1-2. Mumu liaka shimbi jimwe jakupwa ni ulemu muze yimwe muyalumuka ku mwono wetu?

 HA TANGWA lia umbachiso wo, sandungi ni nandungi waze halilulieka kanawa, kakupanjika ni uhumikizo weswe pande ja ulo jize akwalingila. Shimbi jize akulumbununa mu pande jacho hi jaha ko kuli ayo. Alioze ha shimbu liacho, jakupwa ni ulemu unji ku mwono wo. Mumu liaka? Mumu kukatuka hazehene, ayo eswe aali majikaula mu ulo wo.

² Yino ye yakulingiwa nawa muze akwa-Kristu waze alimbata akupwa yisemi. Hakupalika cha miaka ayo mahasa kwivwa pande jinji hakutwala ku kulela ana. Alioze muze masema, shimbi jize akwivwa-vwa chinji mujipwa ni ulumbunwiso waha ku mwono wo. Ayo mapwa ni mwana yoze ene malela. Chino chapwa chiteli chinene! Chochene lume, nyi yimwe muyalumuka ku mwono wetu, shimbi jimwe ja mu Mbimbiliya ja kupwa ni ulemu unji kuli yetu. Chino che chakutwala tuvumbi twa Yehova mba atange Yisoneko ni kuyipukuna “matangwa eswe” ku mwono wo, ngwe chize alwezele mianangana a mu Izalele hanga alinge.—Shimbi 17:19.

3. Yika mutushimutwina ha mutwe uno?

³ Yisemi, yenu nuli ni chuma chinene chize mukwa-Kristu mahasa kupwa nacho, chuma chacho chili kulongesa ana jenu kuzanga Yehova. Alioze nunafupiwa kulinga yuma yinji hi wika ko kwatela lusango hakutwala kuli Zambi. Nwatamba kwakwasa hanga amuzange ni mbunge yo yeswe. Yika munuhasa  kulinga mba nukwase ana jenu kuzanga Yehova? Ha mutwe uno, mutushimutwinaho shimbi jiwana ja mu Mbimbiliya jize mujinukwasa kuchilinga. (2 Timo. 3:16) Mutumona nawa chize yisemi amwe akwa-Kristu akuyuka ha kukaula yiyulo ya mu Mbimbiliya.

4. Shimbi yika muyihasa kukwasa yisemi mba alongesa ana jo kuzanga Yehova ni mbunge yeswe? (Tiangu 1:5)

⁴ Shimbi 1: Kufupa ukwaso wa Yehova. Eta kuli Yehova akwehe mana waze unafupiwa hanga ukwase ana je kumuzanga. (Tanga Tiangu 1:5.) Iye mwe mahasa kutwaha yiyulo yesweyo mutufupiwa. Kuli yuma yinji yize yinatwehe shindakenyo yacho. Tutalenuho yaali. Chitangu, Yehova kali ni yinyingi yinji mumu lia kupwa chisemi. (Samu 36:9) Chamuchiali, yiyulo ya mana yize akuhana nihindu kuyakuyukisa.—Iza. 48:17.

5. (a) Yika ululikiso wa Yehova wakutuhwisa hanga akwase yisemi? (b) Ngwe chize twamona ha chinema, yika walilongesa ha chize ndumbu Amorim ni mukwo-pwo alelele ana jo?

⁵ Kupalikila mu Mbimbiliya ni mu ululikiso wenyi, Yehova kanatwehe kulia chinji cha ku ufulielo chize muchihasa kukwasa yisemi hanga alongese ana jo kumuzanga. (Mateu 24:45) Chakutalilaho, muhasa kuwana yikuma yipema ha mutwe unambe ngwo, “Ukwaso kuli Asoko” yize yapwile ni kutuhuka ha Despertai! haliapwila yili ha site yetu. Chikwo nawa, ha site yetu jw.org hali yinema yinji yize muyihasa kukwasa yisemi hanga alongese ana jo hakutwala kuli Yehova. *—Yishi. 2:4-6.

