1-2. Kulita ni Samu 25:14, yika twatamba kulinga nyi tunazange kupwa masepa ja Yehova?

 YITANGA yika wakumona ngwe yikwete ulemu mu usepa? Hanji muwamba ngwe masepa apema katamba kulikwasa ni kulifunga umwe ni mukwo. Chikalu kwamba ngwo, woma uli chimwe chitanga chilemu mukachi ka masepa. Alioze, ngwe chize chisoneko chinakwate mutwe uno chinasolola, waze anazange kupwa masepa ja Yehova katamba ‘kumuvwila woma.’—Tanga Samu 25:14.

² Chipwe ngwe twakulingila Yehova ha miaka yinji hanji ha miaka yikehe, tulieswe twatamba kumuvwila woma mu mutapu uze walita. Mba kuvwila woma Zambi yika lume chinalumbunuka? Kuchi mutuhasa kulilongesa kuvwila Zambi woma? Yika mutuhasa kulilongesa hakutwala ku kuvwila Zambi woma, hali kaselo Obadia, Sasendote wa lutwe Jehoiada ni hali Mwanangana Njoashe?

3. Lumbununa chize woma muuhasa kutufunga?

³ Kanji-kanji, twakuvwila chimwe chuma woma muze twakunyonga ngwetu muchihasa kuneha upi. Woma wa mutapu au, muuhasa kutukwasa hanga tukwate yiyulo yipema. Chakutalilaho, woma wa kulimbuka wakutukwasa hanga tukanyame muze tunende ku sesa lia chimbongo. Woma wa kulemana, wakutukwasa hanga tuchine ponde. Woma wa kutokesa usepa uze tuli nawo ni mutu yoze twazanga, wakutukwasa hanga tuhone kuhanjika hanji kulinga chuma chize muchilemeka mutu wacho ku mbunge.

4. Yika Satana anafupu tunyonge?

 ⁴ Satana kanazange hanga tuvwile Zambi woma uze kuwalitele. Iye kanafupu kututwala hanga tunyonge ngwe chize Elifaze anyongene, ngwo Yehova kakwivwa uli, kakufunyisa upi ha upi, nawa ngwo chikalu kumuvwisa kuwaha. (Yombi 4:18, 19) Nyonga lia Satana lili ngwo, tuvwile Yehova woma uze muututwala hanga tweche kumulingila. Mba twehuke ponde yacho, tunafupiwa kupwa ni woma walita hali Yehova.

5. Kuvwila Zambi woma yika chinalumbunuka?

⁵ Kuvwila Yehova woma chinalumbunuka kumuzanga chinji, ni kuhona kulinga chuma chize muchihasa kupihisa usepa wetu ni iye. Chakutalilaho, woma wa mutapu au we Yesu apwile ni kuvwila Zambi. (Hepre. 5:7) Iye kakapwile ni kuvwila Yehova mwongo. (Iza. 11:2, 3) Kwamba pundu, iye te kakuzanga chinji Yehova nawa kazangile kumwononokena. (Yoa. 14:21, 31) Chizechene ngwe Yesu, ni yetu twakuvumbika Yehova ni kumuvwila woma, mumu tunanyingika ngwetu, kakwete zango, mana, ululi ni ndundo. Tunanyingika nawa ngwetu, Yehova kakutuzanga chinji. Chikwo nawa, yeswe yize twakulinga muyihasa kumuvwisa chinyengo hanji kuwaha.—Samu 78:41; Yishi. 27:11.

6. Kuchi mutuhasa kulilongesa kuvwila Zambi woma? (Samu 34:11)

⁶ Yetu kutushi kusemuka ni chinyingi cha kuvwila Zambi woma; tunafupiwa kulilongesa kuvwila Zambi woma. (Tanga Samu 34:11.) Mutapu upema wa kuchilingila, uli ha kuhengwola yitangiwa. Muze twakumona yuma yize Zambi atangile, twakuhasa kumona mana jenyi, ndundo ni zango lize akwete hali yetu. Yino yakwokesa zango ni vumbi lietu hali iye. (Roma 1:20) Pangi avuluka ngwo Adrienne, yamba ngwenyi: “Muze nakumona yuma yeswe yize Yehova atangile ni mana waze akwete, chino chakungutwala ngunyonge ngwami iye kananyingika pundu yize yangupemena. Hachino, nyi Yehova mwe wangutangile mumu liaka mungulinga chuma chize muchipihisa usepa wami ni iye?” Chazangile kulinga chuma nichimwe chize muchipihisa usepa wami ni Yehova. Nyi muchilita, ha poso yino sako amwe mashimbu hanga unyonge ha chimwe chitangiwa cha Yehova. Nyi wachilinga, muchikukwasa hanga wokese zango ni vumbi lie hali iye.—Samu 111:2, 3.

