MUTWE WAKULILONGESA 10
Zango ni Kusakwila Yehova Yakukwasa Mutu Hanga Amupapachise
“Chika chinangukwika kutambula upapachiso?”—YILI. 8:36.
MWASO 37 Kuwayila Yehova ni Mbunge Yeswe
CHIKUMA CHILEMU *
1-2. Ngwe chize anasolola ha Yilinga 8:27-31, 35-38, yika yakwashile Ka-Etiopia hanga amupapachise?
UNAZANGE hanga akupapachise ni kupwa kambaji ka Kristu? Zango ni usakwililo yakukwasa atu anji hanga apapachise. Tutalenu chilweza cha chilolo wa mwazovu wa mu Etiopia.
2 Muze te halilongesa hakutwala ku Yisoneko, Ka-Etiopia yamupapachisa hazehene. (Tanga Yilinga 8:27-31, 35-38.) Yika yamukwashile? Zango lienyi ha Liji lia Zambi; muze te ali mu wenyi te kanatanga sango ja mukanda wa Izaia. Muze Fwilipe ambulwile sango lipema kuli lunga yono, yasakwilila ha yize Yesu alingile hali iye. Yika chilolo wacho ayile ni kulinga ku Yerusaleme? Chinasoloka ngwe, iye te kakuzanga chinji Yehova. Kuchi tunachinyingika? Tunachinyingika mumu lusango wacho kanasolola ngwo, iye te kakuya ni kuwayila Yehova ku Yerusaleme. Yino yinasolola ngwo, Ka-Etiopia te hanahichika uwayilo wa ku munyachi wenyi, hanalichingi ni vungu lize liakuwayila Zambi wamwenemwene. Zango liacho hali Yehova, lie liamutwalile kukwata chiyulo chacho chilemu cha kumupapachisa ni kupwa kambaji wa Kristu.—Mateu 28:19.
3. Yika muyihasa kukwika mutu hanga ahone kumupapachisa? (Tala mushete unambe ngwo, “ Mbunge Yami Yili Ngwe Mavu a Mutapu Uka?”)
3 Zango lie hali Yehova mulihasa kukukwasa hanga akupapachise. Alioze, zango mulihasa nawa kukukwika ahone kukupapachisa. Mumu liaka? Nyonga ha yimwe yilweza. Hanji wakuzanga chinji yisemi ni masepa je waze hi Yela ja Yehova ko, hachino, wakwivwa woma ngwo nyi makupapachisa ayo malimika ni yena. (Mateu 10:37) Nawa hanji wakuzanga yimwe yuma chipwe ngwe unanyingika ngwo, Zambi keshi kuyizanga. (Samu 97:10) Chikwo nawa, hanji wakunyonga ha mashimbu apema waze wapwile ni kulinga yiwanyino ya mangeleja a mahuza, kuzanga yuma yacho, muchihasa kukukwika kwecha yiwanyino yize Yehova keshi kuzanga. (1 Kori. 10:20, 21) Kashika, watamba kulihula yenamwene ngwe, ‘Yika nakuzanga chinji’?
MUTU YOZE TWATAMBA KUZANGA CHINJI
4. Yika muyihasa kukukwasa hanga ulihane akupapachise?
4 Kuli yuma yinji yipema yize muzanga ni kusakwilila. Chakutalilaho, ngwe Mbimbiliya. Chipwe muze te kanda uchiputuka kulilongesa Mbimbiliya ni Yela ja Yehova, kota te wakuvumbika chinji Mbimbiliya. Chikwo nawa, hanji walilongesele kuzanga Yesu. Haliapwila amu hiwanyingika kanawa Yela ja Yehova, hanji wakuzanga kupwa no hamuwika mashimbu eswe. Chili chipema kuzanga yuma yino, alioze zango liacho kulichi kukukwasa hanga ulihane kuli Yehova ni kukupapachisa. Zango lie hali Yehova Zambi, lie mulikukwasa hanga akupapachise. Nyi muzanga Yehova kuhiana yuma yeswe, nichimwe chuma muchikukinda kulihana hanga akupapachise chakuhi. Chipwe muze hakupapachisa, zango lie hali Yehova, lie mulikukwasa hanga wende kulita ni umwenemwene.
