Yisemi jami kahichikile Estônia ha jita yamuchiali ya hashi heswe ni kuya ku Alemanha kuze nasemukinyine. Muze nasemukine, ayo yalukila ku Canadá. Twayile hakamwihi ni Ottawa mu Canadá, twapwile mu limwe zuwo muze te akufungila nawa tusumbi. Twapwile chinji yiswale, alioze chuma chize te kutushi kuhona hita chimene chapwile monda.

Tangwa limwe, Yela ya Yehova yatangila mama Usolwelo 21:3, 4. Mukanda uno wamukwachile chinji ku mbunge, hachino yaputuka kulila. Mbuto ya umwenemwene yakolele ni kawashi mu mbunge ya tata ni mama, chocho yajama ni kwapapachisa.

Yisemi jami te keshi kuhanjika kanawa Inglês, chipwe chocho kalemesene umwenemwene. Chipwe muze te akukalakala ha ufuku weswe ku mulimo wa kusangununa yikungo mu Sudbury Ontario, nihindu hita Sambata yami, mwanakwetu Sylvia ni tata te twakuya ni kwambujola. Ha hita poso te twakulilongesa Kaposhi wa Kutalila mu usoko. Nalilongesele kuzanga Yehova ni ukwaso wa tata ni mama. Kashika, nalihanyine kuli Yehova ni kungupapachisa ha 1956 muze te nguli ni miaka kumi. Zango linene lize yisemi jami apwile nalio hali Yehova lie lia kungukwasa kununga ni kumuwayila.

Muze nahwishile shikola, yinguputuka kulaluka ni yuma yeka. Napwile ni kumona ngwami, nyi mungupwa pionelu, te chichi kuhasa kukunga mbongo hanga ngumanunune nyonga liami, lia kulinga wenyi mu ndeke hanga ngunyingike yifuchi yikwo. Naputukile kukalakala ku chisaji cha fuji ha chihela cha kwimbishila miaso; te nakuzanga chinji mulimo wacho. Alioze, te nakukalakala ndo ha ufuku, hachino, yinguputuka kutokesa kukunguluka ha yisuho yinji ni kupwa ni masepa waze keshi kuzanga Yehova. Chocho, mbunge yami yize yapwile ya kufumba ni shimbi ja Mbimbiliya, yiyingukwasa kwalumuna yitanga yami.

Nalukilile mu Oshawa, yimwe mbonge yikwo ya mu Ontario. Kwenako nanyingikinyine Ray Norman, mwanako Lesli, ni mapionelu akwo. Ayo te kakungufunga kanawa. Ha kumona chize ayo apwile ni kuwahilila, yichingutwala ngunyonge ha yize te ngunazange ku mwono wami. Ayo yangukolweza kupwa pionelu, mba yinguchilinga ha Setembro ya 1966. Te ngunawahilila ni kuzachisa kanawa mwono wami. Alioze, te chishi kunyonga ngwami mwono wami mwalumuka chinji.

Muze te nguchili ku shikola, nasonekene yimwe petisau ya kuya ku Mbetele mu Toronto, Canadá.  Kulutwe muze te ngunalingi upionelu, yangusanyika ngukalakale ku Mbetele ha miaka yiwana. Alioze te nakuzanga chinji Lesli, kashika napwile ni kwivwa woma ngwami nyi ngutayiza kuya ku Mbetele, te mungumutokesa. Hanyima lia kulemba chinji, yingutayiza kuya ku Mbetele, ni yikola ku mbunge yingulishika ni Lesli.

Nakalakalile ku lavandaria ya ku Mbetele, mba hanyima yingupwa secretário. Ha mashimbu jacho, Lesli yapwa pionelu walipwila mu Gatineau, Quebec. Napwile ni kunyonga ha yize te analingi ni kulihula nyi ngwe nakwachile lume chiyulo chalita. Chakuhona kushimbwila, yingupwa ni kuyuka chinene ku mwono wami. Yayo ya Lesli Ray, yamusanyika ku Mbetele. Te twatwama mu chipatulo chimuwika! Hachino, yinguputuka kuhanjika cheka nawa ni Lesli. Twalimbachile ha tangwa lizeliene te munguhwisa mulimo wami ku Mbetele—27 Fevereiro, 1971.

