MUTWE WAKULILONGESA 28
Wanangana wa Zambi Unayulu!
“Wanangana wa hano hashi hiwapwa wa Mwene wetu, ni wa Kristu wenyi.”—USO. 11:15.
MWASO 22 Wanangana Unayulu—Wize!
CHIKUMA CHILEMU *
1. Shindakenyo yika tuli nayo, nawa mumu liaka?
MUZE wakumona yuma yipi yize yinalingiwa hano hashi, shina chakukukalila kutayiza ngwo kulutwe yuma muyikapeme? Asoko keshi kulizanga nawa ngwe chize apwile kunyima. Atu anji hano hashi kali yingalwe nawa kakusolola kuzo. Anji chinaakalila kujikijila waze akwete wata. Chipwe chocho, yino muyihasa kukwaha shindakenyo ngwo kulutwe yuma muyikapema. Mumu liaka? Mumu atu kanasolola yitanga yize ambile ha uprofeto wa “ha matangwa a kusula.” (2 Timo. 3:1-5) Kukushi niumwe yoze mahasa kuhangulula umanunuko wa uprofeto wacho. Nawa unasolola pundu ngwo, Kristu kanayulu mu Wanangana wa Zambi. Alioze uno uli umwe wa ku uprofeto unji uze unahanjika hakutwala ku Wanangana wa Zambi. Mutukolesa ufulielo wetu ha kuhengwola umanunuko wa uprofeto ukwo uze unamanunuka ha miaka yino.
Chizechene yapwa yuma yize akusepekenya hamuwika, mukanda wa Daniele ni wa Usolwelo muli uprofeto hakutwala ku matangwa a kulutwe uze walita nyi twauchinga hamwika. Nyi twauhengwola mutukwasa tumone yuma yize kwasala hakehe yilingiwe kulita ni upale wa Yehova (Tala paragrafu 2)
2. Yika mutulilongesa ha mutwe uno, nawa mumu liaka? (Lumbununa chizulie cha ha chifukilo.)
2 Ha mutwe uno, mutulilongesaho (1) uprofeto uze mutukwasa kunyingika ngwetu, Wanangana wa Zambi waputukile kulu kuyula, (2) uprofeto uze mutukwasa kunyingika ngwo, Yesu kanayulu mu malilu ngwe Mwanangana mu Wanangana wa Zambi, ni (3) uprofeto uze unasolola chize akwa-kole ja Zambi makaanongesa. Chizechene yapwa yuma yize akusepekenya hamuwika, uprofeto walisa uze mutulilongesa muutukwasa kunyingika haze twaheta kulita ni yize Yehova atesele kulinga.
KUCHI MUTUHASA KUNYINGIKA SHIMBU LIZE WANANGANA WAPUTUKILE KUYULA
3. Shindakenyo yika tunawane ha uprofeto uze uli ha Daniele 7:13, 14?
3 Uprofeto uze uli ha Daniele 7:13, 14, unatwehe shindakenyo ngwetu, Yesu Kristu mwe wika makayula kanawa mu Wanangana wa Zambi. Atu a hashi heswe makawahilila ‘ha kumulingila,’ nawa chiyulo chenyi muchikapwa cha mutolo. Uprofeto ukwo uli mu mukanda wa Daniele unambe ngwo, Yesu te maputuka kuyula mu Wanangana wa Zambi kusongo lia tungonde shimbiali. Shina chili chashi kunyingika mashimbu waze Yesu aputukile kuyula?
4. Lumbununa chize Daniele 4:10-17 unatukwase kunyingika mwaka uze Kristu aputukile kuyula. (Tala nawa maliji mushi lia lifwo.)
4 Tanga Daniele 4:10-17. “Tungonde shimbiali” kanalumbunuka unji wa miaka 2.520. Tungonde jacho kaputukile ha mwaka 607 K.M.J. muze A-Babilonia achijile Mwanangana wakasula ha ngunja ya Yehova mu Yerusaleme. Tungonde jacho kahwile ha mwaka 1914 M.J. muze Yehova asele Yesu ha ngunja ngwe Mwanangana mu Wanangana wa Zambi. *—Eze. 21:25-27.
5. Kuchi mutuhasa kuyuka ha uprofeto wa “tungonde shimbiali”?
5 Kuchi mutuhasa kuyuka ha uprofeto uno? Kunyingika uprofeto wa “tungonde shimbiali” chakutwaha shindakenyo ngwetu, Yehova makamanununa yilakenyo yenyi ha shimbu lialita. Ngwe chizechene atesele tungonde akukolesa Wanangana wenyi, che makalinga nawa hanga amanunune uprofeto ukwo weswe ha shimbu lize mwene hanatese kulu. Ewa, tangwa lia Yehova ‘kumulikeza, kulichi kahona.’—Haba. 2:3.
