1. Mumu liaka ha mashimbu amwe tuvumbi a Yehova mahasa kulivwa ukawo?

ANJI a kuli yetu, ha mashimbu amwe twakulivwa ngwe tuli ukawetu. Kuli amwe, manyonga jacho kakuhwa ni kawashi. Alioze kuli akwo, mahasa kushimbula chinji. Mutuhasa kulivwa ukawetu chipwe ngwe tuli mukachi ka atu anji. Kuli mandumbu jetu amwe, chakwapwila chikalu kwijilila ni mandumbu a mu chikungulwila chaha. Akwo kanakakolela mu usoko muze te akulinga yuma yeswe hamuwika, kashika muze akuya ku chihela cheka kakulivwa ukawo. Eka kakwivwa usona wa asoko jo waze hanafu. Kuli akwa-Kristu akwo, chipi-chipi waze achili aha mu umwenemwene kakulivwa ukawo muze akwahungumiona kuli asoko jo ni kuli masepa jo waze hi Yela ja Yehova ko.

2. Yihula yika mutukumbulula ha mutwe uno?

² Yehova kananyingika yuma yeswe hakutwala kuli yetu. Iye kananyingika muze twakulivwa ukawetu, nawa kanazange kutukwasa kukumba manyonga jacho. Mba kuchi Yehova akutukwasa? Yika mutuhasa kulinga hanga tulikwase yetwene? Nawa kuchi mutuhasa kukwasa mandumbu mu chikungulwila waze akulivwa ukawo? Tutalenu makumbululo a yihula yino.

3. Kuchi Yehova asolwele ngwo kakulihulumba hali Eliya?

³ Yehova kanazange hanga tuvumbi twenyi eswe awahilile. Yehova kali hakamwihi ni hita umwe wa kuli yetu, nawa kananyingika muze twakupinda ni yinyengo. (Samu 145:18, 19) Tutalenu chize Yehova asolwele ngwenyi, kakulihulumba chinji hali profeta Eliya ni chize amukwashile. Lunga yono washishika katwamine ha amwe mashimbu akalu chinji mu Izalele. Tuvumbi twa Yehova ha mashimbu jacho kapwile ni kwahungumiona chinji nawa akwa-kole kafupile kushiha Eliya. (1 Mia. 19:1, 2) Chikwo nawa, Eliya kanyongene ngwe iye wika mwe wasalileko  ngwe profeta wa Yehova. Chino te chakumuvwisa yinyengo yinji. (1 Mia. 19:10) Hachino, kawashi-washi Zambi yalinga chimwe hanga akwase Eliya. Yehova yatuma mungelo wenyi kuli profeta yono hanga asolole ngwo te keshi ukawenyi, nawa ngwo kwapwile A-Izalele anji waze te anamulingila ni ushishiko weswe!—1 Mia. 19:5, 18.

4. Kuchi Marku 10:29, 30 unasolola ngwo Yehova kakulihulumba hali tuvumbi twenyi waze akulivwa ukawo?

⁴ Yehova kananyingika ngwenyi, mba tumulingile anji a kuli yetu twahichikile yuma yinji. Chimwe cha ku yuma yacho, muchihasa kupwa kuhona ukwaso wa asoko ni masepa jetu waze keshi kuwayila Yehova. Kota mumu lia kulipikala, tangwa limwe postolo Petulu yahula Yesu ngwenyi: “Mba ni yetu hitwahichika yuma yeswe, hitwanukaula; yika mutukatambula?” (Mateu 19:27) Ni zango lieswe, Yesu yalweza tumbaji twenyi ngwenyi chikungulwila te muchipwa usoko wo. (Tanga Marku 10:29, 30.) Nawa Yehova, Tata yetu wa mu malilu kanalakenya ngwenyi makwasa waze eswe anazange kumulingila. (Samu 9:10) Tutalenu yuma yimwe yize muhasa kulinga hanga ukumbe manyonga akulivwa ukawe.

5. Mumu liaka chili chipema kulihulikila ha chize Yehova anakukwasa?

⁵ Lihulikile ha chize Yehova anakukwasa. (Samu 55:22) Nyi wachilinga, chino muchikukwasa hanga uhone kulivwa ngwe uli ukawe. Umwe ndumbu wa pwo twamishi avuluka ngwo Carol, * yoze iye ukawenyi mwe Chela cha Yehova yamba ngwenyi: “Muze nakutala kunyima ni kupukuna ha chize Yehova angukwashile ha mashimbu akalu, chakungwaha shindakenyo ngwami kuchishi ukawami. Nawa ngwo, nihindu Yehova kumapwa sali liami mashimbu eswe.”

