MUTWE WAKULILONGESA 13
Zachisa Yitangiwa Hanga Ulongese Ana je Hakutwala kuli Yehova
“Iya watangile yino yuma?”—IZA. 40:26.
MWASO 11 Yitangiwa Yakuhalisa Zambi
CHIKUMA CHILEMU a
1. Yika yisemi akuzanga hali ana jo?
YISEMI, tunanyingika ngwetu nwakuzanga chinji hanga ana jenu anyingike Yehova ni kumuzanga. Alioze Yehova keshi kumoneka. Kuchi munuhasa kukwasa ana jenu mba anyingike ngwo, Yehova kali mutu wamwenemwene nawa ngwo, mahasa kukundama kuli iye?—Tia. 4:8.
2. Kuchi yisemi mahasa kulongesa ana jo hakutwala ku yitanga ya Yehova?
2 Jila yilemu yize munukwashilamo ana jenu hanga anyingike Yehova, yili kulilongesa no Mbimbiliya. (2 Timo. 3:14-17) Alioze, Mbimbiliya yakusolola nawa jila yikwo yize muyikwasa ana hanga alilongese hakutwala kuli Yehova. Mu mukanda wa Yishima, umwe tata kanewulula mwanenyi hanga ahone kuvulama yitanga ya Yehova yize yakusoloka kupalikila mu yitangiwa. (Yishi. 3:19-21) Tutalenu chize yisemi mahasa kuzachisa yitangiwa hanga akwase ana jo kunyingika kanawa utu wa Yehova.
ZACHISA YITANGIWA HANGA ULONGESE ANA JE
3. Kuchi yisemi mahasa kukwasa ana jo hanga anyingike kanawa utu wa Zambi?
3 Mbimbiliya yinambe ngwo, yitanga ya Zambi yize kuyishi kumoneka, kuyakumoneka kupalikila mu yitangiwa, mumu ‘yakusoloka zwalala mu yuma yize atangile.’ (Roma 1:20) Kanji-kanji, yisemi kakuzanga chinji kupalikisa mashimbu ni ana jo haze. Kashika, zachisa mashimbu jacho hanga wakwase kumona chize yitanga ya Yehova ‘yakusoloka ku yuma yize atangile.’ Haliapwila, mutumona chize yisemi mahasa kwimbulula Yesu ha chikuma chino.
4. Kuchi Yesu azachishile yitangiwa hanga alongese tumbaji twenyi? (Luka 12:24, 27-30)
4 Tala chize Yesu azachishile yitangiwa hanga alongese tumbaji twenyi. Tangwa limwe iye yaalweza hanga atale yikwakwalo ni yitemo ya mu yambu. (Tanga Luka 12:24, 27-30.) Yesu te mahasa kutongola kashitu hanji mutondo weswawo, alioze yasakula umwe kajila ni chitemo, yuma yize tumbaji te anyingika kanawa. Muchihasa kupwa ngwe, ha shimbu liacho tumbaji kamwene tujila mahumuka nawa ha chihela chize apwile hapwile yitemo. Mutuhasa kunyonga Yesu kanamika ku yuma yacho muze anahanjika ni tumbaji twenyi. Mba yika alingile hanyima lia kutongola yuma yacho? Yaalongesa chimwe chuma chilemu hakutwala ku kuhana ni keke ya Tata yetu wa mu malilu, ngwo; mahana kulia ni mazalo kuli tuvumbi twenyi ashishika ngwe chize akulisa yikwakwalo ni kujika yitemo ya mu yambu.
5. Yitangiwa yika yisemi mahasa kuzachisa hanga alongese ana jo hakutwala kuli Yehova?
5 Yisemi, kuchi munuhasa kwimbulula chilweza cha Yesu muze nunalongesa ana jenu? Munuhasa kuhanjika ha chitangiwa chize yenu nwakuzanga chinji hanji kashitu chipwe mutondo. Muze nunalongesa mwanenu, mulumbunwinenu chize yuma yacho yakusolola yitanga ya Yehova. Hanyima, munuhasa kumuhula hanga anulweze kashitu hanji mutondo uze iye akuzanga chinji. Nyi nwazachisa chitangiwa chize mwanenu akuzanga, muchipwa chashi kunupanjika kanawa muze nunatese yuma yacho ni yitanga ya Yehova.
