1-2. Chizechene ngwe Lote, kapinda muka akupalika Akwa-Kristu musono?

 MUZE tunamono chize yitanga ya atu yinayi ni kupiha, twakulivwa ngwe chize alivwile Lote. Iye te kakupinda chinji “ha kwenda cha waze yingulungulu.” Mumu kanyingikine ngwenyi, Yehova keshi kuzanga yitanga yacho. (2 Petu. 2:7, 8) Kuvwila Yehova woma ni kumuzanga, yakwashile Lote kwehuka yitanga yipi yize atu apwile ni kusolola kuze apwile. Ni yetu nawa, twatunga hamwe ni atu waze keshi kulemesa yitanga yipema. Chipwe chocho, nyi mutununga ni kuzanga Zambi ni kumuvwila woma mu jila yalita, mutulifunga ku yitanga yacho yipi.—Yishi. 14:2.

² Mba tuhase kuchilinga, yetu tuli ni ukwaso wa Yehova, chikwo nawa, iye kakuzachisa mukanda wa Yishima hanga atukolweze. Akwa-Kristu eswe malunga ni mapwo, makulwana ni akweze, mahasa kulilongesa yuma yinji ha kuhengwola mukanda uno.

3. Kulita ni Yishima 17:3, chuma chika chakututwala mba tufunge mbunge yetu? (Tala nawa chizulie.)

³ Chuma chilemu chize twakufungila mbunge yetu, chili ngwo Yehova kakuhengwola mbunge yetu. Maliji wano kanasolola ngwo, kulisa ni atu waze mahasa kumona wika haze, Yehova kakumona yize yili ku mbunge yetu. (Tanga Yishima 17:3.) Nyi mutuzalisa mbunge yetu ni yiyulo yipema ya Yehova, iye matuzanga ni kutwaha mwono wa mutolo kulutwe lia matangwa. (Yoa. 4:14) Nyi twachilinga, yitanga yipi ya hano hashi, ni mahuza a Satana kuyichi kutupiangula, mumu kutuchi kuyaha unjililo. (1 Yoa. 5:18, 19) Nyi twasa tachi hanga tukundame kuli Yehova, mutumuzanga ni kumuvumbika chinji. Twakuzanga chinji Yehova, kashika  twakuvwila kole chipwe manyonga a kulinga shili yinene. Nyi matweseka kulinga yuma yipi, twatamba kumana ni kulihula ngwetu: ‘Mumu liaka nguvwisa yikola ku mbunge mutu yoze wakunguzanga?’—1 Yoa. 4:9, 10.

4. Kuchi kuvwila Yehova woma chakwashile umwe pangi?

⁴ Marta, umwe pangi ku Croâcia yoze wapwile mu cheseko cha kulinga utanji, yamba ngwenyi: “Kuli yami chapwile chikalu kumona yuma kanawa ni kwehuka kulivwisa kuwaha ha mashimbu akehe. Alioze kuvwila woma Yehova changufungile.” b Mba kuchi woma wa Yehova wakwashile Marta? Yamba ngwenyi, te kakupukuna ha lamba lize muliza ku yize malinga. Ni yetu che twatamba kulinga. Twatamba kunyingika ngwetu, lamba linene hanji ngwetu chuma chipi chize muchihasa kulingiwa ku mwono wetu, chili kuvwisa Yehova chinyengo ni kwehuka uhashi wa kumuwayila ku miaka yeswe.—Uputu. 6:5, 6.

5. Yika twalilongesa ha chilweza cha Leo?

⁵ Muze twakuvwila Yehova woma, twakusa tachi hanga tuhone kufupa kaliongelo wa kulinga yuma yize kuyalitele. Yino ye alilongesele Leo yoze watwama mu R.D. Congo. Ha kupalika cha miaka yiwana chize haze amupapachishile, iye yaputuka kulikata ni masepa api. Te kakunyonga ngwenyi, nyi kalingile upi niumwe kukushi mulonga wa kulikata ni atu jacho api, acho keshi kuvulumuna kuli Yehova. Ha kupalika cha amwe mashimbu, masepa jacho yatwala Leo hanga aputuke kunwa walwa unji ni kulinga upangala. Hanyima lia yino, mba yaputuka kunyonga ha yize alilongesele kuli yisemi jenyi ni chize apwile ni uwahililo muze te akulingila Yehova. Mba yika alingile? Yalikonyeka ni kwecha kulinga yuma yipi. Ni ukwaso wa makulwana a mu chikungulwila, iye yafuna kuli Yehova. Musono, kanawahilila ha kulingila Yehova  ngwe mukulwana wa mu chikungulwila, aku nawa pionelu walipwila.

