1. Yuma yika yize muyihasa kutuvwisa woma?

 TUTALENU yilweza ya mandumbu amwe. Nestor ni mukwo-pwo María, kazangile kuya ni kukwasa kuze te kunafupiwa chinji ukwaso wa akwa-kwambujola. * Mba achilinge, ayo te katamba kwashiwisa mwono. Alioze kevwile woma ngwo, kechi kuhasa kuwahilila ni mbongo jikehe. Muze Biniam apwile Chela cha Yehova mu chimwe chifuchi muze mulimo wetu hanaukanjisa, yevwa woma ha kunyingika ngwenyi te mamuhungumiona. Alioze kevwile woma unji muze anyongene ha chize asoko jenyi te mevwa muze manyingika ngwo hapwa mu uwayilo weka. Valérie kamukwachile ni câncer yoze wakulitanda ni kawashi, nawa chapwile chikalu kuli iye kuwana ndotolo yoze te mamupasula chakuhona kumusa manyinga kulita ni ufulielo wenyi. Kwamba pundu, iye kevwile woma wa kufwa.

2. Mumu liaka tunafupiwa kukumba woma?

² Shina hiunapalika mu yuma ngwe yino yize yakuvwishile woma? Anji a kuli yetu hitunapalika mu yuma yacho. Nyi kutwahashile kuhombola woma uze twakwivwa, mutuhasa kukwata yiyulo yipi yize muyipihisa usepa wetu ni Yehova. Chino che Satana anafupu hanga tulinge. Iye nawa kakufupa kuzachisa woma uze twakwivwa hanga atukwike kwononokena shimbi ja Yehova, hamwe ni shimbi ya kwambujola sango lipema. (Uso. 12:17) Satana kali mutu mupi, keshi zango nawa kakwete ndundo. Alioze mutuhasa kulifunga hanga ahone kutupiangula. Kuchi mutuhasa kuchilinga?

3. Yika muyihasa kutukwasa kukumba woma?

 ³ Nyi mutupwa ni shindakenyo ngwetu, Yehova kakutuzanga nawa manunga ni kupwa sali lietu, kutuchi kwivwa woma wa Satana. (Samu 118:6) Chakutalilaho, mukwa-kusoneka Samu 118 kapalikile mu yimwe yuma yikalu chinji. Iye kapwile ni akwa-kole anji, amwe a kuli ayo te miata (versu 9, 10). Ha mashimbu amwe, kapwile ni kumupinjisa chinji (versu 13). Nawa kamuhele fumbo linene kuli Yehova (versu 18). Chipwe chocho, iye yasoneka ngwenyi: “Chichi kwivwa woma.” Yika yamukwashile kuhona kwivwa woma? Iye kanyingikine ngwenyi, chipwe ngwe Yehova kamufumbile, nihindu kakumuzanga chinji. Nawa kapwile ni shindakenyo ngwenyi chipwe ngwe mapalika mu yipikalo yeswayo, nihindu Tato wa zango te manunga ni kumukwasa.—Samu 118:29.

4. Woma uka mutuhasa kukumba nyi mutupwa ni shindakenyo ngwetu, Yehova kakutuzanga?

⁴ Twatamba kupwa ni shindakenyo ngwetu Yehova kakutuzanga. Shindakenyo yino, muyitukwasa kukumba woma uze twakwivwa ha yikuma yitatu, (1) woma wa kuhona kulisa usoko wetu, (2) kuvwila atu woma, ni (3) woma wa kufwa. Mandumbu waze twatongola, kahashile kukumba woma mumu kapwile ni shindakenyo ngwo Zambi kakwazanga.

5. Yuma yika yize muyihasa kutwala mwata wa mu usoko kulipikala? (Tala chizulie ha chifukilo.)

⁵ Mukwa-Kristu yoze uli mwata wa mu usoko, kakulemesa chinji chiteli chenyi chakukwasa usoko wenyi ku musunya. (1 Timo. 5:8) Nyi uli mwata wa mu usoko, kota ha mashimbu a Covid-19 wevwile woma wa kutokesa mulimo we. Chikwo nawa, kota walipikalile ngwo, muhona mbongo ja kulisa usoko we chipwe jakufweta lukeza. Nyi mulimo we wafwile kota wevwile woma ngwo kuuchi kuhasa kuwana ukwo. Ngwe Nestor ni María waze hitwatongola, kota wevwile woma ngwo, nyi washiwisa mwono kuuchi kuhasa kuwahilila ni mbongo jikehe. Satana hanakwika atu anji kulingila Yehova ha kakuzachisa woma wa mutapu au.

6. Yika Satana anafupu hanga tunyonge?

⁶ Satana kanafupu hanga tutayize ngwetu Yehova keshi kutuzanga, nawa ngwetu kechi kutukwasa kufunga usoko wetu ku musunya. Manyonga wano mahasa kututwala tuse tachi jinji hanga tufunge mulimo wetu, chipwe lume kulinga chuma chize muchilimika ni shimbi ja Yehova.

