1. Kapinda muka mandumbu anji akuwana ha yize akutesa kulinga ku ufulielo?

 SHINA hiunatese yimwe ku ufulielo, chipwe chocho kuwahashile kuyilinga? b Ni chocho, nyingika ngwe kuushi ukawe. Chakutalilaho, Philip kamwene ngwenyi katamba kulemba chinji ni kululieka mutapu wa kulemba chenyi. Chipwe chocho, chinakamukalila chinji kuwana mashimbu a kuchilinga. Alioze, Erika katesele kupwa ni kuheta ha shimbu ha kukunguluka cha kuya mu munda, chipwe chocho te keshi kuheta ha shimbu. Tomáš katesele ha yisuho yinji kutanga Mbimbiliya yeswe. Alioze yamba ngwenyi: “Te chishi kuzanga kutanga Mbimbiliya. Nesekele ha yisuho yitatu, alioze ha hita chisuho te nakuheta ha mukanda wa Ulevi hazehene mungumana.”

2. Mumu liaka kutwatambile kuhonga nyi kanda tuchilinga yize twatesele ku ufulielo?

² Nyi unase tachi hanga umanunune yimwe yize watesele ku ufulielo, alioze kuushi kuhasa kuchilinga kanda unyonga ngwe kuwatelele. Kulinga yize twatesele ku ufulielo chipwe yikehe-yikehe chakufupiwa kusa mashimbu ni tachi. Tachi jize unase jinasolola ngwo, unazange kululieka usepa we ni Yehova nawa unazange kumulingila ni mbunge yeswe. Nyingika ngwe Yehova kakulemesa tachi jize wakusa. Pundu lume, iye keshi kushimbwila tumulingile yuma yize kutuchi kuhasa kulinga. (Samu 103:14; Mika 6:8) Kashika, pwako ni nyonga lialita muze mutesa kulinga yimwe ku ufulielo ni kusakula yize muhasa kulinga. Mba nyi hiwasakula yimwe ku ufulielo, yika watamba kulinga hanga uyimanunune? Tutalenu yimwe yiyulo yize mutuhasa kukaula.

3. Mumu liaka chili chilemu kupwa ni zango lia kulinga yimwe?

³ Mba tuhase kumanununa yize twatesele ku ufulielo, chili chilemu kupwa ni nyonga lia kuyilinga. Nyonga lia kulinga yimwe, linalumbunuka kupwa ni zango ni kusa tachi ha kulinga chuma chize twatesele. Mutuhasa kutesa nyonga lia kulinga yimwe, ni fuji yize yakushinjika vela ya ulungu hanga uhete kuze unayi. Nyi fuji muyinunga ulungu muheta lume kuze unayi. Chikwo nawa, nyi fuji muyoka chinji ulungu muheta kawashi kuze unayi. Chizechene nawa, nyi tuli ni zango lia kulinga yimwe muchipwa chashi kumanununa yize twatesele. David, umwe ndumbu mu El Salvador, yamba ngwenyi: “Mutu nyi mapwa ni zango lia kulinga yimwe, iye kakusa tachi. Kakusa tachi hanga achine kwecha chuma nichimwe chimukwike kulinga yize atesele.” Yika watamba kulinga mba ulivwe ngwe uli ni zango liacho?

4. Yika mutuhasa kwita mu yilemba yetu? (A-Fwilipu 2:13) (Tala nawa chizulie.)

⁴ Lemba kuli Yehova hanga wokese zango lie lia kulinga yimwe. Iye mahasa kuzachisa spiritu yenyi yisandu hanga akukwase kulinga yuma yize hiunatese. (Tanga A-Fwilipu 2:13.) Ha mashimbu amwe, mutuhasa kutesa kulinga yimwe ku ufulielo, mumu tunanyingika ngwetu yino ye twatamba kulinga. Nyonga lino hi lipi ko. Alioze muchihasa kupwa ngwe kutushi ni zango hanji nyonga lia kulinga chuma chacho. Yino ye yalingiwile kuli umwe pangi mu Uganda yoze avuluka ngwo Norina. Iye katesele kupwa ni longi wa Mbimbiliya, alioze kakapwile ni zango lia kulinga mulimo wacho, mumu te kakunyonga ngwenyi keshi kulongesa kanawa. Mba yika alingile? Mwene yamba ngwenyi: “Naputukile kulemba kuli Yehova matangwa eswe, ni kumwita hanga angukwase kupwa ni zango lia kusongwela longeso lia Mbimbiliya. Ni yami yingulinga chihanda chami; yingusa tachi hanga ngululieke uhashi wami wa kulongesa. Ha kupalika cha amwe tukweji, yingunyingika ngwami zango liami lia kusongwela longeso lia Mbimbiliya lioka. Ha mwaka uzewene, yingupwa ni alongi aali a Mbimbiliya.”

