MUTWE WAKULILONGESA 22
Yiyulo ya Mana Yize Yakutukwasa ku Mwono
“Yehova kakuhana mana.”—YISHI. 2:6.
MWASO 89 Panjika, Ononoka Hanga Akupale
CHIKUMA CHILEMU *
1. Mumu liaka yetweswe tunafupiwa kupwa ni mana a Zambi? (Yishima 4:7)
NYI hiunakwate chiyulo chilemu, kota chitangu walembele kuli Yehova ni kwita mana. Kulinga chino chili chilemu. (Tia. 1:5) Mwanangana Solomone kasonekene ngwenyi: “Che chuma chahiana, mana.” (Tanga Yishima 4:7.) Alioze, Solomone kakahanjikile hakutwala ku mana eswawo. Iye kahanjikile ha mana waze akwiza kuli Yehova. (Yishi. 2:6) Shina mana a Yehova mahasa kutukwasa kukumba yipikalo yeswayo mutumona musono? Ewa, mahasa kutukwasa. Yino ye mutumona ha mutwe uno.
2. Jila yimwe yika yize muyihasa kutukwasa kupwa ni mana?
2 Jila yimwe yize muyihasa kutukwasa mba tupwe ni mana, yili kulilongesa ni kukaula malongeso ja malunga aali waze alemesene chinji mumu lia mana jo. Chitangu, mutuhengwola chilweza cha Solomone. Mbimbiliya yinambe ngwo: “Zambi yahana kuli Solomone mana anji ni yinyingi yahiana.” (1 Mia. 4:29) Hanyima, mba mutulilongesa chilweza cha Yesu, yoze wapwile ni mana kuhiana atu eswe hano hashi. (Mateu 12:42) Uprofeto wambile hali Yesu ngwo: “Spiritu wa Yehova makahwimina hali iye, spiritu wa malinjekela ni yinyingi.”—Iza. 11:2.
3. Yika mutulilongesa ha mutwe uno?
3 Zambi kahanyine mana anji kuli Solomone ni Yesu, chocho o yazachisa mana jacho hanga ahane yiyulo yipema ha yuma yize yikwete ulemu kuli yetweswe. Ha mutwe uno, mutulilongesaho wika yuma yitatu: Kupwa ni nyonga lialita hakutwala ku mbongo, mulimo wetu wa ku musunya ni hali yetwene.
KUPWA NI NYONGA LIALITA HAKUTWALA KU MBONGO
4. Solomone ni Yesu kalisele ha yika?
4 Solomone kapwile pichi wa lufuma nawa kapwile mu zuwo lipema chinji. (1 Mia. 10:7, 14, 15) Kulisa ni Solomone, Yesu kakapwile ni yikumba yinji chipwe zuwo. (Mateu 8:20) Alioze, malunga wano aali kapwile ni nyonga lialita hakutwala ku yikumba mumu mana jo kakatukile kuli Yehova Zambi.
5. Nyonga lika lialita lize Solomone apwile nalio hakutwala ku mbongo?
5 Solomone kambile ngwenyi: “Mbongo kujakutufunga.” (Chilu. 7:12) Nyi tuli ni mbongo mutuhasa kulanda yuma yize tunafupiwa ni yimwe yize tunazange. Alioze chipwe ngwe kapwile pichi, Solomone kanyingikine ngwenyi kuli yuma yize yinahiane mbongo. Chakutalilaho, yasoneka ngwenyi: ‘Lufuma mupema kanapeme kuhiana upite unji.’ (Yishi. 22:1) Solomone kamwene nawa ngwenyi, chili chikalu kuli atu waze akuzanga chinji mbongo kuwahilila ni yuma yize ali nayo. (Chilu. 5:10, 12) Chocho yatutoweza ngwenyi, kanda tujikijila ha mbongo mumu mbongo jize tuli najo mujihasa kusoka mapulwa ni kuhumuka.—Yishi. 23:4, 5.