6. Kuchi umwe chisemi akwivwa ha usongwelo uze iye ni mukwo-pwo akutambula mu ululikiso wa Yehova?

⁶ Yisemi anji kakusakwilila chinji Yehova ha ukwaso uze akutambula mu ululikiso wenyi. Umwe chisemi avuluka ngwo Joe, yatayiza ngwenyi: “Kulela ana atatu mu umwenemwene hi mulimo washi ko. Yami ni mukwetu-pwo twakulemba kuli Yehova mashimbu eswe hanga atukwase. Chikwo nawa, nyi kwatuhuka chimwe chikuma hanji chinema, kanji-kanji twakumona ngwetu chaheta ha ola yalita hanga chitukwase kukumba yipikalo yize tunapalika. Twakusa tachi hanga tukaule  usongwelo wa Yehova.” Joe ni mukwo-pwo hananyingika ngwo, yinema ni yikuma yino yinakwase ana jo kukundama kuli Yehova.

7. Mumu liaka yisemi atamba kusa shindakenyo ngwo kakuhana chilweza chipema kuli ana jo? (A-Roma 2:21)

⁷ Shimbi 2: Pwako chilweza chipema. Ana kakutala yize yisemi jo akulinga nawa kanji-kanji kakuzanga kwaembulula. Alioze, kukushi chisemi mungunu. (Roma 3:23) Chipwe chocho, yisemi waze akwete mana kakusa tachi hanga ahane chilweza chipema kuli ana jo. (Tanga A-Roma 2:21.) Muze ahanjikile hali ana, umwe tata yamba ngwenyi: “Chizechene ngwe mbolo nyi twayitata mu yamwa kuyichi kushisa meya, ana no che apwa, kakwimbulula yuma yize akumona.” Yamba nawa ngwenyi: “Nyi kutushi kukaula yuma yize twakwalongesa, ayo matulweza.” Mba tukwase ana jetu azange Yehova, chitangu yetu ene twatamba kumuzanga ni kusolola zango liacho mu yitanga.

8-9. Yika walilongesa ha maliji ja Andrew ni Emma?

⁸ Kuli majila anji waze yisemi mahasa kulongeselamo ana jo kuzanga Yehova. Talenu yize ambile Andrew, umwe ndumbu mukweze wa miaka 17: “Yisemi jami nihindu te kakungulongesa ulemu wa kulemba. Hita ufuku, tata te kakulemba hamwe ni yami, chipwe muze yami mwene hinalemba kulu. Yisemi jetu nihindu te kakutulweza ngwo: ‘Munuhasa kuhanjika ni Yehova ha ola yeswayo munuzanga.’ Yize apwile ni kutulweza hakutwala ku kulemba yangukwachile chinji ku mbunge, kashika haliapwila nakulemba kuli Yehova ni mbunge yeswe nawa nakumumona ngwe Tata ya zango.” Yisemi, nyingikenu ngwenu zango lienu hali Yehova mulihasa kukwasa ana jenu hanga no amuzange.

⁹ Talenu nawa chilweza cha Emma. Muze tato ahichikile usoko, iye yahichika makongo anji waze apwile no hanga naye aafwete. Emma yamba ngwenyi: “Kwapwile mashimbu anji waze mama te keshi kupwa ni mbongo, alioze te kakutulweza mashimbu eswe chize Yehova akufunga ni kukwasa tuvumbi twenyi. Mutapu uze te akumbata mwono wenyi, wasolwele ngwo kakufuliela pundu muli Yehova. Mama kapwile ni kukaula yize te akutulongesa.” Longeso lika twawanaho? Yisemi mahasa kulongesa ana jo kupalikila mu chilweza cho chipwe muze yuma yinakale ku mwono wo.—Ngala. 6:9.

