MUTWE WAKULILONGESA 21
Yehova Makwaha Tachi
“Muze mungulela, hohene mungupwa ni tachi.”—2 KORI. 12:10.
MWASO 73 Twehe Kama Hamu
CHIKUMA CHILEMU *
1-2. Yipikalo yika mandumbu amwe akupalika?
POSTOLO Paulu, kakolwezele Timoteu hamwe ni akwa-Kristu eswe hanga alinge mulimo wo wa kwambujola. (2 Timo. 4:5) Tulieswe twakukaula chiyulo cha Paulu, nawa twakusa tachi hanga tulinge kanawa mulimo wa Zambi. Alioze ha mashimbu amwe chakukaliwa kuchilinga. Kuli mandumbu jetu anji, kuya mu mulimo wa kwambujola chakufupiwa hamu. (2 Timo. 4:2) Achinyonga hali mandumbu waze atwama mu yifuchi muze mulimo wetu wa kwambujola uli wa kukanjisa. Ayo kakwambujola chipwe ngwe chino muchihasa kwatwala mu zuwo lia ususu!
2 Mandumbu jetu anji kakupalika mu yipikalo yinji yize muyihasa kwahongesa. Chakutalilaho, anji kakufupiwa kukalakala tangwa liangongo hanga ahase kulisa asoko jo. Ayo kakuzanga chinji kwambujola, alioze muze akuheta ku songo lia poso hi keshi nawa ni tachi ja kuya ni kwambujola. Akwo, kakupinda ni misongo yize kuyishi kuhwa hanji ushinakaji. Ha mashimbu amwe keshi kuhasa kwambujola ngwe chize anazange, mumu chakwakalila kukatuka ku zuwo. Kuli nawa waze akupinda ni manyonga api ni kunyonga ngwo, Yehova keshi kwalemesa. Ndumbu Maria * yoze watwama ku Oriente Médio, yamba ngwenyi: “Nakusa tachi jinji hanga ngukumbe manyonga jami api, chino chakunguhongesa ku mbunge. Hachino, nakulisuma mulonga, mumu chino chakungupalikisa mashimbu ni tachi jize te munguhasa kuzachisa mu mulimo wa kwambujola.”
3. Yika mutulilongesa ha mutwe uno?
3 Chipwe ngwe mutupalika mu kapinda mweswawo, nihindu Yehova kanalakenya kutwaha tachi. Iye keshi kutukwasa wika kukumba yipikalo yetu, alioze kakutukwasa nawa hanga tulinge yize mutuhasa mu mulimo wenyi. Ha mutwe uno, mutumonaho chize Yehova akuchilinga. Alioze, chitangu mutumona chize akwashile Paulu ni Timoteu kukumba yipikalo yo ni kulinga kanawa mulimo wo wa kwambujola.
YEHOVA MATWAHA TACHI HANGA TWAMBUJOLE
4. Yipikalo yika Paulu apalikile?
4 Paulu kapalikile mu yipikalo yinji. Iye te kakufupiwa tachi, chipi-chipi muze apwile ni kumulamba, kumwasa mawe ni kumusa mu zuwo lia ususu. (2 Kori. 11:23-25) Paulu neye katayijile ni mbunge yeswe ngwenyi, te kakupinda ni manyonga api. (Roma 7:18, 19, 24) Chikwo nawa, iye te kakupinda ni umwe “lumbambo mu mujimba.” Ha chisuho chimwe, yaliumba kuli Zambi hanga amuchize lumbambo wacho.—2 Kori. 12:7, 8.
Yika yakwashile Paulu mba alinge kanawa mulimo wo wa kwambujola? (Tala maparagrafu 5-6) *
