1. Shimbi yika Yesu ahanyine kuli tumbaji twenyi? (Tala chizulie ha chifukilo.)

HA UFUKU uze Yesu te mafwa, iye yahana yimwe shimbi kuli tumbaji twenyi. Yamba ngwenyi: “Chizechene ngwe yami hingunanuzange, ni yenu nawa nukalizange umwe ni mukwo ni mukwo.” Mba yawezela nawa ngwenyi: “Ku chino eswe makanyingika yenu nuli tumbaji twami.”—Yoa. 13:34, 35.

2. Mumu liaka chili chilemu kulizanga umwe ni mukwo?

² Yesu kambile ngwenyi, tumbaji twenyi amwenemwene te maanyingika kuli atu nyi mapwa ni zango ngwe lize iye apwile nalio. Maliji wano, katalile wika hali tumbaji atangu, kanatale nawa hali yetu musono. Kashika, chili chilemu chinji kulizanga umwe ni mukwo, chipwe ngwe hichashiko.

3. Yika mutulilongesa ha mutwe uno?

³ Hichashiko kulizanga umwe ni mukwo ni mbunge yeswe. Chino chakukaliwa mumu tuli yihenge. Chipwe chocho, twatamba kusa tachi hanga twimbulule Kristu. Ha mutwe uno, mutulilongesa chize zango mulihasa kutukwasa hanga tupwe akwa-sambukila, twehuke katonde ni kuzumbula akwetu. Muze mulilongesa mutwe uno, lihule ngwe: ‘Yika munguhasa kulilongesa hali mandumbu waze anungine ni kulizanga umwe ni mukwo, chipwe ngwe kuchakapwile chashi?’

4. Kulita ni Mateu 5:23, 24, mumu liaka twatamba kulivwashana ni ndumbu yoze uli ni mulonga ni yetu?

⁴ Yesu katulongesele ngwenyi, nyi umwe ndumbu mapwa ni mulonga  ni yetu, twatamba kulivwashana nenyi hanga tupwe ni sambukila. (Tanga Mateu 5:23, 24.) Yesu yashindakenya ngwo, twatamba kupwa ni usepa upema ni akwetu, mba twivwise Zambi kuwaha. Yehova kakuwahilila muze twakusa tachi hanga tupwe ni sambukila ni mandumbu jetu. Chikwo nawa, nyi twanunga ni kutulikila toto umwe ndumbu hanji kulituna kulivwashana nenyi, Yehova kechi kutayiza uwayilo wetu.—1 Yoa. 4:20.

5. Mumu liaka chapwile chikalu kuli umwe ndumbu kulivwashana ni mukwo?

⁵ Muchihasa kupwa chikalu kulivwashana. Mumu liaka? Tutalenu yize yalingiwile kuli Marku. * Umwe ndumbu yamuhona vumbi ni kulweza mandumbu akwo sango jipi hakutwala kuli iye. Yika Marku alingile? Iye yamba ngwenyi: “Yingwivwa kupiha chinji, nawa yingumuzwelesa.” Ha kupalika cha mashimbu, Marku yevwa kupiha ha yize alingile. Yeta ukonekeno kuli ndumbu wacho hanga jipwe ni sambukila. Alioze ndumbu wacho yalituna. Ha chino, Marku yanyonga ngwenyi: ‘Mumu liaka natamba kununga ni kumwita ukonekeno? Iye mwe kasolo kulivwashana ni yami!’ Alioze, kalayi wa mbonge yakolweza Marku hanga anunge ni kuhanjika nenyi. Yika mba Marku alingile?

6. (a) Kuchi Marku asele tachi hanga alivwashane ni ndumbwenyi? (b) Kuchi Marku akawile maliji ali ha A-Kolosu 3:13, 14?

⁶ Muze Marku anyongene kanawa ha chikuma chino, yanyingika ngwenyi, katamba kulikehesa, mumu te kakulimona ngwe keshi ni chitela. Nawa yanyingika ngwenyi, katamba kwalumuna yitanga yenyi. (Kolo. 3:8, 9, 12) Marku yalikehesa, mba yaya nawa ni kuhanjika ni ndumbu wacho hanga ete ukonekeno. Yasonekena ndumbu wacho mikanda ni kumulweza ngwo, kevwile kupiha chinji ha yize yalingiwile, nawa ngwo, kanazange hanga jilikate cheka. Marku nawa yahana yawana kuli ndumbu wacho. Alioze, ndumbu wacho yanunga ni kumuvwila toto. Chipwe chocho, Marku yanunga ni kukawula shimbi ya kuzanga ndumbwenyi ni kumukonekena.  (Tanga A-Kolosu 3:13, 14.) Chizechene ngwe Marku, hanji umwe ndumbu keshi kuzanga kulivwashana ni yena, chipwe ngwe wakusa tachi hanga nulivwashane. Alioze, zango liamwenemwene mulikukwasa hanga ukonekene ndumbu wacho, ni kulemba hanga mulonga wacho uhwe.—Mateu 18:21, 22; Ngala. 6:9.

