1-2. Yika yakulingiwako muze atu akwapapachisa, mba yika mutushimutwina ha mutwe uno?

 HIUNAMONA kama mbunga ya waze alihana hanga apapachise? Twakwivwa muze akukumbulula ni hamu yihula yaali yize akwahula shimbu kanda achaapapachisa. Twakumona chize asoko ni masepa jo akuwahilila. Muze akututuka mu meya, twakwivwa koshi jinji ni chize ayo akuwahilila. Ha hita poso, tununu a tununu twa alongi a Mbimbiliya kakulihana kuli Yehova ni kwapapachisa.

² Mba yena? Nyi unazange kukupapachisa, nyingika ngwe uli mulemu mu chifuchi chino chipi, mumu ‘wakufupa Zambi.’ (Samu 14:1, 2) Mutwe uno unatale hali akweze ni hali makulwana. Alioze, muhasa kutakamisa eswe waze hanapapachisa hanga anunge ni kuwayila Yehova ku miaka yeswe. Kashika mutushimutwina yikuma yitatu yize yakututwala kuwayila Yehova.

3. Mumu liaka tuvumbi twa Yehova akuzanga umwenemwene ni ululi? (Samu 119:128, 163)

³ Yehova kalwezele tuvumbi twenyi hanga ‘azange umwenemwene.’ (Zeka. 8:19) Yesu kalwezele tumbaji twenyi hanga afupe ululi. (Mateu 5:6) Chino chinalumbunuka ngwo, twatamba kusa tachi hanga tulinge yuma yize yalita, yipema ni yalinanga kumeso ja Zambi. Shina wakuzanga umwenemwene ni ululi? Tuli ni shindakenyo ngwetu wa kuyizanga. Kuushi kuzanga mahuza; wakuvwila lwaji yuma yeswe yipi. (Tanga Samu 119:128, 163.) Mahuza kakusolola utu wa Satana,  yoze unayulu hano hashi. (Yoa. 8:44; 12:31) Nyonga limwe lia Satana lili kupihisa lufuma wa jina lisandu lia Yehova. Satana machinunga ni kumwanga mahuza hakutwala kuli Zambi yetu kukatuka mu munda wa Endene. Iye kambile ngwenyi, Yehova kali Nguvulu mupi kakuswekela atu jenyi yuma yipema. (Uputu. 3:1, 4, 5) Mahuza a Satana hali Yehova, machinunga ni kupihisa manyonga ni mbunge ja atu. Muze atu akulituna ‘kuzanga umwenemwene,’ Satana kakwatwala alinge yuma ya uhenge ni kupwa ni yitanga yipi.—Roma 1:25-31.

4. Kuchi Yehova akusolola ngwo kali “Zambi ya umwenemwene”? (Tala nawa chizulie.)

⁴ Yehova kali “Zambi ya umwenemwene.” Iye kakulongesa umwenemwene kuli waze akumuzanga. (Samu 31:5) Muze akuchilinga, kakwakwasa hanga atusuke ku mahuza a Satana. Yehova kakulongesa nawa tuvumbi twenyi ahanjike umwenemwene ni kusolola ululi. Chino chakwakwasa kupwa atu amwenemwene ni kuwana sambukila ya ku mbunge. (Yishi. 13:5, 6) Shina kachilingile hali yena muze waputukile kulilongesa Mbimbiliya? Walilongesele ngwe, majila ja Yehova kali apema kuli atu eswe ni kuli yena nawa. (Samu 77:13) Kashika, unazange kulinga yize Zambi akwamba ngwo yalita. (Mateu 6:33) Unazange kukalila umwenemwene ni kusolola ngwo, yuma yize Satana ambile hali Yehova yili ya mahuza. Kuchi muhasa kuchilinga?

5. Kuchi muhasa kukalila umwenemwene ni ululi?

⁵ Yena muhasa kusakula mwono uze muusolola ngwo, wehuka mahuza a Satana, ni kuzanga kununga mu umwenemwene. Muhasa kusolola ngwo unazange hanga Yehova apwe Nguvulu we, ni kulinga yize akwamba ngwo yalita. Kuchi muhasa kuchilinga? Muhasa kuchilinga, ha kukundama kuli Yehova mu yilemba, ha kulihana kuli iye ni ha kukwata chiyulo cha kukupapachisa. Zango lie ha umwenemwene ni ha kulinga yuma yize yalita, mulikutwala kusakula kukupapachisa.

