MUTWE WAKULILONGESA 22
Nunga ni Kwendela mu “Tapalo Lisandu”
“Kumukukapwa tapalo, jina lialio Tapalo Lisandu.”—IZA. 35:8.
MWASO 31 Endenu ni Zambi!
CHIKUMA CHILEMU a
1-2. Chiyulo chika chilemu atambile kukwata A-Izalele waze apwile mu Babilonia? (Ezera 1:2-4)
MWANANGANA yamba ngwenyi, A-Izalele waze apwile mu undungo ku Babilonia ha miaka 70, te mafuna mu chifuchi cho cha Izalele. (Tanga Ezera 1:2-4.) Chinasoloka pundu ngwo, Yehova mwe wapwile ni kusongwela yuma yeswe. Mumu A-Babilonia te keshi kwecha funge jo chamwechela. (Iza. 14:4, 17) Mwanangana mwaha yoze wanjilileho, yatayiza hanga A-Izalele atuhuke mu chifuchi. Hachino, hita Ka-Izalele, chipi-chipi miata a mu usoko kafupiwile kukwata chiyulo cha kutuhuka mu Babilonia hanji kunungamo. Chiyulo chino kuchakapwile chashi. Mumu liaka?
2 A-Izalele anji te hapwa tushinakaji, kashika wenyi wacho te muukaliwa chinji kuli ayo. Chikwo nawa, A-Izalele anji waze apwilemo kasemukinyine mu Babilonia. Chino che chifuchi chimuwika chize te anyingika. Kuli ayo, chifuchi cha Izalele chapwile wika cha yisemi jo hanji akako. A-Izalele amwe te hapwa pichi mu Babilonia. Kuli ayo, chapwile chikalu kuhichika mazuwo jo apema mingoso yize te akulinga, hanga aye ni kuputuka mwono waha mu chifuchi chize te kanyingikine.
3. Mumu liaka chapwile chipema kuli A-Izalele ashishika kufuna ku Izalele?
3 Kuli A-Izalele waze ashishika, kufuna mu chifuchi cho chahianyine yuma yeswe yize te mahasa kuhichika. Ha yuma yacho, chinene chapwile uwayilo wo kuli Yehova. Chipwe ngwe mu Babilonia mwapwile matembele kuhiana 50 a uwayilo wa mahuza, alioze A-Izalele kakapwile chipwe ni yimuwika hanga awayilemo Yehova. Kakapwile chipwe ni chilumbilo cha kuhanyina yitapo ngwe chize shimbi ya Mose yambile. Ayo kakapwile ni asasendote akululieka waze te mahana yitapo yacho. Chikwo nawa, atu ja Yehova kapwile hamwe ni atu waze te keshi kuvumbika shimbi jenyi. Kashika, tununu twa A-Izalele ashishika azangile kufuna mu chifuchi cho hanga afunyise uwayilo wamwenemwene.
4. Yika Yehova alakenyene kuli A-Izalele waze te mahiluka mu Izalele?
4 Wenyi wakukatuka ku Babilonia ndo ku Izalele kuwakapwile washi, mumu wenyi wacho te muhasa kulinga tukweji awana. Alioze Yehova yalakenya kuchiza chuma cheswacho te muchihasa kukwika tuvumbi twenyi kufuna ku chifuchi cho. Izaia yasoneka ngwenyi: “Luliekenu jila ya Yehova mu puya, lulamisenu tapalo lia Zambi yetu ha kango. . . . Makasalamisa kuze kwapwa milundu-milundu ni kweswe kwa yikulinga-yikulinga makapwisa chana.” (Iza. 40:3, 4) Achinyongenu kama ha chino. Mukachi ka puya muze muli milundu ni mingulunga, te mumupwa tapalo lipema nawa lialulama. Waze eswe te malinga wenyi mu tapalo liacho, malizanga chinji! Te muchipwa chashi, nawa chipema kulinga wenyi mu tapalo lialulama, kuhiana kulinga wenyi mu tapalo lize lili ni milundu ni mingulunga.
5. Jina lika alukile tapalo lize asonekene Izaia?
5 Musono, matapalo anji kali ni majina hanji chimwe kwalula. Tapalo lia chilayi lize Izaia asonekene nelio kalilukile jina. Mukanda wa Izaia 35:8, unambe ngwo: “Kumukukapwa tapalo, jina lialio Tapalo Lisandu. Akwa luchisa kechi kapalikako.” Kuchi chilakenyo chino chamanunukine ha mashimbu ja A-Izalele? Mumu liaka chili ni ulemu unji kuli yetu musono?
