1-2. Chikuma chika chize chatamba kututwala kuzanga mukanda wa Usolwelo?

 ACHINYONGA ngwe umwe kakusanyika hanga utale foto jenyi. Muze unatale foto jacho, mumona atu anji waze kuwanyingikine. Alioze ha foto yimwe, mumana hanga uyitale kanawa. Mumu liaka? Mumu uli ha foto yacho. Muze unayitale, mufupa kwiwuluka mashimbu waze nwayikwachile ni ku chihela kuze nwapwile. Nawa mweseka kufupaho atu akwo waze unanyingika. Foto yacho muyipwa ni ulemu unji kuli yena.

² Mukanda wa Usolwelo uli ngwe foto yacho. Mumu liaka? Mumu lia yikuma yaali. Chitangu, mukanda uno wa mu Mbimbiliya, yetu ausonekenene. Mu versu yitangu twakutangamo ngwetu: “Usolwelo wa Yesu Kristu, uze Zambi amuhele mukulweza kuli ndungo jenyi chize chatamba kupwa nikawashi.” (Uso. 1:1) Kashika, yuma yize yinasonewa mu mukanda uno kuyatalile hali atu eswe, alioze hali yetu, tuvumbi twa Zambi. Yetu tuvumbi twa Zambi, kutwatambile kukomoka ha kunyingika ngwetu, tunamanununa uprofeto uze uli mu mukanda uno ulemu. Mu maliji akwo, tunalimono “ha foto.”

3-4. Kulita ni mukanda wa Usolwelo, ha shimbu lika uprofeto wamo te muputuka kumanunuka, nawa yika twatamba kulinga?

³ Chikuma chamuchiali, chinatale ha mashimbu waze uprofeto wacho watamba kumanunuka. Postolo Yoano kambile hakutwala ku mashimbu jacho ngwenyi: “Napwile mu Spiritu ha tangwa lia Mwene.” (Uso. 1:10) Muze Yoano asonekene maliji wano kota ha 96 M.J., “tangwa lia Mwene” te lichili kusuku.  (Mateu 25:14, 19; Luka 19:12) Alioze kulita ni uprofeto wa mu Mbimbiliya, tangwa liacho liaputukile ha mwaka 1914, muze Yesu amusele ngwe Mwanangana mu malilu. Kukatuka ha mwaka wacho, uprofeto uli mu mukanda wa Usolwelo uze unatale hali atu ja Zambi, yiuputuka kumanunuka. Chochene, haliapwila tuli ha “tangwa lia Mwene”!

⁴ Amu tuli ha mashimbu wano alemu, yetu e twatamba kulihulikila chinji ha chiyulo cha zango chize chili ha Usolwelo 1:3 chinambe ngwo: “Kawaha yoze matanga, ni waze mevwa maliji a uprofeto uno, waze mafunga yuma yize yinasonewamo: mumu mwaka hakamwihi uli.” Chochene, twatamba ‘kutanga ni liji mwilu’ hanga ‘twivwe maliji a uprofeto uno’ ni ‘kwafunga.’ Maliji aka amwe waze twatamba kufunga?

5. Kuchi mukanda wa Usolwelo unatukwase kunyingika nyi Yehova kakutayiza uwayilo wetu?

⁵ Kukatuka mu kapitulu mutangu wa Usolwelo, twakulilongesa ngwetu, Yesu kananyingika kanawa yuma yize yakulingiwa mu yikungulwila. (Uso. 1:12-16, 20; 2:1) Chino chinasoloka zwalala ha maliji waze Yesu atumine ku yikungulwila shimbiali ya mu Azia Yikehe. Ha maliji jacho, iye yahana yiyulo ya pundu hanga akwase akwa-Kristu ku sekulu yitangu awayile Yehova mu jila yize mwene matayiza. Maliji jacho kanatale nawa hali tuvumbi eswe a Zambi musono. Yika twalilongesa? Twalilongesa ngwetu, Mwata wetu, Yesu Kristu, kananyingika kanawa chize tuli ku ufulielo. Iye kakutusongwela ni kutufunga, kashika kukushi chuma nichimwe chize keshi kumona. Kananyingika yize twatamba kulinga mba tununge ni kupwa ni utayizo wa Yehova. Usongwelo uka Yesu ahanyine uze twatamba kwononokena musono?

6. (a) Kulita ni maliji a Yesu waze ali ha Usolwelo 2:3, 4, kapinda muka wapwile mu chikungulwila cha Efwesu? (b) Yika twalilongesa ha lusango yono?

