1. Yika muyitutakamisa muze mutulivwa ngwe tuli ukawetu hanji muze tunapalika mu yipikalo? (Samu 118:5-7)

SHINA hiunalivu ngwe uli ukawe muze wapalikile mu yipikalo? Atu anji hanalivu chocho, chipwe tuvumbi twa Yehova. (1 Mia. 19:14) Nyi yino hiyinalingiwa kuli yena, iwuluka chilakenyo cha Yehova chinambe ngwo: “Chichi kukuhichika nichimwe, chipwe kukwehuka, ka.” Kashika, mutuhasa kwamba ni hamu lieswe ngwetu: ‘Yehova iye Chikwashi chami; chichi kevwa woma.’ (Hepre. 13:5, 6) Postolo Paulu kasonekenene akwa-Kristu-ni-akwo amu Yundeya maliji wano ha mwaka 61 M.J. Maliji wano kanatwiwulula chize umwe mukwa-kwimba masamu evwile ha Samu 118:5-7—Tanga.

2. Yika mutulilongesa ha mutwe uno, nawa mumu liaka?

² Ngwe mukwa-kwimba masamu, Paulu neye kanyingikine ngwenyi, Yehova kali Chikwashi chenyi. Chakutalilaho, kulutwe lia miaka yaali muze te Paulu kanda achisoneka mukanda wa A-Hepreu, kalingile umwe wenyi ukalu chinji mu kalunga lwiji muze mwapwile kangonga munene. (Yili. 27:4, 15, 20) Yize yalingiwile mu wenyi wacho ni yuma yize yalingiwile ku mwono wa Paulu kulutwe, yasolwele ngwo Yehova kapwile Chikwashi wa Paulu mu majila anji. Kashika tushimutwinenu wika majila atatu. Yehova kakwashile Paulu kupalikila muli Yesu, angelo, atu waze apwile ni poko ya kuyula ni akwa-Kristu-ni-akwo. Kupukuna ha yize yalingiwile ku mwono wa Paulu, muyikolesa ufulielo wetu muli Zambi ngwo ni yetu mahasa kutukwasa.

3. Yika te Paulu mahasa kulihula, nawa mumu liaka?

³ Paulu kafupiwile ukwaso. Ha mwaka 56 M.J., yimwe mbunga ya atu yatuhwisa Paulu mu tembele mu Yerusaleme ni kufupa kumushiha. Mukwachako, muze amutwalile kuli Akwa-Kuyula A-Yunda, Paulu te hamupupula kuli akwa-kole jenyi. (Yili. 21:30-32; 22:30; 23:6-10) Ha mashimbu jacho, Paulu te mahasa kulihula ngwenyi: ‘Tangwa lika yuma yino muyihwa?’

4. Kuchi Yehova akwashile Paulu kupalikila muli Yesu?

⁴ Kuchi Yesu akwashile Paulu? Ha ufuku wacho, “Mwene” wamanyine hehi nenyi, yamba ngwenyi, “Hamuka chikolo, Paulu; mumu chizechene ngwe hiunashindakenya ha kutwala kuli yami ku Yerusaleme, chocho chakutamba kushindakenya ku Roma nawa.” (Yili. 23:11) Maliji wano katakamishine chinji Paulu! Yesu yachichimieka Paulu ha shindakenyo yize ahanyine mu Yerusaleme. Iye yalakenya Paulu ngwenyi, te maheta kanawa ku Roma kuze te manunga ni kwambujola. Muze hamulakenya chino, Paulu yatakama ngwe mwana yoze uli mu kondo lia tato.

5. Kuchi Yehova akwashile Paulu kupalikila muli mungelo? (Tala chizulie ha chifukilo.)

⁵ Yipikalo yikwo yika Paulu apalikile? Hakupalika cha miaka yaali muze Paulu amuhungumionene mu Yerusaleme, iye yanyina mu ulungu ni kutalikisa ku Itália. Hachino yikulingiwa kangonga munene, kashika atu waze apwile no mu ulungu yanyonga ngwo kumafwa. Alioze, Paulu kakevwile woma. Mumu liaka? Iye yalweza atu eswe mu ulungu ngwenyi: “Mumu ufuku uno wene, mungelo wa Zambi; mwe Zambi yoze wangupita, yoze nawa nakumulingila, kamananga hehi ni yami. Ngwenyi, Paulu, kanda wivwa woma; chakutamba kumana ku meso ja Sezare. Chikwo nawa, Zambi hanakwehe waze eswe anende mu ulungu hamwe ni yena.” Yehova yatuma mungelo hanga ahane shindakenyo kuli Paulu ha kufunyina yuma yizeyene aliangile kumulweza kuli Yesu. Paulu kahetele ku Roma ngwe chize amulakenyene kuli Yehova.—Yili. 27:20-25; 28:16.

