1-2. Kulita ni Samu 40:5, yawana yika yize Yehova hanatwehe, nawa mumu liaka mutuhanjika ha yawana yacho?

YEHOVA kali chihanyi munene. Iye hanatwehe yawana yinji yipema ngwe, hano hashi twatwama, wongo uze wakutukwasa kunyonga ni kwiwuluka yuma, ni Liji lienyi, Mbimbiliya. Yawana yino yitatu yize Yehova hanatwehe, yili yilemu chinji. Hanatwehe hashi hanga tutwameho, uhashi wa kunyonga ni kuhanjika ni akwetu, nawa hanatwehe Mbimbiliya hanga yikumbulule yihula yilemu ya ku mwono.—Tanga Samu 40:5.

² Ha mutwe uno, mutuhanjika hakehe ha yawana yino yitatu. Kupukuna chinji ha yawana yino, muchitukwasa hanga tusakwilile chinji Sakatanga yetu, Yehova. Hachino, zango lietu lia kulinga yuma yize akuzanga mulikola. (Uso. 4:11) Muchitukwasa nawa kulilulieka hanga tukwase atu waze akufuliela ha longeso lia mahuza liakwamba ngwo, yuma yalitangile yene.

3. Mumu liaka hashi he halipwila?

³ Mana a Zambi kanasoloka kanawa ha chize atangile chihela chetu, hashi. (Roma 1:20; Hepre. 3:4) Chipwe ngwe kwatwama planeta jikwo, alioze, hashi he halipwila. He wika hali yuma yize yakukwasa atu hanga anunge ni mwono.

4. Mumu liaka hashi hanapema kuhiana ndeke yize atu akutunga?

⁴ Hashi hali ngwe ndeke yize yili ha matetela yinambate atu anji. Alioze, ndeke yize atu akutunga yalisa chinji ni hashi.  Chakutalilaho, achinyonga ngwe atu waze ali mu ndeke yacho matomba mwiku wo, kulia ni meya. Alioze, yiswaswa yeswe yize alinayo mu ndeke kechi kuyimbila haze, muyiputuka kupolela muzemwene. Mashimbu angahi manunga ni mwono? Mashimbu akehe wika. Alioze, hano hashi hatwama yitangiwa yinji ya mwono, hakutuhwisa yuma yinji yize tunafupu, ngwe mwiku, kulia ni meya. Yiswaswa yeswe, twakuyimbila hano hashi, chipwe chocho, hashi hananungu ni kupema. Mumu liaka? Mumu Yehova katangile hashi ni yuma yize yakupemesaho. Mutulilongesa wika yuma yaali.

5. Kuchi mwiku wakukalakala, nawa yika unasolola?

⁵ Mwiku (oxigênio), wakukwasa yitangiwa yeswe hanga yinunge ni mwono. Akwa-mana kakutayiza ngwo, ha mwaka umuwika, yitangiwa yeswe ya mwono yakuhwima mwiku unji upema. Muze yakuhwima mwiku upema, mba mayituhwisa mwiku upi uze avuluka ngwo gás carbônico. Chipwe chocho, yitangiwa ya mwono kuyishi kuhona mwiku upema, nawa hashi kuheshi kuzala ni mwiku upi. Mumu liaka? Mumu Yehova katangile yuma yize yakukoka mwiku upi ni kutuhwisa mwiku upema. Yuma yacho, yili yambu ni mitondo. Yuma yeswe ai, yinashindakenya maliji waze ali ha mukanda wa Yilinga 17:24, 25, anambe ngwo: Zambi “kakuhana kuli eswe mwono, ni mwiku.”

6. Yika yakulingiwa ni meya, nawa yika yino yinasolola? (Tala nawa mushete unambe ngwo, “ Meya Kali Chawana cha Yehova.”)

⁶ Meya, hano hashi hatwama meya mumu Zambi kasele tangwa ha chihela chalita. Nyi Zambi kasele tangwa hakamwihi, kachi meya eswe hano hashi hanomu ni mwalwa, kachi hanasasaminya chinji, nawa kachi hali hahululu. Chikwo nawa, nyi tangwa kalisele kusuku chinji ni hashi, kachi yuma yeswe hano hashi hiyinalikakaminya ni chishika. Nawa hano hashi kachi hali wika chiwe. Mutapu uze Yehova atangilemo hashi, wakukwasa hanga meya ahone kuma, yino yakukwasa hanga yitangiwa yinunge ni mwono. Kuchi yino yakulingiwa? Mwalwa wakukoka meya mu kalunga-lwiji ni mu mangiji hanga apwe malelwa. Akwa-mana kakutayiza ngwo, hita mwaka mwalwa wakukoka meya anji, kuhiana waze ali mu yitende ni mu mangiji. Meya wano eswe, kakupwa ha matetela ha matangwa kumi. Hachino, meya jacho manoka ngwe vula hanji mbundu ni kufuna nawa mu kalunda-lwiji ni mu mangiji. Muze mwalwa wakusasaminya, meya jacho kakuhiluka cheka ha matetela. Yino yeswe yinasolola ngwo, Yehova kali Zambi wa ndundo ni mana.—Yombi 36:27, 28; Chilu. 1:7.

