1-2. Yika umwe mukwa-kusoneka ambile, nawa yika mutushimutwina ha mutwe uno?

ATU anji musono kakwamba ngwo kakufuliela muli Yesu, alioze keshi kwononokena malongeso jenyi. (2 Timo. 4:3, 4) Umwe mukwa-kusoneka kambile ngwenyi: “Achinyonga ngwe musono mutupwa ni mutu ngwe Yesu mukachi ketu, nawa mutu wacho mamba yuma ngwe yize Yesu ambile. . . , shina mutulitunayo ngwe chize atu alitunyine Yesu ku mashimbu akunyima? . . . Kumbululo mulihasa kupwa ngwo: Ewa, mutulitunayo.”

² Atu anji ku sekulu yitangu kevwile malongeso a Yesu nawa kamwene yikomokeso yize alingile, chipwe chocho kalitunyine kufuliela muli iye. Mumu liaka? Ha mutwe wapalika, twamonangaho yikuma yiwana yize yatwalile atu kutalinga mumu lia yize Yesu ambile ni yize alingile. Ha mutwe uno, mutumonaho yikuma yikwo yiwana. Mutumona nawa mumu liaka atu anji musono akulituna tumbaji twa Yesu ni yize muyihasa kutukwasa hanga tuchine kutalinga.

3. Yika Yesu alingile yize yatwalile amwe kutalinga?

³ Muze apwile hano hashi, Yesu te kakulikata ni atu a mutapu weswe. Iye te kakulia ni pichi ni waze apwile ni ndundo, alioze te kakusa nawa mashimbu hanga apwe hamuwika ni yiswale ni waze te akumona lamba. Chikwo nawa, iye te kakwivwila keke atu waze akwo te akumona ngwo kali “yivulumunyi.” Amwe waze apwile ni kulimona ngwe kali chinji akwa-ululi, te kakutalinga mumu lia yize Yesu apwile ni kulinga. Ayo yahula tumbaji twa Yesu ngwo: “Kuchi te nunali, nunanu hamwe ni akwa kufwetesa lijimu ni yivulumunyi?” Yesu yaakumbulula ngwenyi:  “Akwa kuyiza mafupa mbuki, hi angunu ko. Ami nguneza kutambika yivulumunyi alikonyeke, hi akwa ululi ko.”—Luka 5:29-32.

4. Kulita ni profeta Izaia, yika A-Yunda te atamba kushimbwila hakutwala kuli Mesaya?

⁴ Yika Yisoneko yinambe? Ha miaka yinji muze Mesaya te kanda achiza, profeta Izaia kanakaprofeteza ngwenyi, atu anji te keshi kumutayiza. Uprofeto wambile ngwo: “Amulelesele, alitunyineye kuli atu . . . ngwe mutu yoze atu mamuswekela meso jo, chocho amulelesele. Etu kutwamusele mbunge.” (Iza. 53:3) Ngwe chize uprofeto wambile, Mesaya te kumalitunayo kuli atu. Hachino, A-Yunda a ku sekulu yitangu kachi kanyingikine ngwo Yesu te kumalitunayo kuli atu.

5. Kuchi atu anji musono akumona tumbaji twa Yesu?

⁵ Shina twakumona kapinda wacho musono? Ewa. Mangana anji kakuwahilila chinji muze pichi, atu waze akwete lufuma ni waze akwete mana anji kulita ni akwa-hashi akuya mu mayingeleja jo. Ayo kakutayiza atu jacho mu mayingeleja jo, chipwe ngwe keshi kutwama kulita ni shimbi ja Zambi. Mangana jacho keshi kulemesa tuvumbi twa Yehova. Chipwe ngwe akwa-Kristu amwenemwene kakwete zango linji nawa kakutwama kulita ni shimbi ja Zambi, nihindu akwa-hashi keshi kwalemesa. Ngwe chize postolo Paulu ambile: “Zambi hanatongola yuma ya yamokomoko.” (1 Kori. 1:26-29) Alioze kuli Yehova, tuvumbi jenyi eswe waze ashishika kali alemu.