6. Chilakenyo chika cha Yesu chize muchihasa kututakamisa, nawa mumu liaka?

⁶ Kuchi Yesu akutukwasa? Yesu matukwasa ngwe chize akwashile Paulu. Chakutalilaho, Yesu kalakenyene tumbaji twenyi ngwenyi: “Yami hamuwika ni yenu nguli matangwa eswe ndo kumanunuka cha miaka.” (Mateu 28:20) Maliji a Yesu mahasa kututakamisa. Mumu liaka? Mumu matangwa wano kali akalu chinji. Chakutalilaho, nyi twafwisa mutu yoze twakuzanga, twakwivwa yinyengo yinji ku mbunge, yinyengo yacho kutushi  kuyivwa ha matangwa akepe, kanji-kanji yakununga ha miaka yinji. Atu amwe kanamono lamba mumu lia ushinakaji. Eka kanamono lamba mumu lia kusakalala. Alioze, twakupwa ni tachi ja kunyongonona mumu tunanyingika ngwetu, Yesu kali hamwe ni yetu “matangwa eswe,” chipwe ha matangwa akalu.—Mateu 11:28-30.

7. Kulita ni Usolwelo 14:6, kuchi Yehova akutukwasa musono?

⁷ Liji lia Zambi liakutwaha shindakenyo ngwetu, Yehova kakutukwasa kupalikila muli angelo. (Hepre. 1:7, 14) Chakutalilaho, angelo kakutukwasa ni kutusongwela muze twakwambujola ‘sango lipema lia Wanangana’ kuli atu a “ku mavungu eswe, ni ku minyachi yeswe, ni ku malimi eswe.”—Mateu 24:13, 14; tanga Usolwelo 14:6.

8. Kuchi Yehova azachishile umwe manjolo hanga akwase Paulu?

⁸ Ukwaso uka Paulu atambwile kuli waze apwile ni poko ya kuyula? Ha mwaka 56 M.J., Yesu yalakenya Paulu ngwenyi, maheta kanawa ku Roma. Alioze, A-Yunda amwe te hatwama punga hanga akwate Paulu ni kumushiha. Muze manjolo wa mu Roma Kelautiu Lishia anyingikine chikuma chacho, yapulwila Paulu. Kelautiu yatuma Paulu ku Sezarea kawashi-kawashi ni ufunge wa maswalale anji, ayo kendele wenyi wa tando 105. Ku Sezarea, nguvulu Fwelishia yatuma hanga Paulu “amufunge mu palasiu ya Heronde.” Hachino, akwa-kole jenyi te kechi kuhasa nawa kumulinga upi.—Yili. 23:12-35.

9. Kuchi nguvulu Festu akwashile Paulu?

⁹ Hakupalika cha miaka yaali, nihindu Paulu kapwile mu zuwo lia ususu mu Sezarea. Fwelishia yamusalakana kuli nguvulu mwaha, Festu. A-Yunda yaliumba kuli Festu hanga atwale Paulu ku Yerusaleme amusopeseleko, alioze iye yalituna kuchilinga. Kota nguvulu wacho kanyingikine ngwenyi, A-Yunda te kanazange kujikinyina Paulu “mu jila akamushihe.”—Yili. 24:27–25:5.

10. Yika Festu alingile muze Paulu etele hanga amusopese kuli Sezare?

¹⁰ Hakupalika cha mashimbu Paulu yamusopesela ku Sezarea. Amu Festu azangile “kutomesa mbunge ja A-Yunda,” yahula Paulu ngwenyi: “Mukanduka ku Yerusaleme akakupatwileko ha yino yuma kumeso jami, nyi?” Paulu kanyingikine ngwenyi, ku Yerusaleme A-Yunda mahasa kumushiha. Chikwo nawa, kanyingikine yize te mahasa kulinga alamwine mwono wenyi, mba ahase kuheta ku Roma ni kwambujola sango lipema. Kashika yamba ngwenyi: “Ngunalikunjika kuli Sezare!” Muze Festu hahanjika ni akwa-kumwaha yiyulo, yakumbulula Paulu ngwenyi: “Hiwalikunjika kuli Sezare. Kuli Sezare mukaya.” Chiyulo chize Festu akwachile chakwashile Paulu ahone kumushiha kuli akwa-kole jenyi. Hakupalika cha mashimbu, Paulu te kumapwa ku Roma kusuku ni A-Yunda waze afupile kumushiha.—Yili. 25:6-12.