7. Kuchi kulemba muchihasa kutukwasa kuvwila Zambi woma?

⁷ Kulemba kuli Yehova mashimbu eswe yili yimwe jila yize muyitukwasa kumuvwila chinji woma. Nyi mutulemba chinji, chino muchitukwasa kumona Yehova ngwe kali hakamwihi ni yetu. Muze twakulemba kuli Yehova hanga atwehe tachi ja kunyongonona, twakumona ukwaso wenyi ni kwiwuluka ndundo jenyi. Muze twakusakwilila Yehova ha chitapo cha Mwanenyi, twakwiwuluka zango lize akwete hali yetu. Muze twakupalika mu umwe kapinda ni kwita kuli Yehova hanga atukwase kumona chize mutuhasa kumukumba, twakwiwuluka mana waze akwete. Kulemba cha mutapu au, chakutukwasa kuvumbika chinji Yehova, ni kwehuka kulinga chuma chize muchipihisa usepa wetu ni iye.

8. Yika muyitukwasa mba tuhone kutokesa woma uze twakuvwila Yehova?

⁸ Mba tuhone kutokesa woma uze twakuvwila Yehova, twatamba kulilongesa Mbimbiliya ni nyonga lia kuwana malongeso ha yilweza yipema ni ha yilweza yipi. Haliapwila mutuhanjika ha yilweza ya tuvumbi aali a shishika a Yehova. Obadia yoze wapwile kaselo mu zuwo lia Mwanangana Ahabe ni Sasendote wa Lutwe Jehoiada. Hanyima, mutuhanjika ha chilweza cha Mwanangana Njoashe wa mu Yunda yoze  waputukile kanawa, alioze kulutwe yecha kulingila Yehova.

9. Kuchi kuvwila Yehova woma chakwashile Obadia? (1 Mianangana 18:3, 12)

⁹ Ha chisuho chitangu haze Mbimbiliya yinatongola Obadia, b yinambe ngwo: “Obadia wapwile ni woma unji wa Yehova.” (Tanga 1 Mianangana 18:3, 12.) Kuchi woma uze Obadia apwile nawo hali Yehova wamukwashile? Tunanyingika ngwetu, iye kapwile lunga wa mbunge yitoma; yoze te akwo akujikijila. Kashika mwanangana amusele ngwe kaselo ku zuwo lia wanangana. (Tala nawa Nehemia 7:2.) Woma uno we wakwashile Obadia kupwa ni hamu linji, chitanga chize te mafupiwa. Mumu liaka? Mumu Mwanangana yoze te wakuyula ha mashimbu jacho, kapwile Ahabe. Mbimbiliya yinambe ngwo: Iye kalingile “chipi kumeso ja Yehova kuhiana waze eswe a kushi.” (1 Mia. 16:30) Chikwo nawa, pwo lia Ahabe kapwile ni kuwayila Mbale. Amu iye te keshi kuzanga Yehova, chocho yazanga kwonwona uwayilo weswe wamwenemwene mu minyachi kumi ya Izalele. Iye kashihile nawa aprofeta anji a Yehova. (1 Mia. 18:4) Kwamba pundu, Obadia kapwile ni kulingila Yehova ha mashimbu akalu chinji.

10. Hamu liakwashile Obadia kulinga yika?

¹⁰ Yika Obadia alingile mumu lia hamu? Muze Jezebele apwile ni kukaujola aprofeta ja Yehova ni kwashiha, Obadia kaswekele aprofeta 100 mu yizavu yaali ya 50; ‘yaakwasa ha kwaha meya ni mbolo.’ (1 Mia. 18:13, 14) Nyi Jezebele kanyingikine yize Obadia alingile kachi kamushihile. Obadia kota kevwile woma mumu neye kakazangile kufwa. Alioze, zango lize apwile nayo hali Yehova ni hali waze te akulingila Yehova liokele chinji, kashika asele mwono wenyi mu ponde hanga afunge tuvumbi twenyi.

