MUTWE WAKULILONGESA 25
Kanda Nutalingisa Niumwe “wa Wano Akepe”
“Kanyamenu, kanda nulelesa umwe wa wano akepe.”—MATEU 18:10.
MWASO 113 Sambukila Yize Tuli Nayo
CHIKUMA CHILEMU *
1. Yika Yehova alingile kuli hita umwe wa kuli yetu?
YEHOVA mwe wakokele hita umwe wa kuli yetu hanga amulingile. (Yoa. 6:44) Achinyonga yize maliji wano analumbunuka. Yehova kahengwile kanawa tununu a tununu twa atu hano hashi, chocho yamona chuma chilemu muli yena—mbunge yipema yize te muyihasa kumuzanga. (1 Sango 28:9) Yehova kanakunyingika kanawa, kananyingika chize akwivwa nawa kakukuzanga. Kunyingika chikuma chino chakututakamisa chinji!
2. Kuchi chilweza cha Yesu chinatukwase kumona ngwo Yehova kakulihulumba hali hita umwe wa kuli yetu?
2 Yehova kakulihulumba chinji hali yena ni hali mandumbu je a ku ufulielo. Mba alumbunune chikuma chino kanawa, Yesu yatesa Yehova ni umwe kafunga. Nyi kafunga kali ni mapanga 100, mba umuwika matoka, yika iye malinga? Iye “mahichika 99 ku milundu maya ni kufupa yoze watoka.” Muze kafunga akuwana panga, iye keshi kumuvwila uli, alioze kakuwahilila. Yika chilweza chino chinatulongesa? Chinatulongesa ngwo, kuli Yehova hita panga kali mulemu. Yesu yamba ngwenyi: “Hi ku upale wa Tata ko yoze uli mu malilu, umwe wa wano akepe akatoke.”—Mateu 18:12-14.
3. Yihula yika mutukumbulula ha mutwe uno?
3 Kwamba umwenemwene, kutwazangile kuvwisa niumwe ndumbu chinyengo. Yika tunafupiwa kulinga hanga tuchine kutalingisa akwetu? Nawa yika twatamba kulinga nyi akwetu matulemeka ku mbunge? Mutwe uno, muukumbulula yihula yino. Alioze chitangu, tunyingikenu akepe waze Yesu atongwele ha Mateu kapitulu 18.
“AKEPE” WAZE ANATONGOLA HANO AYA?
4. “Akepe” waze anatongola hano aya?
4 “Akepe” waze anatongola hano, kali tumbaji eswe a Yesu. Chipwe ngwe kali makulwana hanji twanuke, nihindu ayo kali “ana akepe” mumu kanazange kulilongesa hakutwala kuli Yesu. (Mateu 18:3) Chipwe ngwe kali a ku yihela ni minyachi yalisa kali ni manyonga ni utu walisa, nihindu eswe kanafuliela muli Yesu Kristu. Kashika, Yesu kakuzanga chinji hita umwe wa kuli ayo.—Mateu 18:6; Yoa. 1:12.
5. Kuchi Yehova akwivwa muze umwe akutalingisa hanji kumwesa lamba umwe wa kuli tuvumbi twenyi?
5 Hita umwe wa kuli “wano akepe” kali mulemu kuli Yehova. Mba unyingike chize iye akwivwa, nyonga ha chize wakwivwa hakutwala kuli twanuke. Ayo kali alemu kuli yetu. Tunazange kwafunga, mumu tunanyingika ngwetu, ayo keshi ni tachi, yinyingi ni mana ngwe makulwana. Twakwivwa yinyengo muze twakumona atu mamwesa akwo lamba, alioze twakwiva yinyengo yinji ni uli muze twakumona atu mamwesa twanuke lamba. Chizechene nawa, Yehova kanazange kutufunga. Kashika iye kakwivwa yinyengo ni uli muze umwe akutalingisa hanji kumwesa lamba umwe wa kuli tuvumbi twenyi!—Iza. 63:9; Marku 9:42.
6. Kulita ni 1 A-Korindu 1:26-29, kuchi akwa-hashi akumona tuvumbi twa Zambi?
6 Mu mutapu ukwo uka uze tumbaji twa Yesu akwamwena ngwe kali ana “akepe”? Atu a mutapu uka akwa-hashi akulemesa? Ayo kakulemesa pichi, akwa-lufuma ni waze akwete ndundo. Alioze, kanji-kanji tumbaji twa Yesu keshi ni yuma yacho, kashika akwa-hashi akwamona ngwo ana “akepe,” keshi ulemu nawa akwalelesa. (Tanga 1 A-Korindu 1:26-29.) Alioze Yehova keshi kwamona chocho.