⁶ Tanga Usolwelo 2:3, 4. Kutwatambile kutokesa zango lietu litangu lize twapwile nalio hali Yehova. Maliji a Yesu ku chikungulwila cha Efwesu, kasolwele ngwo ayo te kananyongonona ni kununga kulingila Yehova chipwe ngwe kapwile ni yipikalo yeka ni yeka. Chipwe chocho, ayo katokesele zango lize apwile nalio ku uputukilo. Nyi kakasele tachi hanga apwe nawa ni zango liacho, kachi uwayilo wo te kechi kuutayiza. Chizechene nawa, ni yetu musono, twatamba kulinga yuma yinji hi wika ko kunyongonona. Twatamba kunyongonona ha yuma yalita. Zambi yetu keshi kulihulikila wika ha yize twakulinga, alioze kakulihulikila nawa ha yize yakututwala mba tulinge yuma yacho. Yuma yize yakututwala tumulingile yikwete ulemu kuli iye, mumu kanazange hanga uwayilo wetu ukatuke ha zango lia ku mbunge ni usakwililo.—Yishi. 16:2; Marku 12:29, 30.

7. (a) Kulita ni Usolwelo 3:1-3, kapinda muka Yesu amwene mu chikungulwila cha Sarte? (b) Yika twatamba kulinga?

⁷ Tanga Usolwelo 3:1-3. Twatamba kununga ni kulawola. Mu chikungulwila cha Sarte, mandumbu kapwile ni kapinda walisa. Chipwe ngwe kunyima kapwile ni kusa tachi mu mulimo wa Yehova, nihindu kulutwe yazeya ku ufulielo. Hachino, Yesu yaalweza hanga ‘alawole.’ Utowezo uka twawana hano? Tunanyingika ngwetu Yehova kechi kavulama milimo yetu. (Hepre. 6:10) Alioze kutwatambile kunyonga ngwetu, amu te twakumulingila kunyima, kutwafupiwile kumulingila haliapwila. Chipwe ngwe kutushi ni  uhashi ngwe uze twapwile nawo kunyima, nihindu twatamba kulihana chinji mu “milimo ya Mwene” ni kununga ni kulawola ndo ku songo.—1 A-Kori. 15:58; Mateu 24:13; Marku 13:33.

8. Kulita ni Usolwelo 3:15-17, yika twalilongesa ha maliji a Yesu kuli mandumbu a mu Laotisea?

⁸ Tanga Usolwelo 3:15-17. Twatamba kulihana chinji mu mulimo wa Yehova ni kumuwayila ni mbunge yeswe. Maliji a Yesu ku chikungulwila cha Laotisea kasolwele kapinda walisa. Ayo kapwile ‘asaluka’ mu uwayilo wo. Mumu lia uswelele wo, Yesu yaamba ngwenyi te hapwa ‘akwa kulungajala ni hunya.’ Ayo katambile kusolola zango linji kuli Yehova ni mu uwayilo wenyi. (Uso. 3:19) Yika twalilongesa? Nyi twamona ngwetu zango lietu kuli Yehova linatepuluka, twatamba kusakwilila chinji ha kulia cheswe cha ku ufulielo chize iye akutwaha mu ululikiso wenyi. (Uso. 3:18) Kutwatambile kutepulula zango lietu mu mulimo wa Yehova ha kukisa mashimbu ni tachi jetu hanga tufupe mwono upema hano hashi.

9. Ponde yika twatamba kwehuka kulita ni maliji a Yesu kuli akwa-Kristu mu Perekamu ni Tayatera?

⁹ Twatamba kwehuka malongeso a yitanganyanyi. Yesu kalitunyine amwe mu chikungulwila cha Perekamu mumu lia kuneha kulihandununa mukachi ko. (Uso. 2:14-16) Iye yachichimieka akwa-Kristu a mu Tayatera waze ehukile “yuma ya muma mwajotoka ya Satana,” ni kwakolweza hanga ‘alalaminye’ ku umwenemwene. (Uso. 2:24-26) Akwa-Kristu jako waze akokolokele ku ufulielo mumu lia kukaula malongeso a mahuza katambile kulikonyeka. Mba yika mutwamba hali yetu musono? Twatamba kulituna malongeso eswe waze akulimika ni manyonga ja Yehova. Yitanganyanyi mahasa kupwa ni “uwayilo wa kumeso,” alioze “kakulikala tachi jawo.” (2 Timo. 3:5) Muchipwa chashi kunyingika malongeso a mahuza ni kulitunawo nyi mutupwa alongi apema a Liji lia Zambi.—2 Timo. 3:14-17; Yunda. 3, 4.

