MUTWE WAKULILONGESA 21
Chize Yehova Akukumbulula Yilemba Yetu
“Tunanyingika ngwetu cheswacho mutwita aye matwaha.”—1 YOA. 5:15.
MWASO 41 Ivwa Kama Kulemba Chami
CHIKUMA CHILEMU a
1-2. Atu amwe kakuyambashana ha yika?
SHINA hiunayambashana kama nyi Yehova kakukumbulula lume yilemba ye? Nyi hiunayambashana, nyingika ngwe kuushi ukawe. Mandumbu anji no che akulivwa, chipi-chipi muze anapalika mu yipikalo. Nyi chino muchilingiwa, hanji muchihasa kupwa chikalu kunyingika chize Yehova akukumbulula yilemba yetu.
2 Ha mutwe uno, mutumonaho mumu liaka twatamba kupwa ni shindakenyo ngwetu, Yehova kakukumbulula yilemba ya tuvumbi twenyi. (1 Yoa. 5:15) Mutukumbulula nawa yihula yino: Mumu liaka ha mashimbu amwe mutuhasa kunyonga ngwetu, Yehova keshi kukumbulula yilemba yetu? Kuchi Yehova akukumbulula yilemba yetu musono?
YEHOVA KANJI-KANJI KESHI KUKUMBULULA YILEMBA YETU NGWE CHIZE YETU TUNAZANGE
3. Mumu liaka Yehova anatwite hanga tulembe kuli iye?
3 Mbimbiliya yinambe ngwo, Yehova kakutuzanga chinji mumu tuli alemu kuli iye. (Haga. 2:7; 1 Yoa. 4:10) Kashika anatwite hanga tukundame kuli iye kupalikila mu yilemba. (1 Petu. 5:6, 7) Yehova kanazange chinji kutukwasa hanga tukundame kuli iye, ni kutukwasa tumone chize mutukumba yipikalo yetu.
Yehova kakumbulwile yilemba ya Ndawichi ha kumupulula kuli akwa-kole jenyi anyongonone (Tala paragrafu 4)
4. Kuchi tunanyingika ngwetu, Yehova kakukumbulula yilemba ya tuvumbi twenyi? (Tala nawa chizulie.)
4 Mu Mbimbiliya, tunawanemo sango jinji ja chize Yehova akumbulwile yilemba ya tuvumbi twenyi. Shina muhasa kwiwuluka chilweza chimwe? Hanji unanyongo ha chilweza cha Mwanangana Ndawichi. Mu mwono wenyi weswe, iye kapwile ni akwa-kole anji. Kashika kanji-kanji te akwita ukwaso wa Yehova kupalikila mu yilemba. Tangwa limwe yalemba ngwenyi: ‘Yehova ivwa kama kulemba chami, panjika kulemba chami ungukumbulule kama mu umwenemwene we ni ululi we.’ (Samu 143:1) Yehova kakumbulwile yilemba ya Ndawichi ni kumupulula ku yuma yipi. (1 Samue. 19:10, 18-20; 2 Samue. 5:17-25) Kashika Ndawichi ahashile kwamba ngwenyi: “Yehova hakamwihi ali ni waze eswe akutambika kuli iye.” Ni yetu mutuhasa kupwa ni shindakenyo yacho.—Samu 145:18.
Yehova kakumbulwile yilemba ya Paulu ha kumwaha tachi jize te anafupiwa hanga anyongonone (Tala paragrafu 5)
5. Shina Yehova te kakukumbulula yilemba ya tuvumbi twenyi ku shakulu kulita ni chize ayo apwile ni kushimbwila? Hana chilweza. (Tala nawa chizulie.)