Katutumine hanga tukalakale mu chikungulwila cha limi lia Francês mu Quebec. Ha kupalika cha yimwe miaka, yangusanyika hanga ngukalakale ngwe kalayi wa mbonge muze te kuli wika ni miaka 28. Napwile ni kulimona ngwami, nguchili chinji mukweze te chishi ni utotombo unji, alioze maliji ali ha Jeremia 1:7, 8 kangukolwezele chinji. Alioze, Lesli kalipupile ku mashinyi chikwo nawa, kashika te kakupinda ha kupomba. Chocho yitunyonga ngwetu, muchipwa chikalu kuli yetu kukalakala mu mulimo wa kalayi wa mbonge. Chipwe chocho, Lesli yamba ngwenyi: “Nyi Yehova kanatusanyika, mumu liaka kutwesekele? Yitutayiza mulimo wacho ni kuulinga ha miaka 17.

Kukalakala ngwe kalayi wa mbonge te chikwete milimo yinji, kashika ha yisuho yinji te chishi kuwana mashimbu a kutwama ni Lesli. Nafupiwile kulilongesa yuma yikwo. Tangwa limwe liakasoka ha chimenemene, umwe yangongwela ku chikulo. Muze yayile ni kwazulula kuhakapwile mutu niumwe, hapwile wika chisoka cha kuya nacho ya kutengejela, muze mwapwile twalia ya ha mesa, mihuko, queijo, mbolo, mulangi wa vinyu, ni umwe mukanda uze wambile ngwo: “Anda mukwenu-pwo nuye ni kuheha.” Kwilu kwapwile ni kupema; kwapwile mwalwa unji. Alioze, yami yingulweza Lesli ngwami, chichi kuhasa kuya mumu nguli ni pande ngunalulieka. Iye yangwivwa, alioze yanyenganyana. Muze te ngunalulieka pande, yingulituchika ndambu. Yingunyonga ha A-Efwesu 5:25, 28. Chasolokele ngwe Yehova kangwiwulwile yisoneko yino hanga ngumone ngwami te ngunafupiwa kufunga pwo liami. Hanyima lia kulemba, yingulweza Lesli ngwami, “Mutuhasa kuya ni kuheha,” chocho yawahilila chinji. Yitunjila mu mashinyi; yituya ku chimwe chihela chipema hakamwihi ni lwiji; yituputuka kuheha; liapwile tangwa lipema lize twapalikishile hamuwika. Hanyima lia yino, mba yinguputuka kululieka nawa pande.

Yiteli yetu mu njiza yize te twakumeneka yapwile yinji, alioze yatuhele uwahililo unji. Twalingile wenyi mu chifuchi cheswe kukatuka ku Colúmbia Britânica ndo ku Terra Nova. Te ngunamanununa nyonga  liami lia wanuke, lia kulinga wenyi wa kunyingika yifuchi yikwo. Nazangile kusoneka petisau ya kuya ku shikola ya Ngiliate, alioze chakazangile kukalakala ngwe mishionaliu mu chifuchi cheka. Kuli yami, mishionaliu kapwile atu alipwila, kashika napwile ni kunyonga ngwami chishi ni utotombo wa kupwa mishionaliu. Napwile ni kwivwa woma wa kungutuma mu chifuchi cha mu África muze muli jita hanji misongo. Yami te nakuzanga kukalakalila mu Canadá.

Mu 1992 muze Yela ja Yehova aputukile kwambujola mu yifuchi yize te yakulinga chihanda ku União Soviético, mandumbu yatwita hanga tuye mu Estónia ngwe mishionaliu. Lusango yono katuwanyine susumuku, chocho yitulemba ha chikuma chino. Cheka nawa, yitunyonga ngwetu: ‘Nyi Yehova kanatusanyika mumu liaka kutwesekele?’ Yitutayiza, mba yingwamba ngwami; ‘Alioze chapema mumu katutumine mu África.’

Yituputuka kulilongesa limi lia mu Estónia. Ha kupalika cha amwe tukweji, yatusanyika tukalakale ngwe kalayi wa mbonge. Twamenekene yikungulwila ni yizavu 46 yapwile mu Estónia, Letónia, Lituânia ni mu Kaliningrado, yimwe njiza ya mu Rússia. Kashika, chafupiwile kulilongesa yuma yikehe-yikehe ya hita limi ngwe, Letão, Lituano ni Russo. Chapwile chikalu chinji. Mandumbu kapwile ni kuwahilila ha tachi jize te twakusa ni kutukwasa. Ha 1999 yatunga mutango mu Estónia, mba yami yangusanyika hanga ngukalakale mu Komite ya Mutango hamuwika ni Toomas Edur, Lembit Reile ni Tommi Kauko.

