1-2. Kuchi mutuhasa kukaula chiyulo chili ha Yishima 4:25? Hana chilweza.

ACHINYONGA ha yilweza yino yitatu. Umwe pangi kashinakaji mewuluka yuma yipema yize yalingiwile ku mwono wenyi muze apwile mukweze. Chipwe ngwe haliapwila yuma ku mwono wenyi yinakale, nihindu kananungu ni kulingila Yehova kulita ni uhashi wenyi. (1 Kori. 15:58) Hita tangwa, iye kakunyonga ha chize mwono wenyi, wa asoko ni masepa jenyi muukapwa mu chifuchi chaha chize Zambi analakenya. Pangi mukwo mewuluka ngwenyi, umwe mu chikungulwila kamulemekene ku mbunge, alioze mecha kulihulikila ha yuma yacho. (Kolo. 3:13) Umwe ndumbu mewuluka uhenge uze alingile kunyima, chipwe chocho malihulikila ha yuma yize mahasa kulinga hanga anunge ni kushishika kuli Yehova.—Samu 51:10.

² Yuma yika yinalifwa hakachi ka akwa-Kristu wano atatu? O eswe kakwiwuluka yuma yize yalingiwile ku mwono wo, alioze keshi kulihulikila chinji ha yuma yacho. Chikwo nawa, ayo ‘kakutala’ ku yuma ya kulutwe lia matangwa.—Tanga Yishima 4:25.

3. Mumu liaka chili chilemu ‘kutala’ ku yuma ya kulutwe lia matangwa?

³ Mumu liaka chili chilemu ‘kutala’ ku yuma ya kulutwe lia matangwa? Mumu mutu kechi kuhasa kutondekeza mu jila nyi kanatale kunyima. Chino chinalifu ni mulimo wetu kuli Yehova. Nyi twalihulikila chinji ha yuma yize yalingiwile kunyima, kutuchi kuhasa kununga ni kulingila Yehova ni mbunge yimuwika.—Luka 9:62.

4. Yika mutushimutwina ha mutwe uno?

⁴ Ha mutwe uno, mutushimutwinaho miheto yitatu yize muyihasa kututwala kulihulikila chinji ha yuma yize yalingiwile  kunyima. * (1) Kuzanga hanga mwono wetu upwe ngwe chize wapwile kunyima. (2) Kusweka kakucha ku mbunge, nawa (3) Kulilamikiza. Ha hita chikuma, mutumona chize Mbimbiliya muyihasa kutukwasa kwecha kunyonga ha “yuma yize yili kunyima,” ni chize mutuhasa kulihulikila “ku yuma yize yili kulutwe.”—Fwili. 3:13.

5. Kulita ni Chilumbununyi 7:10, yika kutwatambile kulinga?

⁵ Tanga Chilumbununyi 7:10. Versu yino kuyambile ngwo chili chipi kulihula ngwetu: “Kuchi te matangwa a kunyima apemene?” Kwiwuluka yuma yipema chili chawana cha Yehova. Alioze versu yinambe ngwo: “Kanda uamba ngwe, Kuchi te matangwa a kunyima apemene kuhiana matangwa wano?” Mu maliji akwo, twatamba kwehuka kutesa mwono uze tuli nawo haliapwila ni uze twapwile nawo kunyima, ni kunyonga ngwo haliapwila yuma yapiha chinji. Mbimbiliya jimwe jinalumbununa versu yino ngwo: “Kanda uamba ngwe, ‘Mumu liaka ha miaka ya kunyima yuma yapwile yipema kuhiana musono?’ Chino hi chihula cha mana ko.”

6. Mumu liaka chili chipi kununga ni kunyonga yuma yipema yize yalingiwile kunyima? Hana chilweza.

⁶ Mumu liaka chili chipi kununga ni kunyonga ngwo, mwono wa kunyima wapwile upema? Mumu chino, muchihasa kututwala kwiwuluka wika yuma yipema ni kutuvulamisa yuma yipi yize yalingiwileko. Tutalenu chilweza cha A-Izalele a ku shakulu. Muze akatukile mu Engitu, ha shimbu likehe o yavulama lamba lize apwile ni kumona, yewuluka wika kulia chipema chize apwile nikulia mu Engitu. O yamba ngwo: “Tunewuluka yishi waze twapwile nikulia chawana ku Engitu, ni kasakwa, ni ulenga, ni sawola jeka ni jeka, ni kalumingu.” (Kwa. 11:5) Shina kulia chacho kachilile lume “chawana?” Ka. Yuma yacho A-Izalele kanakayifwetela ndando yinene; mumu ayo te tupinji mu Engitu nawa kapwile ni kumona hunya linji. (Kutuhu. 1:13, 14; 3:6-9) Alioze ayo yavulama lamba liacho, chocho yaputuka  kunyonga ha yuma ya kunyima. Yasakula kulihulikila ha kulia chipema chize apwile nacho mu Engitu, chakuhona kunyonga ha yuma yipema yize Yehova apwile ni kwalingila. Yehova yapihilila ni ndako yacho.—Kwa. 11:10.