“TAPALO LISANDU” KU MASHIMBU A KUNYIMA NI MUSONO
6. Mumu liaka tapalo lino alilukile jina ngwo lisandu?
6 “Tapalo [lino] Lisandu” lili jina lipema lia kuhana ku limwe tapalo! Mba mumu liaka tapalo liacho lili lisandu? Mumu hakachi ka A-Izalele waze te mahiluka mu chifuchi cho, kuhakapwile chihela cha “akwa luchisa” hanji ngwetu kuhakapwile chihela cha atu waze te malinga utanji, makombelela mahamba hanji kulinga shili yikwo yinene. A-Yunda yacho te mapwa atu asandu a Yehova. (Shimbi 7:6) Chochene, mba ayo te evwise Yehova kuwaha katambile kwalumuna yimwe ku mwono wo.
7. Yuma yika A-Izalele amwe afupiwile kwalumuna? Hana chilweza.
7 Ngwe chize twamona ku uputukilo, anji a kuli A-Yunda yacho kasemukinyine mu Babilonia. Chikwo nawa, anji kota te hanejilila kunyonga ngwe A-Babilonia. Muze te hikwapalika miaka 70 chize haze A-Yunda atangu afunyine mu Izalele, mba Ezera yanyingika ngwo, amwe a kuli ayo kalimbachile ni mapwo a yilambala. (Kutuhu. 34:15, 16; Ezera 9:1, 2) Ha kupalika cha mashimbu, nguvulu Nehemia yevwa ngwo, ana amwe waze asemukinyine mu Izalele te kanyingikine kuhanjika limi lia A-Yunda. (Shimbi 6:6, 7; Nehe. 13:23, 24) Chihanda chinene cha Liji lia Zambi chapwile chakusoneka mu limi lia Hepreu. Kuchi twanuke jacho te mahasa kulilongesa kuzanga Yehova ni kumuwayila nyi te kanyingikine kuhanjika limi lia Hepreu? (Ezera 10:3, 44) Twahasa kumona ngwetu, A-Yunda jacho te katamba kwalumuna yuma yinji ku mwono wo. Alioze chapwile chashi kwalumwina yitanga yacho mu chifuchi cha Izalele muze te anafunyisa uwayilo wamwenemwene hakehe-hakehe.—Nehe. 8:8, 9.
Chize ha mwaka 1919 M.J., tununu a tununu twa malunga, mapwo ni twanuke kakutuhuka mu Babilonia Yinene ni kuputuka wenyi mu “Tapalo Lisandu” (Tala paragrafu 8
8. Mumu liaka twatamba kulihulumba ha yuma yize yalingiwile ha miaka yinji kunyima? (Tala chizulie ha chifukilo.)
8 Amwe mahasa kwamba ngwo, ‘lusango yono kali mupema, mba yika yuma yize yalingiwile kuli A-Izalele kunyima yinatale hali yetu musono?’ Yinatutale, mumu mu maliji akwo, ni yetu tunende mu “Tapalo Lisandu.” Chipwe ngwe tuli Akwa-Kristu akuwayisa hanji ka, yetu eswe twatamba kusa tachi hanga twendele mu “Tapalo Lisandu.” Kulinga chino, muchitukwasa kuwayila Yehova musono ni kulutwe lia matangwa muze mutukatambula yiwape yize Wanangana wa Zambi muukatwaha. b (Yoa. 10:16) Kukatuka ha mwaka 1919 M.J., tununu twa malunga, mapwo ni twanuke, kakutuhuka mu Babilonia Yinene hanji ngwetu uwayilo wa mahuza ni kuputuka kulinga wenyi mu tapalo lino lia chilayi. Kota ni yena uli mukachi ka atu jacho. Ha mwaka 1919 he azulwile tapalo lino. Alioze shimbu te kanda tuheta ha mwaka wacho, kwafupiwile kulinga umwe mulimo unene.
KULULIEKA TAPALO
9. Kulita ni Izaia 57:14, kuchi aluliekele “Tapalo Lisandu”?
9 Yehova kasele shindakenyo ngwenyi, te machiza chuma cheswe chize muchikwika A-Izalele kutuhuka mu Babilonia. (Tanga Izaia 57:14.) Shina yuma yacho yinalingiwa mu “Tapalo Lisandu”? Ewa, ha miaka yinji kunyima muze te kanda tuheta ha mwaka 1919, Yehova kazachishile malunga ashishika hanga akwase akwo kutuhuka mu Babilonia Yinene. (Tala nawa Izaia 40:3.) Malunga wano kaluliekele jila hanga atu a mbunge yipema ahase kutuhuka mu uwayilo wa mahuza ni kulichinga ni atu jenyi hanga amuwayile. Mba kuchi ayo ahashile kululieka “jila” yacho? Tutalenu yuma yimwe yize alingile.
