1. Yika Yehova anazange hanga tuvumbi twenyi alinge? (Tala nawa chizulie.)

 UKWASO waya wakufupa muze unafupu utakamiso ni usongwelo? Yetu tunanyingika kumbululo lia chihula chino. Yehova kanazange hanga tulembe kuli iye mashimbu eswe. (1 Tesa. 5:17) Tuli ni utuswilo wa kulemba kuli Yehova ni kwita usongwelo wenyi ha hita chuma ku mwono wetu. (Yishi. 3:5, 6) Kwamba pundu, Yehova kali chihanyi munene. Chuma chinatukwase kuchinyingika chili ngwo, mwene kanatwite hanga tulembe kuli iye ha ola yeswayo.

2. Yika mutumona ha mutwe uno?

² Kulemba chili chawana chilemu chize Yehova hanatwehe. Alioze, muchihasa kupwa chikalu kuwana mashimbu a kulemba mumu lia milimo ya hita tangwa. Chikwo nawa, hanji mutufupiwa kululieka mutapu wetu wa kulemba. Mbimbiliya yakutukwasa ha chikuma chino. Ha mutwe uno, mutumonaho chize mutuhasa kusa mashimbu hanga tulembe ha kwimbulula chilweza cha Yesu. Mutumona nawa yikuma yitano yize muyitukwasa kululieka yilemba yetu.

3. Yika Yesu te anyingika hakutwala ku yilemba?

³ Yesu kanyingikine ngwenyi, kuli Yehova yilemba yikwete ulemu unji. Muze te kanda achiza hano hashi, iye kapwile ni kumona chize Tato apwile ni kukumbulula yilemba ya tuvumbi twenyi ashishika. Chakutalilaho, Yesu kapwile hamuwika ni Yehova muze akumbulwile yilemba ya Hana, Ndawichi, Eliya ni ya tuvumbi akwo. (1 Samue. 1:10, 11, 20; 1 Mia. 19: 4-6; Samu 32:5) Kashika, Yesu alongesele tumbaji twenyi hanga alembe mashimbu eswe ni shindakenyo ngwo, Yehova maakumbulula!—Mateu 7:7-11.

4. Chilweza chika Yesu atuhichikilile?

⁴ Kupalikila mu yilemba yize alingile kuli Yehova, Yesu yatuhichikila chilweza chipema chize twatamba kukaula. Muze apwile ni kwambujola, Yesu te kakulemba chinji. Iye kapwile ni kusa mashimbu hanga alembe mumu kapwile ni milimo yinji nawa te kakupwa ni atu anji. (Marku 6:31, 45, 46) Iye te kakulianga kuhinduka ni kuya kwa ukawenyi hanga alembe. (Marku 1:35) Ha shimbu limwe, iye kalembele ufuku wamuwundu muze te anambe kukwata chiyulo chilemu. (Luka 6:12, 13) Ha ufuku wenyi wa kasula muze anyingikine ngwenyi mapalika mu yuma yikalu mu mulimo wenyi, Yesu yalemba ha yisuho yinji.—Mateu 26:39, 42, 44.

5. Kuchi mutuhasa kwimbulula Yesu mu yilemba yetu?

⁵ Chilweza cha Yesu chinatulongesa ngwo, chipwe ngwe mutupwa ni milimo yinji, nihindu tunafupiwa kusa mashimbu hanga tulembe. Chizechene ngwe Yesu, tunafupiwa kutesa mashimbu hanga tulembe. Mba tuchilinge, hanji mutufupiwa kuhinduka chimene-mene chipwe kupomba ndambu kasula. Nyi twachilinga, mutusolola kuli Yehova ngwetu, twakulemesa chawana cha kulemba. Pangi avuluka ngwo Lynne, kanewuluka chize asakwililile muze alilongesele hakutwala ku chiwape cha kulemba. Mwene yamba ngwenyi: “Muze nanyingikine ngwami, kuma munguhasa kuhanjika ni Yehova ha shimbu lieswalio, yinguputuka kumumona ngwe sepa liami mupema, chocho yinguzanga kululieka yilemba yami.” Chochene, ngwe iye anji a kuli yetu che twakwivwa. Haliapwila tuhengwolenu yikuma yitano yize mutuhasa kuzachisa mu yilemba yetu.

