chilakenyo.” (Ngala. 3:28, 29) Nyi mukwa-Kristu umwe mamuwayisa ni spiritu yisandu, kakupwa chihanda cha munyachi wa pwo. Hachino, mu munyachi wa pwo muli Yesu Kristu ni akwa-Kristu 144.000 waze makayula hamwe nenyi. (Uso. 14:1) Waze eswe ali mu munyachi wacho kakusa tachi hanga anyonge ni kulinga yuma ngwe Tato, Yehova Zambi.

¹⁰ Amu hitwamona waze anatongola mu uprofeto uli ha Uputukilo 3:15, haliapwila mutushimutwina yize Yehova hanalingi hanga amanunune uprofeto uno ni chize unatukwase musono.

11. Mu mutapu uka mukwa-munyachi wa pwo amuwondele ku “kashijino?”

¹¹ Kulita ni uprofeto uli ha Uputukilo 3:15, kapela te mawonda “kashijino” ka mukwa-munyachi wa pwo. Uprofeto uno wamanunukine muze Satana azachishile A-Yunda ni A-Roma hanga ashihe Mwana wa Zambi. (Luka 23:13, 20-24) Mutu nyi mamuteta kashijino kechi kuhasa kulinga niyimwe ha amwe mashimbu. Yino ye yalingiwile kuli Yesu, muze amushihile kakahashile kulinga niyimwe ha matangwa atatu muze te ali mu fuka.—Mateu 16:21.

12. Kuchi, nawa ha shimbu lika makawonda mutwe wa kapela?

¹² Alioze, mba uprofeto uli ha Uputukilo 3:15 umanunuke, Yesu te katambile kununga mu fuka. Mumu liaka? Kulita ni uprofeto, mukwa-munyachi wa pwo te mawonda mutwe wa kapela. Chino chalumbunukine ngwo, Yesu te katamba kumuhindwisa ku ufwe. Yino ye yalingiwileko lume! Ha  kupalika cha matangwa atatu, yamuhindwisa mu ufwe ni mwono uze kushi kufwa. Ha shimbu lize Yehova hanatese, Yesu makanongesa Satana. (Hepre. 2:14) Yesu Kristu ni waze eswe makayula nenyi, makanongesa akwa-kole eswe a Zambi, chekwamba munyachi wa kapela.—Uso. 17:14; 20:4, 10. *

13. Kuchi umanunuko wa uprofeto uno unatuyukisa?

¹³ Nyi uli kavumbi ka Zambi, kumanunuka cha uprofeto uno chinakukwase chinji. Mu mutapu uka? Muze Yesu apwile hano hashi, iye kembulwile utu wa Tato ni ungunu weswe. (Yoa. 14:9) Kashika, nyi twanyingika Yesu muchitukwasa kunyingika kanawa Yehova ni kumuzanga. Chikwo nawa, twakuyuka chinji ha malongeso a Yesu ni mutapu uze akusongwelamo yikungulwila musono. Yesu kakutulongesa hanga tulinge yuma yize muyitukwasa kupwa ni utayizo wa Yehova. Nawa kufwa cha Yesu chize chinalumbunuka kumuwonda ku kashijino chakutuyukisa tulieswe. Mu mulali uka? Muze Yesu ahindwishile, iye kasolwele ulemu wa manyinga jenyi ngwe chitapo chingunu hanga ‘atupemese ku shili yeswe.’—1 Yoa. 1:7.

14. Kuchi tunanyingika ngwetu uprofeto wa mu Endene te kuuchi kumanunuka ha shimbu lizeliene? Lumbununa.

¹⁴ Uprofeto uze Yehova alingile mu Endene unasoloka ngwo, maliji jacho te kechi kumanunuka ha shimbu lizeliene. Uprofeto wambile ngwo pwo te mapwa ni munyachi, Ndiapu neye te makunga atu jenyi, nawa yizavu yino yaali te muyipwa ni kole. Mba yino yeswe yilingiwe te mukumbata mashimbu. Nyi mutunyingika kanawa uprofeto uno, muutukwasa kunyingika ngwo Satana ni atu jenyi te matuvwila kole. Utowezo uno we Yesu ahanyine kuli tumbaji twenyi. (Marku 13:13; Yoa. 17:14) Kwamba pundu, tunamono kumanunuka cha uprofeto uno, chipi-chipi hakupalika cha miaka 100. Mu mutapu uka?