5. Yika mutulilongesa haliapwila?
5 Yesu kambile ngwenyi, twatamba kuzanga Yehova ni mbunge yetu yeswe, ni mwono wetu weswe, ni kunyonga chetu cheswe, ni ngolo jetu jeswe. (Marku 12:30) Yika muhasa kulinga hanga uzange Yehova ni kumuvumbika chinji? Nyi twanyonga ha chize Yehova akutuzanga, muchitukwasa hanga ni yetu tumuzange. (1 Yoa. 4:19) Nyi mutuzanga Yehova, muchipwa chashi kulinga yuma yikwo. Yuma yika? Ye mutulilongesa haliapwila. *
6. Kulita ni A-Roma 1:20, mu jila yika muhasa kulilongesa hakutwala kuli Yehova?
6 Lilongese hakutwala kuli Yehova kupalikila mu yitangiwa yenyi. (Tanga A-Roma 1:20; Uso. 4:11) Pukuna ha mana ja Yehova waze anasoloka ha yuma yize atangile, ngwe mitondo ni tushitu. Lilongeseko hakehe hanga unyingike chize mujimba wetu wakukalakala. (Samu 139:14) Nyonga ha ndundo jize Yehova asele muchima lia tangwa. Alioze, tangwa lili katongonoshi umuwika, kuli nawa tutongonoshi anji. * (Iza. 40:26) Kupukuna ha yuma yino muchikukwasa hanga uvumbike chinji Yehova. Kunyingika ngwo, Yehova kakwete mana ni ndundo, muchikukwasa kupwa sepa lienyi. Alioze, nyi muzanga kukolesa zango lie hali Yehova, watamba kulilongesa chinji hakutwala kuli iye.
7. Shindakenyo yika watamba kupwa nayo mba uzange Yehova?
7 Pwako ni shindakenyo ngwo, Yehova kakukuzanga. Shina chakukukaliwila kutayiza ngwo, Sakatanga wa malilu ni hashi kananyingika ngwo yena kuuli nawa kakukuzanga? Nyi che wakunyonga, ewuluka ngwe Yehova “katwamine kusuku ni yetu eswe.” (Yili. 17:26-28) “Yehova kakupolongoza mbunge jeswe,” nawa kanakulakenya ngwe chize Ndawichi ambile kuli Solomone ngwenyi, “nyi mumufupa mumuwana.” (1 Sango 28:9) Chochene, Yehova hanakukoka, kashika wakulilongesa Mbimbiliya. (Jere. 31:3) Muze munyonga ha yuma yeswe yize Yehova akukulingila, zango lie hali iye mulikola.
8. Kuchi muhasa kusolola ngwo unasakwila ha zango lia Yehova?
8 Jila yimwe yize muhasa kusolwelamo ngwo, wakuzanga Yehova, yili kuhanjika nenyi mu yilemba. Zango lie hali Zambi, mulikola muze mumulweza manyonga je ni kumusakwila ha yuma yeswe yize akukulingila. Nawa usepa we ni Yehova muukola nyi wasa tachi hanga unyingike chize iye akukumbulula yilemba ye. (Samu 116:1) Nyi walinga yino, muupwa nawa ni shindakenyo ngwo iye kanakunyingika. Alioze, watamba kunyingika chize Yehova akunyonga ni yize anazange hanga ulinge, mba ukundame kanawa kuli iye. Kuli jila yimwika yize muyikukwasa kupwa ni chinyingi cha Yehova, yili kulilongesa Mbimbiliya.
Jila yipema ya kukundama kuli Zambi ni kunyingika yize anazange hanga tulinge, yili kulilongesa Mbimbiliya (Tala paragrafu 9) *
9. Kuchi muhasa kusolola ngwo wakulemesa Mbimbiliya?
9 Lilongese kulemesa Liji lia Zambi, Mbimbiliya. Mbimbiliya wika ye yakuhanjika umwenemwene hakutwala kuli Yehova ni yize anazange kukulingila. Kashika, tanga Mbimbiliya matangwa eswe. Shimbu kanda uchililongesa ni longeshi ye, chitangu lulieka kanawa longeso lie lia Mbimbiliya. Kaula yize wakulilongesa. Nyi mulinga chocho, musolola ngwo wakulemesa Mbimbiliya. (Samu 119:97, 99; Yoa. 17:17) Uli ni katalilo wa kutanga Mbimbiliya matangwa eswe? Shina wakukaula katalilo wacho?