6. Kapitulu livwa wa Yishima kanahanjika hali mapwo a mutapu uka?

⁶ Haliapwila tuhengwolenu Yishima kapitulu 9, haze tunawane mapwo aali, umwe kanalumbunuka mana, mukwo kanalumbunuka uhepuke. (Tala nawa A-Roma 5:14; A-Ngalashia 4:24.) Muze tunahengwola kapitulu yono, nyingikenu ngwenu, hano hashi ha Satana, hanashinjila atu kulinga upangala ni kutala yinema ni yizulie ya sonyi. c (Efwe. 4:19) Kashika, chili chilemu kununga ni kuvwila Yehova woma ni kwehuka yuma yipi. (Yishi. 16:6) Yetu eswe, malunga ni mapwo mutuhasa kuwana malongeso alemu mu kapitulu yono. Hita umwe wa kuli mapwo wano, kanasanyika chizuzuke yoze keshi mbunge hanji ngwetu mana. Chili ngwe kanambe ngwenyi: ‘Tweya ku zuwo liami hanga ulie chimwe.’ (Yishi. 9:1, 5, 6, 13, 16, 17) Alioze, yuma yize muyilingiwa kuli waze atayiza kusanyika chacho muyilisa.

7. Kulita ni Yishima 9:13-18, yika mutu mazuka ni matayiza kuya ku zuwo lia pwo chihepuke? (Tala nawa chizulie.)

⁷ Chitangu, tutalenu kukamba chize “pwo chihepuke” malinga. (Tanga Yishima 9:13-18.) Iye keshi ni sonyi ja kusanyika waze keshi yinyingi ni kwamba ngwenyi: ‘Njilenu muno.’ Mba yika muyilingiwako? Kuma kwacho ‘ufwe uliko.’ Hanji nunewuluka ngwenu, mu mukanda wa Yishima twakuwanamo yilweza yikwo yalifwa ni yino. Kanatutoweza hali ‘pwo chitanji yoze keshi kuwayila Zambi.’ Kanatutoweza nawa ngwo, ‘zuwo lia pwo yoze chitanji liakutwala ku kufwa.’ (Yishi. 2:11-19) Ha Yishima 5:3-10 hali nawa utowezo hakutwala kuli ‘pwo mukwo chitanji’ yoze molu jenyi ‘kanapalumuka ku kufwa.’

8. Chiyulo chika twatamba kukwata?

⁸ Waze akupanjika ‘pwo yoze chihepuke,’ katamba kukwata chiyulo chize muchisolola nyi matayiza kuya ku zuwo lienyi nyi ka. Ni yetu nawa hanji mutufupiwa kukwata chiyulo chalifwa ni chino. Chakutalilaho, yika mutulinga nyi umwe matushinjila kulinga upangala hanji muze mutuliwana ni yizulie ya sonyi?

9-10. Yuma yika muyihasa kutukwasa mba twehuke upangala hanji utanji?

⁹ Kuli yuma yinji yize muyitutwala kwehuka yitanga ya upangala. Pwo chihepuke yamba ngwenyi: “Meya akwiya kuyema-o.” Meya akwiya yika analumbunuka? Mbimbiliya yakutesa kulisumbakenya cha pwo ni lunga ngwe  meya waze akuhwimisa mbunge. (Yishi. 5:15-18) Lunga ni pwo waze alimbata kulita ni shimbi, mahasa kulivwisa kuwaha mu ulo wo ha kulisumbakenya. Alioze meya akwiya kalisa chinji, mumu o mahasa kulumbunuka upangala, hanji kulisumbakenya chize kuchalitele. Atu waze akulinga upangala hanji utanji, kanji-kanji kakufupa kuswekela akwo ngwe chizechene eji akulinga muze anayi ni kwiya. Chikwo nawa, muze atu akunyonga ngwo kukushi niumwe yoze manyingika yize akulinga, chocho meya jacho akwiya mahasa kusoloka ngwe kanayeme chinji; alioze yili ponde yinene kunyonga chocho. Yehova kakumona yuma yeswe; yino hi yiyema ko, yapwa yisasu mumu yakutwala mutu kuhona utayizo wa Yehova. (1 Kori. 6:9, 10) Alioze hi yino wika ko.