6. Yika mutuhasa kulilongesa ha chilweza cha naye ya Christopher?
6 Shina yisemi kanafupiwa kupalikisa mashimbu anji ha kulilongesa umwe kashitu hanji mutondo, shimbu kanda achihanjika ni ana jo hakutwala ku chize yuma yacho yinatulongesa hali Yehova? Yino hanji kuyafupiwile. Yesu kakalumbunwine mu yimako-yimako chize yikwakwalo akulia hanji chize yitemo yakusoka. Chipwe ngwe ha mashimbu amwe mwanenu mazanga kulilongesa yuma yinji hakutwala ku yitangiwa, alioze kanji-kanji, chimwe chihula hanji maliji akehe mahasa kumukwasa hanga anyingike yize nunamulongesa. Ndumbu Christopher kanewuluka yimwe hakutwala ku wanuke wenyi. Yamba ngwenyi: “Mama te kakwamba maliji akehe kuli yami ni mandumbu jami hanga tulemese yitangiwa. Chakutalilaho, muze te twakupalika hakamwihi ni umwe mulundu, iye te kakwamba ngwenyi: ‘Talenu kusuhwa ni kupema cha mulundu au! Yehova kakukomwesa, hi chocho ko?’ Hanji muze te twakupwa hakamwihi ni kalunga-lwiji, iye te kakwamba ngwenyi: ‘Talenu tachi ja mikanya ayi, yinasolola ndundo ja Yehova, nyi ngwami?’” Christopher yamba ngwenyi: “Yuma yize mama apwile ni kwamba yapwile yikehe, alioze te yakutunyongesa chinji.”
7. Kuchi mutuhasa kufumba ana jetu hanga apwe ni kuhengwola yitangiwa?
7 Muze ana jenu anayi ni kukola, munuhasa kwafumba hanga ene apwe ni kuhengwola yitangiwa ni kumona yize mahasa kulilongesa hali Yehova. Chakutalilaho, munuhasa kusakula chimwe chitangiwa ni kwahula ngwo: “Yika chitangiwa chino chinanulongesa hali Yehova?” Munuhasa kukomoka ni kuwahilila ha kwivwa yize o akunyonga.—Mateu 21:16.
HA MASHIMBU AKA MUHASA KUZACHISA YITANGIWA HANGA ULONGESE ANA JE?
8. Yika yisemi A-Izalele te akulinga muze ali mu wenyi ni asoko jo?
8 Yisemi A-Izalele kaalwezele hanga alongese ana jo shimbi ja Yehova muze ‘anende mu tapalo.’ (Shimbi 11:19) Mu Izalele mwapwile matapalo anji; mu matapalo jacho chapwile chashi kumona tushitu, tujila ni yitemo. Muze A-Izalele te akulinga wenyi ni asoko jo mu matapalo jacho, ayo kapwile ni uhashi wa kulongesa ana jo yitangiwa ya Yehova. Yisemi, ni yenu munuhasa kuzachisa uhashi ngwe uno hanga nulongese ana jenu hakutwala ku yitangiwa. Talenu chize yisemi amwe achilingile.
9. Yisemi, yika nwalilongesa hali Punitha ni Katya?
9 Punitha, umwe mama yamba ngwenyi: “Asoko jetu amwe katwama ku yihunda, kashika muze twakuya ni kwatala, twakuzachisa uhashi wacho hanga tulongese ana jetu yitangiwa ya Yehova. Nakumona ngwami, ana jami muze akutuhuka mu mbonge yize twatwama, ayo kakulemesa chinji yitangiwa.” Yisemi, chakupwa chikalu ana kuvulama mashimbu waze nwapalikisa no mu yihela yize muli yitangiwa yinji yipema. Katya, umwe pangi mu Moldávia, yamba ngwenyi: “Yuma yipema ya ku wanuke wami yize nakwiwuluka yili mashimbu waze napalikishile ni yisemi jami muze te twakutuhuka mu mbonge yetu. Nakusakwilila chinji yisemi jami ha kungulongesa ku wanuke chize nguhengwola yitangiwa ya Yehova ni kumunyingika kanawa kupalikila mu yuma yacho.”
Chipwe ngwe watwama mu mbonge yinene, nihindu muhasa kuzachisa yitangiwa hanga ulongese ana je hakutwala kuli Yehova (Tala paragrafu 10)
10. Yika yisemi mahasa kulinga nyi chinakaliwa kulinga wenyi wa kutuhuka mu mbonge yize atwama? (Tala mushete, “ Ukwaso kuli Yisemi.”)
10 Mba nyi yena ni usoko we chakunukalila kutuhuka mu mbonge yenu? Amol, umwe ndumbu mu Índia, yamba ngwenyi: “Kuze natwama, twakufupiwa kukalakala ha maola anji, nawa kulinga wenyi wa kutuhuka mu mbonge yetu chakufwika mbongo jinji. Chipwe chocho, mutuhasa kumona yitangiwa ya Yehova ni kuhanjika ha utu wenyi muze tuli mu chimwe chihela chipema hanji muze tuli ku chikalakala cha zuwo lia kwilu.” Nyi nwatala kanawa kuze nwatwama, munuhasa kumona yitangiwa yize munusolwela ana jenu. (Samu 104:24) Hanji munumona tujila, tututu, mitondo ni yuma yikwo nawa. Karina, yoze watwama mu Alemanha, yamba ngwenyi: “Mama kakuzanga chinji yitemo, kashika hita shimbu te twakutuhuka, iye kapwile ni kungusolwela yitemo yize akuzanga.” Yisemi, ni yenu munuhasa kuzachisa yinema hanji mikanda ya mu ululikiso wa Yehova yize yakuhanjika ha yitangiwa hanga nulongesa ana jenu. Chipwe ngwe nwatwama kweswako, nihindu munuhasa kukwasa ana jenu hanga ahengwole yitangiwa ya Yehova. Haliapwila, tutalenu yitanga ya Yehova yize munuhasa kulongesa kuli ana jenu ha kuhengwola yitangiwa.