10. Sango jika jili wika mu Mbimbiliya?
10 Mbimbiliya wika ye yili ni sango ja atu waze amwene Yesu. Ye wika yinalumbununa yuma yize Yesu alingile hali yena. Kulilongesa yuma yize Yesu ambile ni yize alingile, muchikukwasa umuzange.
11. Yika muyikukwasa hanga ukolese zango lie hali Yehova?
11 Kulilongesa kuzanga Yesu, muchikolesa zango lie hali Yehova. Mumu liaka? Mumu Yesu kakwimbulula kanawa yitanga ya Tato. (Yoa. 14:9) Kashika, muze mulilongesa chinji hakutwala kuli Yesu, munyingika kanawa Yehova ni kumulemesa chinji. Nyonga ha chize Yesu te akusolola keke kuli atu waze apwile ni kulengulula kuli akwo, ngwe yiswale, mieji, ni atu waze te keshi ni waze maakwasa. Nyonga nawa ha yiyulo ya mana yize Yesu akuhana ni chize muyuka ku mwono we ha kukawula yiyulo yacho.—Mateu 5:1-11; 7:24-27.
12. Muze mulilongesa chinji hakutwala kuli Yesu, yika muzanga kulinga?
12 Nyonga ha zango lia Yesu muze ahanyine mwono wenyi ngwe chitapo: Iye kafwile mumu lia yetu hanga Zambi atukonekene ku shili yetu. (Mateu 20:28) Nyi mulinga chocho, zango lie hali Yesu mulikola. Chino muchikukwasa hanga ulikonyeke ha shili ye, ni kwita ukonekeno kuli Yehova. (Yili. 3:19, 20; 1 Yoa. 1:9) Muze muzanga chinji Yesu ni Yehova, muzanga kupwa hakachi ka atu waze akwazanga.
13. Yika Yehova makwaha?
13 Lilongese kuzanga usoko wa Yehova. Hanji asoko ni masepa je keshi kuhasa kunyingika mumu liaka unazange kulihana kuli Yehova. Ayo hanji malimika ni yena. Alioze, Yehova kechi kukwecha ukawe, makwaha usoko wa ku ufulielo. Nyi muupwa mashimbu eswe ni mandumbu je a mu chikungulwila, muwana zango ni ukwaso uze mufupa. (Marku 10:29, 30; Hepre. 10:24, 25) Hanji ha kupalika cha mashimbu, asoko je no mahasa kuwayila Yehova hamwe ni yena ni kukawula yize Mbimbilia yakulongesa.—1 Petu. 2:12.
14. Ngwe chize mukanda 1 Yoano 5:3 unasolola, yika wanyingika ha yiyulo ya Zambi?
14 Lilongese kuvumbika shimbi ja Yehova ni kujikaula. Muze te kanda uchinyingika Yehova, kota wapwile ni nyonga lialisa hakutwala ku chipi ni chipema. Alioze, haliapwila hiwapwa ni shindakenyo ngwo, yiyulo ya Yehova ye yili ni ulemu. (Samu 1:1-3; tanga 1 Yoano 5:3.) Nyonga ha yiyulo yize Mbimbiliya yakuhana kuli malunga, mapwo, yisemi ni ana. (Efwe. 5:22–6:4) Shina kukaula yiyulo yino chinakwasa usoko we hanga uwahilile? Nyonga nawa ha yize Yehova akulongesa ha chize mutusakula masepa jetu. Shina kukaula yiyulo yino chinakukwasa kupwa ni ndako jipema? Unawahilila? (Yishi. 13:20; 1 Kori. 15:33) Hanji wakumbulula yihula yino ngwo, “ewa.”
15. Yika muyihasa kukukwasa hanga ukaule yiyulo ya mu Mbimbiliya?
15 Ha mashimbu amwe, muchihasa kupwa chikalu kunyingika chize muhasa kukaula yiyulo yize unalilongesa mu Mbimbiliya. Kashika Yehova akuzachisa ululikiso wenyi hanga akwehe malongeso waze anakatuka mu Mbimbiliya, waze makukwasa kunyingika chipi ni chipema. (Hepre. 5:13, 14) Muze mulilongesa kanawa malongeso wano, mumona ngwo kali ni ulemu unji ku mwono. Chikwo nawa, makukwasa hanga uzange kupwa mu ululikiso wa Yehova.
