Yesu kalongesele atu ngwenyi, katamba kupwa ni sambukila umwe ni mukwo. Alioze ha chisuho chimwe, yalweza apostolo jenyi ngwenyi: “Kanda nushinginyeka ngwe nguneza mukuneha sambukila hano hashi: chejile mukuneha sambukila alioze katana. Mumu nguneza mukuhandununa mutu ni tato, ni mwana wa pwo ni naye, ni tembwa-mwana ni tato-pwo.” (Mateu 10:34, 35) Mba yika Yesu ambile kwamba?

Yesu kakazangile kuhandununa asoko, alioze kanyingikine ngwenyi malongeso jenyi te mahasa kuhandununa asoko. Kashika, waze mazanga kupwa tumbaji twa Kristu ni kwapapachisa, katamba kunyingika ngwo ha mashimbu amwe asoko jo kechi kuwahilila ha chiyulo chize akwata. Ha mashimbu akwo, waze alimbata no hanji asoko akwo te malimika no ni kwakalishila yuma.

Mbimbiliya yakukolweza akwa-Kristu hanga apwe “ni sambukila kuli atu eswe.” (Roma 12:18) Alioze malongeso ja Yesu mahasa kupwa ngwe “katana” kuli asoko amwe. Chino chakulingiwa muze umwe mu usoko matayiza malongeso a Yesu, akwo malituna malongeso jacho hanji kulimika no. Muze chino chakulingiwa, asoko jacho kakulipwisa ene “akwa-kole” ja waze analilongesa umwenemwene.—Mateu 10:36.

Mandumbu waze atwama mu usoko uze walihandununa ku ufulielo, kakufupiwa kunyingika yize malinga hanga evwise Yehova ni Yesu kuwaha hanji kuvwisa asoko jo kuwaha. Chakutalilaho, asoko waze hi Yela ko mahasa kushinjila mandumbu jetu hanga alinge yiwanyino ya matangwa akunanga. Muze akupwa mu cheseko, ayo kakusakula yoze mevwisa kuwaha. Yesu yamba ngwenyi: “Yoze mafwila tato hanji naye kuhiana yami, kangutelele.” (Mateu 10:37) Yesu te keshi kwamba ngwenyi waze mapwa tumbaji twenyi katamba kwecha kuzanga chinji yisemi jo. Alioze te kanaalongesa hanga ahase kunyingika yuma yize yatamba kupwa ni ulemu ku mwono wo. Nyi asoko jetu waze hi Yela ko malimika ni ufulielo wetu, nihindu mutununga ni kwazanga, alioze tunanyingika ngwetu kuzanga Yehova chatamba kupwa ha chihela chitangu.

Tunanyingika ngwetu yihungumiona ya kuli asoko jetu muyihasa kutunehena yikola yinji. Alioze, tumbaji twa Yesu katamba kwiwuluka maliji jenyi anambe ngwo: ‘Yoze keshi kuzundula mutondo wenyi wa lamba hanga angukaule, kangutelele.’ (Mateu 10:38) Mu maliji akwo, akwa-Kristu kakumona yihungumiona ya asoko ngwe lamba lize tumbaji twa Kristu atamba kunyongonona. Alioze, kakushimbwila ngwo, mumu lia yitanga yo yipema, asoko jo malumuna manyonga jo ni kuzanga kulilongesa umwenemwene.—1 Petu. 3:1, 2.