Mbimbiliya kuyishi kwamba nichimwe ha chikuma chino. Alioze, yakusolola yikuma yize muyihasa kulumbununa yize yaatwalile mba azange kutwama mu Mbeteleme.

Mungelo kalwezele Maria ngwenyi te maka ufumba ni kusema mwana. Muze mungelo amulweze lusango yono, Maria ni Yosefwe te katwama mu Nazare mu limbo lia Yosefwe, mu Ngalileya. (Luka 1:26-31; 2:4) Kulutwe, muze afunyine ku Engitu, ayo yaya ku Nazare. Kwe kuze Yesu akolelele ni kupwa Ka-Nazare. (Mateu 2:19-23) Kashika, muze twakunyonga ha Nazare twakwiwuluka Yesu, Yosefwe ni Maria.

Maria kapwile ni usoko te avuluka ngwo, Izabele yoze wapwile ni kutwama mu Yunda. Izabele kapwile pwo lia sasendote Zekaria, yoze wapwile naye ya Yoano Chipapachisa. (Luka 1:5, 9, 13, 36) Maria kayile ni kumeneka Izabele mu Yunda; chocho yatwamako tukweji atatu. Mba hiyafuna ku Nazare. (Luka 1:39, 40, 56) Kashika, Maria anyingikine Yunda.

Kulutwe, Yosefwe yakatuka ku Nazare ni kuya ku Mbeteleme mumu A-Roma kasele shimbi hanga atu eswe aye ni kulisonekesa ku chihunda cho. Kulita ni uprofeto, Mesaya te masemukina mu Mbeteleme. (Luka 2:3, 4; 1 Samue. 17:15; 20:6; Mika 5:2) Hanyima lia Yesu kusemuka, Yosefwe kakazangile hanga Maria alingi wenyi usuku wa kufuna ku Nazare ni mwana-kemba. Ayo yatwama mu Mbeteleme, haze kota hapwile kilometro 9 kukatuka ku Yerusaleme. Chikwo nawa, amu shimbi yambile ngwo, A-Yunda katamba kuhana chitapo cha kusemuka cha mwana, kupwa mu Yerusaleme te muchaakwasa kuya-ya mu tembele.—Levi 12:2, 6-8; Luka 2:22-24.

Ku uputukilo, mungelo kalwezele Maria ngwenyi, mwanenyi te mamwaha “ngunja ya Ndawichi” ni ‘kuyula ngwe Mwanangana.’ Muchihasa kupwa ngwe Yosefwe ni Maria kanyongene ngwo, Yesu masemukina mu mbonge ya Ndawichi. (Luka 1:32, 33; 2:11, 17) Hachino, kota yanyonga ngwo, muchilita kutwama kuze ndo haze te Zambi maalweza yize malinga.

Yetu kutwanyingikine mashimbu waze o alingile mu Mbeteleme muze atambwile akwa-kuhengwola tutongonoshi. Alioze tunanyingika ngwetu, ayo te kanatwame mu limwe zuwo, Yesu hajikiza ndambu; keshi nawa kachiye. (Mateu 2:11) Chinasoloka ngwe shimbu ayo afune ku Nazare, yatwama mu Mbeteleme ha amwe mashimbu ni kuyipwisa mbonge yo.

Heronde yatuma “kushiha ana a malunga eswe a miaka yiali ndo mushi, a ku Mbeteleme.” (Mateu 2:16) Mungelo yatoweza Yosefwe ponde yacho, chocho iye ni Maria yanda Yesu yachinyina ku Engitu; yatwamako ndo haze Heronde afwile. Hachino, Yosefwe yanda usoko wenyi yafuna ku Nazare. Mumu liaka kakafunyine ku Mbeteleme? Mumu ha mashimbu jacho, mwana wa Heronde, Arkelau te kanayulu Yundeya; iye kapwile mutu mupi chinji. Chikwo nawa, mungelo katowezele Yosefwe hakutwala ku ponde ya kufunako. Nazare yapwile chihela chipema chize Yosefwe te malelela Yesu hanga apwe kavumbi mupema wa Zambi.—Mateu 2:19-22; 13:55; Luka 2:39, 52.

Chinasoloka ngwe Yosefwe kaliangile kufwa muze Yesu te kanda azulula jila ya kuya mu malilu. Hachino, Yosefwe makamuhindwisa akatwame hano hashi. Atu anji makaliwana nenyi, kashika makamuhula hanga anyingike mumu liaka iye ni Maria anungine mu Mbeteleme hanyima lia kusemuka cha Yesu.