7. Yika yakwashile umwe pangi kwehuka muheto wa kulihulikila chinji ha yuma ya kunyima?

⁷ Kuchi mutuhasa kwehuka muheto wa kunyonga chinji yuma ya kunyima? Tutalenu chilweza cha umwe pangi yoze waputukile kukalakala ku Mbetele ya Brooklyn ha mwaka wa 1945. Kulutwe yalimbata ni umwe ndumbu Mbetelita, hachino yanunga chimuwika ni kukalakala ku Mbetele ha miaka yinji. Alioze ha mwaka 1970, mukwo-lunga yayiza chinji. Yamba ngwenyi, muze mukwo-lunga te anambe kufwa yamwaha yiyulo yipema yize te muyimukwasa muze masala tuliwa. Mukwo-lunga yamulweza ngwenyi: “Twawahilila chinji mu ulo wetu. Hi eswe ko ali ni uwahilila wacho.” Alioze yamutoweza nawa ngwenyi: “Yena kuuchi kuhasa kuvulama yuma yipema yize yalingiwa ku mwono wetu, alioze kanda ulihulikila chinji ha yuma yacho. Ha kupalika cha mashimbu yinyengo ye muyitepuluka. Kanda ununga ni kunenganyana mumu lia yuma yize yalingiwa ku mwono we. Wahilila ha chize twalingila Yehova chimuwika ni yiwape yize twazukako. . . . Kwiwuluka yuma yipema chili chawana chize Yehova atuhele.” Chiyulo chino chapwile chipema chinji.

8. Kuchi umwe pangi ayukile ha kukaula chiyulo cha mukwo-lunga?

⁸ Pangi yetu kakawile chiyulo cha mukwo-lunga. Iye kanakalingila Yehova ni ushishiko weswe ndo muze afwile ni miaka 92. Shimbu te kanda achifwa yamba ngwenyi: “Nyi natala kunyima ha miaka 63 yize nalinga mu mulimo wa shimbu lieswe, munguhasa kwamba ngwami nawahilila chinji ku mwono.” Mumu liaka? Yalumbununa ngwenyi: “Mutuhasa kuwahilila ku mwono mumu twakulinga chihanda cha usoko cha mandumbu, chikwo nawa tukwete kutalatala cha kutwama no mu chifuchi chaha.” * Mutuhasa kulilongesa yuma yinji kuli pangi yono yoze walihulikilile ha yilakenyo ya Yehova!

9. Ngwe chize anasolola ha Ulevi 19:18, ha shimbu lika muchihasa kupwa chikalu kukonekena mutu yoze watulemeka ku mbunge?

⁹ Tanga Ulevi 19:18. Ha mashimbu amwe muchihasa kupwa chikalu kukonekena umwe ndumbu mu chikungulwila, umwe sepa hanji usoko wetu yoze watulemeka ku mbunge. Chakutalilaho, umwe pangi yalamikiza mukwo ngwo kamwiya mbongo. Hanyima yanyingika ngwenyi hi iye ko wajiyanga, hachino yaya ni kwita ukonekeno. Alioze pangi yoze alamikijine yevwa uli unji, chocho yanunga ni kunyonga ha yuma yacho. Shina hiunapalika kama mu chuma ngwe chino? Chipwe ngwe kanda tuchipalika kama mu yuma ngwe yino, alioze anji a kuli yetu kota hitunasweke kakucha ku mbunge ni kunyonga ngwetu kutuchi kuhasa kukonekena mutu yoze watulemeka ku mbunge.

10. Yika muyihasa kutukwasa nyi tunatulikila umwe mutu kakucha ku mbunge?

¹⁰ Yika muyihasa kutukwasa nyi tunatulikila umwe mutu kakucha ku mbunge? Tulieswe twatamba kwiwuluka ngwetu, Yehova kakumona yuma yeswe. Iye kakumona yuma yeswe yize twakupalika, chipwe muze akwetu matulemeka ku mbunge. (Hepre. 4:13) Iye kakunenganyana muze twakumona lamba. (Iza. 63:9) Nawa, kanalakenya kuhwisa lamba lieswe twakumona hamwe ni yuma yipi yize akwetu akutulinga.—Uso. 21:3, 4.