6. Kulita ni Samu 45:4, mumu liaka wakuzanga Yesu Kristu?

⁶ Mumu liaka wakuzanga Yesu Kristu? Tutalenu yimwe yikuma ha Samu 45:4. (Tanga.) Yesu kasolwele umwenemwene, kulikehesa ni ululi. Nyi wakuzanga umwenemwene ni ululi, chino chinasolola ngwo  wakuzanga Yesu Kristu. Achinyonga ha chize Yesu akalilile umwenemwene ni kulinga yize yalita. (Yoa. 18:37) Kuchi Yesu asolwele kulikehesa?

7. Yika wakuzanga chinji ha kulikehesa cha Yesu?

⁷ Yesu kahichikile chilweza cha chize twatamba kulikehesa. Chakutalilaho, iye kalemesene Tato hi iye mwene ko. (Marku 10:17, 18; Yoa. 5:19) Kuchi wakwivwa ha kulikehesa cha Yesu? Kwamba umwenemwene, chakukukwasa kumuzanga ni kumukaula. Mumu liaka Yesu ali mukwa-kulikehesa? Mumu kakuzanga ni kwimbulula Tato, yoze neye walikehesa. (Samu 18:35; Hepre. 1:3) Chino chishi kukukwasa kunyingika Yesu, yoze wakwimbulula kanawa yitanga ya Yehova?

8. Mumu liaka twakuzanga Mwanangana wetu Yesu?

⁸ Yetu twakuzanga Yesu mumu kali Mwanangana mupema. Yehova mwene kafumbile Mwanenyi ni kumusakula hanga ayule. (Iza. 50:4, 5) Nyonga nawa ha zango lize Yesu asolwele ha kuhana mwono wenyi ngwe chitapo. (Yoa. 13:1) Yesu katela zango lietu mumu kali Mwanangana wetu. Kambile ngwenyi, waze mapwa masepa jenyi kali waze akumuzanga ni kwononokena shimbi jenyi. (Yoa. 14:15; 15:14, 15) Chili chiwape chinene kupwa sepa lia Mwana wa Yehova!

9. Ha yika upapachiso wetu walifwa ni wa Yesu?

⁹ Shimbi yimwe ya Yesu yili ngwo, tumbaji twenyi katamba kwapapachisa. (Mateu 28:19, 20) Iye mwene kahanyine chilweza. Chipwe ngwe, upapachiso wa Yesu walisa ni wa tumbaji twenyi ha yikuma yimwe. (Tala mushete, “ Kalisa Yoze Uli ha Upapachiso wa Yesu ni wa Tumbaji Twenyi.”) Alioze ha yikuma yikwo, walifwa. Muze Yesu amupapachishile, iye kalihanyine hanga alinge upale wa Yehova. (Hepre. 10:7) Chimuwika nawa, tumbaji twenyi muze akwapapachisa kakusolola ha mbunga ngwo, kalihana kuli Yehova. Kukatuka ha shimbu liacho, mwono wo wakutala ha kulinga upale wa Yehova, hi wa ayo ene ko. Hachino, kakukaula chilweza cha Mwata wo, Yesu Kristu.

10. Kuchi kuzanga Yesu muchihasa kukutwala hanga akupapachise?

¹⁰ Yena wakutayiza Yesu ngwe Mwana wa wika wa Yehova, yoze iye asakwile hanga atuyule. Wakumona chize Yesu akwimbulula kanawa kulikehesa cha Tato. Walilongesa ngwe Yesu kalishile mbunga, katakamishine waze a makuka mbunge ni kuwuka mieji. (Mateu 14:14-21) Unamono chize iye akusongwela chikungulwila musono. (Mateu 23:10) Chikwo nawa, unanyingika ngwe amu ali Mwanangana, kwasala hakehe matulingila yuma yinji yipema. Kuchi muhasa kusolola ngwe wakumuzanga? Muhasa kuchilinga ha kukaula chilweza chenyi. (Yoa. 14:21) Chuma chitangu chize mulinga chili kulihana kuli Yehova ni kukupapachisa.