5 Yehova hanji kechi kukumbulula yilemba yetu ngwe chize tunashimbwila. Yino ye yalingiwile kuli postolo Paulu. Iye ketele kuli Yehova hanga amuchize ‘lumbimbo yoze apwile nenyi mu musunya.’ Ha yisuho yitatu, Paulu yalemba kuli Yehova hanga amukwase ha kapinda wacho. Shina Yehova kakumbulwile yilemba yacho? Ewa, alioze hi mu mutapu ko uze Paulu apwile ni kushimbwila. Shimbu ahwise kapinda wa Paulu, Yehova yamwaha tachi jize te anafupiwa hanga anunge ni kumulingila ni ushishiko.—2 Kori. 12:7-10.
6. Mumu liaka ha mashimbu amwe muchihasa kusolola ngwe Yehova keshi kukumbulula yilemba yetu?
6 Ha mashimbu amwe, Yehova mahasa kukumbulula yilemba yetu, mu mutapu uze te kutushi ni kushimbwila. Alioze twatamba kupwa ni shindakenyo ngwetu, Yehova kananyingika kanawa yuma yeswe yize tunafupiwa. Iye mahasa ‘kutulingila yuma yinji kuhiana yize yetu ene tunanyongo.’ (Efwe. 3:20) Kashika, kumbululo lia Yehova mulihasa kwiza mu mutapu hanji ha ola yize yetu kutushi ni kushimbwila.
7. Mumu liaka ha mashimbu amwe twatamba kwalumuna mutapu wa kulemba chetu? Hana chilweza.
7 Hanji mutufupiwa kwalumuna mutapu wa kulemba chetu muze mutunyingika upale wa Zambi hali yetu. Tutalenu yize yalingiwile kuli ndumbu Martin Poetzinger. Ha amwe mashimbu muze te hambata, ndumbu Martin yamusa mu zuwo lia ususu mu chilombo cha A-Nazista. Ku uputukilo, iye yalemba kuli Yehova amuchize mu zuwo lia ususu hanga ahase kufunga mukwo-pwo ni kununga ni kwambujola. Alioze ha kupalika cha poso jaali, yanyingika ngwenyi yize te anete kuyalitele ni upale wa Yehova. Hachino, yaputuka kulemba ngwenyi: “Yehova lisesa, ngulweze yize unazange hali yami.” Hohene, yaputuka kunyonga hali mandumbu akwo waze no apwile mu zuwo lia ususu. Anji a kuli ayo kapwile ni kulihulumba chinji hali mapwo ni ana jo. Hanyima lia yino, ndumbu Martin yalemba ngwenyi: “Yehova twasakwila chinji ha chiteli chino chaha; ngukwase hanga ngukolweze ni kutakamisa mandumbu jami.” Iye yanunga ni kulinga chocho ha miaka livwa!
8. Yika twatamba kwiwuluka muze tunalembe kuli Yehova?
8 Twatamba kwiwuluka ngwetu, Yehova mamanununa upale wenyi ha shimbu lize mwene hanatese. Upale wacho unachingi kuhwisa yuma yeswe yize yakutunehena lamba ngwe, luyinda wa chisemewa, misongo ni kufwa. Yehova makamanununa upale uno kupalikila mu Wanangana wenyi. (Danie. 2:44; Uso. 21:3, 4) Amu tangwa liacho kanda lichiheta, Yehova kaneche Satana hanga ayule hano hashi. b (Yoa. 12:31; Uso. 12:9) Nyi Yehova mahwisa lamba lia atu musono, muchisoloka ngwe kuyula cha Satana chinalite. Kashika muze tunashimbwila hanga Yehova amanunune yimwe ya ku yilakenyo yenyi, chino chalumbunukine ngwo, kanatweche chakuhona ukwaso. Tutalenu majila amwe waze Yehova akutukwashilamo musono.