6. Yika Yesu ambile ha Mateu 11:25, 26, nawa kuchi mutuhasa kumwimbulula?

⁶ Yika twatamba kulinga hanga tuchine kutalinga? (Tanga Mateu 11:25, 26.) Kanda wecha hanga nyonga lize akwa-hashi ali nalio hakutwala kuli tuvumbi twa Zambi likupiangule. Watamba kunyingika ngwe, Yehova kakuzachisa wika atu alikehesa hanga alinge upale wenyi. (Samu 138:6) Nawa nyonga ha yize Yehova alinga ha kuzachisa atu waze kuli akwa-hashi apwa ngwe keshi mana nawa amokomoko.

7. Mumu liaka Yesu avulukile A-Fwariseu ngwo yilembekese, nawa kuchi ayo evwile?

⁷ Yesu kahishile mangana a mayingeleja ha matangwa jenyi, mumu ayo te keshi kulongesa atu jila yalita yakuwayilamo Yehova. Chakutalilaho, Yesu kasolwele ulembekese wa A-Fwariseu waze te akulemesa chinji kusana ku moko, kuhiana kufunga yisemi jo. (Mateu 15:1-11) Muchihasa kupwa ngwe, kota ni tumbaji twa Yesu kakomokene ha kwivwa maliji waze iye ambile. Kashika ayo amuhulile ngwo: “Unanyingika ngwe A-Fwariseu kevwanga uli muze wahanjikanga maliji wano, nyi?” Yesu yaakumbulula ngwenyi: “Mitondo yeswe yize Tata wa mwilu katumbile kumakayitukula. Ahichikenu: tupuputa kanafupu kusongwela tupuputa, nyi kachi kapuputa masongwela kapuputa, eswe aali ku kumakaholokela mu wina.” (Mateu 15:12-14; MW.) Chipwe ngwe mangana wano kanakevwila Yesu uli mumu lia yize ahanjikile, nihindu iye kakechele kuhanjika umwenemwene.

8. Kuchi Yesu asolwele ngwenyi, Zambi keshi kutayiza uwayilo weswe?

⁸ Yesu nawa kasolwele ngwenyi, malongeso amwe a mayingeleja te a mahuza. Iye kakambile ngwenyi, Zambi kakutayiza uwayilo weswe. Alioze kambile ngwenyi, atu anji te mendela mu jila yinene yize yakutwala ku kwonwona, atu akehe wika e te mendela mu jila yikepe yize yakutwala ku mwano. (Mateu 7:13, 14) Yesu nawa kasolwele ngwenyi, amwe te masoloka kumeso ngwe kanawayila Zambi, alioze kuma keshi kumuwayila. Iye yaatoweza ngwenyi: “Keyelenu aprofeta a kwonga, waze akwiza kuli yenu ni mazalo ja mapanga, alioze  muchima kanapu tungunga a kunuwumbula. Ku mihuko yo kumunukaanyingika.”—Mateu 7:15-20.

9. Malongeso aka a mahuza waze Yesu ahishile?

⁹ Yika Yisoneko yinambe? Mbimbiliya yinakaprofeteza ngwo, zango ha zuwo lia Yehova te mulilia Mesaya. (Samu 69:9; Yoa. 2:14-17) Zango liacho lie liatwalile Yesu mba ahise mianda ni malongeso a uwayilo wa mahuza. Chakutalilaho, A-Fwariseu te kakunyonga ngwo alma kuyishi kufwa; alioze Yesu kalongesele ngwenyi, afu kali mu tulo. (Yoa. 11:11) A-Saduseu te keshi kutayiza ngwo, atu waze hanafu mahasa kwahindwisa; alioze Yesu kahindwishile sepa lienyi Lazaru. (Yoa. 11:43, 44; Yili. 23:8) A-Fwariseu te kakwamba ngwo, Zambi hanatesa yuma yeswe yize yakulingiwa kuli atu; alioze Yesu kalongesele ngwenyi, atu mahasa kusakula kulingila Zambi hanji ka.—Mateu 11:28.