10. Yika nawa mutuhasa kulilongesa ha yize Yesu ambile ku chikungulwila cha Perekamu ni cha Tayatera?

¹⁰ Kutwatambile kulinga hanji kutayiza mutapu weswawo wa upangala. Mu chikungulwila cha Perekamu ni cha Tayatera mwapwile nawa kapinda mukwo. Yesu kahishile amwe mu yikungulwila yacho mumu lia kutayiza utanji ni upangala. (Uso. 2:14, 20) Yika twalilongesa? Twalilongesa ngwetu, kutwatambile kushimbwila hanga Yehova atukonekene nyi  mutulinga yuma ya upangala, chipwe ngwe twakumulingila ha miaka yinji nawa tuli ni yiteli yinji. (1 Samue. 15:22; 1 Petu. 2:16) Iye kanashimbwila hanga tununge ni kuvumbika shimbi jenyi, chipwe ngwe yitanga ya akwa-hashi muyinunga ni kupiha.—A-Efwe. 6:11-13.

11. Yika twalilongesa ndo haliapwila? (Tala nawa mushete, “ Malongeso Kuli Yetu Musono.”)

¹¹ Yika twalilongesa ndo haliapwila? Twalilongesa ngwetu, twatamba kupwa ni shindakenyo ngwo Yehova kanatayiza uwayilo wetu. Nyi mutulinga yimwe yize muyihasa kupihisa uwayilo wetu, twatamba kwalumuna yitanga yetu kawashi-washi hanga tupwe ni utayizo wa Yehova. (Uso. 2:5, 16; 3:3, 16) Yesu kasolwele nawa chuma chikwo ha maliji jenyi ku yikungulwila yacho. Chuma chika chenacho?

12. Yika mutuhasa kulilongesa ha sango jize Yesu atumine ku chikungulwila cha Semina ni cha Filadelfia? (Usolwelo 2:10)

¹² Haliapwila tuhengwolenu sango jize Yesu atumine ku chikungulwila cha Semina ni cha Filadelfia. Iye kalwezele akwa-Kristu mu yikungulwila yacho ngwo, kanda evwa woma wa yihungumiona, mumu nyi manunga ni kushishika Yehova te maawahisa. (Tanga Usolwelo 2:10; 3:10) Yika mutuhasa kulilongesa ha sango jino? Twatamba kushimbwila yihungumiona ni kulilulieka hanga tuyikumbe. (Mateu 24:9, 13; 2 Kori. 12:10) Mumu liaka chikuma chino chili chilemu?

13-14. Kuchi kulingiwa cha yuma yize anatongola ha Usolwelo 12 chakwachile hali atu ja Zambi?

¹³ Mukanda wa usolwelo unatulweze ngwo, atu ja Zambi te maahungumiona “ha tangwa lia Mwene,” ha matangwa waze tuli musono. Usolwelo kapitulu 12 unasolola ngwo, mwilu mwapwile jita hanyima lia kupwisa Yesu Mwanangana. Mikele—Yesu Kristu muze afunyine mu malilu hamwe ni angelo jenyi, yasa jita ni Satana ni andemoniu jenyi. (Uso. 12:7, 8) Chocho, akwa-kole jacho a Zambi yaahuma mu malilu ni kwanyasa hano hashi haze ananehe lamba kuli atu. (Uso. 12:9, 12) Mba kuchi yino yinakwate hali atu ja Zambi?

¹⁴ Usolwelo uze unahateko unatulweze chize Satana evwile. Amu keshi nawa ni ulite wa kunjila kuze kwatwama Yehova, iye kanevwila uli masalila ja akwa-Kristu akuwayisa waze anamanyinako Wanangana wa Zambi hano hashi, ni kuhana “shindakenyo ya Yesu.” (Uso. 12:17; 2 Kori. 5:20; Efwe. 6:19, 20) Kuchi uprofeto uno wamanunukine?

15. Yela aali waze anatongola ha Usolwelo kapitulu 11 aya, nawa yika yalingiwile kuli ayo?

¹⁵ Satana katwalile akwa-kole ja Zambi hanga ahungumione akwa-Kristu akuwayisa waze te akusongwela mulimo wa Wanangana. Malunga wano kapwile ngwe ‘yela aali’  anatongola mu mukanda wa Usolwelo waze ashihile. * (Uso. 11:3, 7-11) Ha mwaka 1918, mandumbu nake waze te akusongwela ululikiso yaaliongela yuma, chocho yaahisa ni kwasa mu zuwo lia ususu ha miaka yinji. Atu anji kanyongene ngwe mulimo wa akwa-Kristu wano akuwayisa ‘wafwile.’