7. (a) Yika Yesu atulongesele hanga tulinge? (b) Kapinda muka umwe ndumbu wa pwo apwile nenyi?

⁷ Yesu katulongesele ngwo, twatamba kulinga hali akwetu yize tunazange hanga ayo atulinge. Yawezela nawa ngwo, kutwatambile kuzanga wika atu waze akutuzanga. (Luka 6:31-33) Chakutaliho, hanji umwe ndumbu mu chikungulwila maputuka kutwehuka, hanji kwecha kutumeneka. Yika mutulinga? Lara kapalikile mu kapinda yono. Iye yamba ngwenyi: “Umwe ndumbu wa pwo te kakungutelumuna, alioze te chanyingikine mumu liaka akungutelumuna. Chino te chakungwivwisa kupiha, nawa te nakwivwa chinyengo ha kuya ku kukunguluka.” Alioze, Lara yanyonga ngwenyi: ‘Yami kwami chamulingile upi niumwe. Chipwe mandumbu akwo mu chikungulwila kananyingika ngwo, ndumbu yono kakwete yitanga yipi.’

8. Yika Lara alingile hanga alivwashane ni umwe ndumbu, nawa yika mutuhasa kulilongesa hali iye?

⁸ Lara yasa tachi hanga alivwashane ni ndumbu wacho. Chocho, yalemba kuli Yehova, nawa yaya ni kuhanjika nenyi. Ayo yasopa mulonga wacho, yalikangayika, nawa yalivwashana. Iye yamona ngwe mulonga wacho hiwahwa. Alioze, Lara yamba nawa ngwenyi: “Ha kupalika cha amwe mashimbu, ndumbu wacho yaputuka kungutelumuna nawa. Yingwivwa chinyengo chinji!” Lara yanyonga ngwe te mawahilila wika, nyi ndumbu wacho malumuna ndako yenyi. Alioze, yanyingika ngwenyi, te katamba kununga ni kusolwela ndumbu wacho zango ni ‘kumukonekena.’ (Efwe. 4:32–5:2) Lara yewuluka ngwo, zango liamwenemwene “kulishi kushinginyeka yipi,” alioze, “kuliakulihumikiza ni yuma yeswe, kuliakufuliela yuma yeswe, kuliakutalatala yuma yeswe, kuliakunyongonona mu yuma yeswe.” (1 Kori. 13:5, 7) Ha chino, Lara yapwa ni  sambukila ku mbunge. Ha kupalika cha mashimbu, ndumbu wacho yalumuna ndako yenyi. Nyi muupwa mukwa-sambukila ni mandumbu je ni kwazanga, muhasa kupwa ni shindakenyo ngwo, “Zambi ya zango ni sambukila kumakapwa hamwe” ni yena.—2 Kori. 13:11.

9. Kulita ni Yilinga 10:34, 35, mumu liaka kutwatambile kupwa ni katonde?

⁹ Yehova keshi katonde. (Tanga Yilinga 10:34, 35.) Nyi mutwehuka katonde, mutusolola ngwo, tuli ana jenyi. Twakwononokena shimbi yakuzanga mwenyembo wetu ngwe yetu ene, ni kusa tachi hanga tupwe ni sambukila ni mandumbu jetu mu chikungulwila.—Roma 12:9, 10; Tia. 2:8, 9.

10-11. Yika umwe ndumbu wa pwo alingile hanga ehuke manyonga api?

¹⁰ Chakupwa chikalu kuli atu amwe kwehuka katonde. Tutalenu chilweza cha umwe ndumbu avuluka ngwo, Rute. Muze te uchili mukweze, Rute kapwile ni kulipinjisa ni umwe mutu wa mu chifuchi cheka. Kuchi chino chamukwashile? Rute yamba ngwenyi: “Te ngukwete katonde hali atu eswe a mu chifuchi chacho. Te nakunyonga ngwami, atu eswe a mu chifuchi chacho kakwete ndako yimuwika, chipwe mandumbu.” Yika Rute alingile mba akumbe katonde wacho?

