Kukatuka ha tangwa liacho, mwono wami yiwalumuka, chocho yinguputuka kufupa kunyingika Zambi. Chitangu mungunutela lusango hakutwala ku wanuke wami, hanyima mba ngunulweza chize ufuku wacho wapalikile. Yuma yize napalikile ha mashimbu jacho, yangukwashile kunyonga ni kululieka mbunge yami hanga ngufupe Zambi.

Nasemukine ha mwaka 1937 mu Guesnain, ku yimwe mbonge yikehe ku norte ya França. Tata kapwile ni kufula mawe waze apwa ngwe makala, chocho yingulilongesa kuli iye kupwa chikilikita. Chikwo nawa, tata kangulongesele kupwa chinji mukwa-ululi, iye te kakukalila akwa-kufula mawe waze te akumwesa lamba ni kukalakalila ku yihela kuze kuli ponde. Hachino, iye yanjila mu chizavu cha akwa-kukalila ulite wa kwa-kufula mawe ni kukanjisa akwa-kufula mawe kukalakala ndo muze te mawezela mbongo. Nawa, tata te kakuvwila kole ulembekese wa mangana a mayingeleja a mu mbonge yetu. Anji a kuli ayo kapwile ni mwono upema, chipwe chocho kapwile ni kwita kulia ni mbongo kuli akwa-kufula mawe waze te akukilikita chinji hanga awane yuma yakulikwasa nayo. Tata te keshi kuzanga mangana jacho, kashika te keshi  kungulongesa nichimwe hakutwala ku yingeleja. Kwamba umwenemwene, yetu te kutushi kuhanjika hakutwala kuli Zambi.

Muze te ngunayi ni kukola, ni yami yinguputuka kwivwila kole uhenge uze te nakumona. Chakutalilaho, napwile ni kumona ngwami yilambala waze te atwama mu França kapwile ni kwasolwela katonde munji. Ami napwile ni kwasa konda ni ana ja yilambala, nawa te nakuzanga kuheha no. Chikwo nawa, mama te hi wa mu França ko, kapwile wa ku Polônia. Kashika, te nakuzanga kutwama mu chifuchi muze mumupwa sambukila nawa muze atu eswe matwama kanawa chakuhona katonde.

Nanjilile mu uswalale ha mwaka 1957. Yino ye yangutwalile ku milundu ya Argélia ha ufuku uze natongola ku uputukilo. Hanyima liakuteta ngwami: “Zambi yami! Ngukwase kama!” Yingumona nguli kulutwe hi lia swalale mukwa-kole ko, alioze lia chimbulu wa mu yambu! Hachino yinguhwima mbunge! Chipwe chocho, yize yalingiwile ha tangwa liacho ni jita yangutwalile kunyonga chinji ha mwono wami. Yingulihula ngwami, mumu liaka tuli kuno? Shina Zambi kakulihulumba hali yetu? Shina tangwa limwe mutwiza kapwa ni sambukila?

Ha kupalika cha hamwe mashimbu, muze te nguli ku zuwo lia yisemi jami, yingunyingika umwe Chela cha Yehova. Iye yangwaha La Sainte Bible, yimwe Mbimbiliya ya francês yize alumbunwine kuli akwa-Católica. Muze nafunyine ku Argélia, yinguputuka kuyitanga. Mukanda uze wangukwachile chinji ku mbunge uli wa Usolwelo 21:3, 4. Unambe ngwo: “Zuwo lia Zambi lili hamwe ni atu, . . . Iye makakusumuna masoji eswe ku meso jo. Kufwa kuchichi kapwa nawa; kukuchi kapwa nawa kunenganyana, chipwe miteto, chipwe yikola, ka.” * Maliji wano kangukomwesene chinji. Hachino yinguputuka kulihula ngwami: ‘Shina yino yili lume yamwenemwene?’ Ha mashimbu jacho, te chanyingikine nichimwe hakutwala kuli Zambi ni Mbimbiliya.

Hanyima lia kwecha uswalale ha mwaka 1959, yingunyingika Chela cha Yehova mukwo, yoze te avuluka ngwo François, iye yangulongesa umwenemwene unji wa mu Mbimbiliya. Chakutalilaho, yangusolwela mu Mbimbiliya ngwo Zambi kali ni jina, Yehova. (Samu 83:18) Iye yangulumbunwina nawa ngwo, Zambi makaneha ululi hano hashi, mapwisaho paraisu nawa ngwo maliji ali ha Usolwelo 21:3, 4 makamanunuka.

Malongeso jacho kapwile amwenemwene kuli yami, nawa kangukwachile ku mbunge. Hachino, yinguputuka kwivwila mangana a mayingeleja uli unji. Nazangile kulweza atu eswe hanga anyingike ngwo yuma yize ayo akulongesa kuyishi mu Mbimbiliya! Te ngunalivu ngwe chize tata apwile ni kwivwa, chakazangile nawa kushimbwila. Nazangile kulinga yuma yacho ha mashimbu waze-ene!