6. Kuchi 1 Petulu 5:9, 10, muhasa kukolweza waze akulivwa ukawo?

⁶ Nyonga ha chize Yehova anakwasa mandumbu akwo waze analivu ukawo. (Tanga 1 Petulu 5:9, 10.) Hiroshi, umwe ndumbu yoze mu usoko wenyi iye wika mwe Chela cha Yehova yamba ngwenyi: “Mu chikungulwila, chili chashi kumona ngwo hita ndumbu kali ni yimwe yipikalo yize anapinda nayo. Kunyingika ngwo mandumbu eswe kanase tachi hanga  alingile Yehova, chakutukolweza yetu waze twakulingila Yehova chakuhona asoko jetu.”

7. Kuchi kulemba muchihasa kukukwasa?

⁷ Pwako ni katalilo mupema wa yuma ya ku spiritu. Yino yinachingi kulweza Yehova yeswe yize unevu. (1 Petu. 5:7) Tala yize ambile Massiel, umwe mukweze Chela cha Yehova. Muze aputukile kulingila Yehova, te kakulivwa ukawenyi mumu asoko jenyi te keshi kulingila Yehova. Yamba ngwenyi: “Chuma chimwe chize chapwile ni kungukwasa muze te nakulivwa ukawami, chili kulemba kuli Yehova ni mbunge yami yeswe. Yehova kapwile Tata wamwenemwene kuli yami, te nakulemba matangwa eswe ha yisuho yinji ha tangwa ni kumulweza chize ngunevu.”

8. Kuchi kutanga Liji lia Zambi ni kulipukuna muchikukwasa?

⁸ Tanga Liji lia Zambi matangwa eswe nawa pukuna ha sango jize jinasolola ngwo Yehova kakukuzanga. Bianca, yoze akukekuna kuli asoko jenyi yamba ngwenyi: “Kutanga ni kupukuna ha sango ja mu Mbimbiliya ni ja ku mwono wa Yela ja Yehova, waze akupalika mu kapinda ngwe wa yami chakungukwasa chinji.” Akwa-Kristu amwe kakupachika mu mutwe yisoneko ya utakamiso ngwe Samu 27:10 ni Izaia 41:10. Akwo kakwamba ngwo, kupanjika Mbimbiliya mu maliji akukopa ni mikanda yize twakulilongesa ha kukunguluka, chakwakwasa chinji hanga ahone kulivwa ukawo.

9. Kuchi kuya ku kukunguluka muchikuyukisa?

⁹ Sako tachi hanga upwe ni kukunguluka mashimbu eswe. Muwana utakamiso ha kulia cha ku spiritu nawa munyingika kanawa mandumbu. (Hepre. 10:24, 25) Massiel yoze hitwatongola yamba ngwenyi: “Chipwe ngwe te nakwivwa sonyi jinji, nihindu yinguzanga kuya ha kukunguluka cheswe ni kuhana makumbululo. Chino changukwashile kunyingika kanawa mandumbu mu chikungulwila.”

10. Mumu liaka chili chilemu kulikata ni mandumbu jetu a mu ufulielo?

¹⁰ Likate ni mandumbu a mu ufulielo. Likate ni mandumbu waze ali yilweza yipema, ayo mahasa kupwa twanuke hanji makulwana je nawa a ku minyachi yalisa. Mbimbiliya yinatulweze ngwo: “Mana kakutwama ni makulwana.” (Yombi 12:12) Alioze makulwana no mahasa kulilongesa yuma yinji kuli akweze waze ashishika. Ndawichi kapwile kanuke kuli Jonata, chipwe chocho, chino chakaakinjile kupwa masepa apema. (1 Samue. 18:1) Ayo kalikwashile umwe ni mukwo hanga anunge ni kulingila Yehova, chipwe ngwe kapalikile mu yipikalo yinji. (1 Samue. 23:16-18) Irina, umwe ndumbu yoze mu usoko wenyi iye wika mwe Chela cha Yehova yamba ngwenyi: “Mandumbu jetu a mu chikungulwila mahasa kupwa ngwe yisemi nawa ngwe mandumbu waze twasemuka  no. Yehova mahasa kwazachisa hanga atukwase ha yeswe yize tunafupiwa.”