11. Kuchi mutuhasa kuyuka nyi twakonekena akwetu?

¹¹ Twatamba nawa kunyingika ngwetu, nyi twakonekena akwetu mutulivwa kanawa. Chino che anyingikine ndumbu yoze alamikijine ngwo keya mbongo. Ha kupalika cha matangwa, iye yakonekena pangi yoze wamusumine wiji. Yamba ngwenyi: Muze twakukonekena akwetu, Yehova neye kakutukonekena. (Mateu 6:14) Iye kanyingikine ngwenyi, yuma yize pangi mukwo amulingile yapwile yipi, alioze yasakula kuvulama yuma yacho. Chino chakwashile pangi yetu kuwahilila ni kuhasa kulihulikila mu mulimo wa Yehova.

12. Yika twalilongesa ha 1 Yoano 3:19, 20?

¹² Tanga 1 Yoano 3:19, 20. Tulieswe ha mashimbu amwe twakulilamikiza. Chakutalilaho, atu amwe kakulilamikiza hamukunda wa yuma yize alingile shimbu te kanda achinyingika umwenemwene. Amwe kakulilamikiza chinji ha yuma yipi yize alingile hanyima lia upapachiso. (Roma 3:23) Twakuzanga kulinga yuma yalita, alioze “yetu eswe twakutalinga mu yuma yinji.” (Tia. 3:2; Roma 7:21-23) Chipwe ngwe kulilamikiza hi chipema ko, alioze ha mashimbu amwe chino muchihasa kupwa chipema. Mumu liaka? Mumu kulilamikiza muchihasa kututwala kululieka tupalia twetu ni kusa tachi hanga tuhone kwahilukila.—Hepre. 12:12, 13.

13. Mumu liaka twatamba kwehuka kulilamikiza chinji?

¹³ Chikwo nawa, ha mashimbu amwe mutuhasa kuhianyisa kulilamikiza, hanji kununga ni kulilamikiza chipwe ngwe hitunalikonyeka, nawa Yehova hanasolola ngwenyi hanatukonekena. Kulilamikiza cha mutapu au muchihasa kutulinga chipi. (Samu 31:10; 38:3, 4) Mumu liaka? Tutalenu chilweza cha umwe pangi yoze te wakulilamikiza, mumu lia shili yize alingile kunyima. Yamba ngwenyi: “Napwile ni kulivwa ngwe te chafupiwile kusa tachi mu mulimo wa Yehova, mumu hanji iye kechi kangulamwina.” Anji a kuli yetu hitunalivu ngwe pangi yono. Kashika, twatamba kukanyama hanga tuhone kulilamikiza chinji. Mumu liaka? Mumu nyi twecha kulingila Yehova shimbu iye machituzanga, Satana mawahilila chinji!—Tesa ni 2 A-Korindu 2:5-7, 11.

14. Kuchi mutu mahasa kupwa ni shindakenyo ngwe, Yehova kanazange kumukonekena?

¹⁴ Nihindu, muhasa kulihula ngwe: ‘Kuchi muhasa kupwa ni shindakenyo ngwe, Yehova  kakukonekena?’ Nyi wakulihula chihula chino, chinasolola ngwo Yehova mahasa kukukonekena. Miaka yimwe kunyima Kaposhi wa Kutalila kambile ngwo: “Mutu mahasa kutalinga ni kulimbuka yisuho yinji ha kuhilukila ndako jimwe jipi jize te akulinga kunyima. . . . Chipwe chocho katambile kuhonga. Kanda anyonga ngwe kalinga shili yize Yehova kechi kuhasa kumukonekena. Yino ye Satana anazange hanga anyonge. Nyi wakwivwa yinyengo ni kulilamikiza mumu lia shili yize walingile, chino chinasolola ngwo kuushi mutu mupi, nawa Yehova mahasa kukukonekena. Kashika nunga ni kulikehesa, lemba kuli Zambi hanga akukonekene, mwite akukwase weche kufunyina yuma yacho, nawa kufupa ukwaso. Kundama kuli iye ngwe chize akulinga kanuke yoze wakuya kuli tato muze ali ni yipikalo. Chipwe ngwe chino muchilingiwa ha yisuho yinji mumu lia ulelu uze ukwete, nihindu Yehova makukwasa ni kukusolwela keke.” *

15-16. Kuchi atu amwe evwile muze anyingikine ngwo Yehova mahasa kwakonekena?

