MUTWE WAKULILONGESA 14
‘Ku Chino Eswe Makanyingika Ngwo Yenu Nuli Tumbaji Twami’
“Ku chino eswe makanyingika yenu nuli tumbaji twami, nyi munupwa ni zango umwe kuli mukwo ni mukwo.”—YOA. 13:35.
MWASO 106 Pwenu ni Kusolola Zango
CHIKUMA CHILEMU a
Yika atu anji akwamba muze akumona zango lize tukwete mukachi ketu? (Tala paragrafu 1)
1. Yika kanji-kanji akumona atu waze akwiza ha kukunguluka chetu ha chisuho chitangu? (Tala nawa chizulie.)
ACHINYONGA umwe pwo ni lunga keza ha chisuho chitangu ha kukunguluka mu Zuwo lia Wanangana. Ayo makomoka mu mutapu uze aatambula ni kumona zango lize tukwete mukachi ketu. Muze mafuna ku zuwo, pwo malweza mukwo-lunga ngwenyi: ‘Wamona, Yela ya Yehova kapwa chinji atu apema.’
2. Mumu liaka mandumbu amwe echele kuwayila Yehova?
2 Zango lize liatwama mukachi ka tuvumbi twa Yehova liapwa lilemu. Chipwe chocho, Yela ja Yehova hi atu angunu ko. (1 Yoa. 1:8) Nyi twanyingika kanawa mandumbu jetu mu chikungulwila, chakupwa chashi kunyingika uhenge wo. (Roma 3:23) Chaluyinda, mandumbu anji haneche kuwayila Yehova mumu lia uhenge wa akwo.
3. Kuchi atu te mahasa kunyingika tumbaji amwenemwene a Yesu? (Yoano 13:34, 35)
3 Tala nawa chisoneko chize chinakwate mutwe uno. (Tanga Yoano 13:34, 35.) Yika yakukwasa atu kunyingika tumbaji amwenemwene a Yesu? Chuma chacho chili zango, hi ungunu ko. Wahasa kumona ngwe Yesu kakambile ngwenyi: ‘Ku chino yenu mununyingika ngwenu nuli tumbaji twami.’ Alioze ngwenyi: ‘Ku chino eswe makanyingika ngwo yenu nuli tumbaji twami.’ Hano Yesu yasolola pundu ngwo, hi tumbaji twenyi wika ko te manyingika ngwo kakwete zango liamwenemwene mukachi ko, alioze ni atu akwo te mamona zango liacho.
4. Yika atu amwe mahasa kulihula hali Akwa-Kristu amwenemwene?
4 Atu amwe waze hi Yela ja Yehova ko hanji mahasa kulihula ngwo: ‘Mu mutapu uka zango liakusolola ngwo mutu nganji kali kambaji wamwenemwene wa Yesu? Kuchi Yesu asolwele zango hali tumbaji twenyi? Mba kuchi mutuhasa kwimbulula chilweza cha Yesu musono?’ Yela ja Yehova kakulinga kanawa ha kupukuna ha makumbululo a yihula yino. Kulinga chino chakutukwasa kuzanga mandumbu jetu, chipi-chipi nyi twanyingika uhenge wo.—Efwe. 5:2.
MUMU LIAKA ZANGO LIAKUSOLOLA TUMBAJI AMWENEMWENE A YESU?
5. Maliji a Yesu ha Yoano 15:12, 13 yika analumbunuka?
5 Yesu kambile ngwenyi, tumbaji twenyi te malizanga umwe ni mukwo mu mutapu walipwila. (Tanga Yoano 15:12, 13.) Talenu shimbi yize Yesu aehele: “Lizangenu umwe ni mukwo ngwe chizechene yami nanuzangile.” Yika maliji wano analumbunuka? Yesu kalumbunwine kuli tumbaji twenyi ngwenyi, o te katamba kuzanga chinji mandumbu jo kuhiana ene, nawa nyi muchilita mahasa kuhana chipwe mwono wo hali ayo. b
6. Kuchi Mbimbiliya yakusolola ulemu wa zango?
6 Mbimbiliya yakulongesa ngwo, zango likwete ulemu unji. Atu anji kakuzanga chinji Yisoneko yino yinambe ngwo: “Zambi iye zango.” (1 Yoa. 4:8) ‘Zanga mwenyembo we ngwe chize wakulizanga yena mwene.’ (Mateu 22:39) “Zango kuliakufuka milonga yinji.” (1 Petu. 4:8) “Zango kulishi kuhwa.” (1 Kori. 13:8) Versu jino ni jikwo nawa, jakusolola pundu ngwo chili chilemu kusolola chitanga chino chipema.