10. Ha mashimbu aka yisemi A-Izalele te mahasa kuhanjika ni ana jo hakutwala kuli Yehova? (Shimbi Yamuchiali 6:6, 7)

¹⁰ Shimbi 3: Hanjika ni ana je mashimbu eswe. Yehova kalwezele A-Izalele hanga apwe ni kulongesa ana jo hakutwala kuli iye mashimbu eswe. (Tanga Shimbi Yamuchiali 6:6, 7.) Yisemi jacho kapwile ni uhashi unji wa kuhanjika ni ana jo ha hita tangwa ni kwakwasa hanga azange Yehova ni mbunge yo yeswe. Chakutalilaho, umwe mwana wa lunga Ka-Izalele te mahasa kupalikisa mashimbu ni tato ha kumukwasa kulima minda hanji kucha mbuto. Ndumbwenyi wa pwo ha hita tangwa te mahasa kupalikisa mashimbu anji ni naye ha kumukwasa kululieka mazalo, kwanuka ni kulinga milimo yikwo ya ku zuwo. Muze yisemi ni ana apwile ni kukalakala hamuwika, ayo te kakuhasa kuhanjika hakutwala ku yuma yinji yilemu. Chakutalilaho, ayo kapwile ni kuhanjika ha upema wa Yehova ni chize te akukwasa usoko wo.

11. Ha shimbu lika yisemi akwa-Kristu mahasa kuhanjika ni ana jo?

¹¹ Musono, mwono unalise chinji ni wa ku mashimbu akunyima. Mu yifuchi yinji, ha tangwa yisemi ni ana keshi kuhasa kupalikisa mashimbu hamuwika. Yisemi mahasa kupwa  ku mulimo, ana ku shikola. Kashika, yisemi katamba kulanda mashimbu hanga apwe ni kushimutwina ni ana jo. (Efwe. 5:15, 16; Fwili. 1:10) Uwayilo wa mu usoko wakuhana mashimbu jacho. Alexander, umwe ndumbu mukweze yamba ngwenyi: “Tata kapwile ni kulinga katalilo wa uwayilo wa mu usoko, nawa te keshi kwecha chuma nichimwe hanga chitukwike kupwa hamuwika. Hanyima lia uwayilo, te twakuhanjika ha yikuma yilemu mu usoko.”

12. Ha mashimbu a uwayilo wa mu usoko, nyonga lika mwata wa mu usoko atamba kupwa nalio?

¹² Nyi uli mwata wa mu usoko, kuchi muhasa kululieka uwayilo wa mu usoko mu jila yize ana jenu mauzanga? Munuhasa kulilongesa ni ana jenu mukanda, Wahilila Ku Mwono Ku Miaka Yeswe! Mukanda uno, muunukwasa kushimutwina kanawa ni ana jenu. Echenu ana jenu hanga anulweze yize anevu ni yize yinaapikala, kanda nuzachisa uwayilo wa mu usoko hanga nwambambe yuma hanji kwaha fumbo. Senu tachi hanga nuhone kupihilila muze ana jenu malituna yimwe yize nwakwalongesa. Shimbu nwakumike, asakwilenu mumu lia kunulweza chize anevu, ni kwakolweza hanga anunge ni kuchilinga chakuhona kwivwa woma. Mba nukwase kanawa ana jenu, nwatamba kunyingika chize anevu ku mbunge.

13. Uhashi uka yisemi ali nawo wa kukwasa ana jo hanga akundame kuli Yehova?

¹³ Yisemi, zachisenu uhashi weswawo munupwa nawo hita tangwa hanga nukwase ana jenu kukundama kuli Yehova. Kanda nulongesa wika ana jenu hakutwala kuli Zambi ha mashimbu a longeso lia Mbimbiliya. Umwe mama avuluka ngwo Lisa, yamba ngwenyi: “Twazachishile yuma yeswe yize yatujingilika hanga tulongese ana jetu kuzanga Yehova. Chakutalilaho, muze kawa ketu te akulinga yuma yize yakwasehesa te twakwalweza ngwetu, Yehova kali Zambi ya uwahililo, kashika alingile yuma yimwe hanga yipwe ni kutuvwisa kuwaha.”

14. Mumu liaka chili chilemu yisemi kukwasa ana jo kusakula kanawa masepa? (Yishima 13:20)

¹⁴ Shimbi 4: Kwasa ana je asakule masepa apema. Liji lia Zambi linasolola zwalala  ngwo, masepa jetu mahasa kututwala tulinge yuma yipi hanji yipema. (Tanga Yishima 13:20.) Yisemi, shina nunanyingika masepa ja ana jenu? Kutala hinunaliwana no ni kupalikisa mashimbu hamuwika? Yika munuhasa kulinga hanga nukwase ana jenu alikate ni masepa waze akuzanga Yehova? (1 Kori. 15:33) Munuhasa kwakwasa kupwa ni masepa apema ha kusanyika mandumbu waze ajama ku ufulielo hanga nulinge no yuma hamuwika mu usoko.—Samu 119:63.