Shina nyonga lize tukwete ha yikumba lia kututwala tuhone kusa Wanangana wa Zambi ha chihela chitangu ku mwono wetu? (Tala maparagrafu 6-7) *
6. Nyonga lika lialita lize Yesu apwile nalio hakutwala ku yikumba? (Mateu 6:31-33)
6 Yesu kapwile ni nyonga lialita hakutwala ku yikumba. Iye te kakuzanga kulia kanawa ni kunwa vinyu ha mashimbu amwe. (Luka 19:2, 6, 7) Tangwa limwe, yalinga chikomokeso chenyi chitangu ha kulinga vinyu yipema chinji. (Yoa. 2:10, 11) Nawa ha tangwa lize afwile, iye kapwile ni mazalo a mbongo jinji. (Yoa. 19:23, 24) Alioze, Yesu kakechele hanga yikumba yipwe ni ulemu unji ku mwono wenyi. Iye yalweza tumbaji twenyi ngwenyi: “Niumwe mahasa kulingila miata aali . . . Kunwahashile kulingila Zambi ni kulingila upite hamuwika.” (Mateu 6:24) Yesu kalongesele ngwenyi nyi mutufupa chitangu Wanangana, Yehova matwaha yeswe yize mutufupiwa.—Tanga Mateu 6:31-33.
7. Kuchi ndumbu umwe ayukile ha kupwa ni nyonga lialita hakutwala ku mbongo?
7 Anji a kuli mandumbu ni mapangi jetu kayukile chinji ha kukaula yiyulo ya Yehova hakutwala ku mbongo. Tutalenu chilweza cha Daniel, umwe ndumbu twamishi. Iye yamba ngwenyi: “Muze napwile mukweze, nakwachile chiyulo ngwami chuma chilemu ku mwono wami te muchipwa kulingila Yehova.” Mumu lia kupwa ni mwono washi, Daniel yahasa kulinga yuma yinji mu mulimo wa Yehova. Yamba nawa ngwenyi: “Munguhasa kwamba ni mbunge yeswe ngwami, kuchishi kuliseha ha chiyulo chize nakwachile. Pundu, nyi nalihanyine chinji hanga ngufupe mbongo kachi nguli ni mbongo jinji, alioze kachi kuchishi ni masepa wano apema ni uwahililo uze wakwiza ha kusa Wanangana wa Zambi ha chihela chitangu. Kukushi mbongo nijimwe jize mujihiana yiwape ni uwahililo uze Yehova akungwaha.” Kwamba pundu, nyi mutwecha kufupa chinji mbongo ni kulihulikila mu mulimo wa Yehova mutuyuka chinji.
KUPWA NI NYONGA LIALITA HAKUTWALA KU MULIMO
8. Kuchi tunanyingika ngwetu Solomone kapwile ni nyonga lialita hakutwala ku mulimo? (Chilumbununyi 5:18, 19)
8 Solomone kavulukile uwahililo uze wakwiza ha kukalakala chinji ngwenyi, “chawana cha kuli Zambi.” (Tanga Chilumbununyi 5:18, 19.) Yasoneka ngwenyi: “Milimo yeswe yili ni kufumbuka.” (Yishi. 14:23) Solomone te kananyingika kanawa yize anambe. Mumu kakalakalile chinji! Katungile mazuwo, yatumba mitondo ya uva, yalima minda ni kulinga yitende ya meya. Yatunga nawa yihunda. (1 Mia. 9:19; Chilu. 2:4-6) Milimo yino yeswe yinakamunehena umwe uwahililo. Alioze kanyingikine ngwenyi, mba apwe ni uwahililo wamwenemwene te kanafupiwa nawa kulinga yimwe. Hachino, yalihana chinji mu mulimo wa Yehova. Chakutalilaho, iye yasongwela mulimo wa kutunga tembele yipema hanga apwe ni kuwayilamo Yehova. Mulimo wacho, wambachile miaka shimbiali mba yiuhwa! (1 Mia. 6:38; 9:1) Hanyima lia Solomone kulinga yuma yeka ni yeka, yanyingika ngwenyi, chuma chilemu chize mutu atamba kulinga ku mwono wenyi, chili kulingila Yehova. Chocho yasoneka ngwenyi: “Songo lia chikuma cheswe, twalivwa. Vwila woma Zambi, ni kufunga shimbi jenyi.”—Chilu. 12:13.
