Mumu liaka lunga avuluka ngwo “Mukwetu” ambile ngwenyi, nyi malimbata ni Rute ‘matokesa’ chihinga chenyi? (Rute 4:1, 6)

Ku shakulu, nyi umwe lunga yoze hambata mafwa chakuhona kupwa ni ana, kwapwile ni kusoloka yimwe yihula yize te yatela kumbululo, ngwe yino: Yika te muyilingiwa ni minda yenyi? Shina jina lia usoko wenyi te malivulama liakulu? Shimbi yize ahanyine kuli Mose te yakukumbulula yihula yino.

Yika te yakulingiwa ku minda ya umwe lunga yoze wafwa hanji yoze mumu lia uswale malanjisa minda yenyi? Ndumbwenyi hanji umwe wa kuli asoko jenyi te mahasa kuyilanda. Hachino, minda yacho te muyinunga ni kupwa ya mu usoko.—Levi 25:23-28; Kwa. 27:8-11.

Mba yika te ya kuhana shindakenyo ngwo, jina lia usoko wa lunga yoze wafwa kulichi kujimuka? Te chakulingiwa kupalikila mu ulo wa unyali, yino ye yalingiwile kuli Rute. Lunga te mambata tuliwa ya ndumbwenyi ni kusema nenyi mwana, mba mwana wacho mamuluka jina lia lunga yoze wafwa ni kuhinga chihinga chenyi. Yino yapwile nawa jila yipema yize te akufungilamo tuliwa.—Shimbi 25:5-7; Mateu 22:23-28.

Tutalenu ha chilweza cha Noemi. Iye kamumbachile kuli Elimeleke. Muze mukwo-lunga ni ana jenyi aali afwile, iye yahona mukwa-kumufunga. (Rute 1:1-5) Muze Noemi afunyine ku Yunda, iye yalweza tembwa-mwanenyi Rute hanga alweze Mboaze alande cheka minda hanji kuyipikula. Mboaze kapwile usoko wa Elimeleke. (Rute 2:1, 19, 20; 3:1-4) Alioze Mboaze yewuluka ngwenyi, kuli lunga yoze Mbimbiliya yakuvuluka ngwo, “Mukwetu” hanji ngwetu nganji, yoze te wasemuka mujimo limuwika ni Elimeleke. Kashika, lunga wacho mwe wapwile ha chihela chitangu cha kupikula minda.—Rute 3:9, 12, 13.

Kukuputuka, nganji hanji ngwetu “mukwetu” kazangile kukwasa. (Rute 4:1-4) Iye yanyingika ngwenyi, te mangastala jimwe mbongo hanga alande minda, alioze yanyingika nawa ngwenyi, Noemi te hapwa kashinakaji keshi kusema mwana yoze mahinga minda ya Elimeleke. Hachino, minda yacho te muyipwa ya “mukwetu,” chocho mapwa ni upite unji.

Alioze Mukwetu yalumuna nyonga lienyi muze hanyingika ngwenyi te malimbata ni Rute. Yamba ngwenyi: “Chahashile kuchikuula hali yami kuchina mungulumbula chihinga cha yami mwene.” (Rute 4:5, 6) Mumu liaka alumwine nyonga lienyi?

Nyi Mukwetu hanji lunga mukwo malimbata ni Rute mba ayo masema mwana wa lunga, mwana wacho te mahinga minda ya Elimeleke. Mba mu mutapu uka chino te “muchilumbula” chihinga cha “Mukwetu”? Mbimbiliya kuyishi kuhanjika niyimwe ha chikuma chino, alioze mutuhasa kunyonga ha yuma yimwe.

• Chitangu, te matokesa mbongo jize alanda najo minda ya Elimeleke, mumu minda yacho te muyipwa ya mwana wa Rute.

• Chamuchiali, te mapwa ni chiteli cha kufunga Noemi ni Rute ku musunya.

• Chamuchitatu, nyi te Rute masema ana akwo ni Mukwetu, ana jacho te mapwa ni ulite ha chihinga cha Mukwetu hamwe ni ana waze apwile no.

• Chamuchiwana, nyi Mukwetu te kanda achipwa ni mwana niumwe, mba mwana yoze masema ni Rute te mapwa ni ulite wa chihinga cha Elimeleke ni cha mwene. Nyi te Mukwetu mafwa chihinga chenyi muchipwa cha mwana, mwana wacho te keshi kumbata jina lienyi, alioze Elimeleke. Mukwetu kakazangile kusa chihinga chenyi mu ponde hanga akwase Noemi. Chocho, yazanga hanga usoko mukwo wa ha muchima, Mboaze, ambate chiteli chacho. Mboaze kachilingile mumu kazangile ‘kulindulula jina lia mwe mufu muchihinga chenyi.’—Rute 4:10.

Chinasoloka ngwe mukwetu kazangile chinji kufunga jina ni chihinga chenyi. Kasolwele kuzo. Mukwetu kazangile kufunga jina lienyi, alioze yuma yiyilingiwa mu mulali walisa. Musono, kukushi niumwe yoze wanyingika jina lienyi. Chikwo nawa, katokesele chiwape chize Mboaze azukile, cha kupwa umwe wa ku munyachi kuze kwasemukine Mesaya, Yesu Kristu. Lusango yono kanasolola yuma yize “Mukwetu” atokesele mumu lia kuzo ha kuhona kukwasa mutu yoze te unafupiwa ukwaso!—Mateu 1:5; Luka 3:23, 32.