7. Shindakenyo yika Yesu anatwehe?

⁷ Yesu yoze unanyingika kanawa Tato Yehova kuhiana yetweswe, kambile ngwenyi: Zambi “kananyingika yuma yize [twakufupa-fupa,] shimbu kanda [twita] kuli iye.” (Mateu 6:8) Yesu kananyingika ngwenyi, Yehova kakuzanga kutwaha yuma yeswe yize tunafupiwa. Amu tuli akwa-Kristu, hita umwe wa kuli yetu kali mu usoko wa Yehova. Kashika twatamba kupwa ni shindakenyo ngwetu, Yehova malinga yize atumine kusoneka ha 1 Timoteu 5:8, mumu kali Mwata wa mu usoko wetu.

8. (a) Yika muyitukwasa kukumba woma wa kuhona kulisa usoko wetu? (Mateu 6:31-33) (b) Ngwe chize tunamono ha chizulie, kuchi mutuhasa kwimbulula chilweza cha alunga ni pwo waze anatwale kulia kuli umwe pangi?

⁸ Nyi mutupwa ni shindakenyo ngwetu Yehova kakutuzanga nawa kakuzanga usoko wetu, mutufuliela ngwetu iye matwaha yuma yize tunafupiwa ku musunya. (Tanga Mateu 6:31-33.) Yehova kanazange kutufunga, kukushi mutu niumwe yoze mahasa kuchilinga kuhiana iye! Chakutalilaho, muze atangile hashi kakaseleho wika yuma yize te mutufupiwa hanga tununge ni mwono, alioze kaseleho  nawa yuma yize yakutuvwisa kuwaha. (Uputu. 2:9) Chipwe ngwe ha mashimbu amwe mutupwa wika ni yuma yikehe ya kulikwasa nayo, muchilita kwiwuluka ngwetu Yehova mwe watwahayo. (Mateu 6:11) Twatamba kwiwuluka mashimbu eswe ngwetu, Yehova matwaha yuma yinji yipema kuhiana yize mutwecha hanga tumulingile. Nawa kulutwe lia matangwa makatwaha mwono wa mutolo. Yino ye anyingikine Nestor ni María.—Iza. 65:21, 22.

9. Yika mutuhasa kulilongesa ha chilweza cha Nestor ni María?

⁹ Nestor ni María kapwile ni mwono upema mu Colômbia. Ayo yamba ngwo: “Twafupiwile kwashiwisa mwono hanga tulihane chinji mu mulimo wa kwambujola. Alioze te twakwivwa woma ngwetu, kutuchi kuhasa kuwahilila ni yuma yikehe.” Mba yika yaakwashile kukumba woma wacho? Ayo kanyongene ha chize Yehova aasolwelele zango mu majila anji. Chino yichaaha shindakenyo ngwo, Yehova te maaha yeswe yize mafupiwa, chocho yecha mulimo wo kuze te akwafweta kanawa. Yalanjisa zuwo ni kuya mu mbonge yimwe muze te munafupiwa chinji akwa-kwambujola. Kuchi ayo evwile ha chiyulo chize akwachile? Nestor yamba ngwenyi: “Yetu twamona umanunuko wa maliji waze ali ha Mateu 6:33 ku mwono wetu. Kutushi kuhona nichimwe chuma cha ku musunya, haliapwila tunawahilila chinji kuhiana.”

10. Mumu liaka chili chashi kuli atu kuvwila akwo woma?

¹⁰ Chize haze Alama ni Eva ehukile Yehova, atu kakulimwesa lamba linji. (Chilu. 8:9) Chakutalilaho, atu amwe kakuzachisa wata wo hanga amwese akwo lamba, alongi amwe kakulinga yuma yipi kuli akwo ku shikola, atu akwo kakwalinga yuma yipi kuli asoko jo. Yino kuyishi kutukomwesa! Mba kuchi Satana akuzachisa yuma yino hanga atutwale kuvwila atu woma?

11-12. Kuchi Satana akuzachisa woma wa atu hanga atupiangule?

¹¹ Satana kakuzachisa woma wa atu hanga atukwike kulihana chinji mu mulimo wa kwambujola hanji kutukwika kulinga yuma yikwo yize Yehova akutwita. Kupalikila mu usongwelo wa Satana, manguvulu amwe kakukanjisa mulimo wetu ni kutuhungumiona. (Luka 21:12; Uso. 2:10) Mu chifuchi chino anayulu kuli Satana, atu anji kakumwanga sango ja mahuza hakutwala kuli Yela ja Yehova.  Atu waze akufuliela ha mahuza jacho, kakutukekuna ni kutulinga yuma yipi. (Mateu 10:36) Yuma yino kuyishi kutukomwesa, mumu Satana waputukile kulu kuyizachisa chize ku sekulu yitangu hanga apinjise atu ja Zambi.—Yili. 5:27, 28, 40.