11. Chikuma chika chilemu chize muchikutwala mba akupapachise?

¹¹ Chikuma chika chilemu chize muchikutwala mba akupapachise? Yesu kasolwele liji litangu lia shimbi muze ambile ngwenyi: “Ukazange Mwene Zambi ye ni mbunge ye yeswe, ni mwono we weswe, ni kunyonga che cheswe, ni ngolo je jeswe.” (Marku 12:30) Kulita ni maliji wano, shina ni yena che wakuzanga Zambi?

12. Mumu liaka wakuzanga Yehova? (Tala nawa chizulie.)

¹² Kuli yuma yinji yize muyikutwala kuzanga Yehova. Chakutalilaho, hiwanyingika ngwe, Yehova iye “fuji lia mwono” nawa yuma yeswe yipema yakukatuka kuli iye.  (Samu 36:9; Tia. 1:17) Yuma yeswe yipema yize uli nayo yinakatuka kuli Yehova.

13. Mumu liaka chitapo cha ukuule wa Yesu chili chilemu?

¹³ Chitapo cha ukuule wa Yesu chili chawana chilemu chize Yehova hanatwehe. Mumu liaka tunambe chocho? Mumu lia usepa upema uze Yehova ni Mwanenyi akwete. Yesu kambile ngwenyi: “Tata kakunguzanga” ni yami “nakuzanga Tata.” (Yoa. 10:17; 14:31) Usepa wo wakolele chinji hakupalika cha tununu a tununu twa miaka yize atwamine hamuwika. (Yishi. 8:22, 23, 30) Achinyonga chize Zambi evwile ha kumona Mwanenyi mamona lamba ni kufwa. Yehova kakuzanga atu eswe, kuchingako ni yena. Kashika ahanyine Mwanenyi hanga yena ni atu akwo nuzuke mwono wa mutolo. (Yoa. 3:16; Ngala. 2:20) Chitapo cha ukuule wa Yesu chili chuma chilemu chize chakututwala kuzanga Zambi.

14. Chiyulo chika chipema chize muhasa kukwata ku mwono we?

¹⁴ Zango lie kuli Yehova liakola mumu unalilongesa hakutwala kuli iye. Kwamba pundu, unazange kukundama kuli iye haliapwila ni ku miaka yeswe. Chino muhasa kuchilinga. Yehova kanakwite hanga umuvwise kuwaha. (Yishi. 23:15, 16) Muhasa kuchilinga hi ha maliji wika ko, alioze ni mu yitanga. Mutapu uze mumbachilamo mwono we, muusolola  ngwo wakuzanga Yehova. (1 Yoa. 5:3) Chino chili chiyulo chipema chize muhasa kukwata ku mwono we.

15. Kuchi muhasa kusolola zango lie hali Yehova?

¹⁵ Kuchi muhasa kusolola zango lie hali Yehova? Chitangu, lemba ulihane kuli Zambi umuwika wamwenemwene. (Samu 40:8) Mba musolola kulihana che ha mbunga ha kukupapachisa. Ngwe chize hitwamona ha mutwe uno, upapachiso wakuneha uwahililo nawa uli chuma chilemu. Muze makupapachisa, muputuka mwono waha uze mulita ni upale wa Yehova hi wa yena mwene ko. (Roma 14:8; 1 Petu. 4:1, 2) Muchihasa kusoloka ngwe wakwata chiyulo chikalu, alioze chakwazulula jila ya kupwa ni mwono upema. Mu mutapu uka?