¹¹ Rute yanyingika ngwenyi, katamba kuchiza manyonga jacho api mu mbunge yenyi. Ha chino, yaputuka kutanga sango jinji hakutwala ku chifuchi chacho mu Mukanda wa Mwaka (Anuário). Rute yamba ngwenyi: “Nasela tachi jinji hanga ngupwe ni nyonga lialita hali atu a mu chifuchi chacho. Yingumona ngwami, kumana mandumbu jacho kakwete zango linji. Yingunyingika ngwami, ni ayo kali mukachi ka mandumbu jetu a hashi heswe.” Ha kupalika cha mashimbu, Rute yamona ngwenyi, katamba kulinga yimwe hanga alumune yitanga yenyi. Iye yamba ngwenyi: “Muze te nakuliwana ni mandumbu a mu chifuchi chacho, te nakusa tachi hanga ngwasolwele zango. Kuhanjika no, changukwashile hanga ngwanyingike kanawa.” Shina kulinga yino chamukwashile lume? Rute yamba ngwenyi: “Hakupalika cha mashimbu, yingupwa ni nyonga lialita hali ayo.”

12. Kapinda muka umwe ndumbu avuluka ngwo Sara, apwile nenyi?

¹² Atu amwe mahasa kupwa ni katonde chakuhona kunyingika. Chakutalilaho, Sara te kakulimona ngwe keshi katonde, mumu te keshi kupatwila atu mumu lia uswale, yiteli mu chikungulwila hanji munyachi wo. Alioze yamba ngwenyi: “Yinguputuka kumona ngwami, nguli ni katonde mu mbunge.” Mumu liaka? Sara kanakakolela mu usoko wa atu waze alilongesele chinji, kashika te akulikata wika ni atu waze alilongesele chinji. Tangwa limwe Sara yalweza umwe sepa lienyi ngwenyi: “Nakwenda wika ni mandumbu waze alilongesele chinji. Alioze nakwehuka waze kakalilongesele chinji.” Kashika, Sara te katamba kwalumuna yitanga yenyi. Kuchi achilingile?

13. Yika twalilongesa ha chize Sara alumwine yitanga yenyi?

¹³ Umwe kalayi wa mbonge yakwasa Sara hanga anyonge kanawa ha ndako yenyi. Sara yamba nawa ngwenyi: “Kalayi yanguchichimieka ha ushishiko wami mu mulimo wa kwambaujola, ni makumbululo waze nakuhana ha kukunguluka ni tachi jize nakusa hanga ngulilongese Mbimbiliya. Yangulweza nawa ngwo, muze chinyingi cha Mbimbiliya chinayi ni kukola mu mbunge, twatamba kusolola yitanga ya Ukristu, ngwe, kulikehesa, uhomboloji ni keke.” Sara yasa tachi hanga akaule yize kalayi wa mbonge amulwezele. Iye yamba ngwenyi: “Yingunyingika ngwami, chuma chilemu chili, kupwa chimbovu ni kusolola zango.” Yino yakwashile Sara kupwa ni nyonga  lialita hali mandumbu. Iye kanalumbununa ngwenyi: “Yingusa tachi hanga ngunyingike yitanga yipema yize Yehova akuzanga hali mandumbu.” Yika mutwamba hali yetu? Kutwatambile kunyonga ngwetu, tuli alemu chinji mumu tunakalilongesa chinji. Nyi twazanga chinji mandumbu jetu, tuchi kupwa ni katonde.—1 Petu. 2:17.

14. Kulita ni A-Hepreu 13:16, kuchi Yehova akwivwa muze twakuzumbula akwetu?

¹⁴ Yehova kakuwahilila chinji muze twakuzumbula akwetu. (Tanga A-Hepreu 13:16.) Iye kanatwita hanga tuzumbule akwetu, mumu chili chihanda cha uwayilo wetu, chipi-chipi muze mutukwasa waze anahono. (Tia. 1:27; 2:14-17) Kashika Mbimbiliya yinatukolweza ngwo: “Pwenu ni mbunge ja kuzumbula ngeji.” (Roma 12:13) Kuzumbula akwetu yili jila yakusolwelamo ngwo, twakuzanga mandumbu jetu; twakusolola nawa ngwo, tunazange hanga ayo apwe masepa jetu. Yehova kakuwahilila chinji muze twakuhana kuli akwetu kamwe kalumbolo, kamusenge ka meya, kamwe kakulia, hanji kupalika no mashimbu ni kwapanjika. (1 Petu. 4:8-10) Alioze, kuli yimwe yize muyihasa kutukwika hanga tuhone kuzumbula akwetu.

