1. Yika yakwashile Yombi kulilongesa kunyingika kanawa Yehova?

 HA SANGO jeswe jize Yombi hanate ku mwono wenyi, lusango umuwika kapwile mulemu chinji kuli iye—lusango yoze atele ni Yehova. Ha lusango wacho, Yehova yalweza Yombi hanga atale yitangiwa. Chino yichikwasa Yombi ajikijile chinji ha mana ni ha uhashi uze Yehova akwete wa kufunga tuvumbi twenyi. Chakutalilaho, Yombi kalilongesele ngwenyi Yehova kakufunga tushitu, kashika neye te mahasa kumufunga. (Yombi 38:39-41; 39:1, 5, 13-16) Yombi kalilongesele yuma yinji hakutwala ku yitanga ya Yehova ha kutala wika yitangiwa.

2. Yika muyihasa kutukwika kuhengwola yitangiwa ya Yehova?

² Ni yetu twakulilongesa yuma yinji hali Yehova muze twakulihulikila chinji ha yuma yize atangile. Alioze, chino muchihasa kupwa chikalu kuchilinga mashimbu eswe. Nyi watwama mu mbonge yinene, nihindu wakumona yitangiwa ya Yehova tangwa ha tangwa. Chikwo nawa, chipwe ngwe watwama ku chihela chize yitangiwa yili yinji, hanji muhasa kulivwa ngwe kuushi ni shimbu lia kuyihengwola. Kashika, mutumona ulemu wa kusa mashimbu ni tachi hanga tuhengwole yitangiwa. Mutumona nawa chize Yehova ni Yesu azachishile yitangiwa hanga alongese atu ni yize yetu mutulinga hanga tulilongese yuma yinji ku yitangiwa.

3. Mumu liaka mutuhasa kwamba ngwetu, Yehova kazangile hanga Alama alivwise kuwaha ni yitangiwa?

³ Yehova kazangile hanga Alama alivwise kuwaha ni yitangiwa. Muze Yehova atangile Alama, yamusa mu paraisu ni  kumwaha mulimo wa kufunga paraisu ni kuyitohwesa. (Uputu. 2:8, 9, 15) Achinyonga chize Alama anakawahilila ha kumona mbuto muyisoka hamwe ni fololo. Kufunga munda wa Endene wapwile mulimo unene uze Alama atambwile! Yehova yahana nawa chiteli chikwo kuli Alama cha kuluka tushitu majina. (Uputu. 2:19, 20) Yehova mwene te mahasa kuluka tushitu majina, alioze yahana mulimo wacho kuli Alama. Kwamba pundu, shimbu te kanda achihana jina kuli hita kashitu, Alama kaahengwile kanawa, chocho yamona yitanga ya hita kashitu. Mulimo uno kota unakevwisa Alama kuwaha chinji. Pundu lume, chino chakwashile Alama kumona Yehova ngwe chilangaji munene yoze watangile yuma yeswe ni mana ni utotombo weka ni weka.

4. (a) Mumu liaka tunafupiwa kuhengwola yitangiwa? (b) Yitangiwa yika wakukomoka?

⁴ Yehova kanazange hanga tuhengwole yitangiwa. Mukanda wa Izaia 40:26 unambe ngwo: “Hetulenu meso jenu kwilu nukamone, iya watangile yino yuma?” Kumbululo lili zwalala. Yehova katangile yuma yinji yipema mu malilu, hashi ni mu kalunga-lwiji. Yitangiwa yacho yakutulongesa yuma yinji hali iye. (Samu 104:24, 25) Achinyonga ha chize Zambi atutangile. Iye katutangile ni uhashi wa kumona upeme wa yitangiwa. Chino chakulingiwa mumu Yehova katutangile ni meso, matwi, chikowa, limi ni mazulu.