CHIZE YEHOVA AKUKUMBULULA YILEMBA YETU MUSONO
9. Kuchi Yehova mahasa kutukwasa muze tunazange kukwata chimwe chiyulo? Hana chilweza.
9 Yehova kakutwaha mana. Iye kanalakenya ngwenyi, matwaha mana hanga tukwate yiyulo yipema. Kashika, tunafupiwa kwita mana a Zambi muze tunambe kukwata yiyulo yilemu ku mwono wetu. Chakutalilaho, ngwe muze tunatese nyi mutununga twamishi nyi hanji mutumbata. (Tia. 1:5) Tutalenu chilweza cha Maria, umwe pangi twamishi. c Iye kapwile ni kukalakala ngwe pionelu wa shimbu lieswe, hachino yanyingika umwe ndumbu. Yamba ngwenyi: “Yitupwa masepa, ha kupalika cha mashimbu yituputuka kulizanga. Nanyingikine ngwami te ngunafupiwa kukwata chiyulo, hachino yingulemba chinji kuli Yehova. Nazangile hanga Yehova angusongwele, alioze nanyingikine nawa ngwami, iye kechi kungukwachila chiyulo.” Maria kanalivu ngwenyi Yehova kakumbulwile yilemba yenyi ha kumwita mana. Mu mutapu uka? Iye kahengwile mikanda yetu mba yawana yikuma yize yamukwashile ha chiyulo chize te anambe kukwata. Iye nawa kapanjikile kanawa yiyulo ya naye. Yino yeswe yakwashile Maria kunyonga kanawa ha chize te anevu ku mbunge. Mba kusongo yakwata chiyulo chipema.
Kuchi Yehova akutwaha tachi jize tunafupiwa hanga tunyongonone? (Tala paragrafu 10)
10. Kulita ni A-Fwilipu 4:13, yika Yehova akulinga hanga akwase tuvumbi twenyi? Hana chilweza. (Tala nawa chizulie.)
10 Yehova kakutwaha tachi hanga tunyongonone. Ngwe chizechene alingile hali postolo Paulu, Yehova mahasa kutwaha tachi jize tunafupiwa hanga tukumbe yipikalo yetu. (Tanga A-Fwilipu 4:13.) Talenu chize Yehova akwashile ndumbu Benjamin kunyongonona ha mashimbu akalu. Benjamin kapalikishile miaka yinji ya ukweze wenyi, mu yilombo ya yilambala mu África hamwe ni yisemi jenyi. Mwene yamba ngwenyi: “Yami te nakulemba kuli Yehova mashimbu eswe hanga angukwase kulinga yuma yize iye akwamba ngwenyi yalita. Yehova kakumbulwile yilemba yami ha kungwaha sambukila ni hamu hanga ngununge ni kwambujola ni kungwaha mikanda yize te muyingukwasa kufunga ufulielo wami.” Yamba nawa ngwenyi: “Kutanga sango ja ku mwono ja mandumbu jetu akwo ni kunyingika ngwo, Yehova kaakwashile hanga anyongonone, changukwashile kupwa ni hamu lia kununga ni kushishika kuli iye.”
Hiunamono ukwaso wa Yehova kupalikila muli mandumbu je a ku ufulielo? (Tala maparagrafu 11-12) d
11-12. Kuchi Yehova mahasa kukumbulula yilemba yetu ha kuzachisa mandumbu yetu? (Tala nawa chizulie.)
11 Yehova kakuzachisa mandumbu jetu hanga atukwase. Ha ufuku muze te kanda achifwa, Yesu kalembele chinji. Iye kakazangile hanga atu anyonge ngwo, kashililika jina lia Tato. Kashika alembele kuli Yehova hanga achize lamba lize liapwile kulutwe lienyi. Alioze shimbu Yehova alinge yize Yesu amwichile, iye yatuma mungelo hanga amutakamise. (Luka 22:42, 43) Yehova nawa mahasa kutukwasa ha kuzachisa umwe ndumbu, atusanyike hanji kutumeneka hanga atutakamise. Kwamba umwenemwene, yetu eswe twatamba kufupa uhashi hanga twambe “liji lipema” hanji chuma chize muchitakamisa mandumbu jetu.—Yishi. 12:25.