9. Kuchi Yesu ahashile kusa mulimo wenyi wa ku musunya ha chihela chawo?
9 Yesu kapwile chikilikita. Muze apwile mukweze, kalingile mulimo wa kusonga mapaya. (Marku 6:3) Kwamba pundu, yisemi jenyi te kakuwahilila chinji ha ukwaso uze te akwaha mu usoko. Amu apwile mungunu, kota kapwile ni kulinga milimo yingunu, hachino atu anji kota te kakuzanga kulanda yuma yize apwile ni kulinga! Yesu kota kazangile chinji mulimo wenyi. Alioze, chipwe ngwe kapwile ni kulihana chinji ku mulimo wenyi wa ku musunya, nihindu te kakusa mashimbu hanga alingile Yehova. (Yoa. 7:15) Kulutwe, yanjila mu mulimo wa shimbu lieswe, chocho yatoweza waze apwile ni kumupanjika ngwenyi: “Kanda nukakilikita ha kulia chize cha kutoka, alioze kilikitenu ha kulia chize chili ni mwono wa mutolo.” (Yoa. 6:27) Nawa ha Longeso lia ha Mulundu, Yesu yamba ngwenyi: “Litulikilenu upite mwilu.”—Mateu 6:20.
Kuchi mutuhasa kupwa ni nyonga lialita hakutwala ku mulimo wa ku musunya ni mulimo wa Zambi? (Tala maparagrafu 10-11) *
10. Kapinda muka mutuhasa kupwa nenyi ku mulimo wetu wa ku musunya?
10 Nyi twakaula yiyulo ya mana ya Yehova, mutupwa ni nyonga lialita hakutwala ku mulimo wetu wa ku musunya. Yetu akwa-Kristu tunanyingika ngwetu, twatamba ‘kukilikita ni kulinga milimo yipema.’ (Efwe. 4:28) Kanji-kanji, miata jetu a mulimo kakumona ngwo tukwete mbunge yipema nawa twakukalakala chinji, chocho matuchichimieka. Chino muchihasa kututwala tuputuke kukalakala maola anji hanga o apwe ni nyonga lialita hali Yela ja Yehova. Alioze nyi twachilinga, mutuhona mashimbu akupwa hamwe ni asoko jetu hanji a kulinga milimo ya Yehova. Kashika, chili chilemu kupwa ni nyonga lialita hakutwala ku mulimo wetu.
11. Yika yakwashile umwe ndumbu kupwa ni nyonga lialita hakutwala ku mulimo?
11 William, umwe ndumbu mukweze, kamwene ulemu wakusa mulimo wenyi wa ku musunya ha chihela chawo. Iye yahanjika hali ndumbu yoze wamusele ku mulimo ngwenyi: “[Ndumbu yono] kali chilweza chipema cha mutu yoze ukwete nyonga lialita hakutwala ku mulimo. Iye kakukalakala chinji, nawa kakwete usepa upema ni akwo mumu lia yitanga yenyi yipema. Alioze muze akuhwisa kukalakala chingoloshi, kakuzachisa mashimbu ni tachi jenyi hanga akwase asoko ni kulinga mulimo wa Yehova. Ndumbu yono kakuwahilila chinji ku mwono wenyi!” *
