Nasemukine ha mwaka 1983. Ku wanuke wami te ngukwete mujimba upema ngwe wa twanuke-ni-akwetu. Alioze muze nakumbanyishine miaka kumi, yinguputuka kwivwa yikola yinji mu mujimba. Hakupalika cha miaka yaali, tangwa limwe chimene yingulaula, alioze te chisolo kuhasa kulisunga. Nasele tachi jinji ngusunge kama molu, alioze chakahashile mumu molu te keshi nawa ni tachi. Kukatuka tangwa liacho ndo musono, chishi kwenda nawa. Musongo wacho wangukinjile kukola. Kashika, musono nguli mwihi ngwe mwana-kemba.

Muze naputukile kuyiza chakahashile kukatuka ku zuwo ha amwe tukweji, henaho tangwa limwe Yela ja Yehova aali yeza ku zuwo lietu. Kanji-kanji muze twapwile ni kutambula ngeji, yami te nakuswama. Alioze tangwa liacho, yingutayiza kuhanjika ni mapwo waze aali chakuhona kuswama. Muze aputukile kuhanjika hakutwala ku paraisu, yingwiwuluka yimwe nevwile muze te nguchili ni miaka yitano. Ha shimbu liacho, Jethro umwe mishionaliu yoze wapwile ku Suriname, te kakwiza ha chihunda chetu chisuho chimuwika ha kakweji hanga alongese tata Mbimbiliya. Jethro kapwile ni kutusolwela zango, nawa yami te nakumuzanga chinji. Chikwo nawa, te nakuya ni akaka ku kukunguluka cha Yela ja Yehova chize te akulinga ha chihunda chetu. Hachino, Florence umwe wa kuli Yela ja Yehova waze angumenekene, muze anguhulile nyi ngunazange kulilongesa Mbimbiliya yingumukumbulula ngwami, ewa.

Florence yeza ni mukwo-lunga, Justus, ayo yaputuka kungulongesa Mbimbiliya. Muze o amwene ngwo chanyingikine kutanga, chocho yangulongesa kutanga. Hakupalika cha mashimbu, yingunyingika kutanga kanawa. Tangwa limwe, ayo yangulweza ngwo, kaatuma hanga aye ni kukalakalila ku Suriname. Chaluyinda, mu Orealla te kumushi nawa mutu yoze manunga ni kulilongesa ni yami. Chipwe chocho, Yehova kakanguvulamine.

Hakupalika cha mashimbu akehe, Floyd umwe pionelu yaheta mu Orealla, muze te anambujola ku zuwo ni zuwo yitulinyingika nenyi. Muze anguhulile nyi ngunazange kulilongesa Mbimbiliya, ami yinguseha. Iye yanguhula ngwenyi: “Yika unasehe?” Yingumulweza ngwami, hingunalilongesa mukanda: O Que Deus Requer de Nós? chocho yituputuka kulilongesa mukanda Conhecimento Que Conduz à Vida Eterna. * Yingumulumbunwina mumu liaka kuchishi kulilongesa nawa Mbimbiliya. Floyd yanunga ni kulilongesa ni yami mukanda Conhecimento Que Conduz à Vida Eterna, alioze neye yamutuma ni kukalakalila ku chihela cheka. Ha shimbu liacho,  yanguhichika nawa chakuhona longeshi wa Mbimbiliya.

Ha mwaka 2004, Granville ni Joshua pionelu aali alipwila yaatuma mu Orealla. Muze te anambujola ku zuwo ni zuwo no yanguwana. Muze anguhulile nyi munguzanga kulilongesa Mbimbiliya, yinguseha. Yingweeta hanga tulilongese nawa mukanda Conhecimento chize ku uputukilo. Te ngunazange kunyingika nyi no mangulongesa yuma yizeyene angulongesele alongeshi jami akwo. Granville yangulweza hakutwala ku kukunguluka chize te chakulingiwa ha chihunda chetu. Chipwe ngwe te kuchishi kukatuka ku zuwo ha miaka kumi, nihindu yinguzanga kuya ku kukunguluka. Chocho, Granville yeza kumahetu, yangusa ha chitwamo cha yilema ni kungutwala ku Zuwo lia Wanangana.

