ELISA * yamba ngwenyi: “Yitanga ya utu yize mandumbu asolwele, ye yangukwachile chinji ku mbunge.” Iye te kanahanjika ha chuma chitangu chize chamukwashile mba atayiza umwenemwene. Yino ye yalingiwile nawa kuli Anne, yoze wambile ngwenyi: “Natayijile umwenemwene mumu Yela ja Yehova kasolwele yitanga ya utu hi wika ko mumu lia yize te analongesa.” Mapangi wano aali, kakuzanga chinji kutanga Mbimbiliya ni kuyipukuna, alioze yitanga ya utu yakwachile chinji ku mbunge.

Kuchi mutuhasa kusolola utu hanga tukwate ku mbunge ya atu waze atujingilika? Mutushimutwina chize mutuhasa kuchilinga mu majila aali: Chize twakuzachisa limi lietu ni yitanga yetu. Mba mutumona waze twatamba kusolwela utu.

Pwo wamwenemwene yoze akusolola ha Yishima 31, kakwete “shimbi ja utu” ha limi lienyi. (Yishi. 31:26) Iye kakwecha hanga “shimbi” yacho yisongwele yize akuhanjika ni chize akuyihanjika. Yisemi no katamba kupwa ni “shimbi” yino ha limi. Yisemi anji kananyingika ngwo, nyi mambila mwano maliji api, iye mevwa kupiha. Nyi yisemi mapajila ana jo muze anaalweze yimwe hanji kwamba maliji api, ana jo keshi kwapanjika. Kashika, nyi yisemi mahanjika mu jila yipema, chakupwa chashi ana jo kwapanjika ni kwononokena.

Chipwe ngwe uli chisemi hanji ka, kuchi muhasa kulilongesa kupwa ni limi lia utu? Tunawane ukwaso ha maliji atangu ha Yishima 31:26 ngwo: “Kakupakula kanwa lienyi ni mana.” Chino chinatale ha kusakula kanawa maliji waze muhanjika ni chize mutwahanjika. Kashika, lihule ngwe: ‘Shina yuma yize ngunambe kuhanjika muyivwisa akwetu kupiha nyi muyaevwisa kuwaha?’ (Yishi. 15:1) Ewa, chili chilemu kunyonga shimbu kanda tuchihanjika.

Mukanda ukwo wa Yishima unambe ngwo: “Kwali mukwa kuhanjika kalusulusu ngwe kutuwa cha katana.” (Yishi. 12:18) Nyi mutunyonga ha maliji mutuhanjika, chize mutwahanjika ni chize makwata hali akwetu, muchihasa kutukwasa kunyonga kanawa shimbu kanda tuchihanjika. Nyi mutukaula “shimbi ja utu” muze mutuhanjika, muchitukwasa tuhone kuzachisa maliji akalu chipwe kuhanjika yuma yipi. (Efwe. 4:31, 32) Twehukenu manyonga ni maliji api ha kuhanjika yuma yipema nawa mu jila yalita. Yehova kahanyine chilweza chipema ha chikuma chino muze atakamishine kavumbi kenyi Eliya, ha shimbu lize te anevu woma. Mungelo yoze te unamanyinako Yehova, yahanjika ni ‘liji likepe lia vumbi.’ (1 Mia. 19:12) Alioze, kupwa ni mbunge ya utu chinalumbunuka yuma yinji, hi wika ko kuhanjika maliji apema. Twatamba nawa kusolola yitanga ya utu. Mba kuchi mutuhasa kuchilinga?

Nyi mutwimbulula Yehova, mutuhanjika maliji apema ni kusolola yitanga yipema. (Efwe. 4:32; 5:1, 2) Elisa yoze hitwatongola, kahanjikile ha yitanga ya utu yize Yela ja Yehova asolwele. Yamba ngwenyi: “Muze atuhumine susumuku, mandumbu aali ni mapwo jo yecha kuya ku milimo yo yeza ni kutukwasa kulongeza yikashi. Ha mashimbu jacho, te kanda nguchiputuka kulilongesa Mbimbiliya!” Yitanga yino  ya utu yize mandumbu jetu asolwele, yatwalile Elisa kuhengwola kanawa umwenemwene.

Anne yoze hitwatongola, neye kanakasakwilila chinji ha yitanga ya utu yize anakamusolwela kuli Yela ja Yehova. Yamba ngwenyi: “Mumu lia chize yitanga ya atu anji yinapihi hano hashi, chocho yingupwa mutu mukalu. Chapwile chikalu kuli yami kujikijila hali atu.” Yanunga ni kwamba ngwenyi: “Muze naliwanyine ni Yela ja Yehova, kuchakaajikijilile. Yingulihula ngwami, ‘Mumu liaka atu wano anangusolwela zango?’ Alioze, amu longeshi yami wa Mbimbiliya apwile ni kusolola yitanga yipema ni utu wenyi wamwenemwene, chocho yingumujikijila.” Mba yuma yika yipema yize yinakalingiwa mumu lia chino? “Kulutwe, yinguputuka kulihulikila chinji ha yize te akungulongesa.”

