1-2. Nyi kanda uchipwaho ni kukupapachisa, mumu liaka kuwatambile kunenganyana? (Tala chizulie ha chifukilo.)

 NYI unazange hanga akupapachise, tunakusakwila chinji. Chino chili chuma chipema chize unazange kulinga. Shina hiwalilulieka hanga akupapachise? Nyi watayiza ngwe ewa, ni makulwana a mu chikungulwila makutayiza, lipapachise muze mukusoloka uhashi. Nyi wachilinga, muwahilila chinji mu mulimo wa Yehova.

² Shina umwe hanakulweze ngwo, unafupiwa kwalumuna yimwe mba akupapachise? Nyi hanji yena mwene mwe unanyongo chocho? Nyi chenacho, kanda unenganyana. Muhasa kwalumuna yitanga ye hanga akupapachise chipwe ngwe uli ni miaka yeswayo.

3. Yika Ka-Etiopia ambile kuli Fwilipe, mba yihula yika tunawane ha kumbululo lize ahanyine? (Yilinga 8:36, 38)

³ Tanga Yilinga 8:36, 38. Umwe chilolo Ka-Etiopia, yahula Fwilipe ngwenyi: ‘Yika yinangukwika kungupapachisa?’ Lunga yono Ka-Etiopia kazangile chinji kumupapachisa, mba shina te hajama lume ni kumupapachisa?

4. Kuchi Ka-Etiopia asolwele ngwenyi, kanazange kunyingika nawa yuma yikwo?

⁴ Lunga yono Ka-Etiopia kayile ku ‘Yerusaleme hanga awayile’ Zambi. (Yili. 8:27) Chino chinasolola ngwo, iye te hanatayiza uwayilo wa A-Yunda. Amu te hanalilongesa Yisoneko ya Hepreu, iye kanyingikine yuma yinji hakutwala kuli Yehova. Alioze kazangile kulilongesa nawa yuma yinji. Kwamba umwenemwene, muze Fwilipe awanyine lunga wacho mu tapalo, iye te kanatange chivungo cha uprofeto wa Izaia. (Yili. 8:28) Chivungo chino chapwile ni umwenemwene ulemu wa mu  Mbimbiliya. Hachino, Ka-Etiopia kakazangile wika kunyingika yuma ya helu-helu ya mu yisoneko; kazangile kulilongesa nawa yuma yilemu.

5. Yika Ka-Etiopia alingile hakutwala ku yize alilongesele?

⁵ Lunga yono ‘kapwile chilolo mulemu wa mwazovu Kandase’ mu Etiopia. Iye kapwile kasongo wa yuma yenyi yeswe. (Yili. 8:27) Chochene, kapwile lunga yoze te keshi mashimbu anji; yoze wapwile ni milimo yeka ni yeka. Chipwe chocho, iye kasele mashimbu hanga awayile Yehova. Kazangile nawa kulinga yuma yinji hi wika ko kulilongesa umwenemwene. Kazangile kukaula ku mwono wenyi yuma yize te akulilongesa. Chocho, yalinga wenyi usuku kukatuka ku Etiopia ni kuya ku Yerusaleme hanga awayile Yehova mu tembele. Wenyi wacho wamumbachile mashimbu ni kuzachisa mbongo jinji. Chipwe chocho, iye kazangile kulingila Yehova chipwe ngwe te matokesa yuma yeswayo.

6-7. Kuchi zango lize Ka-Etiopia apwile nalio hali Yehova liokele chinji?

⁶ Fwilipe yalongesa umwenemwene ulemu kuli lunga Ka-Etiopia, kuchingako umwenemwene hakutwala kuli Mesaya. (Yili. 8:34, 35) Lunga yono kanakawahilila chinji ha kunyingika chitapo cha Yesu, ni yize te chinalumbunuka kuli iye. Mba yika alingile hanyima lia kulilongesa yuma yacho? Iye kapwile mutu yoze te akulemesa chinji mu uwayilo wa A-Yunda, kashika te mahasa kununga kwenyi chizechene. Alioze, zango lienyi hali Yehova ni hali Yesu yilioka chinji. Chocho, yakwata chiyulo cha kwalumuna mwono wenyi ha kumupapachisa ni kupwa kambaji ka Yesu. Fwilipe kapapachishile Ka-Etiopia mumu kanyingikine ngwenyi te halilulieka.

⁷ Ni yena muhasa kulilulieka hanga akupapachise nyi mukaula chilweza cha Ka-Etiopia. Nyi wachilinga, muopwa ni shindakenyo yizeyene iye apwile nayo ni kuhula ngwenyi: “Yika yinangukwika kungupapachisa?” Tutalenu chize ni yena muhasa kulinga yuma ngwe yize alingile Ka-Etiopia. Iye kanungine ni kulilongesa, kukaula yize analilongesa ni kwokesa zango lienyi hali Yehova.