François ni masepa jami akwo aha Yela ja Yehova, yangukwasa kulihumikiza. Ayo yangulumbunwina ngwo, yetu akwa-Kristu mulimo wetu hi kusopesa ko atu, alioze uli wa kuhana kutalatala chize Zambi akutwaha kupalikila mu sango lipema lia Wanangana wa Zambi. Mulimo uno we Yesu alingile, nawa we atumine tumbaji twenyi kulinga. (Mateu 24:14; Luka 4:43) Nalilongesele nawa chize munguhasa kuhanjika ni atu ni uhomboloji  chipwe ngwe kakufuliela yuma yeka. Mbimbiliya yinambe: “Kuchatambile ndungo ya Mwene kuneha ndombo, alioze akapwe chimbovu kuli eswe.”—2 Timo. 2:24.

Nalumwine yimwe ku mwono wami, hachino yangupapachisa ha chimwe kukunguluka cha mbonge ha mwaka 1959. Ha kukunguluka chacho, yingunyingikaho umwe mukweze wa pwo avuluka ngwo Angèle. Namumwene ngwami kali chileza. Yinguputuka kuya mu chikungulwila chize apwile, nawa ha mwaka 1960 yitulimbata. Iye kali pwo mupema, wamwenemwene, nawa kali chawana cha Yehova.—Yishi. 19:14.

Ha miaka yino yeswe, nalilongesa yuma yinji yilemu kuli malunga waze akwete mana nawa ajama. Chuma chilemu chinji chize nalilongesa chili ngwo: Nyi tunazange kufumbuka ha mulimo weswawo ukalu, tunafupiwa kupwa akwa-kulikehesa ni kukaula chiyulo chili ha Yishima 15:22, chinambe ngwo: “Ku wunji wa akwa chiyulo kakuchikolesa.”

Ha mwaka 1964, namwene ulemu wa chiyulo chino. Ha mwaka wacho, yangutongola ngwe kalayi wa mbonge, napwile wika ni miaka 27 nawa te kuchanyingikine yuma yinji. Hachino yingulinga umwe kapalia. Alioze, nalilongesele yuma yinji ha kapalia wacho. Kuhiana yeswayi, nalilongesele yuma yinji ni “akwa chiyulo” ajama, nawa waze te ananyingika yuma yinji.

Ngunewuluka chuma chize chalingiwileko muze naputukile kumeneka yikungulwila. Hanyima lia kumeneka chimwe chikungulwila mu Paris, umwe ndumbu wajama yanguhula nyi te mahasa kuhanjika ni yami. Yingumulweza ngwami: “Kushi mulonga.”

Ndumbu yanguhula ngwenyi: “Louis, nyi ndotolo mameneka limwe zuwo, iya yoze aya ni kutala?”

Yingumukumbulula ngwami, “mweji.”

Iye yamba ngwenyi: “Wamba kanawa. Alioze yami namona ngwami muze wa kutumeneka, wakupalikisa mashimbu anji ni atu waze ali kanawa ku ufulielo, ngwe chakutalilaho, kasongo wa mu chikungulwila. Mu chikungulwila chetu muli mandumbu anji waze anahongo, aha ni waze akwivwa sonyi. Ayo mawahilila chinji nyi mupalikisa no mashimbu, muya ni kwameneka ni kulia no hamuwika.”

Chiyulo chize ndumbu yono angwehele chapwile chipema chinji. Zango lize apwile nalio hali mapanga  ja Yehova, liangukwachile chinji ku mbunge. Chipwe ngwe chapwile chikalu kutayiza ngwami nahengesa, nihindu yingukaula chiyulo chenyi. Ngunasakwilila chinji Yehova ha kunyingika mandumbu ajama ngwe, ndumbu yono.

Ha mwaka 1969 ni 1973, kangusakwile hanga ngukalakale ku Chipatulo cha Kuhana Kulia ha kukunguluka chaali cha mambonge cha yifuchi, mu Colombes, Paris. Ha kukunguluka cha mambonge cha mwaka 1973, te mutuhana kulia kuli atu 60,000 ha matangwa atano! Kwamba umwenemwene, nevwile yimwe ndambu ya woma. Alioze mukanda wa Yishima 15:22 wangukwashile nawa, chocho yingufupa yiyulo ya akwetu. Hachino, yingwita yiyulo kuli mandumbu anji ajama waze te ananyingika kanawa mulimo uno, ngwe akwa-kushiha tushitu, njimi, akwa-kuteleka ni akwa-kulanda yuma. Chipwe ngwe mulimo wacho wapwile ukalu chinji, alioze twahashile kuulinga ha kukalakala hamuwika.

