1. Yika tumbaji twa Yesu alwezele mbunga yinene ya atu?

MBUNGA yinene ya malunga ni mapwo a ku yifuchi yeka ni yeka, kayile ku Yerusaleme, atu jacho te kakuhanjika malimi alisa. Ha tangwa liacho, kwalingiwile chimwe chikomokeso. Tumbaji a Yesu waze te A-Yunda, yaputuka kuhanjika malimi ja atu jacho, chino yichaakomwesa. Alioze chuma chize chaakwachile ku mbunge, chapwile sango jize evwile kuli tumbaji twa Yesu ni kuli postolo Petulu. Ayo kalilongesele ngwo, mba aalamwine, katamba kufuliela muli Yesu Kristu. Kanakawahilila chinji, chocho yahula ngwo: “Kuchi mutulinga?” Petulu yaakumbulula ngwenyi: “Anupapachise mutu ni mutu.”—Yili. 2:37, 38.

2. Yika mutumona ha mutwe uno? (Tala chizulie ha chifukilo.)

² Kulutwe yikulingiwa chimwe chuma cha kukomwesa. Ha tangwa lizeliene atu 3.000 yaapapachisa ni kupwa tumbaji twa Kristu. Uno wapwile uputukilo wa mulimo unene uze Yesu atumine tumbaji twenyi kulinga—mulimo wa kutayisa tumbaji. Chipwe musono, tumbaji twa Yesu kananungu ni kulinga mulimo wacho. Ha matangwa jetu, kutuchi kuhasa kukwasa mutu kuheta ku upapachiso ha amwe maola wika. Yino muyihasa kumbata tukweji, mwaka hanji lume kuhiana. Nyi unasongwela longeso lia Mbimbiliya kuli umwe mutu, yena unanyingika ngwo kutayisa kambaji chakufupiwa kusa tachi. Ha mutwe uno, mutumonaho yize muhasa kulinga hanga ukwase longi ye wa Mbimbiliya ahete ku upapachiso.

3. Kulita ni Mateu 28:19, 20, yika longi wa Mbimbiliya atamba kulinga mba amupapachise?

³ Shimbu kanda achimupapachisa, longi wa Mbimbiliya, katamba kusa mu yitanga yize akulilongesa. (Tanga Mateu 28:19, 20.) Muze makaula yize analilongesa, mapwa ngwe “mukwa-kukanyama” wa ha chishima cha Yesu yoze watungile zuwo lienyi ha liwe. (Mateu 7:24, 25; Luka 6:47, 48) Kuchi mutuhasa kukwasa longi kusa mu yitanga yize analilongesa? Tutalenu yikuma yitatu.

4. Kuchi mutuhasa kukwasa longi anunge ni kulikolweza hanga ajame ni kumupapachisa? (Tala nawa mushete, “ Kwasa Longi ye Kutesa Yize Malinga ni Kusa Tachi Hanga Ayilinge.”)

⁴ Kwasa longi ye atese kulinga yimwe muze analilongesa. Mumu liaka watamba kuchilinga? Tutalenu chilweza chino: Achinyonga ngwe unalingi wenyi usuku ni mashinyi, mu wenyi wacho yena hanji muzanga kumana-mana ha yimwe yihela yipema. Hachino, wenyi wacho chipwe ngwe usuku nihindu kuuchi kukuhongesa chinji. Chizechene nawa, chili chipema longi wa Mbimbiliya kutesa kulinga yimwe ha amwe mashimbu akehe ni kulikolweza hanga ayilinge. Hachino, iye manyingika ngwo upapachiso hi chuma chikalu ko kulinga. Mba ukwase longi ye ajame, zachisa chikuma “Yize Mulinga” mu mukanda Wahilila ku Mwono ku Miaka Yeswe! Kusongo lia hita longeso, shimutwina ni longi ye chize yuma yize amukolweza kulinga ha mukanda, yinalite ni yize alilongesa. Nyi unazange hanga longi ye atese kulinga yuma yikwo, muhasa kuhanjika nenyi ni kumukolweza hanga asoneke yuma yacho ha chihela, “Yikuma yikwo.” Pwako ni kuzachisa chikuma chino chili mu mukanda hanga uhanjike ni longi ye hakutwala ku yize atesa kulinga ha mashimbu akehe ni ha mashimbu anji.