7. Mumu liaka Satana kechi kuhasa kukunga atu hanga alizange umwe ni mukwo ni kupwa alinunga?
7 Atu amwe kakulihula ngwo: ‘Kuchi muchihasa kupwa chashi kunyingika uwayilo wamwenemwene? Mayingeleja eswe kakwamba ngwo, kakulongesa umwenemwene, alioze hita yingeleja yakulongesa chuma chalisa hali Zambi.’ Satana kanahase kusa mayingeleja anji a mahuza, chino chakupinjisa chinji atu. Alioze, Satana kechi keza kahasa kukunga atu a mu yifuchi yeka ni yeka hanga alinge usoko umuwika wa hashi eswe wa atu waze akulizanga umwe ni mukwo. Yehova wika mwe mahasa kuchilinga. Chino chinalite mumu zango liamwenemwene linakatuka kuli Yehova. Atu waze ali ni spiritu ni yiwape ya Yehova, e wika mahasa kupwa ni zango liamwenemwene mukachi ko. (1 Yoa. 4:7) Kashika Yesu ambile ngwenyi, tumbaji twenyi e wika te malisolwela zango liamwenemwene umwe ni mukwo.
8-9. Kuchi atu anji akwivwa muze akumona zango lize tukwete mukachi ketu?
8 Ngwe chize Yesu aprofetezele, atu anji kakuhasa kumona tumbaji twenyi amwenemwene ha zango lize akwete mukachi ko. Chakutalilaho, ndumbu Ian kanewuluka yize yamukomwesene muze ayile ha kukunguluka cha mambonge ha chisuho chitangu, chize chalingiwile hakamwihi ni zuwo lienyi mu chipalo cha konda. Mu chihela muze atalile konda ha kupalika cha amwe tukweji. Iye yamba ngwenyi: “Yuma yeswe yinakalisa, Yela ja Yehova kapwile a kufumba, akuzala kanawa chipwe ana jo kakapwile ni kuneha zungo. Chahiana ulemu, ayo kapwile ni kusoloka ngwo kali ni sambukila ya ku mbunge, ni yami ye nazangile kupwa nayo. Chishi kwiwuluka pande nijimwe ha tangwa liacho, alioze kupwa cha Yela ja Yehova chasalile mu manyonga jami.” c Yize Ian amwe ha kukunguluka chino, yili yuma yize yakwiza ku zango liamwenemwene lize twakulisolwela umwe ni mukwo. Muze twakuzanga mandumbu jetu, twakwavumbika ni kwasolwela umbovu.
9 Yino ye amwene ndumbu John muze ayile ha kukunguluka chitangu mu Zuwo lia Wanangana. Iye yamba ngwenyi: “Nakomokene ha chize atu eswe angutambwile mu chihela chacho. Zango lingunu lize namwene mukachi ko lianguhele shindakenyo ngwami, au uli uwayilo wamwenemwene.” d Yilweza yino ni yikwo nawa, yinasolola pundu ngwo, tuvumbi twa Yehova kali Akwa-Kristu amwenemwene.
10. Ha yika tuli ni uhashi wa kusolola ngwetu, twakuzanga mandumbu jetu? (Tala nawa maliji mushi lia lifwo.)
10 Ngwe chize twamona ku uputukilo wa longeso lino, mu chikungulwila kumushi mutu mungunu. Ha mashimbu amwe, mandumbu jetu mahanjika hanji kulinga yuma yize muyituvwisa kupiha. e (Tia. 3:2) Nyi yino muyilingiwa, tuli ni uhashi wa kusolola zango hali mandumbu jetu ha yize mutulinga hanji mutuhanjika. Chuma chize muchitukwasa kusolola zango, chili kulilongesa chilweza cha Yesu.—Yoa. 13:15.
KUCHI YESU ASOLWELE ZANGO HALI APOSTOLO JENYI?
Yesu kapwile ni kuzanga apostolo jenyi chipwe muze te akuhengesa (Tala maparagrafu 11-13)
11. Ndako yika yipi yize asolwele Tiangu ni Yoano? (Tala nawa chizulie.)
11 Yesu kakapwile ni kushimbwila ngwenyi, tumbaji twenyi apwe angunu. Shimbu achilinge, iye yaakwasa akumbe uhenge wo mba ahase kupwa ni utayizo wa Yehova. Tangwa limwe, apostolo aali, Tiangu ni Yoano, yalweza naye ahanjike ni Yesu hanga aehe yihela yilemu mu Wanangana wenyi. (Mateu 20:20, 21) Yize Tiangu ni Yoano alingile, yasolwele kulizata, mumu kazangile kupwa alemu kuhiana akwo.—Yishi. 16:18.