11. Kuchi tuvumbi twa Yehova musono akwimbulula Obadia? (Tala nawa chizulie.)

¹¹ Musono, tuvumbi anji a Yehova katwama mu yifuchi yize mulimo wetu uli wa kukanjisa. Chizechene ngwe Obadia, mandumbu wano kakununga ni kusolola vumbi hali waze ali ni poko ya kuyula, chipwe chocho kakuhana kuli  Yehova yize atela; kuwayila wika iye. (Mateu 22:21) Ayo kakusolola ngwo, kakuvwila Zambi woma ha kumwononokena ngwe nguvulu wetu hi atu ko. (Yili. 5:29) Kakununga ni kwambujola ni kukunguluka mu usweke. (Mateu 10:16, 28) Chikwo nawa, kakusa tachi hanga mandumbu jo apwe ni kulia cha ku ufulielo chize mafupiwa. Tala chilweza cha Henri, iye katwama mu chifuchi cha Africa muze mulimo wetu wapwile wa kukanjisa ha amwe mashimbu. Ha mashimbu jacho, Henri yalihana hanga aye ni kutwala mikanda kuli mandumbu. Mwene yamba ngwenyi: “Yami nakwivwa-vwa sonyi, kashika nguli ni shindakenyo ngwami kuvwila Yehova woma che changukwashile kupwa ni hamu liacho.” Shina muhasa kupwa ni hamu ngwe lize Henri apwile nalio? Muhasa kupwa nalio, nyi muvwila Zambi woma mu mutapu uze walita.

12. Kuchi Jehoiada ni mukwo-pwo asolwele ngwo, kashishika kuli Yehova?

¹² Sasendote wa Lutwe Jehoiada te kakuvwila Yehova woma, woma wacho we wamukwashile kushishika ni kukalila uwayilo wamwenemwene. Yino yasolokele zwalala muze mwana wa Jezebele wa pwo, Atalia, aputukile kuyula mu Yunda chakuhona kupwa ni ulite wacho. Atu te kakuvwila Atalia woma, mumu kapwile mukalu, mukwa-kuzo ni mbunge yipi. Amu azangile kupwa chinji mwazovu, chocho yashiha ajikulu jenyi hanga azuke yize azangile! (2 Sango 22:10, 11) Alioze umwe wa kuli ajikulu jenyi, Njoashe kanungine ni mwono mumu Yehosabeta pwo lia Jehoiada mwe wamuswekele. Iye ni mukwo-lunga kaswekele mwana yono ni kumufunga. Chechize Jehoiada ni Yehosabeta, akwashile kufunga munyachi wa mianangana uze te mukatuka ku chisemuko cha Ndawichi. Jehoiada kashishikile kuli Yehova, chakuhona kuvwila Atalia woma.—Yishi. 29:25.

13. Kuchi Jehoiada asolwele nawa ushishiko wenyi kuli Yehova muze Njoashe apwile ni miaka shimbiali?

¹³ Muze Njoashe apwile ni miaka shimbiali, Jehoiada yasolola nawa ngwenyi, te kashishika kuli Yehova. Iye kanyongene chize te masa Njoashe wa ku munyachi wa Ndawichi hanga apwe mwanangana. Nyi nyonga liacho liakakwashile, kachi Jehoiada kamushihile. Alioze ni ukwaso wa Yehova yuma yeswe yiyenda kanawa. Ni ukwaso wa A-Levi ni wa akwa-kuyula akwo, Jehoiada yalulieka yuma hanga Njoashe apwe mwanangana ni kushiha Atalia. (2 Sango 23:1-5, 11, 12, 15; 24:1) “Mba Jehoiada yakolesa usendo hakachi ka Yehova, ni mwanangana ni atu, akapwe atu ja Yehova.” (2 Mia. 11:17) Iye yasa “nawa akwa kufunga ku yikolo ya zuwo lia Yehova, hanga akakwike kunjila mweswawo yoze halichisa ni chimwe chuma.”—2 Sango 23:19.

14. Kuchi Jehoiada amuwahishile mumu lia kununga ni kuhalisa Yehova?

¹⁴ Yehova waliangile kulu kwamba ngwenyi: “Waze mangulemesa ni yami mungwalemesa.” Yino ye alingile hali Jehoiada. (1 Samue. 2:30) Chakutalilaho, iye kasele lusango wa Jehoiada mu Mbimbiliya hanga yetu tulilongese ha chilweza chenyi. (Roma 15:4) Muze Jehoiada afwile, iye katambwile ulemu wa kumufunjila mu “chihunda cha Ndawichi hakachi ka mianangana, mumu te halinga chipema mu Izalele kuli Zambi ni ku zuwo lienyi.”—2 Sango 24:15, 16.

15. Yika mutuhasa kulilongesa ha lusango wa Jehoiada? (Tala nawa chizulie.)

¹⁵ Lusango wa Jehoiada mahasa kutukwasa hanga twokese woma wetu hali Yehova. Makulwana a mu chikungulwila mahasa kwimbulula chilweza cha Jehoiada, ha kufupa majila  alita hanga afunge chikungulwila. (Yili. 20:28) Mandumbu waze hapwa tushinakaji mahasa kulilongesa ku chilweza cha Jehoiada, ha kuvwila Zambi woma ni kununga ni kushishika kuli iye. Nyi machilinga, Yehova mahasa kwazachisa hanga amanunune upale wenyi. Iye kechi keza kaehuka nilimwe tangwa. Akweze mahasa kulilongesa ha chilweza cha Yehova, ha kuvumbika mandumbu waze hapwa tushinakaji ngwe chizechene Yehova alingile hali Jehoiada, chipi-chipi kuli mandumbu waze akulingila Yehova ha miaka yinji. (Yishi. 16:31) Yetu eswe mutuhasa kulilongesa yimwe hali A-Levi ni hali akwa-kuyula akwo waze akwashile Jehoiada. Mutuchilinga, ha kukwasa ni ushishiko weswe “waze apwa tusongo” mu chikungulwila ni kwononokena ni mbunge yeswe.—Hepre. 13:17.

