Paulu kasonekene ngwenyi: “Mumu ami ku shimbi nafwile ku shimbi, hanga ngupwe ni mwono kuli Zambi.”—Ngala. 2:19.

Yize Paulu asonekene te yinalite ni yize iye alumbunwine mu yikungulwila ya mu mbonge ya A-Roma mu Ngalashia. Akwa-Kristu amwe mu mbonge yacho te kanaapiangula kuli alongeshi a mahuza. Alongeshi jacho kapwile ni kulongesa ngwo, mutu mba amulamwine katamba kwononokena shimbi ya Mose, chipi-chipi yize yinatale ha ungalami. Alioze Paulu kanyingikine ngwenyi, Zambi te keshi kushinjila nawa tuvumbi twenyi kupwa ngalami. Yuma yize Paulu ahanjikile yakumbile malongeso jacho a mahuza ni kukolesa ufulielo wa mandumbu ha chitapo cha ukuule wa Yesu Kristu.—Ngala. 2:4; 5:2.

Mbimbiliya yinasolola pundu ngwo, mutu nyi hafwa kanyingikine nichimwe. Yuma yeswe yize muyilingiwa haze ali kuyichi kukwata hali iye. (Chilu. 9:5) Muze Paulu ambile ngwenyi: “Ami ku shimbi nafwile,” iye te kanambe kwamba ngwenyi, shimbi ya Mose te kuyishi kutala nawa hali iye. Kwamba pundu, Paulu kapwile ni shindakenyo ngwenyi, ufulielo wenyi ha ukuule we te wakumupwisa “ni mwono kuli Zambi.”

Kwalumuka chino ku mwono wa Paulu, chalingiwile kupalikila mu “shimbi.” Mu mutapu uka? Paulu kaliangile kulumbununa ngwenyi: “Mutu keshi kumupwisa mukwa ululi ku yitanga ya shimbi, alioze ha kufuliela Yesu Kristu.” (Ngala. 2:16) Tunanyingika ngwetu, shimbi yinakalinga mulimo ulemu. Ngwe chize Paulu alwezele A-Ngalashia: “Mumu ha utanguko, ayiwezele ndo ku kwiza cha mukwa munyachi wa chilakenyo.” (Ngala. 3:19) Chochene, Shimbi te yakusolola pundu ngwo, atu yihenge kechi kuhasa kwononokena shimbi ni ungunu weswe. Ayo te kanafupiwa chitapo chingunu. Shimbi yakwashile atu kunyingika ngwo, Yesu mwe te “munyachi.” Mutu yoze te masolola ngwenyi, kakufuliela muli Yesu te kumapwa mukwa-ululi ku meso ja Zambi. (Ngala. 3:24) Paulu kapwile mukwa-ululi, mumu kupalikila mu Shimbi iye yatayiza Yesu ni kumufuliela. Mumu lia chino, Paulu ‘yafwa ku shimbi,’ ni kupwa “ni mwono kuli Zambi.” Shimbi te kuyishi nawa ni chiyulo hali Paulu alioze Zambi.

Paulu kahanjikile maliji ngwe wano ha mukanda uze asonekenene A-Roma. Iye yasoneka ngwenyi: “Mandumbu jami, ni yenu nawa hananupwisa afu ku shimbi mumu ha mujimba wa Kristu . . . haliapwila tunatusuka ku shimbi, se twafwile ku chize twakwachikile.” (Roma 7:4, 6) Ha chisoneko chino ni cha A-Ngalashia 2:19, Paulu te keshi kuhanjika hakutwala ku kufwa ngwe chivulumunyi yoze ahisa ku Shimbi. Alioze te kanahanjika hakutwala ku kutusuka. Shimbi te kuyishi nawa ni chiyulo hali iye ni hali atu akwo. Mumu ayo katusukile ha kufuliela ha chitapo cha ukuule wa Kristu.