KUCHI TUNANYINGIKA NGWETU KRISTU MWE MWANANGANA MU WANANGANA WA ZAMBI
6. (a) Yilayi yika yinasolola ngwo Yesu kanayulu mu malilu? (b) Kuchi yilayi yacho yinatwehe shindakenyo ya uprofeto uze tunawane ha Usolwelo 6:2-8?
6 Ku kusula cha mulimo wenyi hano hashi, Yesu kambile ngwenyi, yilayi yize te muyilingiwa hashi muyikwasa tumbaji twenyi kunyingika ngwo iye haputuka kuyula mu malilu. Yilayi yacho yimwe yili, jita, zala ni minyiko. Iye yamba nawa ngwenyi, te mukupwa yilungo “kweka ni kweka”—chilweza tuli nacho chili cha musongo wa COVID-19 uze uli hashi heswe. Yuma yino yinalingi chihanda cha yize Mbimbiliya yinavuluka ngwo, ‘chilayi’ chakuheta cha Kristu. (Mateu 24:3, 7; Luka 21:7, 10, 11) Ha kupalika cha miaka kuhiana 60 muze te hafwa ni kufuna mu malilu, Yesu yahana shindakenyo kuli postolo Yoano ngwenyi, yuma yino te muyikalingiwa pundu. (Tanga Usolwelo 6:2-8.) Yuma yino yeswe kuyinalingiwa chize haze Yesu yaputukile kuyula ha mwaka 1914.
7. Mumu liaka hano hashi yuma yapihile chinji chize haze Yesu aputukile kuyula?
7 Mumu liaka yuma hano hashi yapihile chinji chize haze Yesu aputukile kuyula? Usolwelo 6:2 unatulweze chuma chitangu chize Yesu alingile hanyima lia kupwa Mwanangana mu Wanangana wa Zambi—chuma chacho chili kwasa jita. Mba jita yacho ni aya ayashile? Kayashile ni Ndiapu hamwe ni andemoniu jenyi. Kulita ni Usolwelo kapitulu 12, Satana yamukumba ni kumunyasa hashi hamwe ni andemoniu jenyi. Mumu lia ufwatulo uze ali nawo, iye kanamwesa ‘lamba linji kuli akwa hashi.’—Uso. 12:7-12.
Kutushi kuwahilila muze yuma yipi yakulingiwa, alioze muze twakumona uprofeto muumanunuka musono chakutukwasa kunyingika ngwo Wanangana wa Zambi unayulu (Tala paragrafu 8)
8. Kuchi twakuyuka muze twakumona umanunuko wa uprofeto hakutwala ku Wanangana wa Zambi?
8 Kuchi mutuhasa kuyuka ha uprofeto uno? Yuma yize yinalingiwa hano hashi ni yitanga ya atu yinatwehe shindakenyo ngwetu, Kristu hanaputuka kuyula ngwe Mwanangana. Kutwatambile kwivwa kupiha muze mutumona yitanga yipi ya atu mumu yino yinamanununa uprofeto wa mu Mbimbiliya. Wanangana wa Zambi unayulu! (Samu 37:1) Amu Armagedone yinakundama, tuli ni shindakenyo ngwetu yuma muyinunga ni kupiha. (Marku 13:8; 2 Timo. 3:13) Shina kuushi kusakwilila Yehova ha chize anatukwase kunyingika mumu liaka hano hashi hali lamba linji?
CHIZE AKWA-KOLE JA ZAMBI MAKAANONGESA
9. Kuchi uprofeto uli ha Daniele 2:28, 31-35, unalumbununa wanangana wa kasula wa ndundo ja hashi heswe, nawa shimbu lika waputukile?
9 Tanga Daniele 2:28, 31-35. Musono, twakumona umanunuko wa uprofeto uno. Chilota cha Nabukanezore chinasolola yize te muyilingiwa “ha matangwa a kusula” muze Kristu maputuka kuyula. Akwa-kole ja Yesu hano hashi, te machinga wanangana wa kasula wa ndundo ja hashi heswe uze aprofetezele mu Mbimbiliya anatesa ni ‘yiliato ya utale ni uma.’ Wanangana wacho wa ndundo ja hashi heswe unayulu. Waputukile kuyula ha Jita Yitangu ya Hashi Heswe, muze Grâ-Bretanha ni Estados Unidos alingile usendo wa Anglo-Americana. Kaponya wa mu chilota cha Nabukanezore, kasolwele nawa yuma yaali hakutwala ku Wanangana wacho jize te yinalise ni mawanangana akwo waze alingile kuyula.