7. Kuchi mutuhasa kusolola ngwetu twakulemesa chawana chize anatongola ha Samu 115:16?

⁷ Kuchi mutuhasa kusolola ngwetu, twakulemesa hashi ni yuma yeswe yize yiliho? (Tanga Samu 115:16.) Mutuhasa kulinga chino, ha kupukuna ha yuma yize Yehova atangile. Kupukuna chino, muchitukwasa hanga tusakwilile Yehova matangwa eswe ha yuma yeswe yize akutwaha. Mutuhasa kusolola ngwetu twakulemesa hashi, muze mutufunga kanawa ha chihela haze twatama ni kulinanga.

8. Mumu liaka mutuhasa kwamba ngwetu, wongo wakukomwesa chinji?

⁸ Mutapu uze atangilemo wongo, wakukomwesa chinji. Muze mwana akupwa mu jimo lia naye, wongo wenyi wakukola hakehe-hakehe. Hachino, célula ja mu wongo mujiputuka kuliwezela hakehe-hakehe ha hita tangwa. Akwa-mana kakwamba ngwo, mu wongo wa mukulwana muli tununu ni tununu a célula jalipwila, jize akuvuluka ngwo, neurônio. Célula  jacho jili ja kukunga hamuwika, mujihasa kulema kilu yimuwika ni chipinji. Tutalenu yize wongo wetu wakutukwasa kulinga.

9. Yika yakusolola ngwo kuhanjika chili chawana cha Zambi?

⁹ Uhashi wa kuhanjika uli chikomokeso. Tunyongenu hakehe ha maliji jetu. Mba tuhanjike, wongo wakutuma sango ha muliwu, ku mivumbo, ku mbangachi ni ha pambo. Yino yeswe yatamba kukalakala chimuwika mba maliji atuhuke kanawa. Hakutwala ku kulilongesa malimi eka, jimwe sango ahengwile ha mwaka 2019, jasolwele ngwo, ana kemba mahasa kwivwa maliji a hita limi. Sango jino, jinashindakenya ha yize akwa kuhengwola akutayiza ngwo, mutu kakusemuka ni uhashi wakuhanjika malimi anji. Kwamba pundu, kuhanjika chili chawana cha Zambi.—Kutuhu. 4:11.

10. Kuchi mutuhasa kusolola ngwetu twakulemesa chawana cha kuhanjika chize Zambi atuhele?

¹⁰ Kuli majila anji akusolwelamo ngwo, twakulemesa chawana chino, kuhanjika. Jila yimwe, yili kwambujola kuli atu waze akutayiza ngwo, Zambi katwamineko. (Samu 9:1; 1 Petu. 3:15) Atu waze akukalila longeso liakwamba ngwo, yuma yalitangile yene, kakuzanga kutupiangula hanga ni yetu tutayize ngwo, hashi ni yuma yeswe yize yatwamaho yalitangile yene. Nyi ayo mazanga kutupanjika, mutuhasa kwatangila mu Mbimbiliya ni yimwe yikuma ya Kaposhi yono tunalilongesa, hanga tukalile Tata yetu wa mu malilu ni kwakwasa hanga anyingike mumu liaka yetu twakufuliela ngwetu, Yehova mwe watangile malilu ni hashi.—Samu 102:25; Iza. 40:25, 26.

11. Wongo wakutukwasa nawa kulinga yika?

¹¹ Uhashi wetu wa kwiwuluka yuma wakukomwesa. Ha mashimbu akunyima, umwe mukwa-kusoneka kambile ngwenyi, mutu mahasa kwiwuluka sango jinji jize mahasa kusoneka ha unji wa tununu a tununu aali a mikanda. Alioze, musono kanatayiza ngwo, wongo wetu muuhasa kutulika sango jinji kuhiana. Wongo wakukwasa mutu kwiwuluka ni kulilongesa yuma yinji. Yuma yika yenayo?

12. Mumu liaka twalisa ni yitangiwa yikwo ya hano hashi?

¹² Ha yitangiwa yeswe ya hano hashi, atu wika e ali ni uhashi wa kulilongesa chize atamba kutwama ku mwono. Twakuhasa kwiwuluka yuma ya ku mashimbu akunyima ni kunyonga ha yuma yacho. Kunyonga chino, chakutukwasa kusakula shimbi jize mujisongwela mwono wetu, kwalumuna manyonga ni yitanga yetu. (1 Kori. 6:9-11; Kolo. 3:9, 10) Yetu tuli ni uhashi wa kufumba mbunge yetu hanga tunyingike kalisa uli ha upeme ni upi. (Hepre. 5:14) Mutuhasa nawa kusolola zango, keke ni kwimbulula ululi wa Yehova.