5. Kulita ni Marku 10:17-22, yika Yesu alwezele lunga pichi alinge, nawa mumu liaka?

⁵ Kwasa longi ye hanga alumune mwono wenyi. (Tanga Marku 10:17-22.) Yesu kanyingikine ngwenyi, chapwile chikalu kuli lunga pichi kulanjisa yuma yeswe yize apwile nayo. (Marku 10:23) Chipwe chocho, Yesu yamulweza hanga alanjise yuma yeswe, chuma chize chapwile chikalu kuli lunga wacho. Mumu liaka? Mumu Yesu kamuzangile. Ha mashimbu amwe, twakwecha  kukolweza longi hanga akaule yize analilongesa mumu twakunyonga ngwetu, kanda achijama ni kwalumuna yimwe ku mwono wenyi. Kwamba umwenemwene, kuzula utu ukulu ni kuzala utu waha, chili chuma chize chakumbata mashimbu anji. (Kolo. 3:9, 10) Alioze, nyi walianga kuhanjika chikuma chino ni longi ye, muchipwa chashi iye kuputuka kwalumuna yimwe ku mwono wenyi. Nyi wahanjika chikuma chino ni longi ye, musolola ngwo wakumuzanga.—Samu 141:5; Yishi. 27:17.

6. Mumu liaka twatamba kuzachisa yihula yize muyikwasa longi hanga asolole yize akunyonga?

⁶ Chili chilemu kuhula longi yize akunyonga hakutwala ku chikuma chize analilongesa. Zachisa yihula yacho, hanga unyingike yize longi ananyingika ni yize akufuliela. Nyi wanunga ni kuchilinga, kulutwe lia matangwa muchipwa chashi kushimutwina nenyi ha yikuma yize kuli iye chapwa chikalu kuyitayiza. Mukanda Wahilila ku Mwono ku Miaka Yeswe! uli ni yihula yinji ya mutapu au. Chakutalilaho, ha longeso 04 hali chihula chinambe ngwo: “Ku nyonga lie, kuchi Yehova akwivwa muze wakuzachisa jina lienyi?” Ha longeso 09 hali chihula chinambe ngwo: “Yuma yika yize unazange kwita mu yilemba?” Ku uputukilo, longi ye hanji mafupiwa mashimbu mba ahase kukumbulula chimwe chihula hakutwala ku chize akunyonga, alioze muhasa kumukwasa ha chikuma chacho. Chakutalilaho, mukwase anyonge ha yisoneko ya Mbimbiliya ni yizulie yize yili ha longeso.

7. Kuchi mutuhasa kuzachisa yilweza ya atu akwo hanga tukwase longi yetu?

⁷ Muze longi ye manyingika yize atamba kwalumuna ku mwono wenyi, zachisa yilweza ya atu waze alumwine yimwe ku mwono wo hanga umukolweze neye achilinge. Chakutalilaho, nyi longi ye chakumukalila kuya ku kukunguluka, musolwele chinema chinambe ngwo, Yehova Kakulihulumba hali Yami chize chili ha chikuma, “Hengwola Nawa” ha longeso 14. Ha malongeso anji a mukanda Wahilila ku Mwono ku Miaka Yeswe! muwanaho yilweza ya atu anji waze alumwine yimwe ku mwono wo ha chikuma “Nyingika Nawa” hanji “Hengwola Nawa.” * Watamba kukeya hanga uchine kutesa longi ye ni mutu mukwo hakwamba yuma ngwe, “Nyi iye kachilinga, nyi yena muhasa kuchilinga.” Echa longi mwene alikwachile chiyulo chacho. Chuma chilemu chili kushindakenya ha yikuma yilemu yize yakwashile mutu yoze asolola ha chinema, kusa mu yitanga yize te analilongesa mu Mbimbiliya. Muhasa kutongola chimwe chisoneko hanji chuma chize mutu wacho alingile mba ase mu yitanga yize te akulilongesa mu Mbimbiliya. Nyi muchilita, nunga ni kushindakenya chize Yehova akwashile mutu wacho.

8. Kuchi mutuhasa kukwasa longi yetu hanga azange Yehova?

⁸ Kwasa longi ye hanga azange Yehova. Kuchi muhasa kuchilinga? Ha shimbu lieswalio mukusoloka umwe uhashi, shindakenya ha yitanga ya Yehova. Kwasa longi ye amone ngwo Yehova kali Zambi ya uwahililo, nawa ngwo kakukwasa waze eswe akumuzanga. (1 Timo. 1:11; Hepre. 11:6) Solwela longi ye ngwo, kukaula yize Mbimbiliya yakulongesa chakuneha yiwape, nawa yiwape yacho yili yimwe jila yize muyisolola ngwo Yehova kakumuzanga. (Iza. 48:17, 18) Nyi longi ye mazanga chinji Yehova, chino muchimutwala hanga alumune yimwe ku mwono wenyi.—1 Yoa. 5:3.