12 Talenu chilweza cha pangi Miriam. Ha kupalika cha jimwe poso chize haze mukwo-lunga afwile, Miriam kapwile ukawenyi ku zuwo ni kunenganyana hamwe ni yikola ku mbunge. Iye te keshi kulitwamina kulila nawa kafupiwile kuhanjika ni umwe. Mwene yamba ngwenyi: “Chakahashile kusanyika mutu niumwe, chocho yingulemba kuli Yehova. Muze te ngunalila aku ngunalembe, telefone yiyisanyika; kapwile mukulwana wa mu chikungulwila yoze te twalikata nenyi chinji.” Miriam kawanyine utakamiso ha ukwaso uze atambwile kuli mukulwana yono ni mukwo-pwo. Iye kali ni shindakenyo ngwenyi, Yehova mwe watumine mukulwana wacho hanga amutakamise.
Kuchi Yehova mahasa kuzachisa atu waze keshi kumuwayila hanga atukwase? (Tala maparagrafu 13-14)
13. Hana chilweza chize chinasolola ngwo, Yehova mahasa kuzachisa atu waze keshi kumuwayila hanga akumbulule yilemba yetu.
13 Yehova mahasa kuzachisa atu waze keshi kumuwayila hanga atukwase. (Yishi. 21:1) Ha mashimbu amwe, Yehova mahasa kukumbulula yilemba yetu ha kuzachisa atu waze keshi kumuwayila hanga atukwase. Chakutalilaho, Yehova katwalile Mwanangana Artasherke eche Nehemia afune ku Yerusaleme hanga akwase ku mulimo wa kutungulula mbonge. (Nehe. 2:3-6) Ni musono nawa, Yehova mahasa kuzachisa atu waze keshi kumuwayila hanga atukwase.
14. Kuchi chilweza cha pangi Soo Hing chakukolweza? (Tala nawa chizulie.)
14 Pangi Soo Hing kamwene chize Yehova amukwashile kupalikila muli ndotolo wenyi. Mwanenyi kakuyiza chinji yikola ya mahesu-hesu. Muze mwanenyi alingile acidente, iye ni mukwo-lunga yecha milimo yo hanga amufunge. Hachino, yaputuka kupwa ni kapinda wa mbongo. Pangi Soo Hing yamba ngwenyi, te kanayi ni kuhonga ha kuhona kunyingika yize malinga. Hachino, yalemba kuli Yehova ni kwita ukwaso wenyi. Ndotolo yoze te unauku mwano yalihana hanga aakwase ha yize te anafupiwa. Chocho Soo Hing ni mukwo-lunga yaakwasa kuli nguvulu ha yize te anafupiwa ni kwaha zuwo. Kulutwe iye yamba ngwenyi: “Twamwene chize Yehova atukwashile, chochene iye kali ‘mukwa-kwivwa yilemba.’”—Samu 65:2.
UFULIELO WAKUTUKWASA KUNYINGIKA NI KUTAYIZA KUMBULULO LIA YEHOVA HA YILEMBA YETU
15. Yika yakwashile umwe pangi mba anyingike ngwenyi kuma Yehova te kakumbulula yilemba yenyi?
15 Kanji-kanji yilemba yetu keshi kuyikumbulula kupalikila mu yikomokeso. Alioze, makumbululo a Yehova ha yilemba yetu kakusolola lume yuma yize tunafupiwa hanga tununge ni kushishika kuli iye. Kashika, pwako ni kusa shindakenyo hanga unyingike chize Yehova akukumbulula yilemba ye. Pangi avuluka ngwo Yoko, kapwile ni kunyonga ngwe Yehova keshi kupanjika yilemba yenyi. Hachino, yalinga katalilo wa yuma yeswe yize etele kuli Yehova. Ha kupalika cha amwe mashimbu, yatala ha katalilo wacho yamona ngwenyi kuma Yehova te hanakumbulula yilemba yenyi yinji, ni yize te iye hanavulama. Kashika, chili chilemu hita shimbu kumana ni kutala chize Yehova anakumbulula yilemba yetu.—Samu 66:19, 20.