16. Yika yinasolola ngwo Njoashe kakapwile ni kuvwila Yehova woma kukatuka ku mbunge?

¹⁶ Jehoiada kakwashile Mwanangana Njoashe kupwa mutu mupema. (2 Mia. 12:2) Kashika, mukweze Njoashe azangile kuvwisa Yehova kuwaha. Alioze muze Jehoiada hafwa, Njoashe ‘yaputuka kukaula yitanga ya mianangana waze te keshi kwononokena Yehova. Hachino, iye ni atu jenyi yaputuka ‘kulingila Ashera ni tuponya.’ (2 Sango 24:4, 17, 18) Yehova yevwa chinyengo ha yuma yacho, chocho “yatuma aprofeta kuli ayo akaakoke kuli iye . . . , alioze kaapanjikile.” Ayo kakazangile chipwe kupanjika Zekaria, mwana wa Jehoiada, yoze wapwile musonyi wa Njoashe, nawa profeta kanda sasendote wa Yehova. Nyi kwakapwile usoko wa Zekaria, kachi Njoashe  kakatwamine ni mwono. Alioze, iye kakanyongene ha yuma yeswayi; yavulama upeme uze amulingilile, yatuma kushiha Zekaria.—2 Sango 22:11; 24:19-22.

17. Yika yalingiwile kuli Njoashe mumu lia kuhona kuvwila Yehova woma?

¹⁷ Njoashe kakapwile ni kuvwila Yehova woma mu jila yalita, kashika yuma yinji yipi yaputukile kulingiwa ku mwono wenyi. Yehova kambile ngwenyi: “Waze mangulelesa, kumakasauka.” (1 Samue. 2:30) Hachino, chipwe ngwe kapwile ni maswalale anji, Njoashe yamukumba ku chilombo chikehe cha maswalale A-Seria waze amulemekene chinji. Muze A-Seria ayile kwo, Njoashe yamushiha mumu lia kushiha Zekaria. Amu apwile mwanangana mupi chinji, kakamufunjile kuze te ‘akufunjila mianangana.’—2 Sango 24:23-25; tala “mwana wa Mbarakiya” ha nota ya estudo ha Mateu 23:35.

18. Kulita ni Jeremia 17:7, 8, yika twatamba kulinga mba tuchine kupwa ngwe Njoashe?

¹⁸ Yika mutuhasa kulilongesa ha chilweza cha Njoashe? Mutondo uze kuushi ni miji yikolo, wakufupiwa ukwaso mba ununge ni kumana. Nyi muhona ukwaso, fuji muyiulimbula. Yino ye yalingiwile kuli Njoashe. Iye kapwile ni ukwaso wa Jehoiada, alioze hanyima lia kufwa cha Jehoiada ni yitanga ya yitanganyanyi, Njoashe yalimbuka ku ufulielo, chocho yahona kushishika kuli Yehova. Chilweza chenyi, chasolola ngwo kutwatambile kwononokena Yehova, mumu ngwo asoko jetu hanji mandumbu akwo mu chikungulwila kakutukolweza hanga tuchilinge. Nyi tunazange kupwa ni usepa ukolo ni Yehova, twatamba kukolesa zango ni woma wetu hali iye, ha kulilongesa Mbimbiliya mashimbu eswe, kupukuna ni kulemba.—Tanga Jeremia 17:7, 8; Kolo. 2:6, 7.

19. Yika Yehova anatwite hanga tulinge?

¹⁹ Kwamba pundu, yuma yize Yehova akutwita hi yikalu ko. Yeswe yize anazange hali yetu, yili ha mukanda wa Chilumbununyi 12:13, unambe ngwo: “Vwila woma Zambi, ni kufunga shimbi jenyi, mumu henaho hasulila milimo ya mutu.” Nyi mutuvwila Yehova woma, mutuhasa kukumba yipikalo hanji cheseko cheswacho mutupalika kulutwe, ngwe chize alingile Obadia ni Jehoiada. Nyi twachilinga, kukushi chuma nichimwe hanji mutu niumwe yoze mahasa kupihisa usepa wetu ni Yehova.