16. Kuchi Yehova akusongwela atu jenyi?
16 Lilongese kuzanga ululikiso wa Yehova ni kuukwasa. Yehova kanase atu jenyi mu yikungulwila. Iye hanatongola mwanenyi Yesu hanga apwe mutwe wa yikungulwila yeswe. (Efwe. 1:22; 5:23) Yesu kasele chimwe chizavu chikehe cha malunga asongwele mulimo uze iye te anazange hanga ulingiwe musono. Chizavu chacho, Yesu kachivulukile ngwo, “ndungo wamwenemwene, wa kukanyama.” Ndungo yono kakuhondangana chinji hanga akwehe kulia cha ku spiritu ni kukufunga. (Mateu 24:45-47) Jila yimwe yize ndungo wamwenemwene akukufungilamo, yili kusa makulwana mu chikungulwila hanga akusongwele ni kukufunga. (Iza. 32:1, 2; Hepre. 13:17; 1 Petu. 5:2, 3) Makulwana a mu chikungulwila kakulihana ni mbunge yeswe hanga akufunge, akulembejeke ni kukukwasa hanga upwe ni usepa ukolo ni Yehova. Ukwaso ulemu chinji uze makulwana mahasa kukwaha, uli kukufumba hanga ulongese akwenu hakutwala kuli Yehova.—Efwe. 4:11-13.
17. Kulita ni A-Roma 10:10, 13, 14, mumu liaka twakuhanjika ni akwetu hakutwala kuli Yehova?
17 Kwasa akwenu hanga alilongese kuzanga Yehova. Yesu kalwezele tumbaji twenyi hanga alongese akwo hakutwala kuli Yehova. (Mateu 28:19, 20) Mutuhasa kwivwa ngwe kanatushinjila hanga twononokene shimbi yino. Alioze, muze zango lie muli Yehova mulikola, muwivwa ngwe chize postolo Petulu ni Yoano evwile. Ayo kambile ngwo: “Yetu kutwahashile kulitwamina kwambujola yuma yize twamwene, ni twevwile.” (Yili. 4:20) Mutuwahilila chinji nyi twakwasa mutu hanga azange Yehova. Achinyonga chiseke chize Fwilipe evwile, muze akwashile Ka-Etiopia kunyingika umwenemwene wa Yisoneko ni kumupapachisa! Muze mwimbulula Fwilipe ni kukaula shimbi ya Yesu ya kuya ni kwambujola, musolola ngwo unazange kupwa Chela cha Yehova. (Tanga A-Roma 10:10, 13, 14.) Muze mulinga yino yuma, kota ni yena muhula ngwe chize Ka-Etiopia ahulile ngwenyi: “Chika chinangukwika kutambula upapachiso?”—Yili. 8:36.
18. Yika mutulilongesa ha mutwe muusulaho?
18 Chiyulu chilemu chinji chize mukwata ku mwono we, chili kukupapachisa. Kashika, watamba kunyonga kanawa, shimbu kanda achikupapachisa. Yika watamba kunyingika hakutwala ku upapachiso? Yika watamba kulinga muze kanda achikupapachisa ni muze hakupapachisa? Yihula yino mayikumbulula ha mutwe muusulaho.
MWASO 2 Jina Lie Yehova
^ kax. 5 Atu amwe waze akuzanga Yehova, kakukakajana nyi halilulieka hanga aapapachise nyi ka. Ni yena che wakwivwa? Nyi che wakwivwa, longeso lino mulisolola yuma yize muhasa kulinga hanga akupapachise.
^ kax. 5 Atu kalisa, kashika, amwe mahasa kukaula yiyulo yize yili ha mutwe uno mu jila yalisa.
^ kax. 6 Nyi unazange kunyingika nawa, tala ha kamukanda, A Vida—Teve um Criador? e A Origem da Vida—Cinco Perguntas Que Merecem Resposta.
^ kax. 61 ULUMBUNWISO WA YIZULIE: Umwe ndumbu wa pwo kanahana kalifwo kuli umwe pwo ha chisalo.