7. Kuchi Yehova anazange hanga tumone mandumbu jetu?
7 Yehova kakuzanga tuvumbi twenyi eswe, chipwe waze akumulingila ha miaka yinji ni waze achili aha mu umwenemwene. Mandumbu jetu eswe a malunga ni a mapwo kali alemu kuli Yehova, kashika ni yetu twatamba kwalemesa. Twatamba “kuzanga mandumbu jetu eswe” hi wika ko amwe a kuli ayo. (1 Petu. 2:17) Twatamba kulinga yeswayo yize mutuhasa hanga tufunge mandumbu jetu ni kwakwasa. Nyi mutulemeka umwe ku mbunge, kutwatambile kumona ngwe kwalingiwile nichimwe ni kunyonga ngwo iye kakulivutula ni kawashi, katamba kuvulama yuma yacho. Yika yakutwala amwe mba evwe uli? Mumu lia chize aalele, mandumbu amwe kakulivwa ngwe keshi ni ulemu, kashika akwivwa uli ni kawashi. Akwo achili aha mu umwenemwene, kanda achinyingika ngwo katamba kukonekena mandumbu jo muze maalinga upi. Yeswayo muyilingiwako, nihindu twatamba kusa tachi hanga tunehe sambukila. Chipwe mutu yoze wakulivutula ni kawashi ha chuma cheswacho, neye katamba kwalumuna ndako yenyi. Chino muchimukwasa hanga alivwashane ni akwo ni kutwama no kanawa.
TUMONENU AKWETU NGWETU KATUHIANA
8. Nyonga lika A-Yunda apwile nalio lize liakwachile ni hali tumbaji twa Yesu?
8 Mumu liaka Yesu ahanjikile hali “wano akepe”? Mumu tumbaji kamuhulile ngwo: “Iya kevwe munene wahiana eswe mu wanangana wa malilu?” (Mateu 18:1) A-Yunda anji ha matangwa jacho, kapwile kuzanga hanga akwo aamone ngwo kali alemu chinji. Hakutwala ku chikuma chacho, umwe mukwa-mana yamba ngwenyi: “Kuli A-Yunda, kwalemesa kuli akwo ni kupwa ni lufuma chapwile chuma chilemu chinji ku mwono wo.”
9. Yika tumbaji twa Yesu atambile kulinga?
9 Yesu kanyingikine ngwenyi, tumbaji twenyi te katamba kusa tachi jinji hanga achize mu mbunge jo ndako ya kulitesa ni akwo, chuma chize te chakusoloka chinji kuli A-Yunda. Yesu yaalweza ngwenyi: “Yoze munene wahiana eswe hakachi kenu, akapwe ngwe kanuke; ni mukwa lutwe akapwe ngwe yoze wakuvumbika.” (Luka 22:26) Mutupwa ngwe twanuke nyi mutunyonga ngwetu, “akwetu katuhiana.” (Fwili. 2:3) Nyi mutumona ngwetu akwetu katuhiana, muchipwa chikalu kwatalingisa.
10. Chiyulo chika cha Paulu chize twatamba kukaula?
10 Mandumbu jetu eswe katuhiana ku yimwe. Chili chashi kuchimona nyi mutulihulikila ha yitanga yo yipema. Twatamba kukaula chiyulo chize postolo Paulu ahanyine kuli mandumbu a mu Korindu, ngwenyi: “Kulipwila chino, iya wakuhelecho? Chuma chika uli nacho chize kuwachitambwile? Mba nyi akuhelecho kuchi te unalisambe ngwe kuwachitambwile?” (1 Kori. 4:7) Nyi twamona ngwetu, twakuzanga chinji kusoloka hanji ngwetu tuli alemu chinji kuhiana akwetu, twatamba kukeya. Ndumbu yoze wakulinga pande jipema, hanji umwe ndumbu wa pwo yoze wakuputuka malongeso a Mbimbiliya, katamba kuhalisa Yehova ha yeswe yize akulinga.
KONEKENA AKWENU NI “MBUNGE YESWE”
11. Yika Yesu anatulongesa ha chishima cha mwanangana ni ndungo yenyi?
11 Hanyima lia kutoweza tumbaji twenyi hanga achine kutalingisa akwo, Yesu yata chishima cha umwe mwanangana ni ndungo yenyi. Mwanangana yalweza ndungo yenyi hanga eche kufweta kongo lize te kechi kuhasa kufweta. Hakupalika cha amwe mashimbu, ndungo yono yaya ni kufwetesa kongo likehe lize ndungo-ni-mukwo te amulinalio. Muze mwanangana achivwile, yatuma kusa ndungo wacho mupi mu zuwo lia ususu. Yika yino yinatulongesa? Yesu yamba ngwenyi: “Chocho nawa Tata wa mwilu makalinga kuli yenu nyi kachi mu mbunge mutu mweswe kakonekenene ndumbwenyi.”—Mateu 18:21-35.