KUPWA NI NYONGA LIALITA HALI YETWENE
12. Kuchi Solomone asolwele ngwenyi kali ni nyonga lialita hali mwene, alioze kuchi alitokesele?
12 Muze Solomone apwile ni kulingila Yehova ni ushishiko te kakwete nyonga lialita hali mwene. Muze apwile mukweze, iye kanyingikine haze te hasulila tachi jenyi, chocho yeta usongwelo kuli Yehova. (1 Mia. 3:7-9) Ku uputukilo wa kuyula chenyi, Solomone kanyingikine nawa ngwenyi, kulizata chakuneha ponde. Yasoneka ngwenyi: “Kulengumuka kuchakutetekela kunonga. Mbunge ya kulizata yatwala ku kulimbuka.” (Yishi. 16:18) Chaluyinda, ha kupalika cha mashimbu Solomone yecha kukaula chiyulo chize mwene ahanyine. Ha amwe mashimbu mu wanangana wenyi, iye yaputuka kulizata ni kwehuka shimbi ja Zambi. Chakutalilaho, shimbi yimwe yambile ngwo, mwanangana Ka-Hepreu te katambile kuliokesela “mapwo kuchina mbunge yenyi muyihambuluka.” (Shimbi 17:17) Solomone yehuka shimbi yacho, chocho yapwa ni mapwo 700 ni konkubina 300, anji a kuli mapwo jacho te keshi kuwayila Yehova! (1 Mia. 11:1-3) Iye kota kamwene ngwe chino kuchishi kumusa mu ponde. Alioze kulutwe, Solomone yamona upi uze wakwiza ha kwehuka shimbi ja Yehova.—1 Mia. 11:9-13.
13. Yika mutuhasa kulilongesa nyi mutupukuna ha kulikehesa cha Yesu?
13 Yesu kanungine ni kupwa ni nyonga lialita hali mwene ni kulikehesa. Muze te kanda achiza hano hashi, iye kalingilile Yehova milimo yinji yipema. Kupalikila muli Yesu, “yuma yeswe yatangiwile, mu malilu ni hano hashi.” (Kolo. 1:16) Ha upapachiso wenyi, kota kewulukile yuma yize alingile muze apwile ni Tato mu malilu. (Mateu 3:16; Yoa. 17:5) Chipwe chocho, Yesu kakalizachile muze ewulukile yuma yacho. Chikwo nawa, kakalimwene ngwe kali mulemu kuhiana akwo. Yalweza tumbaji twenyi ngwenyi kakejile hashi hanga “akamuvumbike, alioze hanga iye akavumbike akwo, nikuhana mwono wenyi ndando ya ukuule hali anji.” (Mateu 20:28) Yamba nawa ngwenyi, te kechi kuhasa kulinga chuma nichimwe ukawenyi chakuhona usongwelo wa Tato. (Yoa. 5:19) Pundu lume, Yesu kapwile ni kulikehesa chinji! Iye kahichikile chilweza chipema chize yetweswe twatamba kwimbulula.
14. Yika mutuhasa kulilongesa hali Yesu hakutwala ku kupwa ni nyonga lialita hali yetwene?
14 Yesu kalongesele tumbaji twenyi hanga apwe ni nyonga lialita hali ene. Tangwa limwe, iye yaakolweza ngwenyi: “Chipwe je kambu ja ku mitwe yenu hanajalula jeswe.” (Mateu 10:30) Maliji wano kali a utakamiso kuli yetu, chipi-chipi nyi tukwete nyonga lipi hali yetwene. Kanasolola nawa ngwo, Tata yetu wa mu malilu kakulihulumba hali yetu, nawa tukwete ulemu kumeso jenyi. Nyi Yehova kanatayiza hanga tumuwayile ni kutumona ngwe tunatela kutwama mu chifuchi chaha, yetu kutwatambile kunyonga ngwetu kanalimbenja.
Yika muyihasa kulingiwa nyi kutushi nyonga lialita hali yetwene? (Tala paragrafu 15) *
15. (a) Kuchi Kaposhi wa Kutalila atukolwezele hakutwala ku kupwa ni nyonga lialita hali yetwene? (b) Ngwe chize anasolola ha chizulie chili ha lifwo 24, yiwape yika mutuhona nyi mutulihulikila chinji hali yetwene?