15. Yika yisemi mahasa kulinga hanga akwase ana jo asakule masepa apema?

¹⁵ Umwe tata avuluka ngwo Tony, kanalumbununa yize iye ni mukwo-pwo alingile hanga akwase ana jo kupwa ni masepa apema. Yamba ngwenyi: “Ha miaka yinji, yami ni mukwetu-pwo te twakusanyika ku zuwo lietu mandumbu ni mapangi alisa nawa a miaka yalisa. Te twakulia ni kulinga uwayilo wa mu usoko hamuwika. Yino yili jila yipema ya kunyingikinamo mandumbu waze akuzanga Yehova ni kumulingila ni uwahililo. Twapwile ni kuzumbula ku zuwo lietu tulayi a mbonge, mishionaliu ni mandumbu akwo nawa. Yilweza yo, zango ni spiritu yo ya kulihana, yakwachile chinji hali ana jetu ni kwakwasa kukundama kuli Yehova.” Yisemi, senu tachi hanga nukwase ana jenu asakule masepa apema.

16. Yika mulinga nyi umwe mwane malituna kulingila Yehova?

¹⁶ Chipwe ngwe unase tachi hanga ukwase ana je alingile Yehova, yika mulinga nyi umwe malituna kumulingila? Nyi yino muyilingiwa, kanda ulisuma mulonga. Tulieswe hamwe ni ana jetu, Yehova hanatwehe nyonga lia kusakula chipi ni chipema, che kwamba kusakula kumulingila hanji ka. Nyi umwe wa kuli ana je mecha kulingila Yehova, shimbwila ngwe tangwa limwe meza kafuna. Iwuluka chishima cha Yesu cha mwana yoze watokele. (Luka 15:11-19, 22-24) Mukweze wacho kalingile yuma yinji yipi, alioze kusongo yahiluka ku zuwo lio. Amwe mahasa kwamba ngwo, “Chino chili wika chishima, shina muchihasa kulingiwa lume musono?” Ewa, muchihasa  kulingiwa! Yino ye yalingiwile kuli mukweze yoze avuluka ngwo Elie.

17. Kuchi lusango wa Elie akutakamisa?

¹⁷ Hakutwala kuli yisemi jenyi, Elie yamba ngwenyi: “Ayo kasele tachi jinji hanga angukwase kuzanga Yehova ni Liji lienyi, Mbimbiliya. Muze nakumbanyishine miaka 15, yingupwa chihulia.” Elie yapwa ngwe nongwena, yaputuka kulituna ukwaso wa ku ufulielo uze te akumwaha kuli yisemi jenyi. Muze akatukile ku zuwo, yaputuka kulinga yuma yinji yipi. Chipwe chocho, ha mashimbu amwe te kakuhanjika ni umwe sepa lienyi hakutwala ku Mbimbiliya. Elie yamba ngwenyi: “Muze te nakuhanjika chinji ni sepa liami hakutwala kuli Yehova, chino te chakungutwala kunyonga chinji hali Yehova. Chocho, hakehe-hakehe, mbuto ya umwenemwene yize yisemi jami atumbile mu mbunge yami, yiyiputuka kukola.” Kulutwe, Elie yafuna mu umwenemwene. * Yisemi jenyi kanakawahilila chinji ha kusa tachi hanga amulongese umwenemwene muze te uchili kanuke!—2 Timo. 3:14, 15.

18. Kuchi wakwivwa hali yisemi waze akusa tachi hanga alongese ana jo kuzanga Yehova?

¹⁸ Yisemi, Yehova hananwehe chiteli chinene cha kufunga munyachi wa tuvumbi twenyi. (Samu 78:4-6) Chino hi chashi ko. Kashika, tunanuchichimieka ha tachi jize nwakusa hanga nukwase ana jenu! Nyi munununga ni kusa tachi hanga nukwase ana jenu azange Yehova ni kumwononokena, munuhasa kupwa ni shindakenyo ngwenu, Tata yetu wa mu malilu mawahilila chinji.—Efwe. 6:4.