10. Mumu liaka atu anji akutalinga mumu lia malongeso jetu?

¹⁰ Shina twakumona kapinda wacho musono? Ewa. Atu anji kakutalinga muze twakwasolwela mu Mbimbiliya ngwetu, malongeso amwe a mayingeleja kali a mahuza. Chakutalilaho, mba akinde atu kutuhuka mu mayingeleja jo, mangana kakwalongesa ngwo, Zambi kakumwesa atu lamba mu chitende cha kahia. Alioze waze akuwayila Yehova, Zambi ya zango, kakukwasa atu kunyingika ngwo longeso lino lia mahuza. Mangana a mayingeleja kakulongesa nawa ngwo alma kuyishi kufwa. Alioze yetu twakusolola ngwetu, longeso lino kulishi mu Mbimbiliya, mumu nyi chamwenemwene alma kuyishi kufwa, kachi uhindukilo wa afu kuushiko. Nawa chipwe ngwe mayingeleja anji kakwamba ngwo, Zambi hanatesa yuma yeswe yize yakulingiwa ku mwono wetu, nihindu twakulongesa ngwetu mutu kali ni ulite wa kusakula nyi malingila Zambi nyi ka. Kuchi mangana a mayingeleja akwivwa ha malongeso wano eswe? Kanji-kanji, ayo kakwivwa uli!

11. Kulita ni maliji a Yesu waze ali ha Yoano 8:45-47, yika Yehova anashimbwila hali tuvumbi twenyi?

¹¹ Yika twatamba kulinga hanga tuchine kutalinga? Nyi twakuzanga lume umwenemwene wa mu Mbimbiliya, twatamba kutayiza yize Zambi akwamba. (Tanga Yoano 8:45-47.)  Yetu kutushi ngwe Satana, yoze kakamanyine mu umwenemwene. Kutuchi keza kalinga nichimwe chize kuchishi kulita ni yize twakufuliela. (Yoa. 8:44) Zambi kanazange hanga tuvumbi twenyi “evwile lwaji ungulungulu” ni ‘kulalaminya ku yipema’ ngwe chize Yesu alingile.—Roma 12:9; Hepre. 1:9.

12. Mumu liaka chize Yesu afwile chatalingishile A-Yunda anji?

¹² Chuma chikwo chika chize chatwalile A-Yunda kulituna Yesu? Paulu yamba ngwenyi: ‘Yetu twakwambujola Kristu yoze ahachile ha mutondo, kuli A-Yunda chapwa chitalingiso.’ (1 Kori. 1:23) Mumu liaka A-Yunda anji alitunyine Yesu hamukunda wa chize afwile? Mumu kuli ayo, kufwa cha Yesu ha mutondo wa lamba chasolwele ngwo, iye kali chingalwe, mukwa-shili nawa hi Mesaya ko.—Shimbi 21:22, 23.

13. Yuma yika A-Yunda waze atalingile kakanyingikine?

¹³ A-Yunda waze atalingile kakanyingikine sango jinji ngwo Yesu keshi chitela, kamuliongela yuma nawa ngwo kanamulingi yuma ya uhenge. Ngaji waze asopesele Yesu kakakawile shimbi. Ayo kalikungulwile kawashi-washi, nawa kakavumbikile usongwelo hakutwala ku kusopesa atu. (Luka 22:54; Yoa. 18:24) Nyi ngaji jacho kakapwile ni katonde, kachi kahengwile mulonga uze asumine Yesu ni kumona nyi chamwenemwene kaulinga. Alioze shimbu achilinge, ayo yafupa “yela a mahuza hali Yesu hanga akamushihe.” Amu kakahashile kuwana yela jacho, sasendote wa lutwe yeseka kushinjila Yesu alinge chimwe chize te mahasa kuzachisa hanga amuhise. Yize ayo alingile kuyakalitele ni shimbi ja ha mashimbu jacho. (Mateu 26:59; Marku 14:55-64) Chipwe muze Yesu amuhindwishile, ngaji jacho nihindu yanunga ni kulinga yuma ya uhenge. Ayo yahana mbongo jinji kuli maswalale waze te anafungu fuka lia Yesu hanga amwange sango ja mahuza hakutwala ku kutoka cha mujimba wa Yesu.—Mateu 28:11-15.