5. Kulita ni A-Roma 1:20, mumu liaka chili chilemu kulilongesa yitangiwa?

⁵ Mbimbiliya yakutukwasa nawa hanga tumone ulemu wa kulilongesa hakutwala ku yitangiwa. Yitangiwa yakutukwasa kunyingika yitanga ya Yehova. (Tanga A-Roma 1:20.) Chakutalilaho, yuma yeswe mu malilu ni hashi yili yakululieka kanawa mu jila yakukomwesa. Yino yakusolola mana a Zambi. Achinyonga nawa ha kulia cheka ni cheka chize tukwete. Chino chakusolola zango lize Zambi akwete hali yetu. Muze twakumona yitanga ya Yehova kupalikila mu yuma yize atangile, twakumunyingika kanawa ni kukundama kuli iye. Haliapwila, tulalenu chize Yehova azachishile yitangiwa hanga alongese atu malongeso alemu.

6. Yika mutuhasa kulilongesa ha kumona tujila muze anahumuka?

⁶ Yehova hanatese shimbu ha hita chuma. Hita mwaka kukatuka ku songo lia kakweji wa Fevereiro ni mukachi lia kakweji wa Maio, chapwile chashi A-Izalele kumona yitwanjimbu mahumuka ni kuya ku norte. Yehova yamba maliji wano kuli A-Izalele ngwenyi: “Chitwanjimbu mu malilu kananyingika tungonde twenyi.”  (Jere. 8:7) Yehova hanatese tungonde hanga tujila wano aye ku chihela cheka. Chizechene nawa, hanatese mashimbu akuneha upatwilo wenyi. Hita shimbu mumona tujila kanayi ku chihela cheka, fuliela ngwe, Yehova ‘hanatese shimbu’ lize makaneha upatwilo wenyi.—Haba. 2:3.

7. Shindakenyo yika mutuhasa kupwa nayo muze mutumona umwe kajila unahumuka mwilu? (Izaia 40:31)

⁷ Yehova kakuhana tachi kuli tuvumbi twenyi. Kupalikila muli Izaia, Yehova yalakenya ngwenyi, mahana tachi kuli tuvumbi twenyi hanga ‘ahumuke ngwe pupa’ muze mahona tachi hanji muze mahonga. (Tanga Izaia 40:31.) Chapwile chashi A-Izalele kumona pupa mahumuka mwilu mu mwalwa chakuhona kupupula mapulwa. Yino yinasolola ngwo, chizechene Yehova akuhana tachi kuli pupa ni yetu mahasa kutwaha tachi! Hita shimbu mumona kajila mahumuka mwilu chakuhona kupupula mapulwa, nyingika ngwe Yehova mahasa kukwaha tachi hanga ukumbe yipikalo yeka ni yeka.

8. Yika Yombi alilongesele ha yitangiwa ya Yehova, mba yika yetu mutuhasa kulilongesa?

⁸ Mutuhasa kujikijila hali Yehova. Yehova kakwashile Yombi hanga amone ngwo, mahasa kujikijila muli iye. (Yombi 32:2; 40:6-8) Ha lusango yoze ahanjikile ni Yombi, Yehova yatongola yuma yinji yize atangile ngwe tutongonoshi, malelwa ni mihenyo. Yehova kahanjikile nawa hali tushitu ngwe ngombe wa muyambu ni kavwalu. (Yombi 38:32-35; 39:9, 19, 20) Yuma yino yeswe yalongesele Yombi hi wika ko hakutwala ku ndundo ja Yehova, alioze hakutwala nawa ku zango ni mana jenyi. Hanyima lia lusango wacho, Yombi yaputuka kujikijila chinji hali Yehova kuhiana kunyima. (Yombi 42:1-6) Chizechene nawa, muze mutuhengwola yitangiwa, muchitukwasa kunyingika ngwetu, Yehova kakwete mana ni ndundo jinji kuhiana yetu. Chikwo nawa, mutupwa ni shindakenyo ngwetu, makahwisa lamba lieswe lize twakumona. Kunyingika chino muchitukwasa kujikijila chinji hali Yehova.

9-10. Yika mwalwa ni vula yinatulongesa hali Yehova?

⁹ Yesu te kanyingika kanawa yitangiwa. Mbimbiliya yakumuvuluka ngwo ‘chilangaji mupema,’ mumu kakwashile Tato kutanga yuma yeswe yize yili hashi ni mu malilu. (Yishi. 8:30) Nawa muze apwile hano hashi, iye kazachishile yitangiwa hanga alongese tumbaji twenyi hakutwala kuli Yehova. Tutalenu yuma yimwe yize iye alongesele.