10. (a) Yika tunamono mu wanangana wa ndundo ja hashi heswe Anglo-Americana yize Daniele aprofetezele? (b) Ponde yika twatamba kwehuka? (Tala mushete “ Shina Unamono Ponde?”)
10 Chitangu, kulisa ni mawanangana a ndundo ja hashi heswe waze aliangile kuyula, Potência Mundial Anglo-Americana kuyishi ya unengu ngwe oru ni prata, alioze yili ya utale wakuchinga ni uma wa malowa. Uma wa malowa unalumbunuka, “ana ja atu” hanji ngwetu atu. (Danie. 2:43) Musono, tunahase kumona yize atu akulinga ha kusakula mwata, vunda yize akulinga ni yizavu yikwo yize yakukalakala hamuwika hanga manguvulu a mu wanangana wacho ahone kulinga yize hanatese.
11. Kuchi kuyula cha Wanangana wa Anglo-Americana chinatwehe shindakenyo ngwetu, tuli ha matangwa a kusula?
11 Chamuchiali, amu Wanangana wa Anglo-Americana anautese ni yiliato ya lukaponya, chekwamba uli wanangana wa kasula wa ndundo ja hashi heswe uze aprofetezele mu Mbimbiliya. Kukuchi kapwa nawa wanangana ukwo wa atu uze muukayula hashi eswe. Mumu uze uliko, makaunongesa ha Armagedone hamwe ni manguvulu akwo muze Wanangana wa Zambi mukeza. *—Uso. 16:13, 14, 16; 19:19, 20.
12. Shindakenyo yikwo yika tunawane ha uprofeto wa Daniele yize yinatutakamisa ni kutwaha kutalatala?
12 Kuchi mutuhasa kuyuka ha uprofeto uno? Uprofeto wa Daniele unatwehe shindakenyo yikwo ngwetu, tuli ha matangwa a kusula. Ha unji wa miaka kuhiana 2.500 kunyima, Daniele yaprofeteza ngwenyi, hanyima lia Babilonia te mukusoloka nawa mawanangana awana a ndundo ja hashi heswe waze te mapinjisa atu ja Zambi. Chikwo nawa, yasolola ngwenyi, Wanangana wa Ndundo ja Hashi Heswe Anglo-Americana, te muupwa wa kasula ha mawanangana jacho. Chino chakututakamisa ni kutwaha kutalatala ngwetu, kwasala hakehe Wanangana wa Zambi muunongesa mawanangana eswe a atu ni kuyula hashi heswe.—Danie. 2:44.
13. Yika ‘mwanangana wamuchinake’ ni “kumi lia mianangana” waze anatongola ha Usolwelo 17:9-12 anasolola, nawa kuchi uprofeto wacho wamanunukine?
13 Tanga Usolwelo 17:9-12. Jita Yitangu ya Hashi Heswe yamanunwine uprofeto ukwo wa mu Mbimbiliya hakutwala ku matangwa a kusula. Manguvulu a hashi kazangile chinji kuneha sambukila hashi heswe. Kashika ha Janeiro ya 1920, o yasa Liga das Nações yize asalakanyishine ni Nações Unidas ha Outubro ya 1945. Ululikiso wacho kakuuvuluka ngwo, ‘mwanangana wamuchinake.’ Alioze uno hi Wanangana wa ndundo ja hashi heswe ko. Mumu kukola chawo chinamanyina ha ndundo ja akwa-mafwefwe waze akuukwasa. Mbimbiliya yakuvuluka manguvulu jacho ngwo, “kumi lia mianangana.”
14-15. (a) Yika Usolwelo 17:3-5 unahanjika hakutwala ku “Babilonia Yinene”? (b) Yika yinalingiwa kuli waze akukwasa uwayilo wa mahuza?
14 Tanga Usolwelo 17:3-5. Mu umwe usolwelo, postolo Yoano yamona umwe chikoi, “Babilonia Yinene,” yoze anatese ni uwayilo wa mahuza wa hashi heswe. Kuchi usolwelo uno unamanunuka? Mayingeleja a mahuza kakukalakala hamuwika ni manguvulu a mafwefwe ni kwakwasa. Alioze kwasala hakehe, Yehova masa manyonga jenyi mu mbunge ya akwa-mafwefwe hanga ‘alinge upale wenyi.’ Yika ayo makalinga? Manguvulu jacho hanji ngwetu, “kumi lia mianangana” makakatukila mayingeleja eswe a mahuza ni kwanongesa.—Uso. 17:1, 2, 16, 17.