11. Maliji aka a utakamiso Izaia ambile waze kota Paulu anyongene?

¹¹ Muze Paulu te anashimbwila kuya ku Itália, iye kota kanyongene ha utowezo uze profeta Izaia ambile hakutwala kuli akwa-kole ja Yehova ngwenyi: “Twamenu punga hamuwika, alioze muchikafuwa; hanjikenu liji, alioze kulichi kakola, mumu Zambi tuli nenyi hamwe ni yetu.” (Iza. 8:10) Paulu kanyingikine ngwenyi Yehova mamukwasa, chino chamukwashile kukumba yipikalo yize te muyiza kulutwe.

12. Kuchi Juliu alwezele utu wenyi kuli Paulu, nawa yika kota Paulu amwene?

¹² Ha mwaka 58 M.J., Paulu yalinga wenyi  wa kuya ku Itália. Amu Paulu apwile funge, yamukunjika kuli kapitau wa A-Roma, yoze te avuluka ngwo Juliu. Kukatuka ha tangwa liacho, Juliu te mahasa kusakula kumwesa Paulu lamba hanji kumufunga. Kuchi iye azachishile wata wenyi? Mukwachako, muze te anayi, “Juliu yalweza utu kuli Paulu yamutayiza kuya kuli tusendo twenyi.” Kulutwe, Juliu yalamwina mwono wa Paulu. Kuchi achilingile? Maswalale kazangile kushiha funge eswe waze apwile mu ulungu, alioze Juliu yaakinda kuchilinga. Mumu liaka? Mumu iye ‘kazangile kulamwina Paulu.’ Kota Paulu kamwene chize Yehova apwile ni kuzachisa kapitau yono hanga amukwase ni kumufunga.—Yili. 27:1-3, 42-44.

13. Kuchi Yehova mahasa kuzachisa atu waze ali ni poko ya kuyula?

¹³ Kuchi akutukwasa kuli waze ali ni poko ya kuyula? Nyi yuma yinalite ni upale wenyi, Yehova mahasa kuzachisa spiritu yenyi yisandu hanga atu waze akwete poko ya kuyula alinge yize iye anazange. Yino yinalite ni yize Solomone asonekene ngwenyi: “Mbunge ya mwanangana yapwa mu kwoko lia Yehova ngwe chitwetwe cha meya, kakuyitalikisa kweswako mazanga.” (Yishi. 21:1) Yika maliji wano analumbunuka? Atu mahasa kufula kapila ni kukondolola meya aye kuze ayo anazange. Chizechene nawa, Yehova mahasa kuzachisa spiritu yenyi hanga alumune manyonga ja waze akwete poko ya kuyula, alinge yuma kulita ni upale wenyi. Muze yino yakulingiwa, atu waze ali ni poko ya kuyula kakukwata yiyulo yize yakuyukisa tuvumbi twa Yehova.—Tesa ni Ezera 7:21, 25, 26.

14. Kulita ni Yilinga 12:5, aya waze mutuhasa kulembela?

¹⁴ Yika mutuhasa kulinga? Mutuhasa kulembela “mianangana ni hali akwa kuyula eswe” muze ayo mafupa kukwata yiyulo yize muyikwata ha mwono wetu wa ukristu ni mulimo wa kwambujola. (1 Timo. 2:1, 2; Nehe. 1:11) Ngwe akwa-Kristu ku sekulu yitangu, ni yetu twakulembela chinji mandumbu jetu waze ali mu mazuwo a ususu. (Tanga Yilinga 12:5; Hepre. 13:3) Chikwo nawa, mutuhasa kulembela waze akufunga mandumbu jetu mu mazuwo a ususu. Mutuhasa kuliumba kuli Yehova alumune manyonga ja tufunga jacho, hanga asolwele mandumbu jetu “utu” ngwe chize Juliu alingile kuli Paulu.—Yili. 27:3.

15-16. Kuchi Yehova akwashile Paulu kupalikila muli Aristako ni Luka?

¹⁵ Ukwaso uka Paulu atambwile kuli mandumbu jenyi? Muze te analingi wenyi wa kuya ku  Roma, Paulu katambwile ukwaso wa Yehova kupalikila muli akwa-Kristu-ni-akwo. Tutalenu yimwe yilweza.