14. Yika Yisoneko yambile hakutwala ku kufwa cha Mesaya?

¹⁴ Yika Yisoneko yinambe? Chipwe ngwe A-Yunda anji ha matangwa ja Yesu te keshi  kunyonga ngwe Mesaya kumafwa, alioze tala yize Yisoneko yambile: “Watulile mwono wenyi mu kufwa, amwalwile hamwe ni yitanguke; wambachile shili ya anji; wahakwilile yitanguke.” (Iza. 53:12) Kashika, A-Yunda kakatambile kutalinga ha chize Yesu afwile ngwe mukwa-shili.

15. Milonga yika asumine Yela ja Yehova yize yatalingishile amwe?

¹⁵ Shina twakumona kapinda wacho musono? Ewa, twakumumona! Yesu kanakamuliongela yuma ni kumuhisa chakuhona chitela, yino ye yakulingiwa kuli Yela ja Yehova musono. Tutalenu yilweza yimwe. Ha mwaka 1930 ndo 1950, mu Estados Unidos Yela ja Yehova kayile ku chota cha usopelo ha yisuho yinji hanga akalile utuswilo wo wa kuwayila Zambi. Ngaji amwe kasolwele pundu ngwo, keshi kutuzanga. Mu Quebec, ku Canadá, mayingeleja ni nguvulu kakalakalile hamuwika hanga ahwise mulimo wetu. Mandumbu anji kaasele mu mazuwo a ususu mumu ngwo kambulwile sango ja Wanangana kuli enyembo jo. Ku Alemanha, akweze anji ashishika kaashihile kuli A-Nazista. Nawa ha matangwa wano, mandumbu anji mu Russia kanaase mu mazuwo a ususu mumu lia kwambujola sango lipema, mulimo wacho kanaumono ngwe “unalimiki ni nguvulu.” Chipwe Mbimbiliya Tradução do Novo Mundo mu limi lia Rússia kayikanjisa ni kuyamba ngwo, “yinalimika ni nguvulu” mumu lia kuzachisa jina lia Yehova.

16. Kulita ni 1 Yoano 4:1, mumu liaka sango ja mahuza jize atu akwamba hali Yela ja Yehova kujatambile kutupiangula?

¹⁶ Yika twatamba kulinga hanga tuchine kutalinga? Twatamba kunyingika umwenemwene weswe. Ha Longeso lia ha Mulundu Yesu yamba ngwenyi, atu te “malamikiza tumbaji twenyi yuma ya mahuza.” (Mateu 5:11) Mahuza jacho kakukatuka kuli Satana. Iye kakutwala akwa-kole kumwanga mahuza hakutwala kuli waze akuzanga umwenemwene. (Uso. 12:9, 10) Yetu kutwatambile kupanjika yuma ya mahuza yize akwa-kole akutwamba. Kanda twiza kecha mahuza jacho hanga atuvwise woma hanji akokolole ufulielo wetu.—Tanga 1 Yoano 4:1.