15-16. (a) Mumu liaka atu amwe keshi kuzanga kuzumbula akwo? (b) Yika yakwashile Edite azange kuzumbula akwo?

¹⁵ Hanji kutushi kuhasa kuzumbula akwetu ha mukunda wa yize tuli nayo. Achinyonga hali umwe tuliwa avuluka ngwo Edite. Muze te kanda achililongesa umwenemwene, te keshi kuzanga kuhanjika chinji ni akwo. Iye te kakunyonga ngwo, akwo e ali ni uhashi wa kuzumbula ngeji.

¹⁶ Muze Edite alilongesele umwenemwene, yalumuna manyonga jenyi. Yasa tachi hanga apwe ni kuzumbula akwo. Iye yamba ngwenyi: “Ha mashimbu waze te anatungu Zuwo lietu lia Wanangana, umwe mukulwana yeza ni kungwamba ngwenyi: ‘Edite umwe ndumbu wa pwo ni mukwo-lunga kaneza hanga atukwase kutunga. Shina muhasa kama kwatambula ku zuwo lie ha poso jaali?’ Hazehene, yingwiwuluka chize Yehova awahishile pwo tuliwa wa ku Zarafata.”  (1 Mia. 17:12-16) Edite yatayiza kutambula mandumbu jacho ku zuwo lienyi. Shina kazukile yiwape? Iye yalumbununa ngwenyi: “Ayo yatwama ku zuwo liami tukweji aali. Mashimbu waze atwamine ku zuwo liami, yitupwa masepa apema.” Haliapwila, Edite kali ni chiwape chakupwa ni masepa apema mu chikungulwila. Musono, iye kali pionelu, nawa kakuzanga kuya ni mandumbu waze akutuhuka no mu munda ku zuwo lienyi hanga alie kamwe koma. Kanambe nawa ngwenyi: “Nakwivwa kuwaha ha kukwasa akwetu! Kwamba pundu, nakutambula yiwape yinji ha kulinga chino.”—Hepre. 13:1, 2.

17. Yika Luka ni mukwo-pwo anyingikine?

¹⁷ Chipwe ngwe twakuzumbula akwetu, nihindu kuli yimwe yize mutuhasa kulinga hanga tuzumbule kanawa mandumbu jetu. Chakutalilaho, Luka ni mukwo-pwo te kakuzumbula chinji akwo. Te kakusanyika ku zuwo lio yisemi, asoko, masepa ni tulayi a mbonge ni ma pwo jo. Alioze, Luka yamba ngwenyi: “Yitunyingika ngwetu, kumana twakusanyika wika mandumbu waze twalikata no.” Yika Luka ni mukwo-pwo alingile hanga azumbule kanawa mandumbu eswe?

18. Yika Luka ni mukwo-pwo alingile hanga apwe ni kuzumbula akwo?

¹⁸ Chuma chakwashile Luka ni mukwo-pwo kupwa ni nyonga lialita, chili maliji a Yesu anambe ngwo: “Nyi kachi munuzanga waze akunuzanga, kwononona chika nuli nacho?” (Mateu 5:45-47) Ayo yanyingika ngwo, katamba kwimbulula Yehova, yoze uli chihanyi kuli eswe. Kashika, ayo yaputuka kusanyika ku zuwo lio mandumbu a malunga ni a mapwo waze te kanda achisanyika kama. Luka kanambe ngwenyi: “Tulieswe twakuzanga kupwa ha mashimbu wano. Mumu twakulitakamisa umwe ni mukwo ni kuwahilila.”

19. Kuchi mutuhasa kusolola ngwo tuli tumbaji twa Yesu, nawa yika unazange kulinga haliapwila?

¹⁹ Mutwe uno wasolola ngwo, zango lize tulinalio hali mandumbu jetu liakutukwasa hanga tupwe ni sambukila, twehuke katonde ni kuzumbula akwetu. Twatamba kukumba manyonga api mu mbunge yetu ni kuzanga mandumbu jetu ni mbunge yeswe. Nyi twachilinga, mutuwahilila chinji, mutusolola nawa ngwo, tuli tumbaji twa Yesu.—Yoa. 13:17, 35.