5. Yika Paulu ahashile kulinga chipwe ngwe kapalikile mu yipikalo yinji?
5 Yehova kahanyine tachi kuli Paulu hanga alinge kanawa mulimo wenyi wa kwambujola, chipwe ngwe kapalikile mu yipikalo yinji. Tutalenu yize Paulu ahashile kulinga. Chakutalilaho, ha mashimbu waze apwile mu kamenga ku zuwo mu Roma, Paulu nihindu kahashile kwambujola sango lipema kuli tusongo A-Yunda ni tupatashi a nguvulu. (Yili. 28:17; Fwili. 4:21, 22) Chikwo nawa, iye kambulwile kuli tufunga ni kuli waze te akuya ni kumumeneka. (Yili. 28:30, 31; Fwili. 1:13) Ha mashimbu jacho, he Paulu asonekene yimwe mikanda, mikanda yacho yichili ni ulemu unji musono kuli akwa-Kristu amwenemwene. Chikwo nawa, Paulu kapwile chilweza chipema kuli mandumbu mu chikungulwila cha Roma. Kashika Mbimbiliya yinambe ngwo, mandumbu jako “yahamuka mukuhanjika liji lia Zambi ni woma wakuhi.” (Fwili. 1:14) Chipwe ngwe ha mashimbu amwe Paulu te keshi kulinga yize akuzanga, nihindu kapwile ni kulikolweza hanga alinge yize mahasa. Mba yika ayukile? Paulu mwene yamba ngwenyi: “Yuma yino hiyanguwana hiyalumuka ya kusenyesa kulutwe lie sango lipema.”—Fwili. 1:12.
6. Kulita ni 2 A-Korindu 12:9, 10, yika yakwashile Paulu mba alinge kanawa mulimo wenyi wa kwambujola?
6 Paulu kanyingikine ngwenyi, nyi kakapwile ni tachi ja Yehova kachi kakahashile kulinga yize alingile. Kashika ambile ngwenyi, tachi ja Zambi “kakujipwisa jingunu mu ulelu.” (Tanga 2 A-Korindu 12:9, 10.) Yehova kahanyine tachi kuli Paulu kupalikila mu spiritu yisandu. Tachi jacho jamukwashile kulinga kanawa mulimo wenyi wa kwambujola, chipwe ngwe kapalikile mu yihungumiona, kamusele mu zuwo lia ususu ni yipikalo yikwo nawa.
Yika yakwashile Timoteu mba alinge kanawa mulimo wo wa kwambujola? (Tala paragrafu 7) *
7. Yipikalo yika Timoteu atambile kukumba mba alinge kanawa mulimo wenyi wa kwambujola?
7 Chipwe ngwe Timoteu kapwile mukweze kuli Paulu, nihindu kafupiwile kujikijila ha tachi ja Zambi mba alinge kanawa mulimo wenyi wa kwambujola. Timoteu kalingile wenyi ni Paulu mu mulimo wa kwambujola. Chikwo nawa, Paulu katumine Timoteu hanga aye ni kumeneka yikungulwila ni kuyitakamisa. (1 Kori. 4:17) Kota Timoteu kanyongene ngwe kanda achijama kulinga mulimo wacho. Kota chino che chatwalile Paulu mba amwehe chiyulo chinambe ngwo: “Niumwe kanda alelesa ukweze we.” (1 Timo. 4:12) Chikwo nawa, ha mashimbu jacho Timoteu te kakupinda niumwe lumbambo mu mujimba, chekwamba kapwile ni “kuyiza chinji.” (1 Timo. 5:23) Alioze Timoteu kanyingikine ngwenyi, mahasa kujikijila ha ndundo ja spiritu yisandu ya Yehova. Ni ukwaso wa spiritu yisandu, iye te mapwa ni tachi jize mafupiwa hanga ambujole sango lipema ni kukwasa mandumbu jenyi.—2 Timo. 1:7.
YEHOVA MATWAHA TACHI HANGA TUSHISHIKE CHIPWE MUZE TULI NI YIPIKALO
8. Kuchi Yehova akutwaha tachi musono?
8 Musono, Yehova kakuhana “tachi jahiana” kuli tuvumbi twenyi. Tachi jacho jakutukwasa hanga tununge ni kumulingila ni ushishiko weswe. (2 Kori. 4:7) Tutalenu majila awana waze Yehova akutwehelamo tachi: kulemba, Mbimbiliya, mandumbu jetu akwa-Kristu ni mulimo wa kwambujola.