8. Yika Yoano 17:3, unakukolweza kulinga?

⁸ Tanga Yoano 17:3. Shina maliji wano a Yesu e akukwashile mba uputuke kulilongesa Mbimbiliya? Yino ye yalingiwile kuli anji a kuli yetu. Alioze, shina maliji wano kanatukolweza hanga tununge ni kulilongesa? Ewa. Yetu kutuchi keza kecha kulilongesa kunyingika ‘Zambi umuwika wamwenemwene.’ (Chilu. 3:11) Mutununga ni kulilongesa hakutwala kuli Yehova ku miaka ya mutolo. Nyi mutulilongesa chinji hakutwala kuli  Yehova, chino muchitukwasa kukundama kuli iye.—Samu 73:28.

9. Yika twatamba kulinga hanyima lia kulilongesa umwenemwene wa helu-helu wa mu Mbimbiliya?

⁹ Muze twaputukile kulilongesa hakutwala kuli Yehova, twaputukile ni umwenemwene wa helu-helu wa mu Mbimbiliya. Ha mukanda uze asonekenene A-Hepreu, postolo Paulu kambile ngwenyi, umwenemwene uno wa helu-helu wapwile ngwe yuma ya uputukilo. Iye kakambile ngwenyi yuma yacho kuyishi ni ulemu; shimbu ambe chocho, yayitesa ni yamwa yize ana-kemba akunwa. (Hepre. 5:12; 6:1) Kashika, akolwezele Akwa-Kristu hanga achine kulihulikila wika ha malongeso a helu-helu. Alioze alilongese yuma yikalu ya mu Liji lia Zambi. Shina wakuzanga kulilongesa umwenemwene ukalu wa mu Mbimbiliya? Shina unazange kukola ku ufulielo ni kulilongesa chinji hakutwala kuli Yehova ni upale wenyi?

10. Mumu liaka atu anji chakwakalila kulilongesa?

¹⁰ Kuli anji a kuli yetu, kulilongesa hi chuma chashi ko. Mba yika mutwamba hali yena? Shina ku shikola te wakukwata yuma ni kawashi ni kuzanga kulilongesa? Nyi wapwile ni umwe kapinda mba chino yichikutwala unyonge ngwe kulilongesa chapwa chikalu? Atu anji che akunyonga. Alioze Yehova mahasa kukukwasa. Iye kali mungunu, nawa kali Longeshi munene yoze wahiana alongeshi eswe.

11. Kuchi Yehova akusolola ngwenyi kali “Longeshi” munene?

¹¹ Yehova mwene kambile ngwenyi kali “Longeshi” munene. (Iza. 30:20, 21) Iye kali Longeshi yoze ukwete umbovu, mupema nawa katunyingika kanawa. Kakufupa yuma yipema hali alongi jenyi. (Samu 130:3) Iye keshi kushimbwila hali yetu yuma yize kutuchi kuhasa kulinga. Nyingika ngwe iye mwe walingile wongo, chawana chipema chize uli nacho. (Samu 139:14) Yetu eswe twasemukine ni nyonga lia kufupa kulilongesa yuma yaha. Sakatanga yetu kanazange hanga tununge ni kulilongesa ku miaka yeswe, ni kuzanga kuchilinga. Kashika, muchipema ‘kupwa ni usona’ unji ha umwenemwene wa mu Mbimbiliya, kukatuka ha mashimbu wano. (1 Petu. 2:2) Sakula yuma yize muhasa kulinga mu ululikiso wa Yehova, tanga Mbimbiliya ni kulilongesayo mashimbu eswe. (Yoshu. 1:8) Ni ukwaso wa Yehova, muzanga chinji kutanga Mbimbiliya ni mikanda ya mu ululikiso wetu ni kupukuna ha yize mulilongesa.

12. Mumu liaka chili chilemu kulilongesa ha mwono ni mulimo wa kwambujola wa Yesu?

¹² Sako mashimbu hanga upukune ha mwono ni ha mulimo wa kwambujola wa Yesu. Nyi tunazange kulingila Yehova mu jila yalita, chili chilemu kwimbulula chilweza cha Yesu, chipi-chipi ha mashimbu akalu. (1 Petu. 2:21) Yesu kahanjikile ni umwenemwene weswe ngwenyi, tumbaji twenyi te mapalika mu yipikalo. (Luka 14:27, 28) Chipwe chocho, kapwile ni shindakenyo ngwenyi, ayo manunga ni kushishika kuli Yehova ngwe chize iye alingile. (Yoa. 16:33) Lilongese chinji hakutwala ku chize mwono wa Yesu wapwile, ni kusakula yize mwimbulula ku mwono we wa tangwa ha tangwa.