Twamona ngwetu, chuma chize chakwachile chinji ku mbunge ya Elisa ni Anne ni kwatwala hanga alilongese umwenemwene, chili yitanga ya utu ni zango lize mandumbu anakaasolwela. Yitanga ya utu yize mandumbu anakaasolwela ye yaakwashile kujikijila muli Yehova ni hali atu jenyi.

Atu amwe kakuzanga kuzachisa maliji a umbovu ni kusehejela mumu lia kuze akatukile ni chize aalelele. Chili chipema kunyingika ngwo, atu amwe kakusolola yitanga yipema mumu lia chize aalelele hanji mumu lia kupwa cho. Alioze nyi mutusolola wika yitanga yino mumu lia chize atulelele hanji mumu lia kupwa chetu, kutuchi kuhasa kwimbulula Zambi.—Tala nawa Yilinga 28:2.

Utu unalingi chihanda cha muhuko wa spiritu yisandu ya Zambi. (Ngala. 5:22, 23) Kashika, mba tupwe ni yitanga ya utu, tunafupiwa kwecha hanga spiritu yisandu yisongwele manyonga ni yitanga yetu. Nyi twachilinga, mutwimbulula Yehova ni Yesu. Chikwo nawa, yetu akwa-Kristu tukwete zango liamwenemwene hali atu. Kashika, twakuzanga Yehova ni enyembo jetu. Chitanga cha utu chakupwa chilemu muze muchikatuka ku mbunge ni kupwa ni utayizo wa Zambi.

Muchihasa kupwa chashi kusolola utu kuli atu waze akutuzanga hanji waze twanyingika. (2 Samue. 2:6) Jila yimwe yili kwasakwilila. (Kolo. 3:15) Mba yika mulinga nyi mumona ngwe mutu umwe katelele kumusolwela yitanga ya utu?

Tunyongenu ha chino: Yehova kali chilweza chinene cha mutu yoze wakusolola utu wa lumbama hanji vumbi, nawa Liji lienyi liakutulongesa ngwo chili chilemu kusolola chitanga chino. Liji “vumbi,” kalizachishile yisuho yinji mu Yisoneko ya Ngregu ya akwa-Kristu. Kuchi Zambi akutusolwela utu?

Yehova kakusolola utu kuli atu anji ha kwaha yeswe yize anafupiwa hanga anunge ni mwono. (Mateu 5:45) Kwamba pundu, Yehova kaliangile kutusolwela utu chipwe muze te kanda tuchimunyingika. (Efwe. 2:4, 5, 8) Chakutalilaho, iye kalingile chuma chinene chinji, hakuhana Mwanenyi wa wika ngwe ukuule hali eswe. Postolo Paulu kasonekene ngwenyi, Yehova kahanyine ukuule “nikulita ni kulumbama cha vumbi lienyi.” (Efwe. 1:7) Chikwo nawa, chipwe ngwe twakuvulumuna ni kuvwisa Yehova yikola ku mbunge, nihindu iye kakununga ni kutusongwela ni kutulongesa. Usongwelo ni Maliji jenyi yapwa ngwe “vula wa chehu.” (Shimbi 32:2) Yetu kutuchi keza kahasa kufweta Yehova ha utu uze akutusolwela. Kwamba pundu, nyi Yehova kakatusolwele utu, kachi kutuchi ni kutalatala cha kulutwe lia matangwa.—Tala nawa 1 Petulu 1:13.

Chochene, utu wa Yehova wakututakamisa chinji ni kutukolweza. Hachino, shimbu tusolole utu kuli atu amwe, twatamba kwimbulula Yehova ha kusolola chitanga chino kuli atu eswe hita tangwa. (1 Tesa. 5:15) Nyi mutusolola utu matangwa eswe, mutupwa ngwe kahia ha tangwa lia chishika. Mutupwa ngwe chiswamo kuli asoko jetu, mandumbu, akwa-mulimo-ni-akwetu, alongi-ni-akwetu ni atu waze twatunga no.

Nyonga ha chize asoko hanji mandumbu mu chikungulwila mayuka ha maliji ni yitanga ye yipema. Hanji mu chikungulwila chenu muli umwe ndumbu yoze unafupiwa ukwaso wa kululieka ku zuwo ni kumulingila milimo yikehe-yikehe, ngwe kumulanjila yuma ha chitanda. Chikwo nawa, nyi waliwana ni umwe mutu mu munda yoze unafupiwa ukwaso, shina muhasa kumukwasa?

Twimbululenu Yehova mashimbu eswe ha kusolola “shimbi ja utu” mu maliji ni yitanga yetu.