12. Yuma yika muyihasa kulingiwako nyi twahona kukonekena akwetu?
12 Yitanga ya ndungo wacho kuyakanehene wika lamba hali iye, alioze ni hali akwo nawa. Chitangu, iye kakevwilile ndungo-ni-mukwo keke chocho “yamumbila mu zuwo lia ususu ndo mafweta kongo.” Chamuchiali, kevwishile ndungo-ni-akwo yinyengo. “Kashika muze ndungo-ni-akwo hamona chize iye halinga, yevwa kupiha chinji.” Chizechene nawa, yitanga yetu neyo muyihasa kukwata hali akwetu. Nyi umwe ndumbu matulinga chuma chipi mutulituna kumukonekena, yika muyihasa kulingiwako? Chitangu, twamulemeka ku mbunge mumu kutwazangile kumukonekena, kutushi kumwaha shimbu, nawa kutushi kumusolwela zango. Chamuchiali, nyi mandumbu mu chikungulwila mamona ngwo kutushi kulivwashana ni umwe ndumbu, chino muchaapinjisa.
Shina wakutulika toto nyi wakukonekena akwenu ni mbunge yeswe? (Tala maparagrafu 13-14) *
13. Yika twalilongesa ha yize yinakalingiwa kuli umwe pionelu?
13 Muze twakukonekena mandumbu jetu, tulieswe twakuyuka. Yino ye amwene Crystal umwe pionelu. Umwe ndumbu wa pwo mu chikungulwila cho kamulemekene ku mbunge. Crystal, yamba ngwenyi: “Kanji-kanji maliji a ndumbu wacho te kakungulemeka ku mbunge ngwe poko. Chipwe mu munda te chishi kuzanga kuya nenyi mu mashinyi amuwika. Chocho yinguputuka kutokesa zango ni uwahililo wami mu mulimo wa kwambujola.” Crystal te kakunyonga ngwenyi chinalite kwivwa uli. Alioze iye kakatulikile toto chipwe kulihulikila hali mwene ni ha chize te anevu. Shimbu achilinge, yalikehesa ni kutayiza chiyulo cha mu Mbimbiliya chize awanyine ha mutwe unambe ngwo, “Konekena ni Mbunge Yeswe,” ha Kaposhi wa Kutalila wa 15 ya Outubro 1999. Crystal kahashile kukonekena ndumbu wacho. Yamba ngwenyi: “Haliapwila hinanyingika ngwami, tulieswe tunase tachi hanga tuzale utu waha nawa ngwo Yehova kakutukonekena matangwa eswe. Nakwivwa ngwe kanguchiza yilemu yeswe ya hashi ha yipaya yami. Haliapwila hinaputuka kuwahilila nawa.”
14. Kulita ni Mateu 18:21, 22, kapinda muka kota postolo Petulu apwile nenyi? Yika muyitukwasa nyi mutupalika mu kapinda wacho?
14 Tunanyingika ngwetu, twatamba kukonekena akwetu nawa chili chuma chalita kulinga. Alioze muchihasa kupwa chikalu kukonekena akwetu. Postolo Petulu kota neye che te akulivwa ha mashimbu amwe. (Tanga Mateu 18:21, 22.) Nyi che wakulivwa, yika watamba kulinga? Chitangu, nyonga ha yisuho yize Yehova akukukonekena. (Mateu 18:32, 33) Chipwe ngwe kutwatelele ukonekeno wa Yehova, nihindu iye kakutukonekena. (Samu 103:8-10) Chikwo nawa, tunafupiwa kwiwuluka ngwetu twatamba “kulizanga umwe ni mukwo.” Kashika, kukonekena akwetu hi chuma ko chize mutuhasa kusakula nyi mutulinga nyi ka. Alioze chili chuma chize twatamba kulinga. (1 Yoa. 4:11) Chamuchiali, nyonga ha yize muyilingiwako nyi wakonekena akwenu. Mukwasa mutu yoze wahengesa, chikungulwila muchilinunga, mufunga usepa we ni Yehova nawa mulichiza yilemu ha yipaya. (2 Kori. 2:7; Kolo. 3:14) Chamuchitatu, lemba kuli Yoze wakutwita hanga tukonekene akwetu. Kanda wecha Satana hanga apihise usepa uze ukwete ni mandumbu je mu chikungulwila. (Efwe. 4:26, 27) Ni ukwaso wa Yehova, kuchi kufwa mu muheto uno wa Ndiapu.