6. Kulita ni Usolwelo 4:10, 11, yika Yehova atela kutambula?

⁶ Kuhalisa Yehova. Yoano kamwene usolwelo wa kukomwesa mu malilu, makulwana 24 kanawayila Yehova. Ayo kapwile ni kuhalisa Yehova ha kwamba ngwo, iye katela kutambula “uhenya ni ulemu ni tachi.” (Tanga Usolwelo 4:10, 11.) Angelo ashishika no kali ni yuma yinji yize yakwatwala hanga awayile  Yehova ni kumuhalisa. Ayo kali hamuwika ni Yehova mu malilu, kashika kamunyingika kanawa. Angelo wano kakumona yitanga ya Yehova ha yuma yeswe yize iye akulinga. Chikwo nawa, muze ayo akumona yuma yeswe yize Yehova akulinga, chino chakwatwala hanga amuhalise.—Yombi 38:4-7.

7. Yuma yika muyihasa kututwala mba tuhalise Yehova?

⁷ Ni yetu tunazange kuhalisa Yehova kupalikila mu yilemba yetu. Mutuhasa kuchilinga ha kumulweza yize yakututwala mba tumuzange ni kumuvumbika. Muze mutanga Mbimbiliya ni kulilongesayo, eseka kusa tachi hanga uwane yitanga ya Yehova yize wakuzanga. (Yombi 37:23; Roma 11:33) Hanyima, lweza Yehova mumu liaka wakuzanga chinji yitanga yacho. Mutapu ukwo wa kuhalishilamo Yehova uli ha kumuchichimieka ha yeswe yize akutulingila ni yize akulingila mandumbu jetu a mu ufulielo. Yehova kakutukwasa mashimbu eswe ni kutufunga.—1 Samue. 1:27; 2:1, 2.

8. Yuma yika tuli nayo yize yakututwala kusakwilila Yehova? (1 A-Tesalonika 5:18)

⁸ Kusakwilila Yehova. Yetu tuli ni yuma yinji yize muyihasa kututwala hanga tusakwilile Yehova kupalikila mu yilemba yetu. (Tanga 1 A-Tesalonika 5:18.) Mutuhasa kusakwilila Yehova ha yuma yeswe yipema yize tukwete; mumu chawana cheswe chingunu chinakatuka kuli iye. (Tia. 1:17) Chakutalilaho, mutuhasa kumusakwilila ha yuma yeswe yipema yize atangile. Mutuhasa kumulweza ngwetu, tunasakwilila chinji ha mwono uze watuhele, asoko, masepa ni kutalatala chetu cha kulutwe lia matangwa. Chochene, tunazange kusakwilila nawa Yehova ha uhashi uze atuhele wa kupwa masepa jenyi.

9. Mumu liaka kutwatambile kuvulama kusakwilila Yehova?

⁹ Hanji mutufupiwa kusa tachi jinji mba tuhase kunyonga ha yuma tuli nayo yize yakututwala tusakwilile Yehova. Atu anji musono keshi kusakwilila. Ayo kakuzachisa mashimbu jo hanga afupe yuma yize anazange, shimbu asolole usakwililo wo ha yuma yize ali nayo. Nyi mutwimbulula yitanga ya mutapu au, yilemba yetu muyihasa kupwa wika ya kwita-ta yuma. Mba yino yihone kulingiwa, tunafupiwa kununga ni kusakwilila Yehova ha yuma yeswe yize akutulingila.—Luka 6:45.

10. Kuchi usakwililo wakwashile umwe pangi kukumba yipikalo? (Tala nawa chizulie.)

¹⁰ Nyi twapwa ni kusakwilila, chino muchihasa kutukwasa kukumba yipikalo. Talenu chilweza cha pangi Kyung-sook, ha Kaposhi wa Kutalila 15 ya Janeiro, 2015. Mandotolo kamulwezele ngwo, kali ni câncer wa ku yihungu-hungu yoze te halitanda chinji. Iye yamba ngwenyi: “Kwivwa ngwo nguli ni musongo uno, changulemekene ku mbunge. Chapwile ngwe mwono wami wasula, chocho yinguputuka kwivwa woma unji.” Mba yika yamukwashile kukumba kapinda wacho? Mwene yamba ngwenyi, hita ufuku muze te kanda achiya ni kupomba kapwile ni kunyina  ku chipatulo cha kwilu hanga alembe kuli Yehova ni liji mwilu, ha kumusakwilila ha yuma yitano yize yalingiwa ku mwono wenyi ha tangwa. Hanyima lia chino, te kakuhuzuluka ku mbunge ni kulweza Yehova chize akumuzanga. Iye yanyingika ngwenyi, Yehova kakukwasa tuvumbi twenyi ashishika muze anapalika mu yipikalo. Yamba nawa ngwenyi, tuli ni yiwape yinji ku mwono wetu kuhiana lamba lize twakumona. Chizechene ngwe pangi Kyung-sook, ni yetu tuli ni yuma yinji yize yakututwala hanga tusakwilile Yehova chipwe ngwe tunapalika mu yipikalo ha mashimbu jacho. Kulemba kuli Yehova ni kumusakwilila, muchihasa kutukwasa kunyongonona ni kuhwima mbunge.