5. Ha yika twatamba kupukuna mba twokese zango lietu lia kulinga yize twatesele ku ufulielo?

⁵ Pukuna ha yuma yize Yehova hanakulingila. (Samu 143:5) Postolo Paulu te kakupukuna ha chawana cha vumbi lia Zambi chize amusolwelele, chino chamukwashile kulingila chinji Yehova. (1 Kori. 15:9, 10; 1 Timo. 1:12-14) Chizechene nawa, nyi mupukuna chinji ha yize Yehova hanakulingila, muopwa ni zango linji lia kulinga yize hiunatese ku ufulielo. (Samu 116:12) Talenu yize yakwashile umwe pangi mu Honduras, kumanununa yize atesele ku ufulielo ha kupwa pionelu wa shimbu lieswe. Yamba ngwenyi: “Napwile ni kunyonga chinji ha chize Yehova apwile ni kunguzanga. Iye kangukwashile kupwa mukachi ka atu jenyi. Kakungukwasa ni kungufunga. Kunyonga ha chino, changukwashile kumuzanga chinji ni kuzanga kulinga yize natesele ku ufulielo.”

6. Chuma chikwo chika chize muchitukwasa kupwa ni zango linji lia kulinga yuma yize twatesele ku ufulielo?

⁶ Nyonga ha yiwape yize muzuka ha kumanununa yize watesele ku ufulielo. Talenu yize yakwashile Erika, yoze twatongola helu,  kulinga yize atesele ha kupwa ni kuheta ha shimbu lialita ku kukunguluka. Yamba ngwenyi: “Nanyingikine ngwami, kulaluka te chakunguhonesa yuma yinji. Alioze muze te nakulianga kuheta te nakumeneka mandumbu ni kupwa no hamuwika. Chikwo nawa, te nakuhasa kwivwa yiyulo yize anatwehe ha kukunguluka cha kuya mu munda.” Erika kanyongene ha yiwape yize te mazuka ha kuheta ku kukunguluka ha shimbu, chocho yahasa kulinga yize atesele. Hiunanyongo kama ha yiwape yize muzuka, nyi mumanununa yize watesele ku ufulielo? Chakutalilaho, nyi hiunatese kutanga Mbimbiliya ni kululieka kulemba che, nyonga ha chize yino muyihasa kukolesa usepa we ni Yehova. (Samu 145:18, 19) Nyi unatese kupwa ni chimwe chitanga cha Akwa-Kristu, nyonga chize chitanga chacho muchipemesa usepa we ni akwenu. (Kolo. 3:14) Nyi muchilita, linga katalilo wa yuma yize muhasa kuzuka nyi wamanununa yize watesele. Konga-konga liso ha katalilo wacho. Tomáš yoze hitwatongola, yamba ngwenyi: “Nyi napwa ni zango linji lia kulinga yuma yize natesele, muchipwa chikalu kuhona kuyilinga.”

7. Yika yakwashile Julio ni mukwo-pwo kulinga yize atesele ku ufulielo?

⁷ Pwako hamwe ni atu waze makukwasa kulinga yuma yize watesele ku ufulielo. (Yishi. 13:20) Talenu yize yakwashile Julio ni mukwo-pwo, kulinga yize atesele mu mulimo wa kwambujola. Julio yamba ngwenyi: “Twalikachile ni mandumbu waze te mutuhasa kulweza yize twatesele ku ufulielo ni kutukwasa hanga tuyilinge. Anji a kuli ayo katesele yize yetu twatesele, kashika kapwile ni kutwaha yiyulo yipema. Chikwo nawa, masepa jetu kakulihulumba ha kunyingika chize katalilo wetu ali ni kututakamisa nyi muchifupiwa.”