12. Shina Tiangu ni Yoano wika e asolwele ndako yipi? Lumbununa.
12 Hi Tiangu ni Yoano wika ko asolwele ndako yipi ha mashimbu jacho. Talenu chize apostolo akwo alivwile. Mbimbiliya yinambe ngwo: “Muze tumbaji akwo kumi achivwile, yevwila kupiha wano mwana-kwo ni yayo.” (Mateu 20:24) Mutuhasa kumona ngwetu, hapwile mbwaja mukachi ka Tiangu, Yoano ni apostolo akwo. Hanji kambile yuma ngwe yino: ‘Nunamono ngwe yenu nuli aya, mba nwite chihela chilemu mu Wanangana wa Zambi? Hi yenu wika ko nwakukalakala ni Yesu. Ni yetu tunafupiwa yihela yilemu mu Wanangana wa Zambi!’ Chipwe ngwe kwalingiwile yuma yeswayo, ha mashimbu jacho apostolo kavulamine ulemu wa kulizanga ni kulisolwela keke umwe ni mukwo.
13. Yika Yesu alingile muze amwene uhenge wa apostolo jenyi? (Mateu 20:25-28)
13 Kuchi Yesu atalile ha chikuma chacho? Iye kakahongele ni kwamba ngwenyi, mungusakula apostolo apema, alikehesa waze manunga ni kulisolwela zango umwe ni mukwo. Alioze, yahanjika no ni uhumikizo weswe mumu kanyingikine ngwenyi, apostolo te kanazange kulinga yuma yalita. (Tanga Mateu 20:25-28.) Chino kuchakapwile chisuho chitangu hanji cha kasula chize apostolo ahamikine hanga amone yoze te ukwete ulemu mukachi ko. Chipwe chocho, Yesu yaasolwela umbovu.—Marku 9:34; Luka 22:24.
14. Apostolo kakolelele mu chihela cha mutapu uka?
14 Kwamba pundu, Yesu kanyongene ku chihela chize apostolo akolelele. (Yoa. 2:24, 25) Ayo kanakakolela mu chihela muze mangana a mayingeleja te akulongesa ngwo, mutu mba apwe mulemu katamba kupwa ni chihela chilemu mukachi ka akwo. (Mateu 23:6; tala nawa chinema, Primeiros Assentos nas Sinagogas ha nota ya estudo ha Mateu 23:6.) Mangana a uwayilo wa A-Yunda no kapwile ni kulimona ngwo kali alemu kuhiana akwo. f (Luka 18:9-12) Yesu kanyingikine ngwenyi, yino yeswe te muyikwata ha chize apostolo manyonga hali ene ni hali akwo. (Yishi. 19:11) Yesu kakapwile ni kushimbwila tumbaji twenyi hanga ahengese, alioze muze apwile ni kuhengesa iye te kakwasolwela uhomboloji. Kanyingikine ngwenyi, tumbaji twenyi kapwile ni mbunge yipema, chocho ni uhumikizo yaakwasa hanga ehuke kulizata ni kuzo ha kusolola zango mukachi ko.
KUCHI MUTUHASA KWIMBULULA CHILWEZA CHA YESU?
15. Yika mutuhasa kulilongesa ha yize yalingiwile kuli Tiangu ni Yoano?
15 Mutuhasa kulilongesa yuma yinji ha yize yalingiwile kuli Tiangu ni Yoano. Kwita yihela yilemu mu Wanangana, kwamba pundu chapwile chuma chipi. Alioze, apostolo akwo no kahengesele mumu kechele yuma yacho yaahandunune. Chipwe chocho, Yesu yasolwela apostolo eswe 12 umbovu ni zango. Yika twalilongesa? Twalilongesa ngwetu, chuma chipi hi wika ko tupalia waze akwetu malinga, alioze ni yize yetu mutulinga hanji mutuhanjika ha tupalia jacho. Yika muyitukwasa mba tulinge yuma yalita? Nyi mutuvwila uli umwe ndumbu, twatamba kulihula ngwetu: ‘Yuma yika yipi alinga yize yinangupinjisa chichize? Shina yino yinasolola yitanga yami yipi yize natamba kwalumuna? Kutala ndumbu yono kanapalika mu yimwe yipikalo? Chipwe ngunamono ngwami nguli ni chitela cha kumuvwila uli, shina munguhasa kusolola zango ni kumukonekena?’ Nyi mututwama ni akwetu ni zango, mutusolola ngwetu tuli tumbaji amwenemwene a Yesu.
16. Yika mutuhasa kulilongesa nawa ha chilweza cha Yesu?
16 Chilweza cha Yesu chinatusolwela nawa ulemu wa kufupa kunyingika kanawa mandumbu jetu. (Yishi. 20:5) Yesu te kakuhasa kunyingika yize yili ku mbunge ya mutu, yetu kutuchi kuhasa kuchilinga. Alioze, mandumbu jetu chipwe ngwe mahengesa, nihindu mutuhasa kwasolwela umbovu. (Efwe. 4:1, 2; 1 Petu. 3:8) Chuma chize muchitukwasa kuchilinga chili kwanyingika kanawa. Tutalenu chimwe chilweza.