15. Mumu liaka kole yize akwa-hashi akutuvwila yinanungu ni kwoka, alioze mumu liaka kutwatambile kuvwila Satana woma?

¹⁵ Muze Yesu amupwishile Mwanangana mu Wanangana wa Mesaya ha mwaka 1914, yanyasa Satana hashi. Chize ha shimbu lize, Satana kali hano hashi ni kushimbwila hanga amunongese. (Uso. 12:9, 12) Alioze, iye keshi kutwama wika ni kushimbwila. Kanalisapa ni ufwatulo, chino chinamutwale hanga alimike ni tuvumbi twa Zambi. (Uso. 12:13, 17) Kashika ufwatulo uze akwa-hashi ali nawo hali atu ja Zambi unanungu ni kwoka. Alioze, kukushi nichimwe chize muchitutwala kuvwila woma Satana ni atu jenyi. Tuli ni shindakenyo yizeyene Paulu apwile nayo muze asonekene ngwenyi: “Nyi Zambi mapwa hamwe ni yetu, iya mahasa kulimika ni yetu?” (Roma 8:31) Twakujikijila muli Yehova mumu iye kanamanununa uprofeto weswe uze unatela ha Uputukilo 3:15.

16-18. Kuchi kunyingika uprofeto uli ha Uputukilo 3:15 chakwashile ndumbu Curtis, Ursula ni Jessica?

¹⁶ Uprofeto uze uli ha Uputukilo 3:15 muhasa kutukwasa kukumba kapinda mweswawo mutumona. Ndumbu Curtis yoze unalingi mulimo wa mishionaliu ku Guam, yamba ngwenyi: “Ha mashimbu amwe ku mwono wami, napalikile mu yipikalo ni mu yuma yize yesekele ushishiko wami kuli Yehova. Alioze kupukuna ha uprofeto uze uli ha Uputukilo 3:15 chakungukwasa kujikijila hali Yehova.” Ndumbu Curtis kakushimbwila  ni uhumikizo weswe tangwa lize Yehova makahwisa lamba lietu lieswe.

¹⁷ Ursula, umwe ndumbu wa pwo mu Alemanha yamba ngwenyi, kunyingika ulumbunwiso wa Uputukilo 3:15 che chamukwashile kupwa ni shindakenyo ngwo Mbimbiliya yili mukanda wa Zambi. Iye kamwene chize uprofeto ukwo wa Mbimbiliya wakulita ni uprofeto uno, chino chamukomwesene chinji. Yamba nawa ngwenyi: “Muze nanyingikine ngwami ha shimbu lizeliene Yehova kalingile chimwe hanga atwehe kutalatala, chocho yinguputuka kumuzanga chinji.”

¹⁸ Jessica, umwe ndumbu wa pwo ku Micronésia, yamba ngwenyi: “Ngunewuluka kuwaha chize nevwile ha chisuho chitangu muze nanyingikine ngwami nawana umwenemwene! Uprofeto uli ha Uputukilo 3:15 te kuunamanunuka. Kunyonga ha chino chakungukwasa kunyingika ngwo musono kanda tuchipwa ni mwono wamwenemwene. Uprofeto uno wakukolesa ufulielo wami ngwo, kulingila Yehova chili chuma chilemu chize mutuhasa kulinga haliapwila, ni kutwaha kutalatala cha kupwa ni mwono upema kulutwe.”

19. Kuchi mutuhasa kufuliela ngwetu, chihanda cha kasula cha uprofeto uli ha Uputukilo 3:15 muchikamanunuka?

¹⁹ Ngwe chize twamona, uprofeto uli ha Uputukilo 3:15 nihindu unamanunuka ha matangwa jetu. Nawa hitwanyingika kanawa munyachi wa pwo ni munyachi wa kapela. Yesu chihanda chilemu cha munyachi wa pwo, hanahinduka ku kashijino yoze Satana amuwondele, haliapwila kali Mwanangana wa ndundo yoze keshi kufwa. Yehova hanasakula waze eswe makayula ni Yesu mu malilu. Amu chihanda chitangu cha uprofeto uno hichinamanunuka, tuli ni shindakenyo ngwetu chihanda cha kasula necho muchikamanunuka—chekwamba mutwe wa kapela makauwonda. Chochene, muze Satana makamunongesa tuvumbi twa Zambi makapwa mu uhwimino! Alioze shimbu tangwa liacho kanda liheta, kanda uhonga. Fuliela muli Yehova ngwo, iye makazachisa munyachi wa pwo hanga awahise “mavungu eswe a hashi.”—Uputu. 22:18.