17. Kuchi yuma yize yalingiwile shimbu Yesu te kanda achifwa yatwalile amwe kutalinga?

¹⁷ Shimbu te kanda achifwa, Yesu kamukunjikile kuli umwe wa kuli apostolo jenyi 12. Postolo mukwo yalituna Yesu katatu keswe, akwo, yamuhichika ukawenyi ha ufuku uze te mamushiha. (Mateu 26:14-16, 47, 56, 75) Yino kuyakakomwesene Yesu. Iye mwene kaliangile kuprofeteza ngwenyi, yuma yacho te muyilingiwa. (Yoa. 6:64; 13:21, 26, 38; 16:32) Ha kumona chino, amwe kota yatalinga ni kunyonga ngwo, ‘Nyi yenayo apostolo ja Yesu alinga, yami kuchazangile kulichilinga ni chizavu chacho!’

18. Uprofeto uka wamanunukine ha amwe mashimbu muze Yesu te kanda achifwa?

¹⁸ Yika Yisoneko yinambe? Ha miaka yinji kunyima, Yehova kasolwele mu Liji lienyi ngwo, Mesaya te mamukunjika ha makumi atatu a mbongo ja prata. (Zeka. 11:12, 13) Mutu yoze te makunjika Yesu, te mapwa umwe wa kuli masepa jenyi. (Samu 41:9) Profeta Zekaria kasonekene nawa ngwenyi: “Lamba kafunga, mapanga amwangane.” (Zeka. 13:7) Atu waze akwete mbunge yipema te kechi kulituna Yesu mumu lia yuma yacho. Shimbu achilinge, kumona umanunuko wa yuma yacho muli Yesu, te muchikolesa chinji ufulielo wo.

19. Yika waze ali ni mbunge yipema ananyingika?

¹⁹ Shina twakumona kapinda wacho musono? Ewa. Ha matangwa jetu, Yela ja Yehova amwe hanahichika umwenemwene ni kupwa yitanguke,  nawa kakweseka kupiangula akwo. Ayo kakuzachisa mikanda ni internet hanga amwange sango ja mahuza, sango jili ni ndambu yamwenemwene ni yuma yikwo yipi hakutwala kuli Yela ja Yehova. Alioze waze akwete mbunge yipema keshi kutalinga mumu lia yuma yacho. Shimbu atalinge, ayo kananyingika ngwo Mbimbiliya hiyinambe ngwo, amwe te mapwa yitanganyanyi.—Mateu 24:24; 2 Petu. 2:18-22.

20. Yika muyitukwasa hanga tuchine kutalinga hamukunda wa atu waze ahichikile umwenemwene? (2 Timoteu 4:4, 5)

²⁰ Yika twatamba kulinga hanga tuchine kutalinga? Twatamba kupwa ni ufulielo ukolo. Mba tuchilinge, twatamba kulilongesa Mbimbiliya matangwa eswe, kulemba matangwa eswe ni kulihana chinji mu mulimo wa Yehova. (Tanga 2 Timoteu 4:4, 5.) Nyi twapwa ni ufulielo ukolo, kutuchi kukomoka muze mutwivwa sango jipi hakutwala kuli Yela ja Yehova. (Iza. 28:16) Zango lietu kuli Yehova, ku Liji lienyi ni hali mandumbu jetu mulitukwasa hanga tuchine kutalinga hamukunda wa atu waze ahichikile umwenemwene.

21. Chipwe ngwe atu anji kakulituna sango jetu, shindakenyo yika tunawane mu Liji lia Zambi?

²¹ Ku sekulu yitangu, atu anji katalingile ni kulituna Yesu. Chipwe chocho, atu anji nawa kamutayijile. Mukachi ka atu jacho, mwapwile umwe wa mu chota cha akwa-kuyula cha Yunda ni “mbunga yinene ya asasendote.” (Yili. 6:7; Mateu 27:57-60; Marku 15:43) Yuma yacho ye yakulingiwa musono, tununu twa atu keshi kwecha nichimwe hanga chaatalingise. Mumu liaka? Mumu ayo kananyingika umwenemwene uze uli mu Yisoneko nawa kakuuzanga. Ngwe chize Liji lia Zambi linambe: “Waze akuzanga shimbi ye kuhwima chinji ali nacho. Nichimwe muchiatalingisa chakuhi.”—Samu 119:165.