Twanyingikine mandumbu anji waze akatukile Sibéria. Chipwe ngwe kamwesene lamba linji ni kutwama kusuku ni asoko jo, nihindu o kakapwile atu akalu. Kakatokesele uwahililo wo ni kulihana cho mu mulimo wa Zambi. Chilweza cho chatulongesele ngwetu, chipwe ngwe mutupalika mu yipikalo nihindu mutuhasa kunyongonona ni chiseke.

Yapwile miaka yinji yakukilikita mu mulimo wa Yehova, chocho kutwakapwile nawa ni mashimbu anji a kuhwima. Hachino, Lesli yaputuka kuhonga. Alioze kutwakanyingikine ngwetu, kuhonga chino chapwile uputukilo wa musongo avuluka ngwo, fibromialgia. Chocho yituzanga kufuna ku Canadá. Muze atusanyikine ku shikola ya makulwana a ku mutango ku Patterson Nova York, E.U.A., yinguputuka kuyambashana nyi te mutuya lume. Alioze, hanyima lia kulemba yitutayiza. Yehova kawahishile chiyulo chetu. Kwenako twanyingikine yikola yize te Lesli ali nayo ni kuputuka uwukiso uze te unafupiwa. Mba, yituputuka kulinga cheka milimo yetu.

Muze te tuli mu Estónia, ha umwe ufuku mu 2008, yangusanyika ku telefone kukatuka ku chishina chinene ni kutuhula nyi ngwe mututayiza kuya ku Congo. Chiteli chino chatuwanyine susumuku, mumu ndo te tuhane kumbululo ha tangwa lize liahachileho. Chakalwezele Lesli, mumu nanyingikine ngwami ha ufuku wacho te kechi kupomba. Alioze kwamba pundu, chipwe yami chahashile kupomba; nalilile ufuku weswe, mumu lia kulipikala ha wenyi wa kuya mu África.

Muze hikwacha yingulweza Lesli, mba yitunyingika ngwetu: “Yehova mwe te unatusanyika hanga  tuye mu África. Mba kuchi te mutunyingika ngwetu tuchi kuhasa hanji tuchi kuzangako nyi ngwe kutwesekele?” Kashika, hanyima lia kulinga miaka 16 Estónia, yituya ku Congo Kinshasa. Mbetele yako yapwile ku chihela chalihola cha yitemo yipema. Chuma chitangu chize Lesli asele mu chipatulo chetu kapwile mukanda uze twatambwile muze te tuli ku Canadá. Ha mukanda wacho hapwile ha kusoneka ngwo: “Kweswako munuya, wahililenu.” Hanyima lia kunyingika mandumbu, kulinga malongeso a Mbimbiliya, ni kumona chize mulimo wa mishionaliu wapwile upema, zango lietu mu mulimo wa Yehova yilioka chinji. Ha kupalika cha mashimbu, yitupwa ni chiwape cha kumeneka Mambetele 13 mu yifuchi yikwo ya África. Yino yatukwashile kunyingika mianda yeka ni yeka. Woma uze twapwile nawo ku uputukilo yiuhwa, chocho yitusakwilila Yehova ha kututuma mu África.

Mu Congo, kapwile ni kutwaha kulia cheka ni cheka chize ku uputukilo twapwile ni kumona ngwetu, chichi kuhasa kuchilia. Alioze muze twamwene chize mandumbu apwile ni kuzanga kulia chacho, yitweseka kulia mba ni yetu yituchizanga.

Twalingile wenyi ndo ku Leste ya chifuchi kuze kwapwile jita hanga tutakamise mandumbu ni kwatwalila ukwaso uze te unafupiwa. Ku yihela yacho maswalale te kanalukukila yihunda ni kumwesa lamba mapwo ni twanuke. Mandumbu jetu anji kapwile yiswale. Alioze, kutalatala cho ha uhindukilo, zango lio hali Yehova, ni ushishiko wo ku ululikiso wa Yehova yapwile ni kutukwata chinji ku mbunge. Yilweza yo yatutwalile tunyonge ha zango lietu lia kuwayila Yehova ni kukolesa ufulielo wetu muli iye. Mandumbu jetu amwe katokesele mazuwo ni minda yo. Chino changwiwulula ngwami, yuma ya ku musunya muyihasa kutoka susumuku, alioze usepa wetu ni Yehova che chuma chilemu. Chipwe ngwe kapwile ni kapinda munji, mandumbu te keshi kukokoloka ku ufulielo. Chize apwile ni kumbata mwono wo, chatukwashile kukumba kapinda wa musongo wetu ni hamu.