11. Yika watamba kulinga mba upwe ni masepa apema?

¹¹ Muchihasa kupwa chikalu kupwa ni masepa aha, chipi-chipi ni wakwivwa sonyi. Ratna, umwe ndumbu wakwivwa-vwa sonyi yoze walilongesele umwenemwene chipwe ngwe te kanapalika mu yihungumiona, yamba ngwenyi: “Natambile kunyingika ngwami, te ngunafupiwa ukwaso wa mandumbu jami a ku ufulielo.” Muchihasa kupwa chikalu kuhanjika ni umwe hakutwala ku chize twakwivwa, alioze nyi twachilinga mutu wacho mahasa kupwa sepa lietu mupema. Masepa je kanazange kukukolweza ni kukukwasa, alioze watamba kwalweza chize ayo mahasa kuchilinga.

12. Kuchi mulimo wa kwambujola muhasa kukukwasa kupwa ni masepa apema?

¹² Jila yipema yakupwilamo ni masepa, yili ha kukalakala hamuwika ni mandumbu jetu mu mulimo wa kwambujola. Carol, yoze hitwatongola yamba ngwenyi: “Kwambujola ni kulinga milimo yikwo ya ku spiritu hamuwika ni mandumbu a mapwo a mu chikungulwila chetu, changukwasa kupwa ni masepa apema. Ha miaka yeswayi, Yehova kakungukwasa kupalikila muli masepa wano.” Chino chinasolola pundu ngwo, tachi jeswajo mutusa hanga tupwe masepa ja tuvumbi twa Yehova waze ashishika, kujichi kulitokela. Yehova kakuzachisa masepa jacho hanga atukwase muze tunapalika mukapinda ngwe wakulivwa ukawetu.—Yishi. 17:17.

13. Chiteli chika mandumbu eswe ali nacho?

¹³ Mandumbu eswe mu chikungulwila kali ni chiteli cha kukwasa chikungulwila hanga mupwe zango ni sambukila, muze niumwe keshi kulivwa ukawenyi. (Yoa. 13:35) Yuma yize twakuhanjika ni kulinga muyihasa kutakamisa chinji akwetu! Umwe ndumbu wa pwo kambile ngwenyi: “Muze nanyingikine umwenemwene mandumbu mu chikungulwila yapwa asoko jami. Nyi mandumbu wano kakangukwashile, kachi chakapwile Chela cha Yehova.” Yika muhasa kulinga hanga ukwase ndumbu yoze uli ukawenyi mu umwenemwene hanga alivwe ngwo mandumbu mu chikungulwila kakumuzanga?

14. Yika muhasa kulinga hanga ulikate ni mandumbu aha?

¹⁴ Fupa kulikata ni mandumbu aha. Mutuhasa kutambwisa ni zango lieswe mandumbu waze akwalukila mu chikungulwila chetu. (Roma 15:7) Mutuhasa kulinga yuma yinji hi wika ko kwameneka. Hakupalika cha mashimbu, tunazange hanga mandumbu wano apwe masepa jetu apema. Kashika, solola ngwo wakwazanga nawa ngwo wakulihulumba hali mandumbu wano aha. Eseka kunyingika yipikalo yize ayo anapalika, alioze kanda wahula yuma yize muyevwisa sonyi. Iwuluka ngwe kuli amwe, muchihasa kwapwila chikalu kuhanjika hakutwala ku chize anevu. Kashika, watamba kukanyama hanga uchine kwashinjila achilinge. Mba unyingike chize ayo anevu, ahule ni zango lieswe nawa shimbwila kumbululo lio ni uhumikizo weswe. Chakutalilaho, muhasa kwahula ngwo, kuchi wanyingikine umwenemwene?

15. Kuchi mandumbu waze ajama mahasa kukwasa akwo mu chikungulwila?

¹⁵ Muze mandumbu waze ajama, chipi-chipi makulwana a mu chikungulwila masolola ngwo kakulihulumba hali akwo, chikungulwila muchikola. Melissa, yoze wanyingikine umwenemwene kupalikila muli naye, yamba ngwenyi: “Nakusakwilila mandumbu waze apwile ngwe yisemi jami ha kupalikisa mashimbu ni yami ni kulihulumba hali yami. Mashimbu  eswe waze te nakufupiwa kuhanjika, te kwakupwa umwe yoze mangupanjika.” Mukweze Mauricio, yoze te wakulivwa ukawenyi muze longeshi yenyi ahichikile umwenemwene, yamba ngwenyi: “Makulwana a mu chikungulwila kasolwele ngwo kakulihulumba hali yami, nawa chino changukwashile chinji. Ayo te kakuhanjika ni yami mashimbu eswe. Nawa te kakukalakala hamuwika ni yami mu munda, kungulweza yize awana ha longeso lio lia wika ni kwasa no konda.” Musono, Melissa ni Mauricio kali mu mulimo wa shimbu lieswe.