Yehova kakutwaha tachi kupalikila mu kulemba (Tala paragrafu 9)
9. Kuchi kulemba muchihasa kutukwasa?
9 Kaatakamishine kupalikila mu yilemba. Ha A-Efwesu 6:18, Paulu kanatukolweza hanga tulembe kuli Zambi “matangwa eswe.” Zambi makumbulula yilemba yetu hakutwaha tachi jize tunafupiwa. Jonnie, yoze watwama mu Bolívia kamwene ukwaso wa Yehova muze apalikile mu yipikalo yinji. Yisemi ja Jonnie ni mukwo-pwo kayijile chinji ha shimbu limuwika. Kuli Jonnie, chapwile chikalu chinji kukwasa ayo eswe atatu ha yize te anafupiwa. Naye yafwa, yikupalika mashimbu anji mba mukwo-pwo ni tato yahinduka. Muze akwiwuluka mashimbu jacho, Jonnie yamba ngwenyi: “Muze napwile ni kulipikala chinji, chuma chapwile ni kungukwasa chili, kulemba kuli Yehova ni kumulweza chize ngunevu.” Yehova kahanyine kuli Jonnie tachi jize te anafupiwa hanga anyongonone. Ronald, umwe mukulwana wa mu chikungulwila ku Bolívia, kanyingikine ngwenyi naye kali ni câncer. Ha kupalika cha kakweji umuwika naye yafwa. Yika yamukwashile kukumba ha mashimbu jacho akalu? Mwene yamba ngwenyi: “Muze nakulemba kuli Yehova, nakwazulula mbunge yami ni kumulweza chize ngunevu. Ngunanyingika ngwami Yehova kanangunyingika kanawa kuhiana mutu mweswawo. Kwamba umwenemwene, iye kanangunyingika kanawa kuhiana yami mwene.” Muchihasa kupwa ngwe ha mashimbu amwe, tunapinda chinji ni yipikalo nawa kutushi kuhasa kumona yize mutwita mu yilemba. Alioze, Yehova kanatwite hanga tulembe kuli iye chipwe muze mutumona ngwo chili chikalu kuhanjika yize tunevu.—Roma 8:26, 27.
Yehova kakutwaha tachi kupalikila mu Mbimbiliya (Tala paragrafu 10)
10. Kulita ni A-Hepreu 4:12, mumu liaka chili chilemu kutanga Mbimbiliya ni kuyipukuna?
10 Kaatakamishine kupalikila mu Mbimbiliya. Paulu katambwile tachi ni utakamiso kupalikila mu Yisoneko. Chino muchihasa kulingiwa ni kuli yetu. (Roma 15:4) Chili chilemu kutanga Liji lia Zambi matangwa eswe ni kulipukuna. Nyi twachilinga, Yehova mazachisa spiritu yenyi yisandu hanga asolole chize Mbimbiliya muyihasa kutukwasa kukumba yipikalo yetu. (Tanga A-Hepreu 4:12.) Ronald yoze hitwatongola, yamba ngwenyi: “Chapwile chipema kuli yami kupwa ni chako cha kutanga yimwe versu ya Mbimbiliya ufuku. Nakupukuna chinji ha yitanga ya Yehova ni chize afungile tuvumbi twenyi. Chino chakungukwasa kuhuzulula tachi jami.”
11. Kuchi Mbimbiliya yahanyine tachi kuli umwe ndumbu yoze wafwishile mukwo-lunga?
11 Kupukuna ha Liji lia Zambi chakutukwasa kupwa ni nyonga lialita ha yipikalo yetu. Tala chize Mbimbiliya yakwashile umwe ndumbu wa pwo tuliwa. Iye te kakunenganyana chinji ha kufwa cha mukwo-lunga. Chocho umwe mukulwana wa mu chikungulwila yamukolweza hanga atange mukanda wa Yombi. Ndumbu yatanga mukanda wacho. Muze aputukile kutanga, nyonga lienyi litangu liapwile kuhisa kunyonga cha Yombi. Iye te kakwamba ngwenyi: “Yombi! Kanda ulihulikila wika ha milonga ye!” Hachino, mba yanyingika ngwenyi, kumana nyonga lienyi te linalifu ni lia Yombi. Kutanga mukanda wa Yombi chakwashile ndumbwetu kululieka nyonga lienyi ni kupwa ni tachi ja kunyongonona ha kufwa cha mukwo-lunga.
