1. Chiyulo chika chilemu chize atu eswe atamba kukwata?

 MUSONO, atu eswe katamba kukwata chimwe chiyulo chilemu. Chakukwasa Yehova Zambi ngwe nguvulu yoze watela kuyula malilu ni hashi, hanji kukwasa mukwa-kole yenyi Satana Ndiapu. Hita mutu katamba kusakula sali limuwika, katambile kupwa hakachi-ni-hakachi. Chiyulo chize makwata muchikasolola nyi makazuka mwono wa mutolo nyi ka. (Mateu 25:31-33, 46) Ha “luyinda munene,” ayo makaasa chilayi chakwalamwina hanji chakwanongesa.—Uso. 7:14; 14:9-11; Eze. 9:4, 6.

2. (a) Yika A-Hepreu 10:35-39 unatukolweza kulinga? (b) Kuchi mukanda wa Usolwelo muhasa kutukwasa?

² Tanga A-Hepreu 10:35-39. Nyi musakula kukwasa unguvulu wa Yehova, acho wakwata chiyulo cha mana. Haliapwila unafupiwa kukwasa akwenu hanga no akwate chiyulo chalita. Mba wakwase, muhasa kuzachisa sango jize jili mu mukanda wa Usolwelo. Mukanda uno, unasolola yize muyikalingiwa kuli atu waze akulimika ni Yehova ni yiwape yize makazuka atu waze akukwasa unguvulu wenyi ni ushishiko weswe. Chili chilemu kulilongesa umwenemwene uno ulemu. Nyi twachilinga, muchikolesa zango lietu lia kununga ni kulingila Yehova. Chikwo nawa, mutuhasa kuzachisa yize twakulilongesa hanga tukwase akwetu asakule kupwa sali lia Yehova ni kununga ni kumulingila.

3. Yika mutushimutwina ha mutwe uno?

 ³ Ha mutwe uno, mutushimutwinaho yihula yino: Yika muyikalingiwa kuli atu waze akukwasa Wanangana wa Zambi? Nawa yika muyikalingiwa kuli atu waze akukwasa ngongo muchila yoze anatongola mu mukanda wa Usolwelo?

4. Chizavu chika postolo Yoano amwene chili hamwe ni Yesu mu malilu?

⁴ Mu umwe usolwelo, postolo Yoano yamona yizavu yiali yize yinakwase wata wa Yehova, ni kuzuka yiwape ya mwono wa mutolo. Chizavu chitangu chili ni atu 144.000. (Uso. 7:4) Ayo kanaachiza hashi hanga alinge umwe unguvulu hanji ngwetu Wanangana hamwe ni Yesu mu malilu. O kumakayula hashi heswe hamwe ni Yesu. (Uso. 5:9, 10; 14:3, 4) Mu usolwelo wacho, Yoano yaamona kanamane kumeso ja Yesu mu malilu ha Mulundu wa Zaione.—Uso. 14:1.

5. Yika kwasala hakehe hanga yilingiwe kuli masalila a 144.000?

⁵ Kukatuka ku sekulu yitangu ndo musono, tununu twa atu kakwasakula hanga apwe mukachi ka 144.000. (Luka 12:32; Roma 8:17) Chipwe chocho, Yoano yamulweza ngwenyi ha matangwa a kusula, hano hashi te muhapwa amwe masalila hanji ngwetu akwa-Kristu akehe akuwayisa. “Masalila” wano, makatambula “chijikilo” chakasula cha utayizo wa Yehova shimbu Luyinda munene kanda achiputuka. (Uso. 7:2, 3; 12:17) Ha amwe mashimbu ha luyinda munene, masalila wano makaya mu malilu hanga alichinge ni akwo mu chizavu cha 144.000, waze aliangile kufwa ni ushishiko. Momo, o makayula hamwe ni Yesu mu Wanangana wa Zambi.—Mateu 24:31; Uso. 5:9, 10.

6-7. (a) Chizavu chikwo chika chize Yoano amwene, nawa yika twalilongesa hali ayo? (b) Mumu liaka masalila ni “mbunga yinene” atamba kulimona ha Usolwelo kapitulu 7?