16-17. Mu majila aka mutuhasa kukwashilamo akwetu ha yize anafupiwa?

¹⁶ Kwasa akwenu ha yize anafupiwa. (Ngala. 6:10) Leo, yoze wakukalakala ngwe mishionaliu kusuku ni asoko jenyi, yamba ngwenyi: “Kanji-kanji chuma chize mutu akufupiwa chili kumusolwela zango ha kumulingila chimwe ha mashimbu alita. Ngunewuluka tangwa limwe muze nalingile acidente ni mashinyi, te ngunalipikala chinji muze nahetele ku zuwo. Chocho, umwe ndumbu ni mukwo-pwo yangusanyika hanga nguye ni kulia ku zuwo lio. Kuchishi kwiwuluka yize twalile ha tangwa liacho, alioze chishi kuvulama chize ayo angupanjikile. Hanyima lia chino, yingulivwa kanawa!”

¹⁷ Yetu twakuzanga kupwa ha kukunguluka cha mbonge ni cha mambonge. Ha kukunguluka chacho twakuwahilila kupwa ni mandumbu jetu ni kuhanjika no hakutwala ku yize twevwa mu pande. Alioze, Carol, yoze hitwatongola kambile ngwenyi: “Ha mashimbu a kukunguluka cha mbonge ni cha mambonge, kapwile akalu chinji kuli yami. Mumu liaka? Mumu chipwe ngwe napwile mukachi ka mandumbu jami, nihindu te nakulivwa ukawami ha kumona hita mutu kali ni asoko jenyi alioze yami ka. Ha mashimbu jacho, te nakulivwa chinji ukawami.” Mandumbu akwo, chakwapwila chikalu chinji kuya ha kukunguluka chino hanyima lia kufwisa pwo hanji lunga. Shina unanyingika umwe yoze unapalika mu yuma yacho? Nyi unamunyingika, muhasa kumusanyika hanga uye nenyi chimuwika ha kukunguluka cha mbonge hanji cha mambonge.

18. Kuchi mutuhasa kusa mu yitanga 2 A-Korindu 6:11-13, ha kuzumbula akwetu?

¹⁸ Palikisa mashimbu hamuwika ni mandumbu. Palikisa mashimbu ni mandumbu alisa,  chipi-chipi waze akulivwa ukawo. Tunazange kwazulula “mbunge jetu,” chipi-chipi kuli mandumbu ngwe wano. (Tanga 2 A-Korindu 6:11-13.) Melissa, yoze hitwatongola yamba ngwenyi: “Chapwile chipema kuli yetu muze mandumbu te akutusanyika hanga tuye ku mazuwo jo, tupalikise mashimbu hamuwika hanji kulinga no wenyi.” Shina unanyingika umwe ndumbu mu chikungulwila chenu, yoze muhasa kusanyika ku zuwo lie hanga nulie nenyi hamuwika?

19. Ha mashimbu aka muchihasa kupwa chipema kupalikisa mashimbu ni mandumbu jetu?

¹⁹ Ha mashimbu amwe mandumbu jetu mawahilila chinji nyi mutupalikisa no mashimbu hamuwika. Chakutalilaho, ha matangwa akunanga muchihasa kukaliwa kuli mandumbu amwe, kupwa hamuwika ni asoko jo waze hi Yela ja Yehova ko. Akwo kota kakunenganyana chinji muze akuheta ha tangwa lize afwishile asoko jo. Muze twakulihana hanga tupwe hamuwika ni mandumbu wano ha mashimbu akalu, twakusolola ngwetu twakulihulumba hali ayo.—Fwili. 2:20.

20. Kuchi maliji a Yesu ali ha Mateu 12:48-50 mahasa kutukwasa muze mutulivwa ukawetu?

²⁰ Ngwe chize twamona, kuli yuma yinji yize muyihasa kutwala umwe mukwa-Kristu kulivwa ukawenyi ha mashimbu amwe. Alioze, kutwatambile kuvulama ngwetu, Yehova kananyingika kanawa chize twakwivwa. Chikwo nawa, kanji-kanji Yehova kakutwaha ukwaso uze tunafupiwa kupalikila muli mandumbu jetu a ku ufulielo. (Tanga Mateu 12:48-50.) Mba tusolole ngwetu twakusakwilila Yehova ha kupwa mu chikungulwila chenyi, twatamba kusa tachi hanga tukwase mandumbu jetu a ku ufulielo. Chipwe ngwe mashimbu amwe twakulivwa ukawetu, tunyingikenu ngwetu kutushi ukawetu Yehova manunga kupwa hamwe ni yetu!