16. Yuma yika yakukomwesa yize yalingiwile ha mwaka 1919, nawa yika Satana ananungu ni kulinga chize ha mashimbu jacho?

¹⁶ Uprofeto uze uli ha Usolwelo kapitulu 11 unambe nawa ngwo, hanyima lia mashimbu akehe ‘yela jacho aali’ te mahinduka ni mwono. Uprofeto uno wamanunukine mu jila yakukomwesa. Mandumbu jacho kakalingile chipwe mwaka mu zuwo lia ususu. Ku uputukilo wa mwaka 1919, mandumbu jacho akuwayisa yaatusula, chocho mulonga uze aasumine yiuhwa. Hazehene, ayo yaputuka nawa kusongwela mulimo wa Wanangana. Alioze, chino kuchakakwikile Satana kulimika ni atu ja Zambi. Chize ha mashimbu jacho, Satana yasongwela “lwiji” wa yihungumiona hali atu eswe a Zambi. (Uso. 12:15) Chochene, tulieswe tunafupiwa “kunyongonona ni ufulielo.”—Uso. 13:10.

17. Ukwaso uka tuvumbi twa Zambi atambwile uze te keshi ni kushimbwila chipwe ngwe te kanaahungumiona kuli Satana?

¹⁷ Usolwelo kapitulu 12 unasolola ngwo, atu ja Zambi te matambula ukwaso mu mulali uze te keshi ni kushimbwila. Mukanda wa Usolwelo unalumbununa ngwo, “hashi” te muhamina “lwiji” wa yihungumiona. (Uso. 12:16) Yino ye yalingiwileko lume. Ha mashimbu amwe, maululikiso a hano hashi ha Satana ngwe yota ya usopelo, yakukwasa atu ja Zambi. Ha yisuho yimwe, tuvumbi twa Yehova hanakumbu mu yota ya usopelo ni kupwa ni ndambu ya utuswilo. Kuchi ayo azachishile utuswilo wacho? Kazachishile utuswilo wacho ni mana ha kulinga mulimo uze Yehova aehele. (1 Kori. 16:9) Mulimo wacho yika unachingi?

18. Mulimo uka ulemu twakulinga ha matangwa wano a kusula?

¹⁸ Yesu kaprofetezele ngwenyi, tumbaji twenyi te mambujola ‘sango lipema lia Wanangana [wa Zambi]’ hashi heswe shimbu songo kanda liza. (Mateu 24:14) Muze akwambujola, ayo kakupwa ni ukwaso wa mungelo hanji chizavu cha angelo waze anasolola  ngwo, “kali ni sango lipema lia mutolo mukwambujola kuli akwa hashi, ku mavungu eswe, ni ku minyachi yeswe, ni ku malimi eswe, ni kuli atu eswe.”—Uso. 14:6.

19. Sango jikwo jika jize atu ja Yehova atamba kwambujola?

¹⁹ Atu ja Zambi katambile wika kwambujola sango lipema lia Wanangana. Ayo katamba nawa kukwasa mulimo wa angelo uze analumbununa ha Usolwelo kapitulu 8 ndo 10. Angelo jacho kahanjikile ha yilungo yize te muyilingiwa kuli atu waze akulituna Wanangana wa Zambi. Yela ja Yehova kakwambujola sango ja upatwilo jize japwa ngwe, “chiwe ni kahia” ha kulumbununa chize Zambi makanongesa yuma hano hashi ha Satana. (Uso. 8:7, 13) Atu kanafupiwa kunyingika ngwo, songo lia hano hashi linakundama hanga alumune yitanga yo ni kulingila Yehova mba akaalamwine ha tangwa lia ufwatulo wenyi. (Zefa. 2:2, 3) Alioze sango jacho atu anji keshi kujizanga. Kashika, mba twambujole sango jacho tunafupiwa kupwa ni hamu. Ha mashimbu a luyinda munene, sango ja upatwilo wakasula mujikevwisa atu kupiha.—Uso. 16:21.

20. Yika mutushimutwina ha mitwe yaali yize muyihataho?

²⁰ Twatamba kwononokena “maliji a uprofeto uno,” mumu ni yetu tuli mukachi ka umanunuko wa yize twakutanga mu mukanda wa Usolwelo. (Uso. 1:3) Mba kuchi mutuhasa kunyongonona mu yihungumiona ni kununga ni kwambujola sango jacho ni hamu? Yuma yaali muyitukwasa kuchilinga: Chitangu, kunyingika yize mukanda wa Usolwelo unambe hali akwa-kole ja Zambi, chamuchiali, kunyingika yiwape yize mutukazuka nyi mutununga ni kushishika. Yikuma yino mutuyishimutwina ha mitwe yaali yize muyihataho.