11. Mumu liaka tumbaji twa Yesu afupiwile hamu hanyima lia Yesu kufuna mu malilu?

¹¹ Eta hamu kuli Yehova hanga wambujole. Muze te hikwasala hakehe hanga afune mu malilu, Yesu yewulula tumbaji twenyi ngwenyi, te katamba kwambujola hakutwala kuli iye “mu Yerusaleme, ni mu Yundeya mweswe, ni mu Samaria, ndo ku masongo a hashi.” (Yili. 1:8; Luka 24:46-48) Ha kupalika cha amwe mashimbu, mangana ja A-Yunda yakwata Petulu ni Yoano yaatwala ndo ku chota cha akwa-kuyula A-Yunda. Kuzekwene yaevwisa woma ni kwalweza ngwo, katambile kwambujola. (Yili. 4:18, 21) Yika Petulu ni Yoano alingile?

12. Kulita ni Yilinga 4:29, 31, yika tumbaji alingile?

¹² Mba akumbulule ha yize mangana ja A-Yunda aakanjishile, Petulu ni Yoano yasolola hamu ha kwamba ngwo: ‘Patulenu yenu ene nyi chinalite kumeso ja Zambi kwononokena yenu kuhiana Zambi. Mumu yetu kutwahashile kulitwamina kwambujola yuma yize twamwene ni yize twevwile.’ (Yili. 4:19, 20) Muze Petulu ni Yoano aatuswile, tumbaji kalembele kuli Yehova ni kumwita ukwaso hanga anunge ni kulinga upale wenyi. Ayo yalemba ngwo: “Hanenu kama tachi kuli ndungo jenu akahanjike liji lienu ni hamu lieswe.” Yehova kakumbulwile kulemba chino cha ku mbunge.—Tanga Yilinga 4:29, 31.

13. Yika twalilongesa ha chilweza cha ndumbu Jin-hyuk?

¹³ Nyi ngwe manguvulu matukanjisa kwambujola, mutuhasa kwimbulula apostolo ha kununga ni kwambujola sango jipema. Chino che chalingiwile kuli ndumbu Jin-hyuk. Iye kamukwachile mumu kalitunyine kulinga yuma ya mafwefwe. Mu zuwo lia ususu, iye katambile kufunga funge akwo waze apwile mu chipatulo cha ukawo. Alioze, yamulweza ngwo, mahanjika wika ni funge jacho nyi ayo mafupa ukwaso wa chimwe. Kamukanjishile kuhanjika ni akwo ha yuma yinji, kuchingako ni ya Mbimbiliya. Chocho, yalemba kuli Yehova ni kwita hamu ni mana hanga ahase kwambujola muze mukusoloka uhashi. (Yili. 5:29) Iye yamba ngwenyi: “Yehova kakumbulwile kulemba chami ha kungwaha hamu ni mana, chocho yinguputuka kusongwela malongeso a Mbimbiliya ha minutu yitano ku yikolo ya yipatulo ya zuwo lia ususu. Ha ufuku te nakusoneka mikanda yize munguhana kuli funge akwo muze mukucha.” Chizechene ngwe ndumbu Jin-hyuk, ni yetu mutuhasa kulemba kuli Yehova hanga atwehe hamu ni mana. Nyi twachilinga, mutupwa ni shindakenyo ngwetu Yehova matukwasa hanga twambujole.

14. Yika muyitukwasa mba tuhase kukumba yipikalo? (Samu 37:3, 5)

¹⁴ Tunafupiwa ukwaso wa Yehova mba tuhase kukumba yipikalo. Anji a kuli yetu tunapalika mu yuma yikalu chinji, hi wika ko ku musunya, alioze ni ku manyonga nawa. Amwe kafwishile atu waze azanga chinji, akwo  kanapalika mu yuma yikalu mu usoko ngwe, yihungumiona ni yipikalo yikwo nawa. Chaluyinda, yuma ngwe musongo wa COVID-19 ni jita yinapihisa chinji yuma hano hashi. Hachino, lemba kuli Yehova ni mbunge yeswe. Mulweze yuma yeswe yize unapalika ngwe unahanjika ni sepa lie. Nyi wachilinga, muhasa kupwa ni shindakenyo ngwe Yehova makukwasa.—Tanga Samu 37:3, 5.