8. Yika muyihasa kulingiwa nyi mutushimbwila kupwa ni zango linji mba tumanunune yize hitunatese ku ufulielo? (Tala nawa chizulie.)

⁸ Kwamba umwenemwene, yetu eswe tuli ni matangwa waze kutushi kupwa ni zango lia kulinga yimwe. Shina chino muchihasa kutukwika kulinga yize twatesele? Ka. Tunyongenu nawa ha chilweza cha ulungu uze unende ni vela. Fuji che chuma chitangu chize chakukwasa ulungu mba uhete kuze unayi, alioze fuji muyihasa kwalumuka. Chikwo nawa, ha mashimbu amwe chipwe fuji yacho muyihasa kuhona. Alioze, shina chino chinalumbunuka ngwo ulungu watamba kumana hamuwika? Ka, muhasa kununga ni kwenda. Chakutalilaho, maulungu amwe kali ni mitoli hanji minanga yize tahwili mahasa kuzachisa hanga ahete kuze anayi. Zango lietu lia kulinga yimwe lili ngwe fuji, ha mashimbu amwe zango liacho mulihasa kwoka, ha mashimbu akwo mulihasa kukeketela, ha mashimbu eka mutuhasa kuhona zango liacho. Nyi mushimbwila kupwa ni zango liacho mba umanunune yize watesele ku ufulielo, hanji kuuchi kuhasa kuyimanununa. Chizechene ngwe ulungu muuhasa kuheta kuze unayi, chakuhona kuzachisa fuji, ni yetu nawa mutuhasa kulinga yize hitunatese ku ufulielo chipwe ngwe kutushi ni zango linji lia kuyilinga. Tunanyingika ngwetu kulinga chino hi chashi ko, alioze mutuhasa kuchilinga. Tutalenu chihula chize anji akulihula, hanyima mba mutumona yize mutuhasa kulinga.

9. Shina chinalite kulinga yimwe ku ufulielo chipwe muze kutushi ni zango linji lia kuyilinga? Lumbununa.

 ⁹ Yehova kanazange hanga yetu ene tumulingile ni mbunge yetu yeswe hi ku tachi ko. (Samu 100:2; 2 Kori. 9:7) Nyi kuushi ni zango lia kumanununa chimwe chize watesele ku ufulielo, shina muhasa kusa tachi hanga uchimanunune? Tutalenu chilweza cha postolo Paulu. Iye kambile ngwenyi: ‘Nakumbufula mujimba ni kuutwala ku undungo.’ (1 Kori. 9:25-27, nota ya Mbimbiliya ya estudo ha versu 27) Paulu te kakusa tachi ha kulinga yize yalita chipwe muze te keshi kupwa ni zango linji lia kuyilinga. Mba yika te Yehova akunyonga ha yize Paulu apwile ni kulinga? Iye kanakawahilila ha mulimo wa Paulu ni kumuwahisa ha tachi jize te akusa.—2 Timo. 4:7, 8.

10. Mumu liaka chili chilemu kumanununa yize twatesele, chipwe ngwe kutushi ni zango linji lia kuyilinga?

¹⁰ Chizechene nawa, Yehova kakuwahilila chinji muze akutumona mutusa tachi hanga tulinge yimwe ku ufulielo chipwe ngwe kutushi ni zango linji lia kuyilinga. Iye kakuwahilila mumu kananyingika ngwo twakusa tachi, hi ko mumu lia kuzanga yize tunalingi, alioze mumu lia kumuzanga iye. Chizechene Yehova awahishile Paulu, mawahisa tachi jize mutusa. (Samu 126:5) Chikwo nawa, muze twakunyingika ngwetu Yehova kanatuwahisa, chino chakutukolweza chinji. Umwe pangi mu Polônia yoze avuluka ngwo Lucyna, yamba ngwenyi: “Ha mashimbu amwe, chishi kupwa ni zango lia kuya ni kwambujola, chipi-chipi ni ngunahongo. Alioze uwahililo uze nakupwa nawo muze ngufuna hanyima lia kwambujola wapwa chiwape cha Yehova.” Haliapwila, tutalenu yize mutuhasa kulinga nyi mutulivwa ngwe kutushi ni zango linji lia kulinga yimwe.