Hakupalika cha mashimbu, Granville yangukolweza hanga nguputuke kulinga yihanda ku Shikola ya Milimo ya Zambi. Iye yangulweza ngwenyi: “Yena uli chilema, alioze muhasa kuhanjika. Tangwa limwe mukalinga pande ja mbunga. Ami nguli ni shindakenyo yacho.” Maliji jenyi kangutakamishine chinji.

Yinguputuka kwambujola hamuwika ni Granville. Alioze, majila anji a mu chihunda chetu kakwete mena-mena, kashika chapwile chikalu kwendelamo ni chitwamo cha yilema. Hachino, yingwita kuli Granville apwe ni kungusa mu carro de mão ni kungutwala kuze mutwambulwila. Chino chakwashile chinji. Ha kakweji wa Abril wa 2005 yangupapachisa. Ha shimbu likehe, mandumbu yangutongola hanga ngupwe ni kuhana mikanda kuli mandumbu ni kukalakala ku yisaji ya miaso ni yinema mu Zuwo lia Wanangana.

Ha mwaka 2007 tata yafwa ku ponde ya ulungu mu lwiji. Eswe mu usoko twevwile yikola yinji ku mbunge. Alioze Granville yalemba hamwe ni yetu ni kututangila yisoneko ya Mbimbiliya ya utakamiso. Hakupalika cha miaka yaali, yikulingiwa ponde yikwo yize yamakwine chinji mbunge jetu. Granville neye yafwa ku ponde ya ulungu mu lwiji.

Chikungulwila chetu yichisala kuchishi mukulwana wa mu chikungulwila, yimusala wika kavumbi umuwika. Kufwa cha Granville changukolele chinji ku mbunge, mumu iye kapwile sepa liami wa ku mbunge. Iye te kakungukwasa kukundama kuli Yehova ni ku yuma yikwo yize te nakufupiwa ku mwono. Ha kukunguluka chasulileho, hanyima lia kufwa cha Granville, yangwaha chiteli cha kutanga maparagrafu a longeso lia Kaposhi wa Kutalila. Muze natangile maparagrafu aali yinguputuka kulila, chakahashile nawa kutanga, chocho yingukatuka ha palku.

Muze mandumbu a mu chikungulwila cheka ejile mu Orealla ni kukwasa chikungulwila chetu, mba yinguputuka kulivwa kanawa. Chikwo nawa, mutango yiutuma ndumbu Kojo umwe pionelu walipwila mu chihunda chetu. Ha kupalika cha mashimbu akehe, mama ni mwakwetu yaputuka kulilongesa Mbimbiliya nawa yaapapachisa. Ha Março wa 2015, yangutongola ngwe kavumbi. Hakupalika cha mashimbu akehe, yingulinga pande jami jitangu ja mbunga. Ha tangwa liacho yingwiwuluka maliji ja Granville ni masoji mu meso muze angwambile ngwenyi: “Tangwa limwe mukalinga pande ja mbunga. Ami nguli ni shindakenyo yacho.” Hachino yinguseha ni kusakwilila.

Kupalikila mu programa ya JW Broadcasting^®, yingunyingika hakutwala kuli mandumbu akwo waze apwa ngwe yami. Chipwe ngwe kayiza, nihindu kakuhasa kulinga yuma yinji ni kupwa ni uwahililo. Chipwe yami munguhasa kulinga yuma yimwe. Nazangile kulihana chinji mu mulimo wa Yehova, hachino yingupwa pionelu wa shimbu lieswe. Ha kakweji wa Setembro wa 2019 yingutambula umwe lusango mupema chinji. Yangutongola ngwe mukulwana mu chikungulwila chize chapwile ni akwa-kwambujola 40.

Nakusakwilila chinji mandumbu waze angukwashile kulilongesa Mbimbiliya ni kulingila Yehova. Chahiana ulemu, nakusakwilila chinji Yehova yoze kakanguvulamine.