9. Kulita ni Marku 10:29, 30, yika muyihasa kukwasa longi kwecha yuma yimwe hanga amupapachise?

⁹ Mba longi wa Mbimbiliya ahete ku upapachiso, iye katamba kwecha yuma yimwe. Chizechene  ngwe lunga pichi yoze hitwatongola, alongi amwe a Mbimbiliya katamba kwecha kuzanga chinji upite. Chakutalilaho, nyi kakulinga mulimo uze kuwalitele ni shimbi ja mu Mbimbiliya, ayo hanji mecha mulimo wacho ni kufupa mulimo ukwo. Chikwo nawa, alongi anji a Mbimbiliya hanji mafupiwa kwecha masepa jo waze keshi kuzanga Yehova. Akwo mahasa kwasapula kuli asoko jo waze keshi kuzanga Yela ja Yehova. Yesu kanyingikine ngwenyi, hi chashi ko kuli atu amwe kwecha yuma yimwe. Alioze iye kalakenyene ngwenyi, waze mazanga kumukaula kechi kaliseha. Yehova maawahisa ha kwaha usoko wa ku ufulielo. (Tanga Marku 10:29, 30.) Yika muhasa kulinga hanga ukwase longi ye azuke chawana chino chilemu?

10. Yika walilongesa ha yize Manuel amba?

¹⁰ Pwako sepa lia longi ye. Chili chilemu kusolola kuli longi ye ngwo wakulihulumba hali iye. Mumu liaka? Tala yize Manuel ambile yoze watwama ku México. Muze akwiwuluka mashimbu waze te uchili longi wa Mbimbiliya, yamba ngwenyi: “Shimbu kanda tuchiputuka kulilongesa Mbimbiliya, longeshi yami te kakunguhula chize nguli. Iye te kakungukwasa kulihumikiza nawa te kakungwecha hanga nguhanjike chuma cheswacho ngunazange. Te nakuhasa kumona ngwami iye kakulihulumba hali yami.”

11. Mumu liaka chili chipema longi kupalikisa mashimbu ni longeshi yenyi?

¹¹ Palikisa mashimbu ni longi ye, ngwe chize te Yesu akulinga ni tumbaji twenyi. (Yoa. 3:22) Nyi longi ye maputuka kujama ku ufulielo, muhasa kumusanyika ku zuwo lie hanga nulie hamuwika hanji kutala broadcasting. Chino muchipema chinji kuli longi ye, chipi-chipi nyi mumusanyika ha tangwa lia kunanga hanga achine kulivwa ukawenyi. Kazibwe, yoze watwama mu Uganda yamba ngwenyi: “Chakalilongesele wika hakutwala kuli Yehova ha mashimbu waze te twakulilongesa, alioze ni ha mashimbu waze te nakupalikisa ni longeshi yami. Nahashile kumona chize Yehova akulihulumba hali tuvumbi twenyi ni chize  ayo akuwahilila. Yino ye te ngunazange ku mwono wami.”

12. Mumu liaka chili chipema kuya ni mandumbu alisa muze tunayi ni kusongwela longeso lia Mbimbiliya?

¹² Muze unayi ni kusongwela longeso lia Mbimbiliya yako ni mandumbu alisa. Ha mashimbu amwe, muchihasa kupwa chashi kuya ni kusongwela longeso lia Mbimbiliya ukawetu hanji kuya wika ni ndumbu yoze twakuya nenyi mashimbu eswe. Chipwe ngwe chino hi chipi ko, alioze longi mayuka chinji nyi ha mashimbu amwe mutuyako ni mandumbu alisa. Dmitrii yoze watwama mu Moldávia yamba ngwenyi: “Hita ndumbu yoze longeshi yami te akwiza nenyi ha longeso, te kakulumbununa yuma mu jila yalisa. Chino te chakungukwasa kumona majila alisa waze munguhasa kukawilamo yize te ngunalilongesa. Chikwo nawa, muze nayile ha kukunguluka chitangu, kuchakevwile sonyi mumu te hingunanyingika mandumbu anji.”

13. Mumu liaka twatamba kukwasa longi yetu hanga apwe ni kukunguluka?

¹³ Kolweza longi ye hanga apwe ni kukunguluka. Mumu liaka? Mumu Yehova mwe wakwita tuvumbi twenyi hanga alikungulule, nawa chino chili chihanda cha uwayilo wetu. (Hepre. 10:24, 25) Chikwo nawa, mandumbu jetu a malunga ni a mapwo kali asoko jetu a ku ufulielo. Muze twakupwa no ha kukunguluka, chakupwa ngwe tunali hamuwika chimwe kulia chiyema. Chili chilemu kukwasa longi ye hanga apwe ni kukunguluka, mumu nyi machilinga muchimukwasa hanga amupapachise. Alioze hanji chakupwa chikalu kuli longi ye kukunguluka. Nyi yino ye longi ye akupinda nayo, kuchi mukanda Wahilila ku Mwono ku Miaka Yeswe! muhasa kumukwasa?