Ha miaka yinji kunyima, malunga ashishika kakwashile kululieka jila hanga atu a mbunge yipema atuhuke mu Babilonia Yinene (Tala maparagrafu 10-11)
10-11. Kuchi mulimo wa kutuhwisa Mbimbiliya ni kuyilumbununa wakwashile atu? (Tala nawa chizulie.)
10 Kutuhwisa mikanda. Kukatuka kunyima ndo ha mwaka 1450, Mbimbiliya te kakuyisoneka ku moko. Mulimo uno te wakumbata mashimbu anji, kashika kwapwile Mbimbiliya jikepe. Chikwo nawa, Mbimbiliya jacho te jikwete ndando yinji. Alioze muze atuhwishile makina jimwe ja kufwambwishila mikanda, chocho mulimo wa kutuhwisa Mbimbiliya yiwashiwa.
11 Kulumbununa mikanda. Ha miaka yinji kunyima, Mbimbiliya yapwile wika mu limi lia Latim. Kapinda kapwile ngwo, atu waze alilongesele e wika te anyingika kutanga limi liacho. Amu mulimo wa kutuhwisa mikanda wapwile ni kutatuka, atu waze te akuzanga Zambi, yasa tachi alumbunune Mbimbiliya mu malimi waze atu anji apwile ni kuhanjika. Chino yichikwasa atu anji kutesa yize te akulilongesa mu mayingeleja ni yize Mbimbiliya yakulongesa.
Malunga ashishika kakwashile kululieka jila ya kutuhuka mu Babilonia Yinene (Tala maparagrafu 12-14) c
12-13. Hana chilweza chinasolola chize alongi amwenemwene a Mbimbiliya asolwele hatoma malongeso a mahuza a mayingeleja.
12 Yikwata yize yakukwasa kulilongesa Mbimbiliya. Alongi a Mbimbiliya kalilongesele yuma yinji muze te akutanga Liji lia Zambi. Alioze mangana a mayingeleja te kakwivwa uli, mumu alongi a Mbimbiliya kapwile ni kulweza akwo yize analilongesa.
13 Chakutalilaho, mu miaka 1835 lunga yoze te wakuvumbika Zambi avuluka ngwo Henry Grew, katuhwishile kamukanda kaze kasolwele hatoma malongeso a mahuza hakutwala kuli afu. Mu kamukanda kacho, iye yasolola yize yakulingiwa kuli mutu ni hafwa. Mayingeleja kapwile ni kulongesa ngwo, mutu kakusemuka ni mwono uze kuushi kufwa. Iye yazachisa Mbimbiliya hanga asolole ngwo longeso liacho lili lia mahuza, nawa ngwo mwono uze kuushi kufwa, Zambi kauhanyine kuli atu amwe hi ko ngwo twakusemuka nawo. Ha mwaka 1837, kavumbi ka yingeleja avuluka ngwo George Storrs, yawana mukanda wacho muze te analingi wenyi mu kaulu. Hanyima lia ku utanga, yapwa ni shindakenyo ngwenyi, kawana umwenemwene ulemu. Chocho yazanga kulweza akwo yize alilongesele. Ha mwaka 1842, iye yalinga pande jinji jize japwile ni mutwe ngwo: “Shina atu api kali ni mwono uze kuushi kufwa?” Ulumbunwiso uze George Storrs ahanyine, wakwashile chinji mukweze Charles Taze Russell.
14. Kuchi ndumbu Russell ni masepa jenyi ayukile ha mulimo wa kululieka tapalo uze waliangile kulingiwa kulutwe lio? (Tala nawa chizulie.)
14 Kuchi ndumbu Russell ni masepa jenyi ayukile ha mulimo wa kululieka tapalo uze waliangile kulingiwa kulutwe lio? Ni ukwaso wa mulimo wacho, muze ayo apwile ni kulilongesa te kakuhasa kuhengwola yikwata ngwe dicionário, Índice ya maliji a Mbimbiliya ni Mbimbiliya jeka ni jeka. Kuhengwola Mbimbiliya chize alingile kuli Henry Grew, George Storrs ni atu akwo, necho chaakwashile chinji. Russell ni masepa jenyi no kakwashile mulimo wa kululieka tapalo lino ha kutuhwisa mikanda yeka ni yeka yize te yakuhanjika ha Mbimbiliya.