¹² Satana keshi kuzachisa wika woma wa yihungumiona ya manguvulu hanga atupinjise. Amwe kakwivwa woma wa yize asoko jo manyonga nyi mapwa Yela ja Yehova kuhiana woma wa kwahungumiona. Ayo kakuzanga chinji asoko jo nawa kakufupa hanga no anyingike Yehova ni kumuzanga. Kashika, mahasa kwivwa yikola yinji ku mbunge muze mevwa asoko jo mamba yuma yipi hali Yehova ni hali tuvumbi twenyi. Alioze, asoko ja mandumbu amwe waze apwile ni kulimika ni umwenemwene haliapwila hanapu Yela ja Yehova. Mba yika mutulinga nyi asoko jetu matwehuka mumu lia kupwa Yela ja Yehova?

13. Kuchi kunyingika chize Yehova akutuzanga muchitukwasa muze asoko jetu matwehuka? (Samu 27:10)

¹³ Mutuhasa kuwana utakamiso ha maliji apema waze ali ha Samu 27:10. (Tanga.) Nyi mutunyingika chize Yehova akutuzanga, kutuchi kwivwa woma wa yize muyilingiwa ku mwono wetu, chipwe ngwe asoko jetu matwehuka. Nawa mutufuliela ngwetu iye matuwahisa ha kunyongonona chetu. Kukushi mutu niumwe yoze mahasa kutufunga kanawa ku musunya, ku manyonga ni ku spiritu kuhiana Yehova! Yino ye anyingikine Biniam yoze twatongola ku uputukilo.

14. Yika muhasa kulilongesa ha chilweza cha Biniam?

¹⁴ Biniam kapwile Chela cha Yehova chipwe ngwe kanyingikine ngwenyi, mu chifuchi cho nguvulu kakuhungumiona Yela ja Yehova. Kunyingika chize Yehova akumuzanga, chamukwashile kukumba woma wa atu. Yamba ngwenyi: “Kanguhungumionene chinji kuhiana chize nanyongene. Alioze yihungumiona ya asoko jami yapwile ni kungwaha woma unji kuhiana ya nguvulu. Nevwile yoma ngwo chiyulo nakwachile cha kupwa Chela cha Yehova muchivwisa tata kupiha nawa ngwo asoko jami eswe te kechi kunguvumbika nawa.” Chipwe chocho, Biniam kapwile ni shindakenyo ngwenyi, Yehova kakufunga waze akuzanga. Yamba ngwenyi: “Nanyongene ha chize Yehova akwashile mandumbu akwo anyongonone ha mashimbu akalu ngwe a katonde, ungalwe ni kuhona mbongo. Nanyingikine ngwami nyi nanunga ni kushishika kuli Yehova, iye manguwahisa. Mashimbu  eswe waze angusele mu zuwo lia ususu ni kungulamba, namwene chize Yehova akutukwasa muze twakujikijila hali iye.” Yehova kasolwele ngwenyi kali Tato ya Biniam, nawa tuvumbi twenyi eswe kasolwele ngwo kali asoko jenyi.

15. Mumu liaka hi chipi ko kuvwila kufwa woma?

¹⁵ Mbimbiliya yakusolola ngwo kufwa chili mukwa-kole. (1 Kori. 15:25, 26) Mutuhasa kusakalala nyi mutunyonga ha kufwa, chipi-chipi nyi umwe wa kuli waze twazanga kali ni musongo uze muhasa kumushiha. Mumu liaka twakwiva woma wa kufwa? Mumu Yehova katutangile ni nyonga lia kutwama ni mwono ku miaka yeswe. (Chilu. 3:11) Alioze, kuvwila kufwa woma necho muchihasa kutukwasa hanga tufunge mwono wetu. Chakutalilaho, woma wacho wakutukwasa hanga tusakule kanawa yize mutulia, tufumbe mujimba, tufupe ukwaso wa ndotolo nyi muufupiwa ni kuchina kusa mwono wetu mu ponde.