⁶ Hanyima lia kumona chizavu chize muchikaya mu malilu, Yoano yamona nawa “mbunga yinene.” Kulisa ni 144.000, atu wano kutuchi kuhasa kwalula. (Uso. 7:9, 10) Yika tunanyingika hakutwala kuli ayo? Yoano yamba ngwenyi: “Wano kanatuhuka mu luyinda munene, hanakoso mahina jo ja ungunu, hanaatomesa mu manyinga ja mwe Mwana-panga.” (Uso. 7:14) Hanyima lia kwalamwina ha luyinda munene, “mbunga yinene” muyikatwama hano hashi ku miaka ya mutolo ni kuzuka yiwape ya Zambi.—Samu 37:9-11, 27-29; Yishi. 2:21, 22; Uso. 7:16, 17.

⁷ Nyi tuli ni kutalatala cha kuya mu malilu hanji cha kutwama hano hashi, shina twakulimona ha maliji waze ali ha Usolwelo kapitulu 7? Twatamba kulimonaho. Mumu mashimbu jacho makapwa apema kuli yizavu yeswe yiali ya tuvumbi twa Zambi! Nyi mutusakula kukwasa Wanangana wa Zambi, mutukawahilila chinji. Yika nawa mukanda wa Usolwelo unatulweze hakutwala ku luyinda munene?—Mateu 24:21.

8. Kuchi luyinda munene makaputuka, nawa yika atu anji makalinga?

⁸ Ngwe chize twamonanga ha mutwe wapalika, kwasala hakehe hanga manguvulu a hano hashi alumukine Babilonia Yinene, we uwayilo wa mahuza wa hashi heswe. (Uso. 17:16, 17) Yuma yino ye muyikatwala ku luyinda munene. Shina chino muchikatwala atu anji hanga aputuke kuwayila Yehova? Ka. Mumu Usolwelo kapitulu 6 unasolola ngwo ha mashimbu jacho akalu, atu waze keshi kuwayila  Yehova, makafupa ufunge kuli manguvulu ni akwa-mingoso ya hano hashi waze anatese ni milundu. Amu atu jacho kechi kakwasa Wanangana wa Zambi, acho makapwa akwa-kole jenyi.—Luka 11:23; Uso. 6:15-17.

9. Ha luyinda munene, kuchi atu makahasa kumona ngwo tuvumbi twa Yehova kanalise ni waze keshi kumuwayila, nawa yika muyikalingiwa kuli atu ja Zambi?

⁹ Kwamba pundu, tuvumbi twa Yehova ashishika makalisa ni atu akwo ha mashimbu jacho a luyinda munene. Hano hashi, ayo wika e makanunga ni kuwayila Yehova Zambi ni kulituna kukwasa “ngongo.” (Uso. 13:14-17) Amu makanunga ni kushishika kuli Yehova, akwa-kole jenyi makaevwila uli. Hachino, chizavu cha akwa-mavungu muchikalukukila atu ja Zambi hashi heswe. Mbimbiliya yakuvuluka kulukuka chino ngwo cha Ngoke wa Mangoke.—Eze. 38:14-16.

10. Kulita ni Usolwelo 19:19-21, yika Yehova makalinga muze makalukukila atu jenyi?

¹⁰ Yika Yehova makalinga muze malukukila atu jenyi? Mwene kanatulweze ngwenyi: “Ufwatulo wami muukakasumuka.” (Eze. 38:18, 21-23) Usolwelo kapitulu 19 unasolola yize muyikalingiwa hanyima. Yehova makatuma Mwanenyi hanga apulwile atu jenyi ni kunongesa akwa-kole jenyi. Yesu ni ‘maswalale a mwilu’ waze anachingi angelo ashishika ni atu 144.000, makasa jita ni Ngoke wa Mangoke. (Uso. 17:14; 19:11-15) Yika jita yino muyikalinga? Muyikanongesa maululikiso ni atu eswe waze akulimika ni Yehova!—Tanga Usolwelo 19:19-21.