13. Kulita ni Samu 77:11, 12, kuchi mutuhasa kusolola ngwetu, twakulemesa chawana chino, kwiwuluka?

¹³ Kuli majila anji mutuhasa kusolwelamo kuli Yehova ngwetu, twakulemesa chinji chawana chino, kwiwuluka. Jila yimwe, yili  kwiwuluka mashimbu eswe chize iye atukwashile ni kutulembejeka. Chino, muchitukwasa kujikijila muli iye ni kufuliela ngwetu, kulutwe lia matangwa matukwasa. (Tanga Samu 77:11, 12; 78:4, 7) Jila yikwo, yili kwiwuluka yuma yipema yize mandumbu jetu akutulingila ni kwasakwilila. Akwa-kuhengwola kanakanyingika ngwo, atu waze akusakwilila e akuwahilila chinji. Chikwo nawa, kuli yuma yize Yehova akuzanga kuvulama, chipwe ngwe kali ni uhashi wa kwiwuluka yuma yeswe. Chakutalilaho, muze twakwita ukonekeno kuli Yehova, iye kakutukonekena ni kuvulama shili yetu. (Samu 25:7; 130:3, 4) Chili chipema kwimbulula chilweza chenyi. Muze umwe ndumbu matulemeka ku mbunge, twatamba kumukonekena ni kuvulama yuma yize atulinga. Yehova che anazange.—Mateu 6:14; Luka 17:3, 4.

14. Kuchi mutuhasa kusolola ngwetu, tunasakwilila ha chawana chino chilemu, wongo?

¹⁴ Kwamba umwenemwene, wongo uli chawana chilemu. Mutuhasa kusolola ngwetu, twakulemesa chawana chino, ha kuchizachisa kanawa hanga tulemese yoze watuhelecho. Atu amwe kakusolola ngwo, keshi kulemesa chawana chino, ha kulisela ene shimbi ya chipi ni chipema. Yehova mwe watutangile, kashika, shimbi jenyi jili jilemu kuhiana ja yetu ene. (Roma 12:1, 2) Nyi twakaula shimbi ja Yehova, mutupwa ni sambukila. (Iza. 48:17, 18) Nawa yetu hitunawana ulemu wa ku mwono, kufumanyisa Tangi yetu ni kulinga yuma yize akuzanga.—Yishi. 27:11.

15. Mumu liaka mutuhasa kwamba ngwetu, Mbimbiliya yili chawana chize chakusolola zango lia Zambi hali atu?

¹⁵ Mbimbiliya yili chawana chize chakusolola zango lia Zambi hali yetu. Tata yetu wa mu malilu kakulihulumba chinji hali ana jenyi hano hashi. Kashika atumine atu hanga aasonekene Mbimbiliya. Kupalikila mu Mbimbiliya, Yehova kakukumbuluka yihula yetu yilemu ngwe: Kulihi twakatukile? Mumu liaka atutangile? Yika muyilingiwa kulutwe lia matangwa?  Yehova kanazange hanga ana jenyi eswe awane kumbululo lia yihula yino. Chize ku mashimbu akunyima, iye kakutuma atu hanga alumbunune Mbimbiliya mu malimi anji. Musono, Mbimbiliya yili mu malimi tununu atatu (3,000), yamuwundu hanji chihanda. Mbimbiliya, uli mukanda uze akulumbununa chinji mu malimi anji, nawa atu anji kali nayo. Chipwe ngwe atu katwama ku yihela yeswawo, kakuhanjika malimi alisa, nihindu kali ni uhashi wakupanjika sango ja mu Mbimbiliya mu limi lio.—Tala mushete unambe ngwo, “ Kulumbununa Mbimbiliya mu Malimi a mu Africa.”

16. Kulita ni Mateu 28:19, 20, kuchi mutuhasa kusolola ngwetu twakusakwilila ha chawana chino, Mbimbiliya?

¹⁶ Mutuhasa kusolola ngwetu, twakulemesa Mbimbiliya ha kuyitanga matangwa eswe, kupukuna ha yize tunalilongesa ni kuyikaula ku mwono wetu. Chikwo nawa, mutusolola ngwetu twakusakwila Zambi, ha kusa tachi hanga twambujole sango ja mu Mbimbiliya kuli atu anji.—Samu 1:1-3; Mateu 24:14; tanga Mateu 28:19, 20.

17. Yawana yika twalilongesa ha mutwe uno, nawa yika mutulilongesa ha mutwe uze muusulaho?

¹⁷ Ha mutwe uno, twalilongesa yawana yimwe yize Yehova hanatwehe: hashi hapema, wongo wetu, ni Liji lienyi Mbimbiliya. Alioze, kuli yawana yikwo ya Yehova yize kutushi kumona. Yawana yacho, ye mutulilongesa ha mutwe muusulaho.