Twakomokene nawa, mumu katutumine ku Mbetele ya Hong Kong. Te kanda tunyonga kama ngwetu, tangwa limwe mutuya mu Ásia! Hanyima  lia kumona zango lia Yehova ha hita chiteli ku yihela yize atutumine, yitutayiza kuya ku Ásia. Ha 2013 ni masoji mu meso, yituhichika mandumbu jetu mu África, chakuhona kunyingika yize te muyilingiwa kulutwe.

Kutwama mu Hong Kong, mbonge yinene muze mwatwama atu anji a ku yifuchi yeka ni yeka, chapwile kwalumuka chinene ku mwono wetu. Kulilongesa limi lize te akuhanjikako chakapwile chashi. Alioze, mandumbu kapwile ni zango linji ni kulia chapwile chipema chinji. Mulimo wa kwambujola te unakola ni kawashi, alioze ni yihela ya kutungila Mbetele neyo te yinayi ni kukola ndando. Kashika Chizavu cha Tusongo yakwata chiyulo cha kulanjisa yihela yinji ya ku mutango wacho. Ha 2015, yitwalukila ku Coreia do Sul, kuze twakalakala ndo musono. Ni kuno nawa, tunapinji ha kulilongesa limi. Alioze chipwe ngwe kutushi kuhanjika kanawa Coreiano, nihindu mandumbu kakutuchichimieka ni kutulweza ngwo tunase tachi.

Kupwa ni masepa aha hi chashi ko, alioze twanyingika ngwetu, nyi twalianga kusanyika atu akwo hanga eze ku zuwo lietu muchipwa chashi kulikata no. Twanyingika ngwetu mandumbu jetu kalifwa chinji nawa ngwetu, Yehova katuhele uhashi wa kuzanga masepa anji ha shimbu limuwika.—2 Kori. 6:11.

Twakumona ulemu wa kuzanga atu ngwe chize Yehova akwazanga, ni kumona chize Yehova akutuzanga ni kusongwela mwono wetu. Hita shimbu te twakunenganyana ni kulihula nyi mandumbu kanatuzange lume, twapwile ni kutanga cheka mikanda ya masepa jetu; yino yapwile ni kututakamisa chinji. Ha yisuho yinji twamwene chize Yehova apwile ni kukumbulula yilemba yetu, chino chapwile ni kukolesa ufulielo wetu ni kumona ufunge wenyi hali yetu.

Ha kupalika cha miaka, yami ni Lesli yitunyingika ulemu wa kusa mashimbu hanga tupwe hamuwika chipwe ngwe tuli ni milimo yinji. Twamona nawa ulemu wa yetwene kuliseha nyi mutuhengesa yimwe, chipi-chipi muze tunalilongesa limi liaha. Ha hita ufuku, twapwile ni kunyonga ha yuma yipema yize twazanga ha tangwa mba mutusakwila Yehova ha yuma yacho.

Kwamba pundu, yami te kanda ngunyonga kama kupwa mishionaliu hanji kutwama mu yifuchi yikwo. Alioze, nakuwahilila ha kumona chize yuma yeswe yakuhasa kulingiwa ni ukwaso wa Yehova. Mashimbu eswe nakwiwuluka maliji a Jeremia muze ambile ngwenyi: “Yehova, wangwonga.” (Jere. 20:7) Chochene, Yehova kangukomwesa ni kunguwahisa mu jila yize te chishi ni kunyonga ha kumanununa nyonga liami lia kulinga wenyi mu ndeke. Alioze, twalinga wenyi ku yihela yinji kuhiana yize te nakunyonga muze te nguchili kanuke. Twameneka Mambetele a continente jitano. Ngunasakwila mukwetu-pwo, Lesli, ha kungukwasa mu mulimo uno.

Hita shimbu twakwiwuluka ngwetu, yuma yino yeswe twayilinga mumu twakuzanga Yehova. Yiwape yize tuli nayo musono, yili wika yilweza ya chize muchikapwa nayo ku miaka yeswe, muze Yehova “makafukula moko lienyi ni kuyukisa usona wa waze eswe atwama ni mwono.”—Samu 145:16.