11. Chuma chika chilemu chize anatongola mu mukanda wa Usolwelo?

¹¹ Tuvumbi twa Yehova ashishika hano hashi makawahilila chinji ha chize Zambi makaalamwina ni kunongesa akwa-kole jenyi! Ha mashimbu jacho, atu eswe hano hashi makawahilila chinji! Chipwe ngwe mu malilu mumukapwa uwahililo unji muze Babilonia Yinene mayinongesa, nihindu mukukapwa nawa chuma chikwo chize muchikaneha uwahililo unji kuhiana. (Uso. 19:1-3) Chuma chacho kanachitongola mu mukanda wa Usolwelo—“umbachiso wa mwe Mwana-panga.”—Uso. 19:6-9.

12. Kulita ni Usolwelo 21:1, 2, ha shimbu lika umbachiso wa Mwana-panga muukalingiwa?

¹² Ha shimbu lika umbachiso wacho muukalingiwa? Ha limwe shimbu muze jita ya Armagedone kanda yichiputuka, akwa-Kristu eswe 144.000 makapwa mu malilu. Alioze, umbachiso wa Mwana-panga kuuchi kalingiwa ha shimbu liacho. (Tanga Usolwelo 21:1, 2.) Umbachiso wacho muukalingiwa hanyima lia jita ya Armagedone, muze makanongesa akwa-kole ja Zambi eswe.—Samu 45:3, 4, 13-17.

13. Yika muyikalingiwa ha umbachiso wa Mwana-panga?

¹³ Yika muyikalingiwa ha umbachiso wa Mwana-panga? Umbachiso wakuchinga lunga ni pwo, chizechene nawa, umbachiso wa Mwana-panga muukachinga Mwanangana Yesu Kristu ni “ndungi” yenyi 144.000. Umbachiso uno ulemu, muukapwa uputukilo wa unguvulu waha uze muukayula hashi ha miaka 1.000.—Uso. 20:6.

14-15. Usolwelo kapitulu 21 unatese 144.000 ni yika? (Tala chizulie ha chifukilo.)

¹⁴ Kusulaho, Usolwelo kapitulu 21 yiutesa 144.000 ni limbo lipema anavuluka ngwo, “Yerusaleme Yaha.” (Uso. 21:2, 9) Limbo liacho, lili ni fundamentu ya mawe 12 haze hali hakusoneka “kumi ni majina aali, ja e kumi ni  apostolo aali a mwe Mwana-panga.” Mumu liaka yino yakomwesene Yoano? Mumu ha mawe jacho, iye kamweneho jina lienyi ha liwe limwe. Chino chapwile chiwape chinene!—Uso. 21:10-14; Efwe. 2:20.

¹⁵ Limbo lino linalise ni membo akwo. Mumu lili ni tapalo ya kulinga ni oru yipema, yikolo 12 ya kakanga, yipanga ni fundamentu yakusa mawe a ndando ni yeseko yalita. (Uso. 21:15-21) Alioze, Yoano kamwene ngwenyi hanahono chuma chimwe! Yamba nawa ngwenyi: “Chamwenemo tembele niyimwe: mumu Mwene Zambi Mukwa-Ndundo-Jeswe, ni mwe Mwana-panga, o yapwa tembele yalio. Limbo kulishi ni tangwa, chipwe kakweji kupangukamo, ka; mumu uhenya wa Zambi hiunapangulwisamo; mwe Mwana-panga iye pangu liamo.” (Uso. 21:22, 23) Waze analingi chihanda cha Yerusaleme yaha makapwa hamwe ni Yehova. (Hepre. 7:27; Uso. 22:3, 4) Hachino, Yehova ni Yesu kali tembele ya mu limbo liacho.