Yehova kakutwaha tachi kupalikila muli mandumbu jetu akwa-Kristu (Tala paragrafu 12)
12. Kuchi Yehova akuzachisa mandumbu jetu a ku ufulielo hanga atwehe tachi?
12 Kaatakamishine kupalikila muli mandumbu jetu. Jila yikwo yize Yehova akutwehelamo tachi, yili kupalikila muli mandumbu jetu a ku ufulielo. Paulu yasonekena mandumbu jenyi a ku ufulielo ngwenyi, usona ngunevu kunumona “hanga tukaliwahise hamuwika.” (Roma 1:11, 12) Kuli Maria yoze hitwatongola, kupwa hamuwika ni mandumbu chili chuma chilemu. Yamba ngwenyi: “Yehova kazachishile mandumbu chipwe waze kakanyingikine yipikalo yami hanga angukwase. Ayo kangulwezele yimwe yize yangukolwezele hanji kungutumina mikanda. Kanji-kanji, yuma yacho ye te nakufupiwa ha mashimbu jacho. Chuma chikwo chize chakungukwasa chili kuhanjika ni mandumbu a mapwo waze akupalika mu yipikalo ngwe ya yami, mumu munguhasa kulilongesa yuma yinji ha yilweza yo. Nawa makulwana a mu chikungulwila kanji-kanji kakungulweza ngwo mandumbu kakunguzanga chinji.”
13. Kuchi mutuhasa kulitakamisa umwe ni mukwo muze tuli ha kukunguluka?
13 Jila yimwe yipema yize twakulitakamishinamo umwe ni mukwo, yili kupwa ha kukunguluka. Muze uli ha kukunguluka, shina muhasa kulianga kutakamisa akwenu? Amba kuli umwe ndumbu ngwo, nakukuzanga hanji ngwo nakusakwila ha yeswe yize wakulinga. Chakutalilaho, shimbu kukunguluka kanda chichiputuka, Pedro, umwe mukulwana wa mu chikungulwila yamba kuli umwe ndumbu yoze mukwo-lunga hi Chela ko, ngwenyi: “Nakutakama muze nakukumona ha kukunguluka. Yena nihindu wakwiza ni ana je asambano ha kukunguluka nawa ayo kakuhana makumbululo apema.” Ha kwivwa chocho, ndumbu wacho yalila. Iye yasakwilila ni kumulweza ngwenyi: “Yino ye te ngunafupiwa kwivwa musono.”
Yehova kakutwaha tachi kupalikila mu mulimo wa kwambujola (Tala paragrafu 14)
14. Kuchi mulimo wa kwambujola muhasa kutukwasa?
14 Kaatakamishine kupalikila mu mulimo wa kwambujola. Muze twakuhanjika ni atu hakutwala ku Mbimbiliya, twakulivwa kanawa chipwe ngwe ayo mapanjika sango jetu hanji ka. (Yishi. 11:25) Stacy, umwe ndumbu wa pwo kamwene chize mulimo wa kwambujola wamwehele tachi. Umwe wa kuli usoko wenyi yamusosolola mu chikungulwila, chino yichimunehena yinyengo yinji. Iye te kakulihula ngwenyi: ‘Shina natambile kulinga yimwe hanga ngumukwase?’ Stacy te keshi kuhasa kunyonga nawa ha yuma yikwo. Yika yamukwashile kukumba kapinda yoze apwile nenyi? Mulimo wa kwambujola! Muze apwile ni kwambujola, iye te kakulihulikila chinji hali atu a mu njiza yenyi waze te akufupiwa ukwaso. Yamba ngwenyi: “Ha mashimbu jacho, Yehova kangwehele longi wa Mbimbiliya yoze wakolele ku ufulielo ni kawashi. Chino changukolwezele chinji. Chuma chize chakungwaha tachi ku mwono, chili kwambujola.”