14. Kuchi mutuhasa kukolweza longi yetu hanga apwe ni kukunguluka?

¹⁴ Zachisa longeso 10 lia mukanda Wahilila ku Mwono ku Miaka Yeswe! hanga ukolweze longi ye apwe ni kukunguluka. Shimbu te kanda achituhwisa mukanda uno, amwe akwa-kwambujola ajama kaasakwile hanga eseke longeso liacho. Ayo kambile ngwo, longeso liacho lili lipema, nawa liakwashile alongi jo kuputuka kuya ku kukunguluka. Alioze, kutwatambile kushimbwila ndo ha longeso 10 mba tusanyike longi ku kukunguluka. Nyi muchilita, linga chino ni kawashi, nawa nunga ni kumusanyika hanga apwe ni kukunguluka. Hita longi kakupalika mu yipikalo yalisa. Kashika, sako shindakenyo ha yize longi ye anafupiwa. Nawa fupa majila akumukwashilamo ha yize anafupiwa ku mwono wenyi. Chipwe ngwe kanashimbula kupwa ni kukunguluka, kanda uhonga pwako chimbovu nawa nunga ni kumusanyika.

15. Yuma yika longi yetu mahasa kuvwila woma?

¹⁵ Shina wevwile woma wakupwa Chela cha Yehova? Kota wanyongene ngwe kuuchi kuhasa kwambujola kuli atu akwo. Nawa kota wevwile woma ngwo asoko ni masepa je malimika ni yena. Nyi yenayi wapalikile, muhasa kunyingika chize longi ye akwivwa. Yesu kanyingikine ngwenyi, amwe te mevwa woma wacho. Alioze kakolwezele tumbaji twenyi hanga achine kwecha woma wakinde kulingila Yehova. (Mateu 10:16, 17, 27, 28) Yika Yesu alingile hanga akwase tumbaji twenyi kukumba woma? Nawa kuchi muhasa kumwimbulula?

16. Kuchi mutuhasa kulongesa longi yetu chize mambujola?

¹⁶ Kwasa longi ye hanga ambujole. Muze Yesu atumine tumbaji twenyi kuya ni kwambujola, ayo kota kevwile woma. Alioze iye yaakwasa ha kwalweza ku chihela kuze maya ni kwambulwila ni sango jize mambujola. (Mateu 10:5-7) Kuchi muhasa kwimbulula Yesu? Kwasa longi ye hanga anyingike kuze maya ni kwambulwila. Chakutalilaho, muhule ngwe, shina unanyingika umwe mutu yoze mazanga kulilongesa umwenemwene uno wa mu Mbimbiliya?  Hanyima, mukwase kululieka maliji ashi waze mahasa kwambujola no kuli mutu wacho. Nyi muchilita, munuhasa kululieka hamuwika ha kuzachisa chikuma “Atu Amwe Kakwamba Ngwo” ni chikuma “Amwe Mahasa Kukuhula Ngwo,” yize yili ha mukanda Wahilila ku Mwono ku Miaka Yeswe! Muze nunalilulieka, sako shindakenyo ngwo unalongesa longi ye kuzachisa Mbimbiliya hanga akumbulule yihula yashi, alioze mujila yalita.

17. Kuchi mutuhasa kuzachisa Mateu 10:19, 20, 29-31, hanga tukwase longi yetu kujikijila muli Yehova?

¹⁷ Kwasa longi ye hanga ajikijile muli Yehova. Yesu kalwezele tumbaji twenyi ngwenyi, Yehova kakwazanga nawa ngwo te manunga ni kwakwasa. (Tanga Mateu 10:19, 20, 29-31.) Iwulula longi ye ngwe, neye Yehova mamukwasa. Jila yimwe ya kukwasa longi ye kujikijila muli Yehova, yili ha kulemba nenyi hamuwika hakutwala ku yize atesa kulinga ku spiritu. Franciszek yoze watwama mu Polônia, yamba ngwenyi: “Longeshi yami muze te akulemba, te kakuhanjika hakutwala ku yuma ya ku spiritu yize natesele. Muze namwene ngwami Yehova kanakumbulula yilemba ya longeshi yami, ni yami yinguputuka kulemba. Namwene ukwaso wa Yehova muze nawanyine mulimo, ni muze nafupiwile kwita mashimbu hanga nguye ku kukunguluka ni kukunguluka cha mambonge.”

18. Kuchi Yehova akwivwa ha mulimo uze alongeshi a Mbimbiliya akulinga?

¹⁸ Yehova kakulihulumba chinji hali alongi jetu a Mbimbiliya. Nawa Zambi kakuzanga chinji alongeshi a Mbimbiliya, mumu kananyingika tachi jize akusa hanga alongese akwo umwenemwene hakutwala kuli iye. (Iza. 52:7) Nyi kuushi kusongwela longeso lia Mbimbiliya haliapwila, muhasa kukwasa alongi a Mbimbiliya kujama ni kwapapachisa ha kuya ni kwambujola hamwe ni mandumbu akwo.