¹⁰ Yehova kakuzanga atu eswe. Ha Longeso lienyi lia ha Mulundu, Yesu yahanjika ni tumbaji twenyi ha yitangiwa yaali, yize atu anji keshi kulemesa; mwalwa ni vula. Yuma yino yaali, yikwete ulemu unji ku mwono. Chikwo nawa, Yehova te mahasa kulituna kuhana mwalwa ni vula kuli atu anji. Alioze mumu lia zango, iye kakuhana yuma yacho kuli atu eswe hano hashi. (Mateu 5:43-45) Yesu kazachishile chilweza cha mwalwa ni vula hanga alongese tumbaji twenyi ngwenyi, Yehova kanazange hanga tuzange atu eswe. Kashika, hita shimbu mutumona tangwa linanjila, hanji vula mawayangila muchilita kupukuna ha zango lia Yehova lize kulishi katonde. Jila yimwe yize mutwimbulwilamo zango lia Yehova, yili kwambujola kuli atu eswe.

11. Yika mutuhasa kulilongesa ha kutala tujila a mwilu?

¹¹ Yehova kakutwaha yuma yeswe yize tunafupiwa ku musunya. Ha Longeso lienyi lia ha Mulundu, Yesu yamba nawa ngwenyi: ‘Talenu tujila a mwilu, keshi kukuwa, keshi kucha, chipwe kukungila mu machila; alioze Tatenu wa mwilu kakwalisa.’ Muchihasa kupwa ngwe muze Yesu te anahanjika, atu waze apwileho  kamwene tujila mahumuka mwilu, mba iye yahula ngwenyi: “Yenu kunwaahianyine chikolo, nyi?” (Mateu 6:26) Ha maliji wano a zango, Yesu yatukwasa hanga tumone ngwetu, Yehova nihindu matwaha yeswe yize mutufupiwa ku musunya! (Mateu 6:31, 32) Maliji wano a Yesu kananungu ni kutakamisa tuvumbi ashishika a Yehova. Umwe mukweze pionelu mu Espanha kapwile ni kunenganyana mumu te keshi kuwana chihela kuze matwama. Alioze, muze amwene tujila kanali chichi ja yimwe mihuko, chocho yawana utakamiso. Yamba ngwenyi: “Kumona tujila jacho changukwashile kunyingika ngwami, nyi Yehova kakwakwasa ni yami mangukwasa.” Ha kupalika cha amwe mashimbu, pangi yono yawana chihela kuze te matwama.

12. Kulita ni Mateu 10:29-31, yika tulujila mahasa kutulongesa hali Yehova?

¹² Yehova kakulemesa hita umwe wa kuli yetu. Muze te kanda achituma tumbaji twenyi mu mulimo wa kwambujola, Yesu yaakwasa hanga akumbe woma wa yihungumiona. (Tanga Mateu 10:29-31.) Iye yachilinga ha kwaha chilweza cha tujila waze te anyingika chinji mu Izalele. Ha matangwa ja Yesu, tujila wano kakapwile ni ulemu. Alioze, iye yalweza tumbaji twenyi ngwenyi: “Niumwe wa kuli ayo kechi kaholokela hashi shina Tatenu machitayiza.” Hanyima, Yesu yamba ngwenyi: “Yenu kunwahiana tulujila tunji.” Ni maliji wano, Yesu yakwasa tumbaji twenyi kunyingika ngwo, Yehova kakulemesa hita umwe wa kuli ayo nawa ngwo, kafupiwile kwivwa woma wa yihungumiona. Hita shimbu tumbaji te akumona tulujila muze apwile ni kwambujola mu mambonge ni mu yihunda, pundu lume te kakwiwuluka maliji a Yesu. Chizechene nawa, hita shimbu mumona umwe kajila mukehe, iwuluka ngwe uli ni ulemu unji kumeso ja Yehova, mumu ‘unahiane tulujila tunji.’ Nyi ukwaso wa Yehova, muhasa kukumba yihungumiona yeswayo muyisoloka ku mwono we.—Samu 118:6.