YITANGA YA YEHOVA ‘YIZE KUYISHI KUMONEKA YAKUSOLOKA ZWALALA’
11. Kuchi yisemi mahasa kukwasa ana jo hanga amone zango lia Yehova?
11 Mba nukwase ana jenu amone zango lia Yehova, munuhasa kwasolwela chize tushitu anji akufunga ana jo. (Mateu 23:37) Munuhasa nawa kusolola yuma yeka ni yeka yize Yehova atangile hanga yituvwise kuwaha. Karina yoze hitwatongola, yamba ngwenyi: “Muze te nakuya ni kwenda ni mama, iye nihindu te kakungukolweza hanga ngutale chize hita chitemo chili chilemu ni chize upeme wacho unasolola zango lia Yehova hali yetu. Ndo musono, yami nakumana hanga ngutale yitemo yeka ni yeka ni ulombo wayo. Yino yakungwiwulula zango lize Yehova akwete hali yetu.”
Muhasa kuhanjika ni ana je hakutwala ku mana a Yehova ha kwalumbunwina chize iye atangile mujimba wetu (Tala paragrafu 12)
12. Kuchi yisemi mahasa kukwasa ana jo hanga amone mana a Yehova? (Samu 139:14) (Tala nawa chizulie.)
12 Kwasenu ana jenu hanga amone mana a Yehova. Yehova kakwete mana anji kuhiana hita umwe wa kuli yetu. (Roma 11:33) Chakutalilaho, munuhasa kuhanjika ha chize chiku-chiku cha meya chakulinga malelwa, mba malelwa jacho maya ku yihela yeka ni yeka. (Yombi 38:36, 37) Munuhasa nawa kuhanjika ha chize Yehova atangile mujimba wetu mu jila yakukomwesa. (Tanga Samu 139:14.) Talenu yize ambile tata yoze avuluka ngwo, Vladimir: “Tangwa limwe, mwanetu kalimbukile ni kinga, chocho yalilemeka. Ha kupalika cha amwe matangwa, chilonda chacho yichoma. Yami ni naye yitumulweza ngwetu, Yehova katangile mujimba wetu hanga upwe ni kuliwuka wene. Yitumulumbunwina kanawa ngwetu, yino kuyishi kulingiwa ku yuma yize atu akulinga. Chakutalilaho, mashinyi kechi kuhasa kulilulieka ene hanyima lia kulinga acidente. Yino yakwashile mwanetu amone mana a Yehova ha kutanga mwono.”
13. Kuchi yisemi mahasa kukwasa ana jo hanga amone ndundo ja Yehova? (Izaia 40:26)
13 Ha Izaia 40:26, Yehova kanatwite hanga tutale mu malilu ni kupukuna ha ndundo jize jinafupiwako mba malilu ni hashi apwe akululieka kanawa. (Tanga.) Munuhasa kukwasa ana jenu atale mwilu ni kusa mashimbu hanga apukune ha yize anamono. Talenu yize anewuluka pangi, Tingting yoze watwama mu Taiwan. Yamba ngwenyi: “Muze napwile kanuke, tangwa limwe yituya ni mama kusuku ni mbonge yetu. Amu ku chihela chacho kwakapwile kahia kazembwe, nahashile kumona kanawa tutongonoshi. Yino yalingiwile ha mashimbu waze te ngunapalika mu yeseko yinji ku shikola ni kulihula nyi te munguhasa kununga ni kushishika kuli Yehova. Mama yazachisa mashimbu jacho hanga angukwase kumona ndundo jize Yehova azachishile mba atange tutongonoshi jacho. Yangwiulula ngwenyi, Yehova mahasa kuzachisa ndundo jacho hanga angukwase kunyongonona mu kapinda mweswawo mungupalika. Hanyima lia kuhengwola yitangiwa mu wenyi yacho, yingukwata chiyulo cha kukolesa usepa wami ni Yehova ni kumulingila ku mwono wami weswe.”