13. Yika watamba kwita kuli Yehova, nawa mumu liaka?

¹³ Tunanyingika ngwetu chinyingi chili chilemu, alioze hi yino wika ko. Chinyingi muchikukwasa kunyingika kanawa Yehova ni kupwa ni zango linji hali iye ni ufulielo. (1 Kori. 8:1-3) Muze unanungu ni kulilongesa hakutwala kuli Yehova, mwite hanga akukwase kupwa ni ufulielo unji. (Luka 17:5) Yilemba ya mutapu au, iye mayikumbulula. Nyi wapwa ni ufulielo uze unakatuka ha chinyingi chamwenemwene, muchipwa chashi kukaula ku mwono we yize walilongesa.—Tia. 2:26.

14. Kuchi Petulu asolwele ulemu wa kukaula ku mwono wetu yize twakulilongesa? (Tala nawa chizulie.)

¹⁴ Ha kuzachisa chilweza cha Noa, postolo Petulu yasolola ngwenyi, chili chilemu kununga ni kukaula ku mwono wetu yuma yize twakulilongesa. Yehova kalwezele Noa ngwenyi, maneha Sanga lia meya hanga anongese atu api a ha matangwa jacho. Kunyingika wika ngwo maneha sanga lia meya te hi chino wika ko muchilamwina mwono wa Noa ni wa asoko jenyi. Hakutwala ku chikuma chacho, Petulu yazachisa liji muze te ‘anatungu ulungu’ hanga ahanjike ha matangwa aze shimbu Sanga lia meya te kanda liza. (1 Petu. 3:20) Yino yinasolola ngwo, Noa ni usoko wenyi kalingile yuma kulita ni yize Zambi ambile, chocho yatunga ulungu. (Hepre. 11:7) Petulu katesele upapachiso ni yize Noa alingile, hakwamba ngwenyi: ‘Upapachiso uze unalite ni chino, haliapwila unanulamwina nawa.’ (1 Petu. 3:21) Hachino, mutuhasa kutesa tachi jize unase ulilulieke hanga akupapachise ni tachi jize Noa ni usoko wenyi asele ha miaka yinji hanga atunge ulungu. Yika unafupiwa kulinga mba ujame ni kukupapachisa?

15. Kuchi muhasa kusolola ngwe walikonyeka ni mbunge yeswe?

¹⁵ Chuma chimwe chize twatamba kulinga chili kulikonyeka ni mbunge yeswe ha shili yetu. (Yili. 2:37, 38) Twakuhasa kwalumuna yitanga yetu nyi mutulikonyeka ni mbunge yeswe ha yize twakulinga. Shina hiwecha kulinga yuma yize yakuvwisa Yehova kupiha ngwe upangala, kunwa makanya, hanji kuhanjika yuma ya sonyi? (1 Kori. 6:9, 10; 2 Kori. 7:1; Efwe. 4:29) Nyi kanda wecha yuma yino twatongola, kanda uhonga; nunga ni kusa tachi. Eta ukwaso kuli longeshi we wa Mbimbiliya hanji kuli makulwana a mu chikungulwila. Nyi uli mukweze yoze watwama hamuwika ni yisemi, eta ukwaso wo hanga uhase kwecha yuma yipi yize yinakukwika kukupapachisa.

16. Kupwa ni katalilo mupema ku spiritu yika chinachingi?

¹⁶ Chikuma chikwo chilemu chili kupwa ni katalilo mupema wa ku spiritu. Chino chinachingi kukunguluka ni kuhana makumbululo. (Hepre. 10:24, 25) Nyi ngwe waputuka  kwambujola ni chikungulwila, ambujola mashimbu eswe. Nyi mulihana chinji mu mulimo uno wa kulamwina mwono, muchikukwasa hanga uzange mulimo wacho. (2 Timo. 4:5) Nyi uli mukweze, watwama ni yisemi je, lihule ngwe: ‘Shina yisemi jami katamba mashimbu eswe kungwiwulula hanga nguye ku kukunguluka ni mu mulimo wa kwambujola? Nyi yami mwene mwe natamba kuyilinga chakuhona kungwiwulula?’ Kulinga yuma yino muchisolola ngwo uli ni ufulielo, wakuzanga Yehova ni kusakwilila ha yeswe yize akukulingila. Ngwe chize Mbimbiliya yakwamba, ‘unalingi yitanga’ yize Zambi akuzanga, mu maliji akwo chili ngwe unahane chawana kuli Yehova. (2 Petu. 3:11; Hepre. 13:15) Yuma yeswe yize twakuhana kuli Yehova ni mbunge yeswe chakuhona kutushinjila, yakumuvwisa kuwaha. (Tala nawa 2 A-Korindu 9:7.) Kuli yetu, chapwa chipema chinji kulingila Yehova ni mbunge yeswe.