16. Kuchi atu makapwa ha mashimbu a Kanunu ka Miaka ya Kuyula cha Wanangana wa Zambi?

¹⁶ Akwa-Kristu akuwayisa kakuzanga chinji limbo liacho. Alioze, waze ali ni kutalatala cha kutwama hano hashi no katamba kulizanga. Ha Kanunu ka Miaka ya Kuyula cha Wanangana wa Zambi, Yerusaleme Yaha muyikaneha yiwape yinji hano hashi. Yoano kamwene yiwape yacho ngwe “lwiji wa meya a mwono.” Sali ni sali lia lwiji wacho, kuli ‘mitondo ya mwono’ yize yakwima mafwo a “kuwuka no mavungu.” (Uso. 22:1, 2) Kashika, atu eswe waze makapwa hano hashi, makazuka yiwape yacho. Chikwo nawa, eswe waze makwononokena Yehova, hakehe-hakehe makapwa angunu. Kukuchi kapwa nawa misongo, yikola chipwe masoji a yinyengo.—Uso. 21:3-5.

17. Ngwe chize Usolwelo 20:11-13 unasolola, aya makazuka yiwape ha Kanunu ka Miaka?

¹⁷ Mba aya makazuka yiwape yino yipema? Atu atangu waze makazuka yiwape yino, kali mbunga yinene yize makalamwina ha Armagedone hamwe ni ana waze hanji makasemuka mu chifuchi chaha. Alioze, Usolwelo kapitulu 20 unalakenya nawa ngwo, afu makaahindwisa. (Tanga Usolwelo 20:11-13.) “Akwa ululi” waze hanafu ni “yihenge” waze afwile chakuhona kulilongesa hakutwala kuli Yehova, eswe makaahindwisa hanga akatwame  hano hashi. (Yili. 24:15; Yoa. 5:28, 29) Shina chino chinalumbunuka ngwo atu eswe waze hanafu makaahindwisa hanga atwame hano hashi ha Kanunu ka Miaka? Ka. Atu waze alitunyine kulingila Yehova shimbu te kanda achifwa kechi kaahindwisa. Mumu o kapwile ni uhashi wa kuzuka mwono wa mutolo mu Paraisu, alioze ene yasolola ngwo kauzangile.—Mateu 25:46; 2 Tesa. 1:9; Uso. 17:8; 20:15.

18. Kuchi hashi muhakapwa ku songo lia kanunu ka miaka?

¹⁸ Kusongo lia kanunu ka miaka, atu eswe waze makatwama hano hashi makapwa angunu. Ha shimbu liacho, kukushi niumwe yoze makapinda ni shili yize yakatukile kuli Alama. (Roma 5:12) Shingo lieswe lia shili ya Alama, makalichiza liakulu. Hachino, atu eswe hano hashi makapwa ni “mwono,” mumu eswe makapwa angunu ku songo lia kanunu ka miaka.—Uso. 20:5.

19. Mumu liaka kunafupiwa cheseko chakasula?

¹⁹ Tunanyingika ngwetu, Yesu kanungine ni kushishika kuli Zambi chipwe muze Satana amwesekele. Shina atu eswe angunu makahasa kushishika kuli Yehova muze Satana maeseka? Hita mutu makakumbulula chihula chino ha kushishika kuli Yehova muze makatusula Satana mu jondo ku songo lia kanunu ka miaka. (Uso. 20:7) Waze makashishika kuli Zambi ha cheseko cha kasula, makazuka mwono wa mutolo ni kupwa ni utuswilo wamwenemwene. (Roma 8:21) Waze makalichinga ha uhulia wa Satana, makaanongesa hamwe ni Ndiapu ni andemoniu jenyi.—Uso. 20:8-10.

20. Kuchi unevu hanyima lia kuhengwola uprofeto uli ha mukanda wa Usolwelo?

²⁰ Kuchi unevu hanyima lia kuhengwola yuma yize yili mu mukanda wa Usolwelo? Shina unawahilila ha kulimona mu uprofeto uno wakukomwesa? Kwamba pundu, chino chakukwasa usanyike akwenu hanga alichinge ni yetu mu uwayilo wamwenemwene. (Uso. 22:17) Amu hitwalilongesa yuma yino yize muyikalingiwa kulutwe lia matangwa, tunawahilila, nawa tunazange kwamba ngwe chize ambile postolo Yoano ngwenyi: “Amene; Tweya, Mwene Yesu.”—Uso. 22:20.