¹⁶ Masepa aali a Paulu, Aristako ni Luka kayile hamwe nenyi ndo ku Roma. * Mbimbiliya kuyishi kusolola ngwo, Yesu kalakenyene Aristako ni Luka kuheta kanawa ku Roma. Chipwe chocho, ayo kasele mwono wo mu ponde hanga alinge wenyi ukalu hamwe ni Paulu. Muze te hapwa mukachi ka wenyi, mba ayo yanyingika ngwo te maheta kanawa. Hachino, muze Aristako ni Luka ayile ku Sezarea mu ulungu, Paulu kota kalembele chinji kuli Yehova, ni kumusakwilila ha ukwaso uze amuhele kupalikila muli masepa wano a hamu.—Yi 27:1, 2, 20-25.

17. Kuchi Yehova akwashile Paulu kupalikila muli mandumbu jenyi a mu ufulielo?

¹⁷ Mu wenyi weswe, Paulu katambwile ukwaso unji wa mandumbu jenyi a ku ufulielo. Chakutalilaho, muze ahetele mu mbonge ya Sendone, Juliu yecha Paulu hanga aye “kuli tusendo twenyi, amuzumbule.” Hakupalika cha mashimbu, mu mbonge ya Petuolu, Paulu ni waze apwile no ‘yawana mandumbu, waze aliumbile kuli ayo hanga atwame hamwe no matangwa shimbiali.’ Muze mandumbu wano te anakwase Paulu ni masepa jenyi, kota iye kaakolwezele ha kwatakamisa ni kwalweza yakulitakana nayo yinji. (Tesa ni Yili. 15:2, 3) Hanyima lia utakamiso uno weswe, Paulu ni masepa jenyi yanunga mu wenyi wo.—Yili. 27:3; 28:13, 14.

18. Mumu liaka Paulu asakwilile Zambi ni kuwana utakamiso?

¹⁸ Muze Paulu te anayi ku Roma, kota kewulukile maliji waze anakasonekena chikungulwila chacho ha miaka yitatu kunyima ngwenyi: “Ha miaka yinji ngunevu usona wa kwiza kuli yenu.” (Roma 15:23) Alioze, kakanyingikine ngwenyi te mahilukilako ngwe funge. Paulu kawanyine utakamiso unji muze amwene mandumbu a ku Roma waze ayile ni kumusambilila! ‘Muze Paulu aamwene, yasakwila kuli Zambi, yajikiza mu mbunge.’ (Yili.  28:15) Twamona ngwetu, Paulu kasakwilile Zambi muze amwene mandumbu jenyi waze ayile ni kumupatwiza. Mumu liaka? Mumu Paulu kamwene nawa chize Yehova amukwashile kupalikila muli mandumbu jenyi a mu ufulielo.

19. Kulita ni 1 Petulu 4:10, kuchi Yehova mahasa kutuzachisa hanga akwase waze anafupiwa ukwaso?

¹⁹ Yika mutuhasa kulinga? Shina unanyingika umwe ndumbu mu chikungulwila chenu yoze unapinji ni umwe musongo hanji yuma yikwo? Hanji iye kafwisa mutu yoze azanga chinji. Nyi twevwa ngwetu umwe ndumbu kanafupiwa ukwaso, mutuhasa kulemba kuli Yehova hanga atukwase kwamba hanji kumulingila chimwe chuma chipema. Maliji hanji yitanga yetu, muyihasa kutakamisa ndumbu wacho. (Tanga 1 Petulu 4:10.) * Nyi twakwasa mandumbu wano, ayo mahasa kuputuka kujikijila ha chilakenyo cha Yehova chinambe ngwo: “Chichi kakwecha ukawe.” Nyi twachilinga, ni yetu mutuwahilila chinji!

20. Mumu liaka muhasa kwamba ni shindakenyo ngwe: ‘Yehova iye Chikwashi chami?’

²⁰ Chizechene ngwe Paulu ni masepa jenyi, ni yetu twakupalika mu yipikalo yeka ni yeka ku mwono wetu. Alioze tunanyingika ngwetu, mutuhasa kutakama mumu Yehova kali ni yetu. Iye kakutukwasa kupalikila muli Yesu ni angelo. Chikwo nawa, kulita ni upale wenyi, Yehova mahasa kutukwasa kupalikila muli waze akwete poko ya kuyula. Anji a kuli yetu, hitunamono chize Yehova akuzachisa spiritu yenyi yisandu hanga akolweze tuvumbi twenyi hanga akwase mandumbu jo a ku ufulielo waze anafupiwa ukwaso. Chizechene ngwe Paulu, ni yetu tuli ni yitela yinji yakwamba ni shindakenyo ngwetu: ‘Yehova iye Chikwashi chami; chichi kevwa woma. Atu yika mangulinga?’—Hepre. 13:6.