11. Yika mutuhasa kulinga mba tupwe ni uhumikizo?

¹¹ Lemba hanga wite uhumikizo. Uhumikizo uli uhashi uze wakutukwasa kuhombola manyonga ni yitanga yetu. Kanji-kanji, wakusolola nyonga lia kulifunga hanga tuhone kulinga yuma yize kuyalitele. Alioze, ni yetu tunafupiwa kulihumikiza hanga tupwe ni zango lia kulinga yuma yize yalita. Chipi-chipi chuma chize chili chikalu hanji chize kutwazangile kulinga. Iwuluka ngwe uhumikizo unalingi chihanda cha muhuko wa spiritu, kashika lemba kuli Yehova akwehe spiritu yisandu hanga upwe ni chitanga chino chilemu. (Luka 11:13; Ngala. 5:22, 23) David yoze hitwatongola, te keshi kuhasa kulinga longeso lia wika mashimbu eswe. Iye kanatulweze chize kulemba chamukwashile. Yamba ngwenyi: “Yami te nakulemba kuli Yehova mashimbu eswe hanga akukwase kupwa ni kulihumikiza. Ni ukwaso wenyi, yinguhasa kulinga katalilo mupema wa kulilongesa ni kukaula katalilo wacho.”

12. Kuchi Chilumbununyi 11:4 unakwate ha yize mututesa ku ufulielo?

¹² Kanda tushimbwila kulinga yuma yingunu. Hano hashi twatwama, kutwatambile kushimbwila ngwetu yuma yeswe mutulinga muyipema. Nyi mutupwa ni nyonga liacho, hanji kutuchi kuhasa kumanununa yize twatesele ku ufulielo. (Tanga Chilumbununyi 11:4.) Ndumbu yoze avuluka ngwo Dayniel, yamba ngwenyi: “Kukushi yuma yingunu, yetu mutuhasa kulinga yuma yize yalita muze mutupwa ni zango lia kuyilinga.” Umwe ndumbu mu Uganda avuluka ngwo Paul, yalumbununa mumu liaka kutwatambile kununga ni kutulika yuma yize te mutulinga ha tangwa lizeliene. Yamba ngwenyi: “Nyi mutuputuka kulinga chimwe chuma chipwe ngwe mukusoloka kapinda, yetu twakuhana uhashi kuli Yehova hanga atuwahise.”—Mala. 3:10.

13. Mumu liaka chili chilemu kuputuka ni yuma yikehe-yikehe mba tumanunune yize twatesele?

¹³ Putuka ni yuma yikehe-yikehe. Muchihasa kupwa ngwe kuushi ni zango lia kulinga yize watesele ku ufulielo, mumu yuma yacho yili yikalu chinji kuyimanununa. Nyi chenacho, muchilita kumanununa chuma chacho, ha kuputuka ni kulinga yuma yikehe-yikehe. Nyi unazange kupwa  ni chimwe chitanga chipema, muhasa kuchisolola ha yuma yikehe-yikehe yize mulinga ha hita tangwa. Chikwo nawa, nyi mutesa kutanga Mbimbiliya yeswe, muchilita kuyitanga ha mashimbu akehe ha hita tangwa. Tomáš yoze twatongola ku uputukilo wa longeso, te keshi kuhasa kumanununa yize atesele ha kutanga Mbimbiliya yeswe. Yamba ngwenyi: “Nanyingikine ngwami te nakutanga yuma yinji ha shimbu limuwika. Hachino, yinguputuka cheka, alioze ha shimbu lino yingweseka kutanga versu jikehe ha hita tangwa ni kupukuna ha yize ngunatange. Chocho, yinguputuka kuzanga kutanga Mbimbiliya.” Mumu lia kuzanga kutanga Mbimbiliya, chino chakwashile Tomáš’ kununga ni kuyitanga. Hachino, iye yahasa kuhwisa kutanga Mbimbiliya yeswe. c

14. Kapinda muka mutuhasa kupwa nenyi?

¹⁴ Chaluyinda, chipwe ngwe mutupwa ni zango lia kulinga yimwe ni kusa tachi hanga tuyilinge, hanji mutupwa ni kapinda wa kumanununa yize twatesele. Chakutalilaho, yuma yize yakulingiwa susumuku muyihasa kutuwana ni kutuhonesa kupwa ni mashimbu a kulinga yize twatesele. (Chilu. 9:11) Hanji muchihasa kupwa ngwe yipikalo yimwe muyituhongesa ni kuhona tachi. (Yishi. 24:10) Chikwo nawa, mumu lia kupwa yihenge mutuhasa kulinga yuma yize muyitukwika kumanununa yize twatesele ku ufulielo. (Roma 7:23) Hanji kuhonga lume ku mujimba. (Mateu 26:43) Yika muyihasa kutukwasa kukumba yipikalo hanji mashimbu api?