¹⁵ Tuvumbi anji a Yehova kanakawana utakamiso ha kunyingika ngwo, Yehova kaambilile. Chakutalilaho, ha miaka yimwe kunyima, umwe ndumbu kawahilile chinji ha kutanga yakulitakana nayo ha chikuma: “Mbimbiliya Yakwalumuna Mwono wa Atu.” Ha mutwe wacho umwe pangi yamba ngwenyi, mumu lia yize yalingiwile ku mwono wenyi, chapwile chikalu kutayiza ngwenyi Yehova mahasa kumuzanga. Chipwe muze te hikwapalika miaka yinji hanyima lia kumupapachisa, nihindu yanunga ni kupinda ni manyonga jacho. Alioze muze anyongene ha ukuule, yanyingika ngwenyi Yehova kakumuzanga. *

¹⁶ Kuchi chilweza chenyi chakwashile ndumbwetu? Yasoneka ngwenyi: “Ku ukweze, napwile ni kutala chinji yizulie ya sonyi, kashika chapwile chikalu kwecha yuma yacho. Ha mashimbu wano-ene naholokela nawa mu muheto wacho. Hachino yingufupa ukwaso wa makulwana a mu chikungulwila, haliapwila ngunase tachi hanga ngukumbe kapinda wacho. O yangulweza ngwo, Zambi kakunguzanga nawa mahasa kungukonekena. Alioze ha mashimbu amwe nakulivwa ngwe chishi ulemu, hanji ngwami, Yehova kechi kuhasa kunguzanga. Kutanga sango ja pangi yono, changukwashile  chinji. Haliapwila hinanyingika ngwami, kunyonga ngwo Yehova kechi kuhasa kungukonekena, chili ngwe ngunambe ngwami, chitapo cha ukuule cha Mwanenyi kuchishi kuhasa kufuka shili yami. Hachino, yingutulika mutwe wacho hakamwihi hanga nguhase kuutanga ni kuupukuna muze manyonga a kulilamikiza mangwiza ku mbunge.”

17. Kuchi postolo Paulu ehukile muheto wa kulilamikiza chinji?

¹⁷ Yuma ngwe yino, yakutwiwulula postolo Paulu. Shimbu te kanda achinyingika umwenemwene, kalingile shili jinji. Paulu kewulukile yuma yipi yize alingile, alioze kakalihulikile ha yuma yacho. (1 Timo. 1:12-15) Iye te kakumona ukuule ngwo uli chawana chize Zambi amuhele. (Ngala. 2:20) Chino chakwashile Paulu kwehuka muheto wa kulilamikiza, ni kulihulikila mu mulimo wa Yehova.

18. Yika twalilongesa ha mutwe uno?

¹⁸ Yika twalilongesa ha miheto yize twashimutwina ha mutwe uno? (1) Kwiwuluka yuma yipema chili chawana cha Yehova. Alioze chipwe ngwe kwalingiwile yuma yinji yipema ku mwono wetu, nihindu hashi haha yuma muyikapema chinji kuhiana. (2) Akwetu mahasa kutulemeka ku mbunge, alioze nyi twalihulikila mu mulimo wa Yehova mutuhasa kununga ni kutala kulutwe. (3) Kulilamikiza chinji muchihasa kutukinda kulingila Yehova ni uwahililo. Ngwe Paulu, twatamba kupwa ni shindakenyo ngwetu, Yehova kakutukonekena.

19. Kuchi tunanyingika ngwetu, mu chifuchi chaha kutuchi kewuluka yuma yize muyihasa kutuvwisa yinyengo?

¹⁹ Tukwete kutalatala cha mwono wa mutolo. Kashika mu chifuchi chaha kutuchi kewuluka yuma yize muyihasa kutuvwisa yinyengo. Hakutwala ku mashimbu jacho, Mbimbiliya yinambe ngwo: “Yuma yakushi kechi kayiwuluka nawa.” (Iza. 65:17) Tunyongenu ndambu hachino: Amwe a kuli yetu, tunapwila tushinakaji mu mulimo wa Yehova, alioze mu paraisu eswe mutukapwa akweze. (Yombi 33:25) Kashika, tusenu tachi tuhone kulihulikila chinji ha yuma yize yalingiwile kunyima. Alioze, tulihulikilenu ha yuma ya kulutwe lia matangwa ni kusa tachi hanga tukatwame mu chifuchi chaha.