14. Kuchi yisemi mahasa kukwasa ana jo hanga amone ngwo, Yehova kali Zambi ya uwahililo?
14 Yitangiwa yakusolola ngwo, Yehova kali Zambi ya uwahililo. Akwa-Ciencia hanamono ngwo, tushitu anji kakuzanga kuheha, kuchingako tujila ni yishi. (Yombi 40:20) Hinunamono kama mwanenu mawahilila ha kumona umwe kashitu unahehe? Hanji kamwene kameshi kanahehe ni yimwe konda hanji ana ja tuwa malisuma-suma ku matwi. Ha shimbu likwo, muze mwanenu maseha ha kumona amwe tushitu kanahehe, zachisenu uhashi wacho hanga nwaewulule ngwo, Yehova kali Zambi ya uwahililo.—1 Timo. 1:11.
WAHILILENU NI YITANGIWA YA YEHOVA MU USOKO WENU
Nyi muhengwola yitangiwa hamwe ni ana je, chino muchaakwasa kulivwa kanawa ni kukulweza yize anevu (Tala paragrafu 15)
15. Yika muyihasa kukwasa yisemi mba anyingike yize ana jo ananyongo? (Yishima 20:5) (Tala nawa chizulie.)
15 Ha mashimbu amwe, yisemi mahasa kupalika mu ukalu wa ana kuhona kwalweza chize anevu. Kashika, munuhasa kufupa uhashi hanga anulweze chize anevu. (Tanga Yishima 20:5.) Yisemi amwe hananyingika ngwo, kulilongesa ni ana jo hakutwala ku yitangiwa muchihasa kwakwasa. Mumu liaka? Mumu wano kakupwa mashimbu waze yisemi ni ana akulihumikiza chakuhona kunyonga ha yuma yize muyaapiangula. Umwe tata mu Taiwan avuluka ngwo Masahiko, yamba ngwenyi: “Muze yami ni mukwetu-pwo twakuya ni ana jetu ku milundu hanji ku kalunga-lwiji, chakwakwasa kulivwa kanawa. Hachino, chakupwa chashi kuhanjika no ni kunyingika yize ananyongo.” Katya yoze hitwatongola, yamba ngwenyi: “Kanji-kanji, hanyima lia kutuhuka ku shikola, mama te kakungutwala mu parque yize yapwile hakamwihi. Amu parque yacho yapwile yipema, chapwile chashi kulweza mama yize napalika ku shikola ni yize yinangupinjisa.
16. Kuchi asoko mahasa kuzachisa yitangiwa ya Yehova hanga ahehe ni kulivwisa kuwaha?
16 Nyi asoko masa mashimbu hanga ahengwole yitangiwa, muchaakwasa kulivwa kanawa ni kuheha-hehako ndambu. Yino yakukwasa asoko apwe ni usepa upema. Ngwe chize Mbimbiliya yinambe, kuli ‘shimbu lia kuseha’ ni ‘shimbu lia kuhangana.’ (Chilu. 3:1, 4) Yehova katangile yihela yipema hano hashi hanga tuhase kuzomboka, kuheha ni kulinga yuma yize twakuzanga. Asoko anji kakuzanga kupalikisa mashimbu hamuwika ku minda, ku milundu hanji ku kalunga-lwiji. Twanuke amwe kakuzanga kuheha ni kuzomboka mu parque, kutala tushitu, kusana ku lwiji hanji mu kalunga-lwiji. Tuli ni uhashi unji wa kuhengwola yitangiwa yeswe yize Yehova atangile!
17. Mumu liaka yisemi atamba kukwasa ana jo hanga azange yitangiwa ya Yehova?
17 Mu chifuchi chaha, yisemi ni ana makalilongesa yuma yinji ha yitangiwa ya Yehova. Kutuchi kevwila tushitu woma, no kechi katuvwila woma. (Iza. 11:6-9) Mutukapwa ni mashimbu anji akuhengwola yitangiwa ya Zambi. (Samu 22:26) Alioze yisemi, chili chilemu kukwasa ana jenu hanga azange yitangiwa ya Yehova kukatuka haliapwila. Nyi munuzachisa yitangiwa hanga nulongese ana jenu hakutwala kuli Yehova, hanji no matayiza yuma ngwe yize Ndawichi ambile: ‘Yehova kukushi milimo yize yalifwa ni ya yena.’—Samu 86:8.
MWASO 134 Ana Kali Chihinga cha Kuli Zambi
a Mandumbu ni mapangi anji kakwiwuluka mashimbu waze apalikishile hamwe ni yisemi jo ha kuhengwola yitangiwa muze te achili twanuke. Ayo machewuluka chize yisemi jo apwile ni kuzachisa uhashi wacho hanga aalongese hakutwala ku utu wa Yehova. Nyi uli ni ana, kuchi muhasa kuzachisa yitangiwa hanga walongese hakutwala ku yitanga ya Zambi? Longeso lino mulikwasa yisemi ha chikuma chacho.