15. Kuchi yilemba muyihasa kutukwasa kunyongonona mu yipikalo? Hana chilweza.

¹⁵ Nyi mutununga ni kulemba, chino muchitukwasa hanga ‘tunyongonone mu yipikalo.’ (Roma 12:12) Yehova kananyingika yize tuvumbi twenyi anapalika, kashika ‘kakwivwa muteto wo wa kwalamwina.’ (Samu 145:18, 19) Kristie, umwe pionelu wa miaka 29 kamwene umwenemwene wa maliji wano. Iye kaputukile kupwa ni yimwe misongo yinji yize te yakumutwala aleme ku mbunge. Hanyima yanyingika ngwo, naye kapwile ni umwe musongo uze te mumutwala ku kufwa. Kristie yamba ngwenyi: “Yami te nakulemba kuli Yehova mashimbu eswe ni kumwita tachi hanga nguhase kunyongonona hita tangwa. Chikwo nawa, te nakuya ku kukunguluka cheswe ni kulinga longeso liami lia wika.” Yawezela ngwenyi: “Kulemba che changukwashile mba ngupalike ha mashimbu jacho akalu. Napwile ni shindakenyo ngwami, Yehova kali hakamwihi ni yami. Chino chapwile ni kunguhwimisa mbunge. Misongo yami te kanda yichihwa, alioze kunyingika ngwo Yehova te kakukumbulula yilemba yami, changuhele sambukila ni kunguhwimisa mbunge.” Tunafupiwa kwiwuluka mashimbu eswe ngwetu, ‘Yehova kakupulwila waze akumulingila ni mbunge yeswe.’—2 Petu. 2:9.

16. Mumu liaka tunafupiwa ukwaso wa Yehova mba tukumbe yeseko?

¹⁶ Eta ukwaso wa Yehova hanga ukumbe yeseko. Yetu tuli yihenge, kashika tunafupiwa kusa tachi mba twehuke kulinga yuma yipi. Satana kanase tachi hanga atutwale kulinga  yuma yacho. Yuma yimwe yize iye akuzachisa hanga atweseke, yili yiheho yipi. Yiheho ya mutapu au, muyihasa kuzalisa manyonga yetu ni yuma ya luchisa. Kupwa ni manyonga a mutapu au, muchihasa kututwala kulinga shili yinene yize muyituhonesa utayizo wa Yehova.—Marku 7:21-23; Tia. 1:14, 15.

17. Hanyima lia kwita ukwaso kuli Yehova mu yilemba, yika twatamba kulinga? (Tala nawa chizulie.)

¹⁷ Mba twehuke kulinga yuma yize kuyalitele, tunafupiwa ukwaso wa Yehova. Yesu kasele chikuma chacho mu kulemba cha Mwene, muze ambile ngwenyi: “Kanda ututwala ku cheseko, alioze tulamwine kuli mwe mupi.” (Mateu 6:13) Yehova kanazange kutukwasa, alioze yetu twatamba kwita ukwaso wenyi. Chikwo nawa, twatamba kulinga yuma kulita ni yize tunete mu yilemba. Twatamba kulinga yeswe yize mutuhasa hanga twehuke manyonga ni yitanga yipi ya hano hashi ha Satana. (Samu 97:10) Nyi twatanga Mbimbiliya ni kulilongesayo, mutuzalisa manyonga jetu ni yuma yipema. Kuya ku kukunguluka ni kwambujola, muyitukwasa kufunga manyonga jetu. Hachino, Yehova mamanununa chilakenyo chenyi cha kutukwasa tuhone kupalika mu cheseko chize kutuchi kuhasa kukumba.—1 Kori. 10:12, 13.

18. Yika yetu eswe twatamba kununga ni kulinga?

¹⁸ Ha mashimbu wano, hita umwe wa kuli yetu kanafupiwa kulemba chinji kuhiana kunyima. Nyi twachilinga, mba mutuhasa kununga ni kushishika kuli Yehova ha matangwa wano akalu. Kashika, sako mashimbu hita tangwa hanga ulembe kuli Yehova ni mbunge yeswe. Yehova kanazange hanga ‘tuzukwile mbunge jetu kuli iye’ kupalikila mu yilemba. (Samu 62:8) Sakwilila Yehova ni kumuhalisa ha yeswe yize akulinga. Mwite ukwaso hanga upwe ni hamu mu mulimo wa kwambujola. Lemba hanga wite ukwaso wa kunyongonona mu yipikalo, ni kwehuka cheseko cheswacho muchisolokako. Kanda wecha chuma nichimwe hanji mutu apihise katalilo we wa kulemba kuli Yehova. Mba kuchi Yehova akukumbulula yilemba yetu? Mutuwana kumbululo lia chihula chino ha mutwe uze muuhataho.