15. Yika walilongesa ha maliji ja Maria?
15 Mandumbu amwe kakunyonga ngwo, hamukunda wa yipikalo yo kechi kuhasa kwambujola chinji. Ni yena che wakunyonga? Nyi che wakunyonga, iwuluka ngwe Yehova kakuwahilila ha yize wakuhasa kulinga. Tala nawa chilweza cha Maria. Muze ayile ku chikungulwila chize akuhanjika limi lieka, iye kapwile ni kulivwa ngwe keshi kuhasa kulinga nichimwe. Yamba ngwenyi: “Ha mashimbu amwe, chuma chize te nakuhasa kulinga chili kuhana kumbululo likehe, kutanga chimwe chisoneko cha mu Mbimbiliya ni kuhana kalifwo mu mulimo wa kwambujola.” Muze Maria te akulitesa ni waze akuhanjika kanawa limi liacho, iye te keshi kulivwa kanawa. Alioze kalumwine nyonga lienyi. Yanyingika ngwenyi, Yehova mahasa kumuzachisa chipwe ngwe kali ni kapinda wa kuhanjika limi liacho. Maria yamba ngwenyi: “Umwenemwene wa mu Mbimbiliya uli upema nawa washi, muhasa kwalumuna mwono wa atu.”
16. Nyi kuushi kuhasa kukatuka ku zuwo, yika muyihasa kukukwasa kupwa ni tachi?
16 Hanji wakuzanga kwambujola, alioze kuushi kuhasa kukatuka ku zuwo. Chipwe chocho, pwako ni shindakenyo ngwe Yehova kakukumona nawa kananyingika kapinda we. Iye mahasa kukukwasa hanga wambujole kuli waze akukufunga hanji kuli mbuki waze akukuwuka. Chikwo nawa, kanda utesa yize wakulinga musono ni yize wapwile ni kulinga kunyima, mumu chino muchihasa kukuhongesa. Eseka kunyingika yize Yehova analingi haliapwila hanga akukwase. Nyi wachilinga, mupwa ni tachi ja kukumba yipikalo chakuhona kutokesa uwahililo we.
17. Kulita ni Chilumbununyi 11:6, mumu liaka kutwatambile kulitwamina kwambujola?
17 Yetu twakusa tachi hanga tutumbe mbuto ya umwenemwene, alioze kutwanyingikine yize muyihasa kupwa ni miji ni kukola. (Tanga Chilumbununyi 11:6.) Achinyonga ha chilweza cha Barbara. Iye kali ni miaka kuhiana 80, nihindu kakwambujola ku telefone ni kusoneka mikanda. Umwe wa ku mikanda yacho, yasamo Kaposhi wa Kutalila 1 wa Março wa 2014, wapwile ni mutwe unambe ngwo, “Yize Zambi Analingi Hali Yena.” Barbara kakanyingikine ngwenyi, mukanda wacho kautumine kuli lunga ni pwo waze echele kulingila Yehova. Ayo katangile kaposhi wacho ha yisuho yinji. Lunga yevwa ngwe Yehova te kanahanjika nenyi. Ayo yaputuka kukunguluka ni kulingila Yehova chipwe ngwe kwapalikile miaka kuhiana 27, chize haze ahichikile Yehova. Achinyonga kuwaha chize Barbara evwile ni utakamiso uze awanyine ha kunyingika ngwenyi, mukanda wacho wakwashile akwo!
Yehova kakutwaha tachi kupalikila mu (1) kulemba (2) mu Mbimbiliya (3) muli mandumbu jetu akwa-Kristu (4) ni mu mulimo wa kwambujola (Tala maparagrafu 9-10, 12, 14)
18. Yika twatamba kulinga mba tuyuke ha tachi ja Zambi?
18 Yehova kakutwaha yuma yinji yize yakutwaha tachi, ngwe kulemba, Mbimbiliya, mandumbu jetu a ku ufulielo ni mulimo wa kwambujola. Muze twakuzachisa yuma yacho, twakusolola ngwetu tunajikijila ha ndundo ni ha ukwaso wa Yehova. Nunga ni kufuliela muli Tatenu wa mu malilu, nawa pwako ni shindakenyo ngwo, iye kakulisolola kupwa “mukwa tachi kukwasa yoze uli ni mbunge yingunu kuli iye.”—2 Sango 16:9.
MWASO 61 Nungenu, Enu Yela!
^ kax. 5 Tuli ha mashimbu akalu, alioze Yehova kakutwaha tachi jize tunafupiwa hanga tuhase kunyongonona. Ha mutwe uno, mutumonaho chize Yehova akwashile postolo Paulu ni Timoteu hanga anunge ni kushishika chipwe muze te akupalika mu yipikalo. Nawa mutumona yuma yiwana yize Yehova akutwaha musono hanga tununge ni kunyongonona.
^ kax. 2 Jina liapwa kwalumuna.