15. Yika yalingiwile ha mwaka 1919?
15 Ha mwaka 1919, Babilonia Yinene yatokesele ndundo jize apwile najo hali tuvumbi twa Yehova. Ha mwaka wacho, yatongola “ndungo washishika, wakanyama” yoze te makwasa atu a mbunge yipema hanga aputuke kwendela mu “Tapalo Lisandu.” (Mateu 24:45-47) Mumu lia mulimo weswe uze alingile kunyima hanga alulieke “Tapalo Lisandu,” waze aputukile kwenda mu tapalo liacho, te mokesa chinyingi cho hali Yehova ni ha yilakenyo yenyi. (Yishi. 4:18) No kafupiwile kwalumuna yimwe ku mwono wo hanga atwame kulita ni shimbi ja Yehova. Alioze, Yehova kakechele hanga atu jenyi alumune yuma yeswe ha shimbu limuwika. Shimbu achilinge, iye yakwasa atu jenyi hakehe-hakehe. (Tala mushete, “ Yehova Kakululieka Atu Jenyi Hakehe-Hakehe.”) Mu paraisu, muchikapema chinji muze mutukapwa ni uhashi wa kuvwisa Yehova kuwaha mu yuma yeswe ku mwono wetu!—Kolo. 1:10.
“TAPALO LISANDU” LICHILI LIA WASHI
16. Chize ha mwaka 1919, kuchi akululieka “Tapalo Lisandu?” (Izaia 48:17; 60:17)
16 Tapalo lieswe liakufupiwa kulilulieka mba linunge ni kupema. Chize ha mwaka 1919, “Tapalo Lisandu” kakulilulieka mashimbu eswe, chino chakukwasa atu anji kutuhuka mu Babilonia Yinene. Ha mwaka 1921, ha kupalika cha yimwe miaka chize haze amusele, ndungo washishika wakanyama, yatuhwisa umwe mukanda hanga akwase atu alilongese Mbimbiliya. Mukanda wacho te kakuuvuluka ngwo, Arpa de Deus; kautuhwishile mu unji wa tununu asambano a tununu mu malimi 36. Atu anji yalilongesa umwenemwene kupalikila mu mukanda uno. Ha mashimbu wano, katuhwisa mukanda waha wakusongwela nawo malongeso a Mbimbiliya uli ni mutwe unambe ngwo, Wahilila ku Mwono ku Miaka Yeswe! Ni ukwaso wa Yehova ni wa ululikiso wenyi, kutushi kuhona kulia cha ku spiritu ha matangwa wano a kusula. Kulia chino, chakutukwasa tulieswe hanga tununge ni kwenda mu “Tapalo Lisandu.”—Tanga Izaia 48:17; 60:17.
17-18. Kulihi “Tapalo Lisandu” linatutwale?
17 Mutuhasa kwamba ngwetu, nyi umwe mutu matayiza longeso lia Mbimbiliya, acho kapwa ni uhashi wa kwendela mu “Tapalo Lisandu.” Amwe kakuchilinga ha mashimbu akehe, chocho mahichika tapalo liacho. Akwo, kananungu ni kwenda mu tapalo lino ndo haze mahetela kuze anayi. Kuli kwenako?
18 Waze ali ni kutalatala cha kuya mu malilu, “Tapalo [lino] Lisandu” muliatwala “mu paraisu ya Zambi” hanji ngwetu mu malilu. (Uso. 2:7) Kuli waze ali ni kutalatala cha kutwama hano hashi, tapalo lino lisandu muliatwala ndo kusongo lia kanunu ka miaka ya kuyula cha Yesu. Ha shimbu lize yetu eswe mutukapwa angunu. Nyi waputuka wenyi mu tapalo lino lisandu haliapwila kanda utuhukamo; nunga mu jila yacho ndo mu chifuchi chaha! Kashika, “tunakulakenya wenyi upema.”
MWASO 24 Tweyenu ku Mulundu wa Yehova
a Kunyima, A-Izalele katuhukile mu undungo ku Babilonia ni kufuna ku Izalele. Yehova yaaluliekela yimwe jila ya chilayi yize avulukile ngwo, “Tapalo Lisandu.” Shina ha mashimbu wano, Yehova kaluliekela atu jenyi tapalo lia mutapu au? Ewa! Kukatuka ha mwaka 1919 M.J., tununu a tununu twa atu kanatuhuka mu Babilonia Yinene ni kuputuka kwendela mu “Tapalo Lisandu.” Yetu eswe twatamba kununga mu tapalo liacho ndo haze mutuhetela kuze tunayi.
c ULUMBUNWISO WA CHIZULIE: Ndumbu Russell ni masepa jenyi kazachishile yikwata ya kulilongesa nayo Mbimbiliya, yize yaliangile kutuhuka muze ayo te kanda achisemuka.