16. Kulita ni Samu 41:12, yika Yehova makalingila waze akulihana hanga amuwayile?

¹⁶ Yehova kali chihanyi munene. Yeswayo mumwaha, iye makufunyishinayo kuhiana. (Marku 10:29, 30) Makukwasa kupwa ni mwono upema, chipwe mu chifuchi chino chipi. Uno uli wika uputukilo. Mwono uze muputuka hanyima lia kukupapachisa, muhasa kupwa wa miaka yeswe. Muhasa kununga ni kuwayila Tatenu wa zango ku miaka ya mutolo. Zango lize ukwete hali Yehova ni lize iye akwete hali yena, mulinunga ni kukola. Hachino, yenu eswe munukatwama ku miaka ya mutolo.—Tanga Samu 41:12.

17. Yika muhasa kuhana kuli Yehova yize iye keshi nayo?

¹⁷ Muze muhana mwono we kuli Yehova ni kukupapachisa, mwopwa ni uhashi wakuhana chuma chilemu kuli Tatenu. Yuma yeswe yipema, ni mashimbu eswe a uwahililo waze hiwapalika ku mwono we yili chawana cha Yehova. Ni yena muhasa kuhana kuli Sakatanga wa malilu ni hashi chuma chize keshi nacho, chuma chacho chili kushishika kuli iye ni kumulingila ni mbunge yeswe. (Yombi 1:8; 41:11; Yishi. 27:11) Kwamba pundu, yino yili jila ya kuzachishilamo kanawa mwono we. Chochene lume, zango lize ukwete hali Yehova lie mulikutwala kukwata chiyulo cha kukupapachisa.

18. Yihula yika watamba kulihula?

¹⁸ Shina unazange akupapachise? Yena wika muhasa kukumbulula chihula chino. Alioze muchilita kulihula ngwe: ‘Mumu liaka kanda achingupapachisa?’ (Yili. 8:36) Nyonga ha yikuma yitatu yize twamona ha mutwe uno. Chitangu, wakuzanga umwenemwene ni ululi. Lihule ngwe, ‘Nakuzanga kutwama mu chifuchi chize atu eswe makahanjika umwenemwene ni kusolola ululi?’ Chamuchiali, wakuzanga Yesu Krisu. Lihule ngwe, ‘Ngunazange hanga Mwana wa Zambi anguyule ni kukaula chilweza chenyi?’ Chamuchitatu, chize chahiana ulemu, wakuzanga Yehova. Lihule ngwe: ‘Shina ngunazange kuvwisa Yehova kuwaha ni kumulingila?’ Nyi wakumbulula ngwe ewa ha yihula yino yeswe, mba mumu liaka kanda achikupapachisa? Yika unashimbwila?—Yili. 16:33.

19. Mumu liaka kuwatambile kwivwa woma wa kukupapachisa? Hana chilweza. (Yoano 4:34)

¹⁹ Nyi unevu woma wa kukupapachisa, nyonga ha chilweza chize Yesu azachishile. (Tanga Yoano 4:34.) Iye katesele kulinga upale wa Zambi ni chimwe kulia. Mumu liaka? Mumu yetu eswe twakuzanga kulia. Yesu kanyingikine ngwenyi, yeswe yize Yehova akutwita hanga tulinge yili yipema kuli yetu. Yehova kechi kutwita hanga tulinge chuma chize muchitupinjisa. Mba, shina upapachiso newo unalingi chihanda ku upale wa Zambi? Ewa. (Yili. 2:38) Kashika, muhasa kupwa ni shindakenyo ngwe upapachiso muukuyukisa. Nyi kuushi kwivwa woma wa kulia, kulia chize wakuzanga, mumu liaka unevu woma wa kukupapachisa?

20. Chihula chika mutukumbulula ha mutwe uze muuhataho?

²⁰ Mumu liaka kanda achikupapachisa? Atu anji kakukumbulula chihula chino ngwo: “Kanda nguchililulieka.” Chiyulo cha kulihana kuli Yehova ni kukupapachisa chili chiyulo chilemu chize mukwata ku mwono we. Kashika, unafupiwa kunyonga kanawa ha chiyulo chacho ni kusa mashimbu ni tachi hanga ujame ni kukupapachisa. Nyi chamwenemwene unazange akupapachise, yika muhasa kulinga hanga ulilulieke? Mutukumbulula chihula chino ha mutwe uze muuhataho.