16. Kuchi Satana akufupa kutupiangula mumu lia woma wa kufwa uze twakusemuka nawo?

¹⁶ Satana kananyingika ngwenyi, twakulemesa chinji mwono wetu. Kashika ambile ngwenyi, mutuhasa kwecha yuma yeswe tuli nayo—chipwe usepa wetu nyi Yehova hanga tulamwine mwono wetu. (Yombi 2:4, 5) Maliji wano hi amwenemwene ko! Amu ali “ni tachi ja kufwa” Satana kakuzachisa woma wa kufwa uze twakusemuka nawo hanga atutwale twehuke Yehova. (Hepre. 2:14, 15) Ha mashimbu amwe, atu waze akusongwela kuli Satana kakufupa kutushiha nyi kutwechele kuwayila Yehova. Chikwo nawa, Satana mahasa kututwala hanga twehuke Yehova muze tunayiza chinji. Mandotolo hanji asoko jetu waze keshi kuwayila Yehova mahasa kutushinjila hanga tutayize kutambula manyinga, chuma chize chakulimika ni shimbi ja Zambi. Hanji umwe mahasa kutulweza hanga tutayize uwukiso weka uze unalimika ni shimbi ja Zambi.

17. Kulita nyi A-Roma 8:37-39, mumu liaka kutwafupiwile kuvwila kufwa woma?

¹⁷ Chipwe ngwe kutushi kuzanga kufwa, nihindu tunanyingika ngwetu nyi twafwa Yehova manunga ni kutuzanga. (Tanga A-Roma 8:37-39.) Muze masepa ja Yehova afwa, iye keshi kwavulama. Kuli iye machinunga ni mwono. (Luka 20:37, 38) Iye maakahindwisa ku ufwe. (Yombi 14:15) Yehova kahanyine Mwanenyi ngwe chitapo hanga atukwase kupwa ni “mwono wa mutolo.” (Yoa. 3:16) Tunanyingika ngwetu Yehova kakutuzanga chinji ni kutufunga. Kashika, shimbu twehuke Yehova muze tunayiji hanji muze mafupa kutushiha, tujikijilenu muli iye ha kufupa utakamiso, tachi ni mana jenyi. Yino ye alingile Valérie ni mukwo-lunga.—Samu 41:3.

18. Yika twalilongesa ha chilweza cha Valérie?

¹⁸ Muze te ali ni miaka 35, Valérie yamukwata ni musongo wa câncer uze kuushi kusoloka chinji. Tutalenu chize kuzanga Yehova chamukwashile kukumba woma wa kufwa. Yamba ngwenyi: “Muze atulwezele ngwo nguli ni câncer, twevwile yikola yinji ku mbunge. Katambile kungupasula mba ngumone mwono. Chocho, yituhanjika ni mandotolo anji, alioze o yalituna kungupasula chakuhona kuzachisa manyinga. Nevwile woma unji, alioze mumu lia kukaula shimbi ja Zambi, yingulituna kutambula manyinga! Yehova hanangusolwela zango linji ku mwono wami weswe. Kashika ni yami napwile ni uhashi wa kumusolwela zango. Hita shimbu te nakutambula sango jipi hakutwala ku musongo wami, te nakusa tachi hanga nguvwise Yehova kuwaha ni kusolola ngwami, Satana kali mukwa-mahuza. Mandotolo kangupaswile chakuhona  kuzachisa manyinga. Chipwe ngwe musongo muuchinunga, nihindu Yehova kakutwaha yize tunafupiwa. Chakutalilaho, shimbu te kanda angukwata ni musongo wacho, ha chimwe kukunguluka twalilongeseleho chikuma, ‘Kukumba ni Hamu Kapinda Yoze Mutupwa Nenyi.’ * Chikuma chino chatutakamishine chinji. Twachitangile ha yisuho yinji. Yikuma ngwe yino, kwambujola ni kukunguluka yatukwashile kulihumikiza ni kukwata yiyulo yipema.”

19. Yika kwasala hakehe hanga yilingiwe?

¹⁹ Ni ukwaso wa Yehova, akwa-Kristu hashi heswe kanahase kukumba yipikalo yize anapalika nawa kanahase kulimika ni Ndiapu. (1 Petu. 5:8, 9) Ni yena muhasa kuchilinga. Kwasala hakehe, Yehova matuma Yesu ni akwa-Kristu akuwayisa hanga “akonwone yitanga ya Ndiapu.” (1 Yoa. 3:8) Hanyima lia yino, atu ja Zambi makamulingila mu chifuchi muze niumwe kechi ‘kaevwisa woma ni mwongo.’ (Iza. 54:14; Mika 4:4) Shimbu tangwa liacho kanda liheta, twatamba kusa tachi hanga tukumbe woma uze tukwete.

20. Yika muyitukwasa mba tukumbe woma uze tunevu?

²⁰ Twatamba kununga ni kufuliela ngwetu, Yehova kakuzanga tuvumbi twenyi nawa kakwafunga. Chino mutuhasa kuchilinga ha kupukuna ha chize Yehova afungile tuvumbi twenyi ku mashimbu akunyima ni kuyilweza kuli akwetu. Chikwo nawa, kutwatambile kuvulama chize iye atukwashile ha mashimbu a lamba. Ni ukwaso wa Yehova, mutuhasa kukumba woma weswawo tunevu!—Samu 34:4.