15 Ha miaka 15 yapalika, Kaposhi wa Kutalila katukolwezele hanga tupwe ni nyonga lialita hali yetwene, ha kwamba ngwo: “Kutwatambile kulimona ngwe tuli alemu chinji ni kuputuka kulizata; hanji kunyonga yuma yipi hali yetwene yize muyitutwala tulivwe ngwe kutushi ulemu. Shimbu tuchilinge, twatamba kusa tachi hanga tupwe ni nyonga lialita hali yetwene, chekwamba, kunyingika yize mutuhasa kulinga ni yize kutuchi kuhasa kulinga. Umwe pangi kambile ngwenyi: ‘Yami chishi chinji mutu mupi nawa chishi chinji mutu mupema. Kuli yuma yize nakuhasa kulinga ni yize kuchishi kuhasa kulinga.’” * Kashika, nyi mutupwa ni nyonga lialita hali yetwene mutuyuka chinji.
16. Mumu liaka Yehova akutwaha yiyulo ya mana?
16 Yehova kakutwaha yiyulo ya mana kupalikila mu Liji lienyi. Iye kakutuzanga nawa kanazange hanga tuwahilile. (Iza. 48:17, 18) Chuma cha mana mutuhasa kulinga chize muchitunehena uwahililo wamwenemwene, chili kusa mulimo wa Yehova ha chihela chitangu ku mwono wetu. Nyi twachilinga, kutuchi kupwa ni yipikalo yize akupwa nayo atu waze akulihulikila chinji ha mbongo, mulimo wa ku musunya ni hali ayo-ene. Kashika, yetweswe twatamba kupwa ni mana hanga tuvwise mbunge ya Yehova kuwaha!—Yishi. 23:15.
MWASO 94 Tunasakwilila Chinji ha Liji lia Zambi
^ Solomone ni Yesu kapwile ni mana anji. Mana jacho kakatukile kuli Yehova. Ha mutwe uno, mutushimutwinaho yize mutuhasa kulilongesa ha yiyulo yize Solomone ni Yesu ahanyine hakutwala ku kupwa ni nyonga lialita ha mbongo, mulimo wetu wa ku musunya ni hali yetwene. Mutumona nawa chize amwe mandumbu ayukile ha kukaula yiyulo ya mu Mbimbiliya ha yikuma yino.
^ Tala chikuma, “Chize Muwahilila ha Kuhondangana” ha Kaposhi wa Kutalila 1 Fevereiro 2015.
^ Tala chikuma, “Mbimbiliya Muyihasa Kukukwasa Kupwa ni Uwahililo” ha Kaposhi wa Kutalila 1 Agosto 2005.
^ ULUMBUNWISO WA YIZULIE: Ndumbu John ni Tom katwama mu chikungulwila chimuwika. John kanapalikisa mashimbu anji ni kufunga mashinyi jenyi. Tom kanazachisa mashinyi jenyi hanga akwase mandumbu waze anayi ni kwambujola ni kukunguluka.
^ ULUMBUNWISO WA YIZULIE: John kanakalakala ndo ha maola waze hi a mulimo ko. Kazangile kuvwisa mwata wenyi kupiha. Kashika, muze mwata wenyi akumwita hanga akalakale ndo ufuku, iye kakuchilinga. Ha ufuku wowene, Tom yoze kavumbi, kaya ni kumeneka umwe pangi hamuwika ni umwe mukulwana wa mu chikungulwila. Tom kalwezele mwata wenyi wa ku mulimo ngwenyi, ha poso kakuzachisa matangwa amwe ufuku hanga alinge milimo ya ku ufulielo, kashika kechi kukalakala ha maola jacho.
^ ULUMBUNWISO WA YIZULIE: John kanalihulikila hali mwene. Tom yoze wakusa mulimo wa Zambi ha chihela chitangu ku mwono wenyi, hapwa ni masepa anji muze anakwase kululieka zuwo lia kukunguluka chinene.