Ha mwaka 1973, yami ni mukwetu-pwo yatusanyika hanga tukalakale ku Mbetele ya França. Mulimo wami utangu ku Mbetele newo wapwile ukalu. Yami te nakutuma mikanda kuli mandumbu a mu Camarões mu África. Mu chifuchi chacho, mulimo wetu kaukanjishile chize ha mwaka 1970 ndo ha mwaka 1993. Ha mashimbu jacho, namwene nawa ngwe kuchichi kuhasa kulinga mulimo wacho. Alioze ndumbu yoze te wakusongwela mulimo mu França, yangukolweza ni kungulweza ngwenyi: “Mandumbu jetu mu Camarões kanafupiwa chinji kulia cha ku spiritu. Twatamba kwatumina kulia!” Yino ye twalingile.

Yami nalingile wenyi unji mu yifuchi yize yasulangana ni Camarões, hanga ngulikungulule ni makulwana a mu yikungulwila a mu chifuchi chacho. Mandumbu wano a hamu nawa akanyama, kangukwashile kululieka yuma yize te yinafupiwa hanga tuhase kutuma kulia cha ku spiritu mu Camarões ha mashimbu eswe. Yehova yawahisa tachi jetu. Kashika ha kupalika miaka 20, mandumbu jetu kakahonene Kaposhi wa Kutalila chipwe mukanda uze te akuvuluka ngwo, Nosso Serviço do Reino.

Chize ku uputukilo wa usendo wetu, namwene yitanga yinji ya ku spiritu kuli Angèle. Yitanga yacho yasolokele chinji muze te hitwalimbata. Ha tangwa lize twalimbachile, iye yangwita hanga ngulembe hakutwala ku zango lize te tuli nalio lia kulinga Yehova ngwe lunga ni pwo. Yehova yakumbulula yilemba yetu.

Angèle kakungukwasa kufuliela muli Yehova. Chakutalilaho, muze atusanyikine hanga tukalakale ku Mbetele ha mwaka 1973, yami chakazangile chinji, mumu te nakuzanga mulimo wa kumeneka yikungulwila. Alioze Angèle yangwiwulula ngwenyi: Yetu twahanyine mwono wetu kuli Yehova. Shina hi chipema ko kulinga mulimo uze ululikiso wenyi unatwehe? (Hepre. 13:17) Chakamwene yakwamba, chocho yingutayiza chiyulo chenyi. Hachino yituya ku Mbetele. Ha miaka yeswayi tuli hamuwika, nakuwahilila chinji ha kupwa ni pwo wakanyama, mwashi nawa wajama ku ufulielo. Chino chakukolesa ulo wetu ni kutukwasa kukwata yiyulo yipema.

Chipwe ngwe hitwapwa tushinakaji, nihindu Angèle machinunga ni kupwa pwo mupema nawa chikwashi. Chakutalilaho, Mashikola anji a Mulimo wa Zambi, kakulingiwa mu Inglês. Mba tuyeko, yami ni Angèle twakusa tachi hanga tululieke Inglês yetu. Hachino, yituya mu chikungulwila cha Inglês chipwe ngwe te hitwapwa ni miaka kuhiana 70. Mumu lia chiteli chami ngwe mukulwana wa mu Komite ya Mutango mu França, kulilongesa limi likwo chapwile chikalu chinji. Alioze yami ni Angèle twakulikwasa umwe ni mukwo. Haliapwila tuli ni miaka kuhiana 80, nihindu twakululieka kukunguluka mu Inglês ni mu Francês. Nawa twakusa tachi hanga tukumbulule ha kukunguluka ni kuya mu munda hamwe ni chikungulwila. Yehova kanawahisa tachi jize tunase hanga tulilongese Inglês.

Ha mwaka 2017 twatambwile chimwe chiwape chinene. Yami ni Angèle yituya ku Shikola ya Makulwana aku Mitango ni Mapwo jo, yize yakulingiwa ku Patterson, Nova York.

Kwamba umwenemwene, Yehova kali Longeshi Munene. (Iza. 30:20) Kashika, kutwatambile kukomoka muze tuvumbi twenyi, akweze ni tushinakaji matambula fumbo lipema! (Shimbi 4:5-8) Pundu lume, hinamona ngwami akweze waze akupanjika Yehova ni mandumbu ajama, kakukola kanawa ku ufulielo ni kupwa makulwana apema. Mukanda wa Yishima 9:9 unatwiwulula ngwo: “Fumba mukwa mana mba maliwezela mana. Longesa mukwa ululi mba maliwezela yinyingi.”

Ha mashimbu amwe, nakwiwuluka ufuku uze nevwile woma ku milundu ya Argélia, ha miaka 60 kunyima. Chakanyongene yuma yipema yize te muyiza kulutwe. Nalilongesa yuma yinji kuli akwetu! Yehova hanatwehe mwono upema hamwe ni uwahililo. Kashika, yetweswe aali tunazange kununga ni kulilongesa hakutwala kuli Tata yetu wa mu malilu ni kuli mandumbu jetu akwete mana nawa ajama waze akuzanga Zambi.