15. Mumu liaka yipikalo kuyatambile kukuhongesa kulinga yize watesele? Lumbununa. (Samu 145:14)

¹⁵ Kupwa ni kapinda wa kumanununa yize watesele kanda chikuhongesa. Mbimbiliya yinasolola pundu ngwo, chipwe ngwe mutupalika mu yipikalo ha mashimbu anji, ni ukwaso wa Yehova mutuhasa kukatuka ni kuya kulutwe. (Tanga Samu 145:14.) Philip yoze hitwatongola, yamba ngwenyi: “Mba ngunyingike nyi ngunalingi yuma kanawa, chishi kulihulikila ha yisuho yize nalimbuka. Alioze, nakusa tachi hanga ngulihulikile ha yisuho yize nakatuka ni kuya kulutwe.”  David yoze hitwatongola, yamba ngwenyi: “Nakutala ha yipikalo ni ha yuma yipi yize yakulingiwa ku mwono wami ngwe uhashi wa kusolola zango liami kuli Yehova hi ngwe yikwiko ko.” Muze twakununga ni kulinga yize yalita chipwe ngwe tunapalika mu yipikalo, twakusolola kuli Yehova ngwetu, tunazange kumuvwisa kuwaha. Chikwo nawa, Yehova kakuwahilila muze akumona tunase tachi tulinge yize hitunatese ku ufulielo!

16. Malongeso aka mutuhasa kuwana ha yipikalo yize tunapalika?

¹⁶ Wana malongeso ha yipikalo yize muopwa nayo. Lihule ngwe, ‘Yika yangunehena kapinda yono? Shina munguhasa kulinga yimwe hanga kapinda yono ahone kufuna nawa?’ (Yishi. 27:12) Ha mashimbu amwe, kapinda umwe mahasa kusolola ngwo, twatesa yuma yimwe ku ufulielo yize kutuchi kuhasa kulinga. Nyi yino ye yinalingiwa kuli yena, nyonga kanawa ha yize hiunatese ku ufulielo ni kutala nyi uli lume ni uhashi wa kuyimanununa. d Nyi mumona ngwe kuwahashile kumanununa yize hiunatese ku ufulielo, kanda unyonga ngwe Yehova makumona ngwe kuwatelele.—2 Kori. 8:12.

17. Mumu liaka chili chilemu kunyonga ha yuma yize hiunalingi?

¹⁷ Nyonga ha yuma yize hiunalingi kulu. Mbimbiliya yakusolola ngwo: ‘Zambi hi chihenge ko mba avulame mulimo uze nwakumulingila.’ (Hepre. 6:10) Kashika, kanda uvulama yuma yeswe yize hiunalingi. Chakutalilaho, achinyonga ha yuma yize hiunalingi ngwe kupwa sepa lia Yehova, kwambujola kuli akwenu ni kukupapachisa. Ngwe chizechene wamanunwine yuma yino watesele ku ufulielo, muhasa kumanununa yuma yize hiwatesa haliapwila.—Fwili. 3:16.

18. Yika twatamba kulinga muze tunase tachi hanga tumanunune yize twatesele ku ufulielo? (Tala nawa chizulie.)

¹⁸ Ni ukwaso wa Yehova, muhasa kumanununa yize hiunatese ku ufulielo, ngwe chizechene chapwa kuli mutu yoze unalingi wenyi mu ulungu muze maheta kuze anayi. Alioze atu waze akulinga wenyi mu ulungu, kakusa nawa tachi hanga ayuke ha wenyi uze analingi. Chizechene nawa, muze unase tachi hanga umanunune yize hiunatese ku ufulielo, fupa kunyingika chize Yehova anakukwase, ni chize manunga ni kukukwasa hanga uyimanunune. (2 Kori. 4:7) Nyi kuwahongele, mukatambula yiwape yinji.—Ngala. 6:9.