13. Yika twatamba kulinga mba tulilongese yuma yinji hali Yehova kupalikila mu yitangiwa?

¹³ Mutuhasa kulilongesa yuma yikwo yinji hali Yehova kupalikila mu yitangiwa. Kuchi mutuhasa kuchilinga? Chitangu, tunafupiwa kusa mashimbu hanga tuhengwole yitangiwa. Hanyima, mutupukuna ha yize yitangiwa yacho yinatulongesa hali Yehova. Alioze kulinga yuma yino hi chashi ko. Géraldine, umwe pangi mu Camarões, yamba ngwenyi: “Yami nakolela mu mbonge yinene, kashika nakufupiwa kusa tachi mba nguhengwole yitangiwa.” Alfonso, umwe mukulwana wa mu chikungulwila, yamba ngwenyi: “Hinanyingika ngwami, ngunafupiwa kusa mashimbu mba nguhengwole yitangiwa ni kupukuna ha yize yinangulongesa hali Yehova.”

14. Yika Ndawichi alilongesele ha kupukuna ha yitangiwa?

¹⁴ Ha Samu 8:3, 4, Ndawichi yasoneka ngwenyi:  ‘Shimbu mungutala malilu che chitanga cha minwe ye; kakweji ni tutongonoshi aze wakolesele, mutu kuchi apwa mba ukamunyonge yena?’ Ndawichi te kakupukuna ha yitangiwa ya Yehova. Ha ufuku muze te akutala mwilu muli tutongonoshi, iye te kakumona yuma yinji hi wika ko upeme wa tutongonoshi. Te kakumona yuma yize tutongonoshi analongesa hali Yehova. Chocho, yalilongesa chize Yehova apwa munene. Ndawichi nawa te kakupukuna mu mutapu wa kukomwesa wa chize aputukile mu jimo lia naye. Chochene, kunyonga ha yuma yino yeswe te chakutwala Ndawichi akomoke ha mana a Yehova.—Samu 139:14-17.

15. Hana yilweza ya yimwe yitanga ya Yehova yize muhasa kumona ku yitangiwa. (Samu 148:7-10)

¹⁵ Chizechene ngwe Ndawichi, ni yetu hi chikalu ko kuwana chimwe chitangiwa cha Yehova hanga tuchipukune. Pundu lume, mutuhasa kumona yitanga ya Yehova ha chihela haze tuli. Chakutalilaho, muhasa kumona ndundo ja Yehova muze muwivwa kusasaminya cha mwalwa ha chikowa. (Jere. 31:35) Muhasa kunyonga ha mana a Yehova muze mumona kajila kanalingi chaswa. Muhasa kunyonga ha chize Yehova apwa mukwa-kuheha muze mumona kawa mahehesa-hehesa muchila wenyi. Chikwo nawa, muhasa kusakwilila Yehova ha zango lienyi hita shimbu mumona umwe mama kanahehe ni mwanenyi wa kemba. Tuli ni yuma yinji yize muyitukwasa kulilongesa hali Yehova. Yuma yeswe yize atangile chipwe yikehe-yikehe ni yinene-yinene chipwe yize yili kusuku hanji hakamwihi, yakumuhalisa.—Tanga Samu 148:7-10.

16. Yika twatamba kulinga hita tangwa?

¹⁶ Zambi yetu kali mukwa-mana, mukwa-zango, mukwa-ndundo nawa yuma yeswe yize akulinga yapwa yipema. Mutuhasa kumona yitanga yino ya Yehova ni yikwo nawa muze mutuhengwola yitangiwa yenyi. Kashika, tunafupiwa kusa mashimbu hita tangwa hanga tuhengwole yitangiwa ni kupukuna ha yize yinatulongesa hali Yehova. Nyi twachilinga, mutukundama kuli Sakatanga yetu. (Tia. 4:8) Ha longeso lize mulihataho, mutumona chize yisemi mahasa kuzachisa yitangiwa hanga akwase ana jo kukundama kuli Yehova.