16. Mu mutapu uka ukwo uze twakusolola ngwetu tuli ni ufulielo? (A-Hepreu 11:6)
16 Twakusolola ngwetu tuli ni ufulielo muze twakulemba kuli Yehova, ni muze twakutayiza kumbululo lieswalio iye matwaha. (Tanga A-Hepreu 11:6.) Talenu chilweza cha Mike ni mukwo-pwo Chrissy. Ayo kazangile kukalakala ku Mbetele. Mike yamba ngwenyi: “Twasonekene mapetisau a ku Mbetele ha miaka yinji, nawa te twakulemba chinji kuli Yehova ha chikuma chacho, alioze kanda achitusanyika kama ku Mbetele.” Mike ni Chrissy kanyingikine pundu ngwo, Yehova te kanyingika ha chihela chize o mahasa kukalakala kanawa. Ayo te kakulinga yize mahasa ha kukalakala ngwe mapionelu a shimbu lieswe kuze kunafupiwa ukwaso ni kukwasa kutunga mazuwo a Wanangana. Musono, o kali mu mulimo wa kumeneka yikungulwila. Mike yawezela ngwenyi: “Yehova keshi kukumbulula mashimbu eswe yilemba yetu mu mutapu uze tunashimbwila. Alioze, iye kakuyikumbulula mu mutapu upema chinji kuhiana uze yetu tunanyongo.”
17-18. Kulita ni Samu 86:6, 7, shindakenyo yika mutuhasa kupwa nayo?
17 Tanga Samu 86:6, 7. Ndawichi kapwile ni shindakenyo ngwenyi, Yehova te kakwivwa yilemba yenyi ni kuyikumbulula. Ni yetu mutuhasa kupwa ni shindakenyo yacho. Yilweza yize twamona ha mutwe uno, yasolola pundu ngwo, Yehova mahasa kutwaha mana ni tachi jize tunafupiwa hanga tunyongonone. Iye mahasa kuzachisa mandumbu jetu chipwe atu waze keshi kumuwayila hanga atukwase ha yize tunafupu.
18 Chipwe ngwe Yehova keshi kukumbulula yilemba yetu mashimbu eswe mu mutapu uze tunazange, chuma twatamba kunyingika chili ngwo, nihindu mayikumbulula. Iye matwaha yuma yeswe yize tunafupiwa ha shimbu lialita. Kashika, tunungenu ni kulemba ni ufulielo hamwe ni shindakenyo ngwetu, Yehova matukwasa haliapwila mba mu chifuchi chaha ‘makayukisa usona wa yitangiwa yeswe ya mwono.’—Samu 145:16.
MWASO 46 Yehova, Tunakusakwila
a Yehova kanatulakenya ngwenyi, nyi mutulemba kulita ni upale wenyi iye makumbulula yilemba yetu. Muze mutupalika mu yipikalo, mutuhasa kupwa ni shindakenyo ngwetu, Yehova matwaha ukwaso weswawo mutufupa hanga tufunge ungunu wetu. Ha mutwe uno, mutumonaho chize Yehova akukumbulula yilemba yetu.
b Mba unyingike nawa mumu liaka Yehova aneche Satana hanga ayule hano hashi, tala chikuma “Nunga ni Kukwasa Wata wa Yehova,” ha Kaposhi wa Kutalila wa Junho 2017.
c Majina amwe kapwa kwalumuna.
d ULUMBUNWISO WA CHIZULIE: Umwe mama ni mwanenyi kali mu chifuchi cha yilambala. Mandumbu jo a ku ufulielo kanaatambula kanawa ni kwaha yuma yize anafupu.