¹⁰ Kulinga upangala hanji utanji, muchihasa kukutwala kulivwa ngwe, kuushi ulemu ni kwivwa sonyi. Chikwo nawa, mukuhasa kusoloka ufumba uze mutu kanyongene ni kupihisa usoko. Kashika chuma chipema kulinga chili, kuhona kuya ku zuwo lia pwo chihepuke. Kuchizako kufwa ku ufulielo hanji ngwetu kuhona utayizo wa Yehova, atu waze akulinga upangala kakuyiza chinji nawa mahasa kufwa. (Yishi. 7:23, 26) Mukanda wa Yishima 9:18 unambe ngwo: ‘Ngeji jenyi kali mwe muma mwa afu.’ Nyi kuya ku zuwo lia pwo chihepuke chakuneha lamba lipwahaha, mba mumu liaka atu anji akutayiza kuyako?—Yishi. 9:13-18.

11. Mumu liaka yinema ni yizulie ya sonyi yili yuma yipi?

¹¹ Yuma yinasoloka chinji musono yize twatamba kwehuka, yili yizulie ni yinema ya sonyi. Amwe kakunyonga ngwo hi chipi ko kutala yizulie yacho, alioze kwamba umwenemwene, yizulie ya sonyi yakuneha lamba linji. Yakutwala mutu ahone kulilemesa ni kuhona kumulemesa kuli akwo, chikwo nawa, chakupwa chikalu kuyecha. Mutu ni matala yinema ya sonyi, chakupwa chikalu kuchiza yizulie yacho mu manyonga. Yizulie yacho kuyishi kuhwisa usolo upi, alioze usolo wacho wakwoka chinji nawa. (Kolo. 3:5; Tia. 1:14, 15) Kashika, atu waze akutala yizulie ya sonyi kakulinga yuma yinji ya luchisa.

12. Kuchi mutuhasa kulifunga ku yizulie yize yakutwala atu evwe usolo upi?

¹² Yika Mukwa-Kristu atamba kulinga ni yizulie ya sonyi muyisoloka ha telefone yenyi hanji ha computador? Hazehene lume, katamba kuchizako meso. Mba tuhase kuchilinga, twatamba kwiuluka ngwetu chuma chilemu ku mwono wetu chili usepa uze tuli nawo ni Yehova. Yizulie yimwe muyihasa kupwa hi ya pornografia ko, chipwe chocho muyihasa kututwala tupwe ni usolo upi. Mumu liaka twatamba kwehuka yizulie ya mutapu au? Mumu kutwazangile kulinga niyimwe yize muyitutwala hanga tupwe ni manyonga a upangala hanji a kulinga utanji. (Mateu 5:28, 29) David, umwe mukulwana mu chikungulwila ku Tailândia, yamba ngwenyi: “Nakulihula ngwami, ‘Yizulie ayi chipwe ngwe hi ya pornografia ko, shina Yehova mawahilila ni munguyitala?’ Manyonga wano kakungukwasa kukwata yiyulo yalita.”

13. Yika yakutukwasa kukwata yiyulo yipema?

¹³ Kwivwa woma wa kulinga yuma yize muyivwisa Yehova chinyengo, muchihasa kutukwasa kukwata yiyulo yipema. Mbimbiliya yinambe ngwo: “Woma wa Yehova we uputukilo wa mana.” (Yishi. 9:10) Yino yakusoloka zwalala ha versu jitangu ja Yishima kapitulu 9, haze twakuwana ‘mana amwenemwene’ waze anatese ni pwo mukwo.

14. Kusanyika chikwo chika chize tunawane ha Yishima 9:1-6?

¹⁴ Tanga Yishima 9:1-6. Hano tunawaneho kusanyika cha Yehova, yoze uli Sakatanga yetu nawa Chishina cha mana amwenemwene. (Yishi. 2:6; Roma 16:27) Versu jino jakuhanjika ha  limwe zuwo linene lize lili ni manguji shimbiali. Zuwo lino linene, liakutukwasa kunyingika ngwetu Yehova kali chihanyi; kakutayiza eswe waze anazange kulilongesa hakutwala kuli iye ni kupwa ni mana.