15 Kuchi tunanyingika ngwetu kusula cha Babilonia Yinene chili hakamwihi? Mba tukumbulule chihula chino, ndo twiwuluke chize mbonge yikulu ya Babilonia yapwile ya kujingilika ni meya a Lwiji Ufrateze. Mukanda wa Usolwelo wakutesa tununu a tununu twa atu ali mu Babilonia Yinene ni “meya” waze akuyifunga. (Uso. 17:15) Alioze wakusolola nawa ngwo, meya jacho te “moma,” chekwamba, uwayilo wa mahuza wa hashi heswe te muutokesa atu jawo. (Uso. 16:12) Musono, tunamono umanunuko wa uprofeto uno mumu atu anji kanatuhuka mu mayingeleja ni kufupa kuhwisa yipikalo yo mu majila eka.
16. Kuchi mutuhasa kuyuka ha kunyingika uprofeto wa kusoloka cha Nações Unidas ni wa kunongesa cha Babilonia Yinene?
16 Kuchi mutuhasa kuyuka ha uprofeto uno? Kusoloka cha Nações Unidas ni chize atu anji anatuhuka mu uwayilo wa mahuza, yinasolola ngwo tuli ha matangwa a kusula. Chipwe ngwe atu anji kanatuhuka mu Babilonia Yinene, nihindu hi chino ko muchikanongesa uwayilo weswe wa mahuza. Ngwe chize twamona ku uputukilo, Yehova makasa “upale wenyi” mu mbunge ya “kumi lia mianangana,” chekwamba manguvulu waze akukwasa Nações Unidas. Manguvulu jacho makanongesa susumuku uwayilo weswe wa mahuza, chino muchikakomwesa atu hashi heswe. * (Uso. 18:8-10) Kunongesa cha Babilonia Yinene, muchikakwata hali atu hashi heswe ni kwanehena lamba, alioze atu ja Zambi makawahilila ha mukunda wa yikuma yaali. Uwayilo wa mahuza uze wakulimika ni Yehova ha miaka yinji kuuchikapwako nawa, makatutusula ku yitanga yipi ya hano hashi!—Luka 21:28.
FULIELA NGWO YEHOVA MAKAFUNGA ATU JENYI
17-18. (a) Kuchi mutuhasa kununga ni kukolesa ufulielo wetu? (b) Yika mutumona ha mutwe uze muhataho?
17 Daniele kaprofetezele ngwenyi, “yinyingi” yamwenemwene “muyikaliwezela.” Chochene, yino ye tunamono musono! Haliapwila tunanyingika kanawa uprofeto hakutwala ku mashimbu jetu. (Danie. 12:4, 9, 10) Kunyingika kanawa uprofeto wacho, chinatukwase kulemesa Yehova ni Liji lienyi. (Iza. 46:10; 55:11) Kashika, tunungenu ni kukolesa ufulielo wetu ha kulilongesa kanawa Mbimbiliya ni kukwasa akwetu hanga apwe ni usepa upema ni Yehova. Iye makalamwina waze eswe akumujikijila ni kwaha “uhwimino” wamwenemwene.—Iza. 26:3.
18 Ha mutwe uze muuhataho, mutushimutwina uprofeto hakutwala ku chikungulwila cha akwa-Kristu ha matangwa a kusula. Ngwe chize mutumona, uprofeto wacho unatwehe shindakenyo ngwetu, tuli ha matangwa a kusula. Mutumona yuma yikwo yize muyisolola ngwo, Mwanangana yetu Yesu Kristu, kali hamwe ni tumbaji twenyi ashishika.
MWASO 61 Nungenu, Enu Yela!
^ Tuli ha mashimbu alemu ku mwono wa atu! Wanangana wa Zambi unayulu, ngwe chizechene uprofeto unji wa mu Mbimbiliya wambile. Ha mutwe uno, mutushimutwinaho umwe wa ku uprofeto wacho uze mutukwasa kukolesa ufulielo wetu muli Yehova ni kutukwasa hanga tulihumikize ni kufuliela muli iye haliapwila ni kulutwe lia matangwa.
^ Tala longeso 32 ha chikuma 4 cha mukanda, Wahilila Ku Mwono Ku Miaka Yeswe! ni kutala chinema chili ha jw.org, chinambe ngwo, O Reino de Deus Começou a Governar em 1914.
^ Mba unyingike nawa sango jikwo hakutwala ku uprofeto wa Daniele, tala Kaposhi wa Kutalila 15 Junho 2012, mafwo 14-19.
^ Mba unyingike sango jikwo hakutwala ku yize kwasala hakehe hanga yilingiwe, tala kapitulu 21 wa mukanda, O Reino de Deus já Governa!