17. Kuchi kunyingika kanawa umwe ndumbu chakwashile kalayi wa mbonge?
17 Umwe kalayi wa mbonge yoze wakukalakala ku África Oriental, kanewuluka ndumbu yoze wapwile ni kusoloka ngwe mukalu chinji kutwama nenyi. Yika kalayi wa mbonge alingile? Yamba ngwenyi: “Shimbu ngwehuke ndumbwami; yingufupa kumunyingika kanawa.” Hanyima lia kuchilinga, yanyingika ngwenyi mutapu uze ndumbu wacho amulelele wapwile ukalu chinji. Chino yichikwata ha chize te akutwama ni akwo. Kalayi wa mbonge yanunga ngwenyi: “Muze nanyingikine lamba lize ndumbu yono amwene, chize alumwine utu wenyi hanga atwame kanawa ni akwo ni yuma yize alumwine ku mwono wenyi, yingukomoka. Hachino, yitupwa masepa apema.” Chochene, nyi mutusa tachi hanga tunyingike kanawa mandumbu jetu muchipwa chashi kwazanga.
18. Yihula yika twatamba kulihula nyi ndumbu umwe matulinga chuma chipi? (Yishima 26:20)
18 Ha mashimbu amwe, muchilita kuhanjika ni ndumbu yoze watulinga chuma chipi hanga tuhwise kapinda wacho mukachi ketu. Alioze chitangu, twatamba kulihula ngwetu: ‘Shina nanyingika lume yuma yeswe yize yalingiwangako?’ (Yishi. 18:13) Shina iye kalinga yuma yacho ku tachi? (Chilu. 7:20) Kutala yami hingunalingi uhenge walifwa ni uze iye alinga? (Chilu. 7:21, 22) Nyi munguya ni kuhanjika nenyi, shina kapinda yoze ngunazange kuhwisa moka chinji? (Tanga Yishima 26:20.) Nyi mutusa mashimbu hanga tupukune ha yihula yino, hanji mutumona ngwetu chuma chilemu chili kusolola zango ni kuvulama yize ndumbwetu atulinga.
19. Tachi jika twatamba kusa?
19 Yela ja Yehova kakusolola ngwo, kali tumbaji amwenemwene a Yesu mumu lia zango lize akwete mukachi ko. Hita umwe wa kuli yetu masolola ngwo kali kambaji ka Yesu, ha kuzanga mandumbu ni mbunge yeswe chipwe ngwe ha mashimbu amwe ayo mahengesa. Nyi twachilinga, mutukwasa atu akwo amone ngwo, tuli mu uwayilo wamwenemwene ni kulichinga ni yetu hanga tuwayile Zambi yetu wa zango, Yehova. Kashika, tusenu tachi hanga tununge ni kusolola zango lize liakusolola ngwo, tuli Akwa-Kristu amwenemwene.
MWASO 17 “Ngunapale”
a Atu anji kanazange kulilongesa yuma yinji hali Yehova mumu lia zango liamwenemwene lize akumona hali yetu. Alioze, yetu hi tuli angunu ko, kashika ha mashimbu amwe muchihasa kukaliwa kulisolwela zango umwe ni mukwo. Hachino, mutumona ulemu uze zango likwete ni chize mutuhasa kwimbulula chilweza cha Yesu muze mutumona uhenge wa mandumbu jetu.
b Tala mukanda, “Venha Ser Meu Seguidor,” kapitulu 17 maparagrafu 10-11.
c Tala chikuma, “Finalmente, Minha Vida tem objetivo,” ha Kaposhi wa Kutalila 1 Novembro, 2012, mafwo 13-14.
d Tala chikuma, “Minha Vida Parecia Muito Boa,” ha Kaposhi wa Kutalila 1 Maio, 2012, mafwo 18-19.
e Ha mutwe uno, kutuchi kuhanjikila ha shili yinene yize atamba kutala kuli makulwana a mu chikungulwila ngwe yize anatongola ha 1 A-Korindu 6:9, 10.
f Sango jimwe jinasolola ngwo, umwe ngana wa yingeleja, kambile ngwenyi: “Hano hashi hali atu makumi atatu ashishika ngwe Apalahama. Nyi kali lume makumi atatu, yami ni mwanami tuli aali a kuli ayo; nyi kali kumi, yami ni mwanami tuli aali a kuli ayo; nyi kali atano, yami ni mwanami tuli aali a kuli ayo; nyi kali aali, atu jacho kali yami ni mwanami; nyi kali umuwika, mutu wacho yami.”