15. Yika Yehova anazange hanga tulinge?

¹⁵ Mukanda wa Yishima unatongola umwe pwo Chihanyi yoze unalulieka chiteleka. Iye malulieka vinyu yenyi ni kuyisa ku mesa. Kulita ni Yishima kapitulu 9, pwo yono kanalumbunuka ‘mana amwenemwene.’ Chilweza chenyi chinatulongesa ngwo, Yehova kali Chihanyi ha yeswe yize akutwaha. (Yishi. 9:2) Kuchizako yino, versu 4 ni 5 yinahanjika hali waze keshi mana, ngwo: ‘Tweyenu, nulie; nunwe.’ Mumu liaka twatamba kutayiza kusanyika chino? Mumu Yehova kanazange hanga ana jenyi apwe ni mana. Iye kanazange kutufunga; kazangile hanga tulilongese yuma muze mutupalika mu lamba. Nyi twecha kulinga yuma yize kuyalitele, kutuchi keza kaliseha nilimwe tangwa. Kashika, Yehova ‘akulumbamisa mana angunu hali mukwa ululi.’ (Yishi. 2:7) Nyi mutuvwila Zambi woma mu jila yalita, mutupwa ni mbunge ya kumuvwisa kuwaha. Mutupanjika kanawa yiyulo yenyi ya mana ni kuwahilila ha kukaula yiyulo yacho ku mwono wetu.—Tia. 1:25.

16. Kuchi kuvwila Zambi woma chakwashile Alain kukwata chiyulo cha mana, mba yika azukile?

¹⁶ Talenu chize kuvwila Zambi woma chakwashile Alain kukwata chiyulo cha mana. Alain yoze uli mukulwana mu chikungulwila, nawa longeshi ku shikola, yamba ngwenyi: “Alongeshi-ni-akwetu ku shikola kapwile ni kunyonga ngwo, pornografia yakulongesa yuma yinji hakutwala ku kulisumbakenya.” Alioze iye kanyingikine ngwenyi, yino hi yamwenemwene ko. Yamba ngwenyi: “Kuzanga Zambi ni kumuvumbika, changukwashile nguhone kutala yinema yacho ya sonyi.” Chikwo nawa, nalumbunwine kuli alongeshi-ni-akwetu mumu liaka chishi kutala yinema yacho. Alain te kanakaula chiyulo cha ‘mana amwenemwene,’ ha ‘kwendela mu jila ya malinjiekela.’ (Yishi. 9:6) Alongeshi amwe yakomoka chinji, kashika haliapwila kanalilongesa Mbimbiliya ni kukunguluka.

17-18. Yuma yika yakulingiwa kuli waze akutayiza kukaula ‘mana amwenemwene,’ mba yika ayo mahasa kushimbwila kulutwe lia matangwa? (Tala nawa chizulie.)

¹⁷ Yehova kakuzachisa chilweza cha mapwo wano aali hanga atusolwele chize mutuhasa kupwa ni uwahililo kulutwe. Waze akutayiza kusanyika cha pwo chihepuke, kakufupa kulia yuma ya yekemena ku usweke ngwe kulinga upangala. Muze akulinga yuma yacho, o keshi kunyonga ha lamba lize mazuka kulutwe. Kashika, mwono wa mutapu au muukaatwala “muma mwa afu.”—Yishi. 9:13, 17, 18.

 ¹⁸ Alioze waze akutayiza kusanyika cha pwo mukwa ‘mana amwenemwene,’ yuma yize akuwanako yalisa! Iye kakululiekela ngeji jenyi chiteleka, chekwamba yuma yeswe yize anafupiwa hanga anunge ni kukundama kuli Yehova. (Iza. 65:13.) Kupalikila muli profeta Izaia, Yehova yamba ngwenyi: “Panjika kanawa kuli yami, ukalie yuma yipema, ukawahilile ni maji.” (Iza. 55:1, 2) Tunalilongesa kwehuka yuma yize Yehova keshi kuzanga ni kulinga yize iye akuzanga. (Samu 97:10) Twakuwahilila chinji kusanyika akwetu hanga no alilongese ha ‘mana amwenemwene.’ Chakupwa ngwe tunasanyika ha manangamo a mu mbonge ngwetu: ‘Yenu eswe yihepuke hanji waze keshi yinyingi, tweyenu kuno.’ Yuma yize yetu eswe mutuzukako hi ya mashimbu akehe ko yili ya mutolo. Nyi twakaula ‘jila ya malinjiekela’ muyitukwasa kutwama ku miaka yeswe.—Yishi. 9:3, 4, 6.

19. Kulita ni Chilumbununyi 12:13, 14, yika twatamba kununga ni kulinga? (Tala nawa mushete, “ Kuvwila Zambi Woma Chakutukwasa.”)

¹⁹ Tanga Chilumbununyi 12:13, 14. Kuvwila Zambi woma muchifunga mbunge yetu, ni kutukwasa kulinanga ku yitanga ni ku spiritu ha matangwa wano a kusula. Twakusanyika atu anji hanga alilongese ku ‘mana amwenemwene.’ Twakuchilinga mumu twakuvwila Zambi woma mu jila yalita ni kumuzanga ni mbunge yeswe.