17-18. Yuma yika yilemu yize muyikukwasa mba ujame ni kukupapachisa, nawa mumu liaka? (Yishima 3:3-6)

¹⁷ Muze unalilulieka hanga akupapachise, muliwana ni yipikalo yinji mu jila. Atu amwe makukekuna ha yize wafuliela; akwo malimika ne. (2 Timo. 3:12) Chikwo nawa, hanji uli ni umwe ulelu wa ndako yipi yize wakupinda nayo. Hanji wakunenganyana ha kunyonga ngwe kuuchi keza kahasa kulinga yize hiunatese. Ha chikuma ngwe chino, yika muyihasa kukukwasa hanga uchine kuhonga? Chuma muchikukwasa chili kuzanga Yehova.

¹⁸ Zango lize uli nalio hali Yehova, chili chuma chilemu chize muhasa kupwa nacho. (Tanga Yishima 3:3-6.) Nyi wazanga chinji Yehova, muchikukwasa kukumba yipikalo. Kanji-kanji, Mbimbiliya yakuhanjika ha zango lingunu lize Yehova ali nalio hali tuvumbi twenyi. Maliji wano kanasolola ngwo, Yehova kechi keza kahichika tuvumbi twenyi hanji kwecha kwazanga. (Samu 100:5) Iwuluka ngwe Zambi kakutangile mu chifwa chenyi. (Uputu. 1:26) Mba kuchi muhasa kusolola zango lingunu?

19. Kuchi muhasa kusolola usakwililo we ha yuma yeswe yize Yehova akukulingila? (A-Ngalashia 2:20; NWT.)

¹⁹ Chuma chitangu chize twatamba kulinga mba tupwe ni zango lingunu chili kupwa ni kusakwilila. (1 Tesa. 5:18) Hita tangwa lihule ngwe: ‘Kuchi Yehova akusolola ngwenyi kakunguzanga?’ Hanyima, muze mulemba, sakwilila  Yehova ha kutongola chimwe chuma chize iye akulingila. Yehova kakukuzanga ni kukulingila yuma yinji, kashika eseka kumona yuma yacho ngwe chize postolo Paulu alingile. (Tanga A-Ngalashia 2:20; NWT.) Lihule ngwe: ‘Ngunazange kusolola kuli Yehova ngwami, nakumuzanga?’ Zango lize ukwete hali Yehova lie mulikukwasa mba ukumbe yeseko ni yipikalo yize mupalika ku mwono we. Zango liacho lie mulikukwasa mba ulinge kanawa katalilo wa ku spiritu ni kusolola hita tangwa ku mwono we ngwo wakuzanga Yehova.

20. Kuhana mwono we kuli Yehova yika chinalumbunuka? Shina chiyulo chacho chili chilemu?

²⁰ Ha kupalika cha mashimbu, mumu lia zango lize ukwete hali Yehova muzanga kulemba kuli iye. Ha yilemba yacho, yena mulihana kuli Yehova. Muze mulihana kuli iye, muopwa ni kutalatala chipema; cha kumuwayila ku miaka yeswe. Muze mulihana kuli Yehova, mumulakenya kumulingila ha mashimbu apema ni ha mashimbu api. Kulihana kuli Yehova chili chilakenyo chize mulinga kamuwika ku mwono we. Yena mukwata yiyulo yinji ku mwono we, yimwe yipema, alioze ha yiyulo yino yeswe, chiyulo cha kulihana kuli Zambi chinahiane yiyulo yeswe. (Samu 50:14) Satana meseka kutepulula zango lie hali Yehova, ni kushimbwila hanga uhone kushishika kuli iye. Alioze, kanda wecha hanga akukumbe! (Yombi 27:5) Nyi muzanga chinji Yehova, chino muchikukwasa kumanununa chilakenyo cha kulihana che ni kukundama kuli iye.

21. Mu mutapu uka upapachiso hi songo ko, alioze uputukilo?

²¹ Hanyima lia kulihana kuli Yehova, hanjika ni makulwana a mu chikungulwila hanga ulinge chuma chikwo chize muchihataho. Alioze, nihindu iwuluka ngwe upapachiso uli wika uputukilo hi songo ko. Kukatuka ha tangwa liacho, muputuka kulingila Yehova mulimo uze muununga ku miaka yeswe. Kashika kukatuka haliapwila, kolesa zango lie hali Yehova. Tesa yize mulinga ku ufulielo hanga zango lie hali Yehova likole hita tangwa. Kulinga yino yuma muchikukwasa hanga akupapachise. Tangwa liacho mulikapwa lilemu chinji ku mwono we. Alioze iwuluka ngwe, uno uli wika uputukilo. Tunashimbwila hanga zango lize uli nalio hali Yehova ni hali Mwanenyi linunge ni kukola ku miaka ya mutolo!