KANDA UTALINGA MUMU LIA AKWENU
15. Kulita ni A-Kolosu 3:13, yika twatamba kulinga ni umwe ndumbu matulemeka ku mbunge?
15 Yika watamba kulinga nyi umwe ndumbu makulinga chuma chize muchikulemeka ku mbunge? Sako tachi hanga nulivwashane. Lemba kuli Yehova ni kumulweza chize unevu. Mwite hanga akwase ndumbu yoze wakulemeka ku mbunge. Nawa mwite akukwase kumona yitanga yipema ya ndumbu wacho, yitanga yize Yehova akumona muli iye. (Luka 6:28) Nyi kushi kuhasa kuvulama yuma yize ndumbwe akulinganga, fupa mutapu walita uze muhasa kuhanjika nenyi. Chili chipema kunyonga ngwe, ndumbwe te keshi ni nyonga lia kukulemeka ku mbunge. (Mateu 5:23, 24; 1 Kori. 13:7) Muze muya ni kuhanjika nenyi, iwuluka ngwe ndumbwe te keshi ni nyonga lia kukulemeka ku mbunge. Mba nyi iye kazangile hanga nulivwashane? Kanda umwehuka, nunga ni kumusolwela uhomboloji. (Tanga A-Kolosu 3:13.) Chahiana ulemu, kanda ununga ni kumuvwila uli mumu chino muchihasa kupihisa usepa we ni Yehova. Kanda wecha nichimwe chikutalingise. Nyi wachilinga, musolola ngwo zango lie kuli Yehova linahiane yuma yeswe.—Samu 119:165.
16. Yika hita umwe wa kuli yetu atamba kulinga?
16 Chili kuyuka chinene kuwayila Yehova hamuwika ni mandumbu jetu mu “chendo chimuwika” ni “kafunga umuwika”! (Yoa. 10:16) Mukanda Ululikiso Uze Unalingi Upale Wa Yehova ha lifwo 165 unambe ngwo: “Amu unayuku ha kulinunga chacho, kashika watamba kukwasa kulinunga chacho hanga chinunge.” Kashika, twatamba “kumona mandumbu jetu ngwe chize Yehova akwamona.” Kuli Yehova, yetweswe tuli alemu. Shina ni yena che wakumona mandumbu je? Yehova kakumona ni kulemesa yeswe yize wakulinga hanga ukwase mandumbu je ni kwafunga.—Mateu 10:42.
17. Yuma yika yize kutwazangile kulinga?
17 Yetu twakuzanga chinji mandumbu jetu. Kashika kutwazangile kusa “chihukanyiso hanji chitalingiso mu jila ya” ndumbwetu. (Roma 14:13) Tunazange kumona mandumbu jetu ngwetu, katuhiana ni kwakonekena ni mbunge yeswe. Kanda twecha niumwe hanga atutalingise. Shimbu tutalinge, “tukaulenu yuma yipema yize yatwala ku sambukila, ni yuma yize mutuhasa kulikolesa nayo umwe ni mukwo.”—Roma 14:19.
MWASO 130 Pwenu ni Kukonekena Akwenu
^ kax. 5 Mumu lia uhenge, mutuhasa kwamba hanji kulinga yuma yize muyivwisa mandumbu jetu yikola ku mbunge. Nyi chino chalingiwa, yika twatamba kulinga? Shina mutusa tachi hanga tulivwashane ni mandumbu jetu? Shina kawashi-washi mutwita ukonekeno? Nyi mutunyonga ngwetu, nyi kanevu yikola ku mbunge mulonga ni wenyi hi wa yami ko? Nyi hanji yetu twakulivutula kawashi ni koma keswako mandumbu jetu mamba hanji matulinga? Shina twakweseka kukalila yitanga yetu ni kwamba ngwo, yami kwami che napwa kuchishi kwalumuka nawa? Nyi hanji twakutayiza ngwetu, kuli yuma yimwe yize tunafupiwa kwalumuna ku mwono wetu?
^ kax. 53 ULUMBUNWISO WA CHIZULIE: Umwe ndumbu wa pwo kanevwila mukwo uli. Hanyima lia kuhanjika ni kuhwisa kapinda wacho, ayo havulama yize yalingiwangako nawa kananungu ni kulingila Yehova ni uwahililo weswe.
